Tɔlɔ Mɔ 23 - WE NU GALE 1995

¹ Nɛ Balamɛ aka Balakɛ na, a dɛ gbagala sambo, nɛ a hã 'bɔ wili ngɔmbɔ sambo do wili bata sambo hã ɛ.

² Balakɛ dɛa olo nu Balamɛ. Nɛ wa bɔa nɛ, wa dɔa wili ngɔmbɛ kpo do wili bata kpo ngɔ gbagala kpo kpo.

³ Nɛ Balamɛ to hã Balakɛ na: “Mɔ 'báná dɛ kɛ zã dɔnggamɛnɔ gɛ, kɔ mi nɛ la dɛ gele fala. Mbe gɔ, nɛ NWA a be sɛ tɛ̀ a hã mi, nɛ mi tɔ̃ sɛ we a tɔ̃a hã mi ni hã mɔ.” Nɛ Balamɛ la, nɛ a kũ dɛ zu kala i.

⁴ Nɛ a kpa Gale, nɛ a tɔ̃ hã Gale na: “Mi zĩ gbagala sambo, nɛ mi dɔ wili ngɔmbɔ kpo do wili bata kpo ngɔ gbagala kpo kpo hã mɔ.”

⁵ Nɛ NWA Gale tɔ́a we ma wia na Balamɛ wele ni, nɛ a ba nu a hã Balamɛ na, a kpolo tɛ̃ a dɛ 'da Balakɛ i.

⁶ Balamɛ kpula tɛ̃ a, nɛ a kpa Balakɛ, nɛ nde a tɛ yolo fai dɛ kɛ zã dɔnggamɛnɔ ni, fala nɛ kpo do okumu Moabɛ.

⁷ Nɛ Balamɛ gba olo nu Gale na: “Balakɛ, nwa ngɔ nù Moabɛ sa mɔ hã mi tɛ ngɔ kala Siri, si gbãlã ngɔ. A tɔ́a hã mi na, mi nɛ, kɔ mi fɔmbɔ obe Israɛlɛ, obe zã Yakɔbɔ, hã ngamɔ ma tɛ dɛ ngɔ wa.

⁸ Kɔ mi nɛ dɛ fala fɔmbɔ winɔ kɛ NWA fɔmbɔ wa gɔɛ ni nɛ nde? Mi nɛ dɛ fala tɔ̃ to ngamɔ hã winɔ kɛ NWA hã̀ ngamɔ hã wa gɔ ni nɛ nde?

⁹ Mi tɛ yolo do zu kala, nɛ mi zɔ wa. Mi tɛ yolo ngɔ ngala ta, nɛ mi ka mɔ tɛ wa! Mɛ a nu kpala kɛ wa ɔ do tɛ̃ ɛ, nɛ dɛa mɔ tɛ wa la ngbɛ ɛ do kɛ 'da gele winɔ wena.

¹⁰ Wi wia we tɔlɔ gba gili obe Israɛlɛ, wi a wio nde? Wi wia we ĩ ti ngɔ gili obe zã Yakɔbɔ, wi a wio nde? E kɔ Sɔkpɔ dungi 'da mi ma ɔ nɛ kɛ 'da winɔ 'da NWA ni. E kɔ mi fe dia fio, ɔ nɛ kɛ wa, owi bɔlɔ zunɔ wa fe ni.”

¹¹ Balakɛ nɛa we zele ni, nɛ a tɔ̃ hã Balamɛ na: “Kɛ mɔ dɛa do mi ni a ge nde? Mi sa mɔ hã mɔ na, mɔ fɔmbɔ owi sɛnɛ mi, nɛ mɔ wele nu mɔ tɛ wa kpaa nde!”

¹² Nɛ Balamɛ gese na: “Mi tɔ̃ tati a we kɛ NWA wila hã mi ni.”

Balamɛ wila nu a tɛ obe Israɛlɛ fala bɔa

¹³ Nɛ Balakɛ tɔ̃ hã Balamɛ na: “Mɔ tɛ́, kɔ lɛ la do mɔ dɛ gele fala, hã mɔ zɔ owinɔ ni vɛ̃, we kɛ mɔ zɔ́ wa vɛ̃ gɔ. Kɔ lɛ hɔ i mɔ, nɛ mɔ fɔmbɔ sɛ wa hã mi.”

¹⁴ Nɛ a nɛa do a dɛ zu kala Pisga, tɛ fala wa zɔ do mɔ ngɔ le ni. Nɛ a dɛ gbagala sambo, nɛ a dɔ wili ngɔmbɔ kpo do wili bata kpo ngɔ gbagala kpo kpo.

¹⁵ Nɛ Balamɛ tɔ̃ hã Balakɛ na: “Mɔ 'báná dɛ kɛ zã dɔnggamɛnɔ gɛ, kɔ mi nɛ we kpa NWA fala i mɔ ni.”

¹⁶ Nɛ Balamɛ nɛa, nɛ a kpa NWA, nɛ NWA tɔ̃ we ma wia na a wele ni hã a. Nɛ a ba nu a hã Balamɛ na, a kpolo tɛ̃ a dɛ 'da Balakɛ i.

¹⁷ Balamɛ kpolo tɛ̃ e, nɛ a kpa Balakɛ, nɛ nde a 'bana yolo tɛ mɛ fai dɛ kɛ zã dɔnggamɛnɔ ni, fala nɛ kpo do okumu Moabɛ. Nɛ Balakɛ aka a na: “NWA tɔ̃a na ge nde?”

¹⁸ Nɛ Balamɛ gba olo nu Gale na: “Balakɛ, be 'da Sipɔrɛ, mɔ gɛ́ zala mɔ! Mɔ zélé mi do dia nɛ ngboo!

¹⁹ Gale a a wele ɔ nɛ lɛ gɛ gɔ. A 'bílí bɛlɛ gɔ. A wè 'bɔ tɛ kpolo nu a gɔ, a kpo mbulu, nɛ a dɛ ma, a tɔ̃ we, nɛ ma dɛ tɛ̃ ɛ.

²⁰ NWA tɔ̃a hã mi na, mi wele nu mi tɛ owinɔ gɛ. A wila nu a tɛ wa ia, mi wè tɛ kpolo mɔ kpo gɔ.

²¹ Mi zɔ̃ 'dã mɔ mɔ́ obe zã Yakɔbɔ kpo gɔ. Fo ngamɔ ngɔ nù Israɛlɛ bina, we kɛ NWA do wa boe.

²² A fua wa ngɔ nù Ezipeto dɛ nza do ngawi 'da a vɛ̃. A bi zu wa ɔ nɛ wili yele ni.

²³ Obe Israɛlɛ wa dɛ́ sɔ na, wa ĩ ti mɛ Gale kɔa ni gɔ, we kɛ Gale be mɛnɔ vɛ̃ a kɔa ni hã wa bia.

²⁴ Obe Israɛlɛ wa ɔ nɛ gbɔgbɔ, kɛ a ba sa'de, nɛ a nyɔngɔ a vɛ̃, nɛ nde tɔkɔ, tabi mulu kpo té nù nu a gɔ, sɛ nɛ a ĩ ti ɔ nù de ni.”

²⁵ Balakɛ nɛa we zele ni, nɛ a tɔ̃ hã Balamɛ na: “Fala kɛ mɔ bɛ̃ we fɔmbɔ wa, ní a dia nɛ wá na, mɔ tɛ wèlè nu mɔ tɛ wa gɔ!”

²⁶ Nɛ Balamɛ gese hã a na: “Mi mbese sɔ mɔ ia na, mi nɛ dɛ vɛ̃ a mbula 'da NWA.”

Balamɛ wila nu a tɛ obe Israɛlɛ fala talɛ

²⁷ Nɛ Balakɛ tɔ̃ hã Balamɛ na: “Mɔ tɛ́, kɔ lɛ la do mɔ dɛ gele fala. Lɛ hɔ i mɔ, nɛ mbe gɔ, nɛ Gale a kɔ sɛ na, mɔ fɔmbɔ owinɔ ni hã mi.”

²⁸ A la do Balamɛ dɛ zu kala Peɔrɛ, tɛ fala kɛ ma ka mɔ dɛ li gba zɔ́ i ni.

²⁹ Nɛ Balamɛ tɔ̃ hã a na, a dɛ gbagala dɛ fala ni, nɛ a hã 'bɔ wili ngɔmbɔ sambo do wili bata sambo hã ɛ.

³⁰ Balakɛ dɛa olo nu a, nɛ a dɔ wili ngɔmbɔ kpo do wili bata kpo ngɔ gbagala kpo kpo.