Tɔlɔ Mɔ 22 - WE NU GALE 1995

OBE ISRAƐLƐ TƐ NGƆ MBƐ NÙ MOABƐ Nwa ngɔ nù Moabɛ tumba to hã Balamɛ

^1-4 Obe Israɛlɛ wa kulu ngɔ, nɛ wa la dɛ ngɔ mbɛ nù Moabɛ, kɛ ma tɛ nu lì Yɔrdanɛ si gbãlã ngɔ, nɛ ma ka mɔ dɛ li ngba ɛ do le Yeriko ni. Li nwa ngɔ nù Moabɛ ni a Balakɛ, be 'da Sipɔrɛ. 'Da fala nwa Balakɛ zila we mɛ obe Israɛlɛ wa dɛa do Oamori ni, nɛ a, do owinɔ 'da a vɛ̃, wa ma ngɔ tana kili we zɔ gili obe Israɛlɛ kɛ wa tɛ ni. Ma kɛ Omoabɛ wa tɔ́a hã okumu Madianɛ na: “Nɛ zɔ́ ogili winɔ gɛ, wa 'danga sɛ nùi 'da lɛ vɛ̃ iko! Wa ɔ nɛ gba gili ongɔmbɔnɔ kɛ wa nyɔngɔ wɔkɔsɔnɔ, nɛ ma e vɛ̃ ni.”

⁵ NWA Balakɛ nɛa we zele ni, nɛ a tombo Owele hã Balamɛ, wi zɔ gulu mɔ. Balamɛ a be 'da Beɔrɛ, nɛ a ɔ Pɛtɔrɛ, dɔ̃ɔ do nu lì Efratɛ. Pɛtɔrɛ ma tɛ ngɔ nùi 'da Oamavi. Balakɛ tumba wi tonɔ hã Balamɛ na: “Mɔ ĩ́ na, ogba gili wele wa yula Ezipeto, nɛ wa kpa falanɔ vɛ̃. Wa 'dafa fala ɔi 'da wa dɔ̃ɔ do le 'da mi,

⁶ nɛ ngɔ gili wa nɛa ngɔ lɛ do'do. Kɔ mɔ kɔ, nɛ mɔ tɛ, kɔ mɔ fɔmbɔ wa hã mi. Mbe gɔ, nɛ lɛ we sɛ we bi wa, nɛ lɛ nɛ ngɔ wa, nɛ lɛ ndaka wa ngɔ nùi gɛ do'do. Mba gɔ, mi ĩ na, wila nùi do fɔmbanɔ ma hɔ kɔ nu mɔ ni, nɛ ma dɛ tɛ̃ ɛ.”

⁷ Ma kɛ okumu Madianɛ do Moabɛ, kɛ Balakɛ tumba wa ni, wa nɛa 'da Balamɛ i do omɔ we futa do a. Wa hɔa i mɔ, nɛ wa tɔ̃ toe 'da Balakɛ hã a.

⁸ Balamɛ zila toe do'do, nɛ a tɔ̃ hã wa na: “Nɛ ɔ nù dɛ dɛ, kɔ tũi gɛ, nɛ mi aka sɛ nwa we gisa nu toe 'da nɛ. Nɛ bindɛ, nɛ mi tɔ̃ sɛ ma hã nɛ.” Ma kɛ okumu Moabɛ wa ɔa dɛ 'da Balamɛ ni.

⁹ Nɛ Gale tɛa, nɛ a aka Balamɛ na: “Owinɔ wa ɔa 'da mɔ gɛ a wio nde?”

¹⁰ Nɛ Balamɛ gese hã a na: “Balakɛ, nwa ngɔ nù Moabɛ a tumba wa, nɛ wa tɔ́a hã mi na,

¹¹ Owele wa yula ngɔ nù Ezipeto, nɛ wa kpa do falanɔ vɛ̃. Kɔ a kɔa na, mi fɔmbɔ wa hã ɛ, takɔ ɛ bi wa, nɛ ɛ nɛ ngɔ wa, nɛ ɛ ndaka wa ngɔ nùi 'da ɛ do'do.”

¹² Nɛ Gale tɔ̃ hã Balamɛ na: “Mɔ nɛ́ sɛ do wa gɔ, nɛ mɔ fɔmbɔ sɛ 'bɔ owinɔ ni gɔ, we kɛ mi wila nu mi tɛ wa wila.”

¹³ Fala nɛa we sa ma, nɛ Balamɛ nɛa, nɛ a tɔ̃ hã okumunɔ kɛ Balakɛ tumba wa ni na: “Nɛ kpóló tɛ nɛ dɛ ngɔ nùi 'da nɛ. NWA bɛ̃a na, mi tɛ nɛ̀ do nɛ gɔ.”

¹⁴ Ma kɛ okumunɔ wa kpula tɛ wa dɛ 'da Balakɛ i, nɛ wa tɔ̃ hã a na, Balamɛ bɛ̃a we tɛ do lo do'do.

¹⁵ Nɛ Balakɛ tumba 'bɔ mbé gba gili okumunɔ kɛ wa do dĩ nɛa ngɔ wanɔ dati ni.

¹⁶ Nɛ wa nɛ, nɛ wa hɔ 'da Balamɛ i, nɛ wa tɔ̃ toe 'da Balakɛ hã a na: “Mi, Balakɛ, be 'da Sipɔrɛ, mi aka mɔ na, mɔ kɔ̃, nɛ mɔ tɛ bɛ̃̀ we tɛ 'da mi nga gɔ.

¹⁷ Mi hã sɛ gã kpamɔ hã mɔ, nɛ mi dɛ sɛ 'bɔ mɛ kɛ mɔ kɔ̃a ni. Mɔ kɔ̃, nɛ mɔ tɛ, kɔ mɔ fɔmbɔ owinɔ gɛ hã mi.”

¹⁸ Nɛ Balamɛ gese hã owi tonɔ 'da Balakɛ na: “Gɛnɛ kɔ Balakɛ hã sɔ mbili do mɔ mbali kɛ ma dunu kɔ tɔa nwa 'da a ni hã mi, nɛ nde mi wé sɔ we bɛ̃ mbula 'da NWA Gale 'da mi gɔ.

¹⁹ Nɛ nde nɛ ɔ nù dɛ dɛ, ɔ nɛ ongba nɛ zi dati ni. Kɔ tũi gɛ, nɛ mi ĩ sɛ ti we NWA kɔ̃a we tɔ̃ hã mi ni.”

²⁰ Do tũi ni, nɛ Gale tɛa 'da Balamɛ, nɛ a tɔ̃ hã a na: “Fala kɛ owinɔ gɛ wa tɛa we aka mɔ na, mɔ la do lo nde, nɛ mɔ la do wa. Nɛ nde mɔ dɛ sɛ tati a we mi nɛ tɔ̃ hã mɔ ni.”

^21-22 Ma hɔa titole, nɛ Balamɛ kũ ngɔ naa punda 'da a, nɛ a la do okumu Moabɛ. Nɛ owi tonɔ 'da a bɔa wa kã a. Zã NWA Gale nɔ̃lɔ̃ we kɛ Balamɛ la ni. Nɛ anzɛ 'da a yolo dɛ li wala we kele ti Balamɛ do punda 'da a.

Balamɛ do punda 'da a

²³ 'Da fala punda zɔa anzɛ tɛ yolo do du kɔya kɔ̃ a ni, nɛ a la li wala, nɛ a le kɔ fɔ. Nɛ Balamɛ zɛ a we fo a dɛ li wala.

²⁴ Nɛ anzɛ 'da nwa nɛa, nɛ a yolo dɛ tɛ fala li wala mɔɛ nɛ ni. Fala ni, mɛ a li ngbala fɔ vinɔ bɔa kɛ wa zĩ ngbo dɛ tɛ nɛ.

²⁵ Nɛ punda zɔ anzɛ 'da NWA, nɛ a ngbɛlɛ si tɛ ngboe ni, nɛ a hɔnɔ nyanga Balamɛ do ma. Nɛ Balamɛ zɛ 'bɔ punda.

²⁶ Nɛ anzɛ 'da NWA gba wa, nɛ a nɛ, nɛ a yolo tɛ fala kɛ fo mbé fala we gbili do ma bina ni.

²⁷ Nɛ punda zɔ anzɛ, nɛ a gu nù gburr dɛ ti Balamɛ ni. Nɛ zã Balamɛ nɔ̃lã, nɛ a zɛ a do te.

²⁸ Nɛ NWA dɛa na, nu punda hũi, kɔ a wele we. Nɛ punda tɔ̃ hã Balamɛ na: “Mɛ ngboo mi dɛa do mɔ, kɔ mɔ zɛa mi di ni fala talɛ ni a ge nde?”

²⁹ Nɛ Balamɛ gese hã a na: “We kɛ mɔ mɔmɔ mi. Ɔ do kɛ du kɔya ɔ sɔ kɔ̃ mi gɛ, nɛ nde mi gbɛa sɔ mɔ ia.”

³⁰ Nɛ punda tɔ̃ hã Balamɛ na: “Mi a punda kɛ mɔ kũ ngɔ mi fai ni gɔ nde? Fala kpo mi dɛa mbe mɔ do mɔ ɔ nɛ nde?” Nɛ Balamɛ gese na: “Gɔ!”

³¹ Do 'da fala ni, nɛ NWA hũi li Balamɛ, nɛ a zɔ anzɛ, nɛ nde a yula dɛ gbogbo wala, nɛ a do du kɔya kɔ̃ a. Nɛ Balamɛ te do ti, nɛ a gu li a nù.

³² Nɛ anzɛ aka a na: “Gulu kɛ mɔ zɛa punda 'da mɔ fala talɛ vɛ̃ ni we ge nde? Mi tɛa we kele wala ti mɔ, we kɛ gɛnɛ mɔ nɛ gɛ, mɔ 'danga nyanga mɔ iko.

³³ Punda zɔa mi, nɛ a ɛlɛ tɛ̃ a ti mi fala talɛ. A dɛ̃ sɔ na mɛ ni gɔ, nɛ mi gbɛ sɔ mɔ, nɛ mi la sɔ a do tunu li a.”

³⁴ Nɛ Balamɛ tɔ̃ hã anzɛ na: “Mi dɛ̀ de gɔ. Mi ĩ̀ sɔ na, mɔ yula dɛ li wala dati mi ni gɔ. Nɛ nde fala kɛ gɛnɛ mi nɛ gɛ ma wè li mɔ gɔ, nɛ mi kpolo sɛ tɛ mi iko.”

³⁵ Nɛ anzɛ gese hã a na: “Ɔ̃ ɔ̃. Mɔ ka owinɔ gɛ. Nɛ nde mɔ tɔ̃ sɛ tati a olɛnggɛnɔ mi nɛ tɔ̃ hã mɔ ni.” Nɛ Balamɛ la do owi tonɔ 'da Balakɛ.

Balamɛ kpa ngba a do Balakɛ

³⁶ Balakɛ nɛa we zele na, Balamɛ tɛ tɛ nɛ ni, nɛ a gɔnɔ dati a gbaa dɛ kɔ le Arɛ, le 'da Omoabɛ. Le ni, ma do nu lì Arnoni, dɔ̃ɔ do li ngbala nù Moabɛ.

³⁷ Balakɛ nɛa we kpa Balamɛ, nɛ a aka a na: “Gulu kɛ mɔ bɛ̃a zi we tɛ do owi tonɔ mi tumba wa hã mɔ dati ni we ge nde? Mɔ lengge zi na, mi wé sɛ we hã gã kpamɔ hã mɔ gɔ nde?”

³⁸ Nɛ Balamɛ gese hã a na: “Mi kɛ! Nɛ nde mi nɛ tɔ̃ hã mɔ na ge nde? Mi nɛ tɔ̃ tati a owenɔ kɛ Gale a e sɛ ma dɛ nu mi ni iko.”

³⁹ Balamɛ kulu ngɔ do Balakɛ, nɛ wa la dɛ Kiriatɛ-Husɔtɛ.

⁴⁰ Wa hɔa i mɔ, nɛ Balakɛ gbɛ ongɔmbɛ do obata, nɛ a hã mbe mulu nɛ hã Balamɛ do okumunɔ wa kã a ni.

Balamɛ wila nu a tɛ obe Israɛlɛ

⁴¹ Fala nɛa we sa ma, nɛ Balamɛ do Balakɛ wa kũ dɛ Bamɔtɛ-Bala, tɛ fala wa wia we zɔ do mbe obe Israɛlɛ ni.