Tɔlɔ Mɔ 24 - WE NU GALE 1995

¹ Balamɛ ĩ na, NWA kɔ̃a we wele nu a tɛ obe Israɛlɛ. Ma kɛ a nɛ 'bɔ mbe nɛ we kpa linggamɛ 'da NWA ɔ nɛ kɛnɔ dati ni gɔ. Nɛ a siki li a si dɛ li gba zɔ́ i.

² A nɛa we ba li a ngɔ, nɛ a zɔ obe Israɛlɛ, wa dungu dɛ fala ɔi 'da wa do nu kpala wa kpo kpo. Nɛ Hi Wi 'da Gale lia kɔ a,

³ nɛ a gba olo nu Gale na: “Wi a mi Balamɛ, be 'da Beɔrɛ, kɛ mi zɔ gulu mɔ zɔa ni. Nɛ zélé lɛnggɛ mi nɛ tɔ̃ nɛ gɛ!

⁴ Gale kɛ a nɛa ngɔ mɛnɔ vɛ̃, a wele we, nɛ mi zele, a be mɔ dɛ li mi, nɛ mi zɔ. Mi sambala a, nɛ a be mɔ hã mi.

⁵ Mi zɔa obe Israɛlɛ, obe zã Yakɔbɔ, nɛ nde tɔa tandenɔ 'da wa ma de wena.

⁶ Ma ɔ nɛ fua lì, tabi 'bete kɛ wa mi nu kolo lì ni. Ma ɔ nɛ odia te kɛ NWA mi ma dɛ nu be fua lì ni.

⁷ “Dunguu, nɛ nwa a yolo sɛ kɔ obe zã Israɛlɛ, nɛ a dungu sɛ ngɔ gba gili Owele. A nɛ sɛ ngɔ nwa 'da Oamalɛkɛ, nɛ to nwa 'da a ma sɛ do ngawi fai.

⁸ Nɛ Gale fua obe Israɛlɛ ngɔ nù Ezipeto dɛ nza do ngawi 'da a vɛ̃. A bi zu wa ɔ nɛ wili yele ni. Wa gbɛ sɛ owi sɛnɛ wa, nɛ wa gbini gbãlã tɛ wa. Obe Israɛlɛ wa da sɛ kpili hã owi sɛnɛ wa, nɛ wa ndɔlɔ sɛ wa dɛlɛ wena.

⁹ Wa ɔ nɛ gbɔgbɔ kɛ a ɔ nù, nɛ nde fo wi tɔ̃ na, a kulu ngɔ bina ni. “Wi kɛ a wélé nu a tɛ obe Israɛlɛ, nɛ Gale a wele sɛ nu a tɛ̃ a. Wi kɛ a fɔ́mbɔ́ obe Israɛlɛ, nɛ Gale a fɔmbɔ sɛ a.”

¹⁰ Balakɛ nɛa we zele ní, nɛ zã a nɔ̃lɔ̃ dɛ tɛ Balamɛ, nɛ a umu kɔ a, nɛ a be li a, nɛ a tɔ̃ hã a na: “Mi tɛa do mɔ dɛ dɛ na, mɔ fɔmbɔ owi sɛnɛ mi. Nɛ nde di ni fala talɛ vɛ̃, mɔ wele nu mɔ tɛ wa wila.

¹¹ Kɔ mɔ lá, mɔ sí dɛ kɔ le 'da mɔ. Mi kpua zi mbulu hã gã kpamɔ hã mɔ, nɛ nde nwa kpia wala nɛ ti mɔ do'do.”

Obe Israɛlɛ wa kpa sɛ dɔ̃lɔ̃ li

¹² Nɛ Balamɛ gese hã Balakɛ na: “Mi tɔ̃a zi hã owi tonɔ mɔ tumba wa hã mi ni na:

¹³ ‘Gɛnɛ kɔ Balakɛ hã sɔ mbili do mɔ mbali kɛ ma dunu kɔ tɔa nwa 'da a ni hã mi, nɛ nde mi wé sɔ we bɛ̃ mbula 'da nwa gɔ. Mi to tati nɛ a olɛnggɛnɔ kɛ nwa wele ma hã mi ni.’

¹⁴ Kɔ di dɔ̃ ni, mi nɛ si dɛ kɔ le 'da mi. Nɛ nde dati si ma, mi nɛ tɔ̃ we mɛ kɛ obe Israɛlɛ wa dɛ sɛ do owinɔ 'da mɔ do 'do ni hã mɔ.”

¹⁵ Nɛ Balamɛ gba olo nu Gale na: “Wi a mi Balamɛ, be 'da Beɔrɛ, kɛ mi zɔ gulu mɔ zɔa ni. Nɛ zélé lɛnggɛ mi nɛ tɔ̃ nɛ gɛ

¹⁶ Gale kɛ a nɛa ngɔ mɛnɔ vɛ̃, a wele we, nɛ mi zele, nɛ mi kpa hã zã kɔ̃ a. A be mɔ dɛ li mi, nɛ mi zɔ. Mi sambala a, nɛ a be mɔ hã mi.

¹⁷ “Mi ka mɔ, nɛ mi zɔ mɛ kɛ ma hɔ sɛ do 'do nza ni. Mi zɔa nwa sanga obe Israɛlɛ, a ɔ nɛ sɔla ni, a ba dɔndɔlɛ 'da a dɛ kɔ̃ a, nɛ a zɛ do gulu zala Omoabɛ, nɛ a ngbolo do zu obe zã Sɛtɛ.

¹⁸ A bi 'bɔ owi sɛnɛ a, Oedɔmɛ, nɛ a ba nùi 'da wa Seirɛ. Obe Israɛlɛ wa 'bana bi owi sɛnɛ wa, nɛ wa nɛ ngɔ wa.

¹⁹ Gã wi yolo kɔ obe zã Israɛlɛ, nɛ a nɛ ngɔ owi sɛnɛ a. A kumu tala winɔ kɔ lenɔ 'da wa vɛ̃.”

Owi sɛnɛ Israɛlɛ wa kumu sɛ

²⁰ 'Do nɛ, nɛ Balamɛ ka mɔ, nɛ a zɔ Oamalɛkɛ, nɛ a tɔ̃ na: “Nɛ, Oamalɛkɛ, nɛ nganda wena, nɛ nde do 'do nza, nɛ nɛ kumu sɛ vɛ̃.”

²¹ 'Do Oamalɛkɛ, nɛ a zɔ Okeni, nɛ a tɔ̃ na: “Nɛ, Okeni, fala ɔi 'da nɛ do ngɔ ta, nɛ ma do ngɔ ɔ nɛ tɔa nɔɛ ni.

²² Nɛ nde do 'do nza, Osiri wa kala sɛ nɛ si do nɛ, nɛ wa kumu sɛ nɛ vɛ̃.”

²³ Nɛ Balamɛ tɔ̃ 'bɔ wenɔ gɛ na: “Mɛ sɛ a kɔ̃ tũ 'bako, wele kpo kpásá sɛ ti kɔ̃ NWA gɔ.

²⁴ Owi bolo wa yolo sɛ tɛ Siprɛ, nɛ wa hɔ do masua 'da wa, nɛ wa bi sɛ Oasiri do obe zã Ebɛrɛ. Nɛ nde wa tɛ mɛ 'bɔ ngboo ni, wa kumu sɛ vɛ̃.”

²⁵ 'Do owenɔ ni, nɛ Balamɛ lia wala we si dɛ kɔ le 'da a. Nɛ Balakɛ si tɛ mɛ 'bɔ kɛ 'da a.