Tɔlɔ Mɔ 21 - WE NU GALE 1995

Obe Israɛlɛ wa bi Okanana, nɛ wa nɛ ngɔ wa

¹ Mbe nwa Kanana kpo, kɛ a a nwa ngɔ nù Aradɛ do si ba gɔtɔ, a zila na, obe Israɛlɛ wa tɛ tɛ do wala Atarimɛ, nɛ a nɛa, nɛ a bi wa, nɛ a kala ombe kɔ wa si do wa.

² Ma kɛ obe Israɛlɛ wa kpua mbulu hã NWA na: “Fala kɛ mɔ dɛ na, lɛ bi owinɔ gɛ kɔ lɛ nɛ ngɔ wa, nɛ lɛ kumu sɛ wa, nɛ lɛ 'danga sɛ olenɔ 'da wa vɛ̃.”

³ NWA zila mbuli 'da obe Israɛlɛ, nɛ a kɔa gɛnɛ nɛ, nɛ a ia Okanana dɛ kɔ wa. Obe Israɛlɛ wa gbɛa wa, nɛ wa 'danga olenɔ 'da wa vɛ̃, nɛ wa ia li fala ni na Horma, gulu nɛ na: “Ogbɛsɛ tɔa.”

Oda gɔ̃

⁴ Obe Israɛlɛ wa kulu ngɔ tɛ ngɔ kala Hɔrɛ, nɛ wa sa'ba do 'do le Edɔmɛ, nɛ wa ba li wala gba lì Sala Tɔ̃, we kɛ wa kɔ̃̀ we le ngɔ nù Edɔmɛ gɔ. Nɛ nde wa 'bana dɛ li wala gɛ iko, nɛ sila wa ma ngɔ zɛlɛ nɛ,

⁵ nɛ wa ma ngɔ tɔ̃ 'dã we hã Gale do Mɔizɛ na: “Gulu kɛ nɛ fua lɛ ngɔ nù Ezipeto, nɛ nɛ tɛ do lɛ dɛ li gba zɔ̃ɛ gɛ, kɛ ma do nyɔngɔmɔ, tabi lì nɔ nɔa bina ni we ge nde? Nyɔngɔmɔ 'bakoe, lɛ nyɔngɔ do mana gɛ, ma ngba lɛ do'do.”

⁶ Ma kɛ NWA nɛa we zele ni, nɛ a tombo odã gɔ́ hã wa. Nɛ gɔ̃nɔ ni wa gɔmɔ gba gili obe Israɛlɛ, nɛ wa fe.

⁷ Nɛ tala owinɔ wa yu dɛ 'da Mɔizɛ i, nɛ wa tɔ̃ hã a na: “Lɛ tɔ̃a 'dã we hã mɔ do NWA, lɛ dɛa 'dã mɔ. Kɔ mɔ kɔ̃, nɛ mɔ ala nu mɔ hã NWA na, a ndaka odã gɔ̃nɔ gɛ do'do.” Ma kɛ Mɔizɛ sambala NWA we owinɔ,

⁸ nɛ NWA gese hã a na: “Mɔ ba tũ mɔ bolo, nɛ mɔ dolo ma do gɔ̃, nɛ mɔ e ma zu te. Kɔ 'da fala kɛ gɔ̃ gɔmɔ wele, hã a soko gɔ̃ tũ mɔ bole ni, nɛ a kpasa sɛ.”

⁹ Mɔizɛ dula gɔ̃ tũ mɔ bole ni, nɛ a e ma zu te. Kɔ fala kɛ gɔ̃ gɔmɔ zi wele, hã a ka mɔ tɛ gɔ̃ tũ mɔ bole ni, nɛ a kpasa.

Yolo ngɔ kala Hɔrɛ we hɔ kɔ gbangɔlɔ̃ 'da Omoabɛ

¹⁰ Obe Israɛlɛ wa kulu ngɔ, nɛ wa la, nɛ wa 'dafa fala ɔi 'da wa tɛ Obɔtɛ.

¹¹ 'Do nɛ, nɛ wa kulu ngɔ di ni, nɛ wa ɔ tɛ Ye-Abarimɛ, tɛ li gba zɔ̃ kɛ mɔ yolo ngɔ nù Moabɛ, nɛ nde ma do si 'biti gba wese ni.

¹² 'Do Ye-Abarimɛ, nɛ wa ɔa tɛ kɔ gbangɔlɔ̃ Zerɛdɛ.

¹³ Nɛ wa yolo Zerɛdɛ, nɛ wa la, nɛ wa ɔ tɛ li gba zɔ̃ kɛ ma kulu lì Arnoni. Zu lì Arnoni ma do 'da Oamori. (Lì Arnoni zi a sanga nùi 'da Omoabɛ do Oamori.)

¹⁴ Gulu nɛ a wa kɔma kɔ 'Buku bolonɔ 'da NWA na: “… le Vahɛbɛ tɛ Sufa do Ogbangɔlɔ̃,

¹⁵ nɛ lì Arnoni do ogbakɔ̃ nɛ, ma yula kɔ le Arɛ, nɛ ma mba ngbɛ ɛ, nɛ ma fo do li ngbala nù Moabɛ.”

¹⁶ Wa yula di ni, nɛ wa la dɛ tɛ nu kɔ̃ lì, tɛ fala nwa tɔ̃a zi hã Mɔizɛ na: “Mɔ ngɛmɛ li winɔ, nɛ mi hã sɛ lì hã wa” ni.

¹⁷ Do 'da fala ni, nɛ obe Israɛlɛ, wa ga zuma na: “Aa mɔ kɔ̃ lì gɛ, mɔ go'do do lì, nɛ lɛ ga sɛ zuma, nɛ lɛ zɛ kɔ̃ lɛ hã mɔ.

¹⁸ Wi zã zi kɔ̃ lì a owi dĩ do onwa ngɔ lenɔ. Wa zã zi ma do dɔndɔlɔ nwa 'da wa.” Wa yula li gba zɔ̃ɛ ni, nɛ wa la dɛ Matana.

¹⁹ Nɛ wa yolo di ni, nɛ wa la dɛ Nahaliɛlɛ. 'Do nɛ, nɛ wa Ia dɛ Bamɔtɛ.

²⁰ Nɛ wa yolo wá Bamɔtɛ, nɛ wa la dɛ kɔ gbangɔlɔ̃ 'da Omoabɛ, tɛ nyanga kala Pisga, kɛ ma ka mɔ si li gba zɔ̃.

Obe Israɛlɛ wa bi do onwa Sihoni do Ɔgɛ

²¹ Obe Israɛlɛ wa tumba owi to na, wa nɛ, kɔ wa tɔ̃ hã Sihoni, nwa 'da Oamori na:

²² “Mɔ kɔ̃, nɛ mɔ hã wala hã lɛ, kɔ lɛ la do ngɔ nùi 'da mɔ. Lɛ la sɛ do li gba wala iko, lɛ lé sɛ kɔ ofɔnɔ 'da nɛ gɔ. Lɛ nɔ́ sɛ 'bɔ lì kɔ kɔ̃nɔ 'da nɛ gɔ. Lɛ ɛ́lɛ́ sɛ wala gɔ gbaa na, lɛ hɔ nza ngɔ nùi 'da mɔ do'do sɛ nɛ de.”

²³ Nɛ Sihoni kɔ̃̀ we hã wala hã wa gɔ. A ngbula li osodanɔ 'da a vɛ̃, nɛ a hɔ nza, nɛ a kpa ngba a do obe Israɛlɛ tɛ Yahasi, tɛ li gba zɔ̃ i, nɛ a bi wa.

²⁴ Obe Israɛlɛ wa bi do wa, nɛ wa nɛ ngɔ wa, nɛ wa ba nùi 'da wa vɛ̃, yolo tɛ lì Arnoni si gbãlã ngɔ, we hɔ Yabɔkɛ, gbaa we hɔ li ngbala nùi 'da Oamori, kɛ gba ngbo zĩ ma takpa ni.

²⁵ Wa kala olenɔ 'da Oamori vɛ̃, mba do Hɛsɛboni do obe lenɔ kɛ zã nɛ ni. Nɛ wa ɔ dɛ di ni.

²⁶ Hɛsɛboni zi a gã le 'da Sihoni, nwa 'da Oamori. Sihoni bi zi do kuti nwa ngɔ nù Moabɛ, nɛ a ba zi nùi 'da a vɛ̃ gbaa we hɔ nu lì Arnoni.

²⁷ Ma kɛ owi kɔmɔ zuma wa kɔma na: “Nɛ tɛ́ dɛ kɔ le Hɛsɛboni, nɛ nɛ 'dáfá 'bɔ le 'da Sihoni dɛ olo nɛ.

²⁸ Osodanɔ 'da Sihoni wa hɔ nza kɔ le Hɛsɛboni, nɛ wa pɛsɛ ɔ nɛ kɛ we yɛ'bɛ ni, nɛ wa 'danga le Arɛ ngɔ nù Moabɛ, nɛ wa kumu Onwanɔ ngɔ kalanɔ kɛ zã Arnoni.

²⁹ Aa nɛ, owi Moabɛ, 'bako do nɛ! Aa nɛ, owi dɔnggɔ gale bɛlɛ Kɛmɔsi, nɛ yɔa ia! Gale 'da nɛ dɛa na, owi wili wa hɔ wi yu bolo, nɛ owukonɔ wa te dɛ kɔ nwa ngɔ nù Amori.

³⁰ Nɛ nde di dɔ́ ni, lɛ kumu Oamori, yolo Hɛsɛboni we hɔ Diboni, nɛ lɛ 'danga lenɔ vɛ̃, yolo Nofa we hɔ Medɛba.”

³¹ Ma kɛ obe Israɛlɛ wa dungu tɛ ngɔ nùi 'da Oamori.

³² Nɛ Mɔizɛ tumba owi miã na, wa nɛ́, kɔ wa yɛnggɛ kɔ le Yazɛrɛ. 'Do nɛ, nɛ obe Israɛlɛ wa nɛa, nɛ wa bi le ni do obe lenɔ kɛ zã nɛ ni, nɛ wa ba ma. Nɛ wa ndaka Oamori di ni do'do.

³³ 'Do nɛ, nɛ obe Israɛlɛ wa la fala ba do wala ni, nɛ wa ba wala Basanɛ. Nɛ Ɔgɛ, nwa ngɔ nù Basanɛ do osodanɔ 'da a vɛ̃, wa kulu ngɔ we bi obe Israɛlɛ tɛ Edrei.

³⁴ Nɛ NWA tɔ̃ hã Mɔizɛ na: “Mɔ tɛ dɛ kili a gɔ. Mi dɛ sɛ na, mɔ nɛ ngɔ a do osodanɔ 'da a vɛ̃, nɛ mɔ ba nùi 'da a. Mɔ dɛ sɛ do a ɔ nɛ kɛ mɔ dɛa do Sihoni, nwa 'da Oamori, kɛ a dungu nwa tɛ Hɛsɛboni ni.”

³⁵ Ma kɛ obe Israɛlɛ wa bi Ɔgɛ, nɛ wa nɛ ngɔ a do obenɔ 'da a, do osodanɔ 'da a vɛ̃, nɛ wa ba nùi 'da a, nɛ wele kpo kpàsà gɔ.