Tɔlɔ Mɔ 20 - WE NU GALE 1995

Obe Israɛlɛ wa gɔa lì

¹ Obe Israɛlɛ vɛ̃ wa hɔa tɛ li gba zɔ̃ Sinɛ do kuti zɛkɛ kɔ sabɛlɛ, nɛ wa 'dafa fala ɔi 'da wa tɛ Kadɛsɛ. 'Da fala wa hɔa di ni ni, nɛ Miriamɛ fe, nɛ wa mi a.

² Ɔ nɛ kɛ fo zi lì di ni bina ni, nɛ obe Israɛlɛ wa mba ngba wa dɛ kɛ zã Mɔizɛ do Aroni,

³ nɛ wa fa we kpa we do Mɔizɛ, nɛ wa tɔ̃ hã a na: “Ma wia sɔ na, NWA gbɛ lɛ fala nɛ kpo do onya lɛ kɛ a gbɛa zi wa ni.

⁴ Gulu kɛ nɛ tɛa do lɛ, owinɔ 'da NWA, dɛ li gba zɔ̃ɛ gɛ ni we ge nde? Nɛ tɛa do lɛ na, nɛ gbɛ lɛ do onadalamɛnɔ 'da lɛ dɛ li gba zɔ̃ɛ gɛ nde?

⁵ Gulu kɛ nɛ fua lɛ ngɔ nù Ezipeto, nɛ nɛ tɛ do lɛ dɛ fala zɛlɛ tɛ gɛ ni we ge nde? Mɛ a fala kɛ wa mí kpalɛ tɛ nɛ gɔ, nɛ fo owala te nyɔ nyɔnga, tabi mbamba lì nɔ nɔa 'bɔ bina.”

⁶ Mɔizɛ do Aroni wa la obe Israɛlɛ dɛ di ni, nɛ wa nɛ dɛ nu tɔa Tande i. Nɛ wa gu fi wa nù dɛ di ni, nɛ NWA be gã dɔlɔ li 'da a hã wa.

⁷ Nɛ NWA tɔ̃ hã Mɔizɛ na:

⁸ “Mɔ bá dɔndɔlɛ 'da mɔ, nɛ mɔ do Aroni, nɛ mbá li obe Israɛlɛ, nɛ mɔ bá nu mɔ hã ta gɛ dɛ li wa ni, nɛ lì ma hɔ sɛ kɔ nɛ dɛ nza. Na mɛ ni, nɛ mɔ dɛ sɛ na, lì sulu kɔ ta dɛ nza, nɛ obe Israɛlɛ do onadalamɛnɔ 'da wa, wa kpa lì nɔ nɔa.”

⁹ Mɔizɛ nɛa, nɛ a ba dɔndɔlɛ 'da a tɛ kɔ tɔa Tande 'da NWA, ɔ nɛ kɛ NWA ba do nu a ni.

¹⁰ Nɛ Aroni do Mɔizɛ wa sa mɔ hã obe Israɛlɛ, nɛ wa tɛ dɛ dati ta ni, nɛ wa tɔ̃ hã obe Israɛlɛ na: “Nɛ, owi nga zunɔ gɛ, nɛ zélé! Lɛ we sɛ we dɛ na, lì hɔ kɔ ta gɛ hã nɛ nde?”

¹¹ Ma kɛ Mɔizɛ ba dɔndɔlɛ 'da a dɛ ngɔ, nɛ a zɛ do ta fala bɔa, nɛ gã lì yula kɔ nɛ do ti, nɛ ma go'do dɛ nza. Nɛ obe Israɛlɛ wa nɔa lì fala nɛ kpo do onadalamɛnɔ 'da wa.

¹² Nɛ NWA tɔ̃ hã Mɔizɛ do Aroni na: “Ɔ nɛ kɛ nɛ gbìnì zã nɛ do mi gɔ, nɛ nɛ bà wala hã mi na, mi be ngawi santo 'da mi hã obe Israɛlɛ gɔ ni, nɛ kã sɛ 'bɔ wa dɛ ngɔ nùi kɛ mi kpua mbulu hã ma hã wa ni gɔ.”

¹³ We duzu mɛ ma la ni, wa sa li lì ní na Mɛriba, gulu nɛ na: “Lì kpa we”, we kɛ obe Israɛlɛ wa kpa we do NWA. Nɛ nde NWA bia hã wa na, ɛ a santo.

Nwa ngɔ nù Edɔmɛ bɛ̃a we hã wala hã obe Israɛlɛ

¹⁴ Tɛ Kadɛsɛ i, nɛ Mɔizɛ tombo Owele hã nwa ngɔ nù Edɔmɛ na: “Mɔ zélé toe 'da onya mɔ, obe Israɛlɛ. Mɔ ĩ ti ngamɛnɔ vɛ̃ lɛ kpa ma ni.

¹⁵ Oyaa lɛ wa nɛa zɛ́ Ezipeto, nɛ owinɔ 'da lɛ wa ɔa i mɔ wena. Oezipeto wa zɛlɛ zi tɛ oyaa lɛ, nɛ wa zɛlɛ zi 'bɔ tɛ lɛ.

¹⁶ Nɛ lɛ sa mɔ hã NWA na, a gbaka lɛ. Nɛ a zila hiamɛ 'da lɛ, nɛ a tombo anzɛ 'da a na, a fo lɛ ngɔ nù Ezipeto dɛ nza. Ma kɛ lɛ hɔa dɔ̃ɔ do 'do le Kadɛsɛ, kɛ ma a li ngbala nùi 'da mɔ ni.

¹⁷ Kɔ mɔ kɔ̃, nɛ mɔ hã́ wala hã lɛ, kɔ lɛ gɔnɔ ngɔ zã nùi 'da mɔ. Lɛ la sɛ do li gba wala iko, lɛ lé sɛ kɔ ofɔnɔ 'da nɛ gɔ. Lɛ nɔ́ sɛ 'bɔ lì kɔ kɔ̃nɔ gɔ. Lɛ ɛ́lɛ́ sɛ wala gɔ gbaa na, lɛ hɔ nza ngɔ nùi 'da mɔ vɛ̃ sɛ nɛ de.”

¹⁸ Nɛ nwa ngɔ nù Edɔmɛ gese hã wa na: “Nɛ lá sɛ do ngɔ nùi 'da mi gɔ. Nɛ yamba le nɛ, nɛ mi bi sɛ nɛ.”

¹⁹ Nɛ obe Israɛlɛ wa tɔ̃ 'bɔ na: “Lɛ 'bana sɛ dɛ li gba wala iko. Fala kɛ lɛ do onadalamɛnɔ 'da lɛ, lɛ ɔ do wɔ lì nde, nɛ lɛ oso sɛ ma kɔ̃ mɔ usa. Lɛ aka mɔ tati a we la do ngɔ nùi 'da mɔ iko.”

²⁰ Nɛ nwa ngɔ nù Edɔmɛ gese 'bɔ na: “Nɛ lá sɛ gɔ.” Nɛ Oedɔmɛ wa hɔ do ogili nga sodanɔ 'da wa, we kpa ngba wa do obe Israɛlɛ.

²¹ Nɛ wa kele wala ti wa na, wa tɛ là do ngɔ nùi 'da lo gɔ. Ma kɛ obe Israɛlɛ wa la do gele wala.

Aroni fia

²² Obe Israɛlɛ vɛ̃ wa kulu ngɔ Kadɛsɛ, nɛ wa la dɛ ngɔ kala Hɔrɛ,

²³ kɛ ma tɛ li ngbala Edɔmɛ. Wa hɔa i mɔ, nɛ nwa tɔ̃ hã Mɔizɛ do Aroni na:

²⁴ “Aroni lé sɛ ngɔ nùi mi kpua mbulu hã ma hã obe Israɛlɛ ni gɔ. A nɛ fe di ni fia. Mba gɔ, nɛ bɛ̃a zi we dɛ mbulanɔ 'da mi tɛ nu 'de Mɛriba i.

²⁵ Mɔ Mɔizɛ, mɔ kṹ do Aroni do be 'da a Elazarɛ dɛ zu kala Hɔrɛ nga.

²⁶ Nɛ mɔ hɔ́lɔ́ otulu nganga 'da a, nɛ mɔ he'de hã Elazarɛ. 'Do nɛ, nɛ Aroni a fe sɛ dɛ di ni.”

²⁷ Mɔizɛ dɛa mbulanɔ 'da NWA, nɛ wa vɛ̃ do talɛ zu wa, wa kũ ngɔ kala Hɔrɛ i dɛ li obe Israɛlɛ ni vɛ̃.

²⁸ Nɛ Mɔizɛ hɔlɔ tulunɔ 'da Aroni, nɛ a he'de hã Elazarɛ. Nɛ Aroni fe dɛ zu kala mɔ. 'Do nɛ, nɛ Mɔizɛ do Elazarɛ wa zĩlĩ kala.

²⁹ 'Da fala obe Israɛlɛ wa nɛa we zele na, Aroni fia ni, nɛ wa vɛ̃ wa hia kɔa a 'do zɛkɛ kpo.