Tɔlɔ Mɔ 19 - WE NU GALE 1995Wa dɔ sɛ fila ngɔmbɔ, nɛ a dɛ bũ 1 NWA tɔ̃a mbulanɔ gɛ hã Mɔizɛ do Aroni na: 2 “Nɛ tɔ̃ hã obe Israɛlɛ na, wa tɛ do fila naa ngɔmbɔ kɛ kunda tɛ̃ a bina, nɛ a dɛ to fɔ fala kpo gɔ ni hã nɛ. 3 Nɛ nɛ ba sɛ a hã nganga Elazarɛ. Nɛ a hɔ do a fala ɔi dɛ nza, nɛ wa 'bili gɛlɛ ngɔmbɛ ni dɛ gbali a. 4 'Do nɛ, nɛ Elazarɛ a so sɛ tɔkɔ sa'de ni sĩ, nɛ a ndɔ zu kɔ̃ a 'dɔ nɛ, nɛ a kpã si 'biti wala nu tɔa Tande fala sambo. 5 Nɛ wa dɔ sɛ ngɔmbɛ ni vɛ̃ dɛ gba li a: ndala tɛ̃ a, mulu tɛ̃ a, tɔkɛ do kala zã a vɛ̃. 6 Nɛ nganga Elazarɛ a ba sɛ te sɛdrɛ, te nyama do fila fɛlɛ, nɛ a da ma dɛ li we fala wa dɔ do ngɔmbɛ ni. 7 'Do nɛ, nɛ a fɔlɔ sɛ tulu tɛ̃ a, nɛ a fɔlɔ tɛ mɛ 'bɔ tɛ̃ a dati kɛ na, a kpolo tɛ̃ a dɛ fala ɔi i ni. Nɛ nde a 'bana sɛ wi ndi li Gale gbaa we hɔ gɛ̃a wese. 8 Wele kɛ a dɔ sɛ ngɔmbɛ ni, a fɔlɔ sɛ 'bɔ tulu tɛ̃ a, nɛ a fɔlɔ tɛ̃ a. Nɛ nde a 'bana sɛ 'bɔ wi ndi gbaa we hɔ gɛ̃a wese. 9 Wele kɛ a a sa wi ni, a holo sɛ bũ ngɔmbɛ, nɛ a hɔ do ma fala ɔi dɛ nza, nɛ a e ma tɛ fala kɛ ma a sa li mi ni. Nɛ obe Israɛlɛ wa a sɛ ma 'dɔ lì fɔlɔ wi we hɔ sa wi li mi Gale. (Ma wia kɔ̃ do dɔnggamɔ we fo ku'da 'dã mɔ.) 10 Ma wia na, wi nɛ so sɛ bũi ni, a fɔlɔ tɛ mɛ 'bɔ tulu tɛ̃ a. Nɛ nde a 'bana sɛ 'bɔ wi ndi gbaa we hɔ gɛ̃a wese. Obe Israɛlɛ do ogɛnɛnɔ wa ɔ sanga wa ni, wa dɛ sɛ mbula gɛ 'da fala fai. 11 “Wele kɛ a 'be tɛ wɔlɔ ni, nɛ a hɔ sɛ wi ndi 'do tũ sambo. 12 Nɛ tũ kɛ talɛ do tũ kɛ sambo, nɛ wa kpã sɛ lì fɔlɔ wi tɛ̃ a na, a hɔ sa wi. Nɛ nde do tũi talɛ do sambo ni, kɔ fala wa kpã̀ tɛ̃ a gɔ, nɛ a 'bana sɛ wi ndi. 13 Wele kɛ a 'be tɛ wɔlɔ, kɔ wa kpa lì fɔlɔ wi tɛ̃ a gɔ, nɛ nde a faka tɔa Tande 'da mi Gale faka, nɛ wa fo sɛ a sanga obe Israɛlɛ do'do. 14 “Mbe mbulanɔ 'bɔ a kɛ gɛ: Fala kɛ wele fe kɔ mbe tande ɔinɔ nde, nɛ winɔ wa lia i mɔ, tabi winɔ wa kɔ tande do 'da fala wɔlɛ boe ni, wa hɔ sɛ wi ndi 'do tũ sambo. 15 Fala kɛ kpana ɔ di ni, kɔ wa kpè nu nɛ do dia nɛ gɔ nde, nɛ mɛ kɔ nɛ ni ma hɔ sɛ ndi mɔ li mi Gale. 16 Fala kɛ wele yɛnggɛ zamɔ, kɔ a kpa wɔlɔ wele kɛ wa gbɛ a gbɛa, tabi a fia gele fio iko, kɔ a 'be tɛ nɛ, nɛ a hɔ sɛ wi ndi 'do tũ sambo. Fala kɛ wele 'be tɛ gbãlã wele, tabi zunu nde, nɛ a hɔ sɛ 'bɔ wi ndi 'do tũ sambo. 17 “We fɔlɔ wi ndi ni na, a hɔ sa wi, nɛ wa so bũ ngɔmbɛ wa dɔa ma we fo ku'da 'dã mɛ ni, nɛ wa a ma dɛ kɔ kpana, nɛ wa a lì 'de ngɔ nɛ. 18 Nɛ wi kɛ a a sa wi ni, a ba te nyama, nɛ a yulu 'dɔ lì kɔ kpana ni, nɛ a kpã ma tɛ tande, do omɛnɔ vɛ̃, do owinɔ wa kɔ nɛ ni. Tabi a kpã tɛ wi kɛ a 'bia tɛ gbãlã wele, wɔlɔ, tabi zunu ni. 19 Wi kɛ a a sa wi ni, a kpã sɛ lì tɛ wi ndi ni, do tũi kɛ talɛ do tũi kɛ sambo. Do sambo tũi ni, nɛ wi ndi ni a fɔlɔ sɛ tulu tɛ̃ a, nɛ a fɔlɔ 'bɔ tɛ̃ a. Nɛ do gɛ̃a wese ni, nɛ a hɔ sɛ sa wi li mi Gale. 20 “Wele kɛ a 'be tɛ wɔlɔ ni, kɔ wa kpa li fɔlɔ wi tɛ̃ a gɔ, nɛ nde a faka tɔa Tande 'da mi NWA faka, nɛ wa fo sɛ a sanga obe Israɛlɛ do'do. 21 Obe Israɛlɛ wa dɛ sɛ mbula gɛ kɔ sabɛlɛ do sabɛlɛ. Wele kɛ wa kpã lì fɔlɔ wi tɛ̃ a ni, a wia we fɔlɔ tulu tɛ̃ a. Nɛ wi kɛ a ndɔ kɔ̃ a tɛ lì ni, nɛ a hɔ sɛ wi ndi gbaa we hɔ gɛ̃a wese. 22 Mɛnɔ vɛ̃ kɛ wi ndi 'be tɛ nɛ ni, ma hɔa ndi mɔ li mi. Nɛ wi kɛ a 'be tɛ wi ndi ni, nɛ a hɔ sɛ wi ndi gbaa we hɔ gɛ̃a wese.” |
Ngbaka DC Bible (We Nu Gale) Version © Bible Society of the Democratic Republic of Congo, 1995.
Bible Society of the Democratic Republic of Congo