Tɔlɔ Mɔ 18 - WE NU GALE 1995

¹ Ma hã NWA tɔ̃a hã Aroni na: “Yolo do sɔɛ gɛ, fala kɛ wele dɛ 'dã mɔ, nɛ nde a faka tɔa Tande 'da mi, nɛ mi gese sɛ nu 'dã mɛ ni hã mɔ, do obe zã mɔ do onya mɔ, wi nu kpala Levi. Nɛ nde fala kɛ mɔ, do obe zã mɔ, nɛ dɛ 'dã mɔ kɔ toe 'da nɛ, nɛ tɛ nɛ ma zɛlɛ sɛ olo nɛ.

² Mɔ sa sɛ mɔ hã onya mɔ levitɛnɔ, nɛ nɛ dɛ toe do wa. 'Da fala mɔ do obe zã mɔ, nɛ nɛ sɛ we dɛ to kɔ tɔa Tande ni, nɛ wa dɛ sɛ to ti nɛ, nɛ wa gala nɛ.

³ Wa dɛ sɛ to kɔ tɔa Tande, nɛ nde ma wè na, wa kɔlɔ do gbagala tabi do omɛnɔ kɛ ma santo ni gɔ. Wa dɛ ní, nɛ nde nɛ do wa, nɛ hɔ́ sɛ fɛna fio gɔ.

⁴ Wa gala sɛ nɛ kɔ otonɔ vɛ̃ kɛ ma dɛ tɛ̃ ɛ kɔ tɔa Tande i ni. Gele wele iko kɔ́lɔ́ sɛ do nɛ gɔ.

⁵ Mɔ, do obe zã mɔ hã nɛ dɛ sɛ toe tɛ Fala kɛ ma santo do kɛ zã gbagala. Nɛ dɛ na mɛ ni, nɛ zã mi ma nɔ̃́lɔ̃́ sɛ 'bɔ mbé nɛ dɛ tɛ obe Israɛlɛ gɔ.

⁶ Nɛ zɔ́, mi saka onya nɛ olevitɛnɔ kɔ tala gele obe Israɛlɛ na, wele wa a mɔ́ mi. Nɛ mi hã wa hã nɛ na, wa dɛ tonɔ kɔ tɔa Tande.

⁷ Nɛ nde mɔ Aroni, do obe zã mɔ, nɛ dɛ sɛ to nganga 'da nɛ tɛ fala gbagala, do Fala kɛ ma santo wena, nɛ ma do 'do ku'bi kɛ ma gɔnɔ sanga tɔa ni. Wi a mi a mi hã toe gɛ hã nɛ. Nɛ nde fala kɛ gele wele kɔlɔ do mi, nɛ wa gbɛ sɛ a.”

Onganganɔ wa kala sɛ mbe kɔ dɔnggamɛ do mɔ́ wa

⁸ NWA tɔ̃a hã Aroni na: “Mɔ zɔ́, odɔnggamɔ santonɔ, kɛ obe Israɛlɛ wa tɛ do ma hã mi, nɛ wa dɔ̀ dɔa gɔ ni, mi hã ma vɛ̃ hã mɔ do obe zã mɔ. Wele mɛnɔ ni sɛ a mɔ́ nɛ fai.

⁹ Odɔnggamɛnɔ kɛ nɛ we sɛ tɛ kala do mɔ́ nɛ ni, ma kɛ: fũ farini, dɔnggamɛnɔ we si olo ku'da 'dã mɔ, do dɔnggamɛnɔ we futa olo 'dã mɔ. Dɔnggamɛnɔ ni ma santo, ma sɛ we duzu mɔ, do obe zã mɔ.

¹⁰ Ma wia na, nɛ nyɔngɔ mɛnɔ ni tɛ fala kɛ ma santo, nɛ tati a owi wili hã wa wia we nyɔngɔ ma. Nɛ nɛ ba ma na, ma santo.

¹¹ Dɛ ngɔ nɛ, ogele mɛnɔ kɛ obe Israɛlɛ wa 'dɔlɔ hã mi ni, wele nɛ sɛ 'bɔ a mɔ́ mɔ, do obe zã mɔ fai. Nɛ owinɔ vɛ̃ kɔ nu fɛlɛ mɔ, wi wili tabi wuko kɛ wa a sa wi li mi ni, wa wia sɛ we nyɔngɔ ma.

¹² Mi 'dɔlɔ 'bɔ kuti nyɔngɔmɛnɔ, kɛ obe Israɛlɛ wa tɛ nɛ hã mi sabɛlɛ kpo kpo ni hã nɛ. Mɛ a: nɔ, do dɔ, do Okpalɛnɔ.

¹³ Mɛnɔ ni vɛ̃ wele nɛ a mɔ́ nɛ, nɛ owi nu fɛlɛ mɔ vɛ̃, kɛ wa a sa wi li mi ni, wa wia sɛ we nyɔngɔ ma.

¹⁴ Nɛ mɛnɔ vɛ̃ kɛ obe Israɛlɛ wa ia hã mi do mɔ́ mi fai ni, wele nɛ 'bɔ a mɔ́ nɛ.

¹⁵ “Kuti bulu benɔ tabi kuti be wili sa'denɔ kɛ obe Israɛlɛ wa tɛ do wa hã mi ni, wele wa 'bɔ a mɔ́ nɛ. Nɛ nde ma wia na, nɛ gɔnɔ zu kuti bulu benɔ vɛ̃, do kuti be wili sa'de kɛ a a sa li mi gɔ ni.

¹⁶ Wa gɔnɔ sɛ zu obulu benɔ 'da fala wa ɔ zɛkɛ kpo ni. Nɛ wa gɔnɔ sɛ zu wa do mbili kɛ wa dɛa do fɛ̃a mɔ bolo ni mɔlɔ. Nɛ wa we sɛ dĩ nɛ do mɔ we do mbili kɔ tɔa Tande na, ma hɔ gramɛ 'bu.

¹⁷ Wa gɔ́nɔ́ sɛ zu kuti be wili ngɔmbɔ, be bata, tabi be dua gɔ. Wa la sɛ sa'denɔ ni hã mi fai. Mɔ gbɛ sɛ wa, nɛ mɔ kpã tɔkɔ tɛ wa ngɔ gbagala, nɛ mɔ dɔ fala kɛndɔnɔ na, zɛ̃ we nɛ unu mi, nɛ ma de tɛ mi.

¹⁸ 'Do nɛ, nɛ mulu sa'denɔ ni sɛ a mɔ́ nɛ, ɔ nɛ kɛ gbãlã ngu'du sa'de do ku kɛ si ngɔ ngawili kɔ̃, kɛ wa hã do dɔnggamɔ be dɛa na, mɛ a mɔ́ nɛ ni.

¹⁹ Nɛ mi hã mɛnɔ vɛ̃ kɛ obe Israɛlɛ wa tɛ do ma hã mi ɔ nɛ dɔnggamɔ kɛ ma santo ni hã nɛ. Ma sɛ fai a mɔ́ mɔ, do obulu benɔ 'da mɔ do oboko benɔ 'da mɔ. Kɛ gɛ mɛ a gba tɔkɔ kɛ mi gba do mɔ do obe zã mɔ, nɛ mi kpóló sɛ ma gɔ fai.”

²⁰ NWA tɔ́a hã Aroni na: “Mɔ kpá sɛ 'bili tɛ nù ngɔ nùi mi hã sɛ hã obe Israɛlɛ ni gɔ. Mi nwa, mi sɛ a kpamɛ 'da mɔ.”

Olevitɛnɔ wa kala sɛ mbe kɔ dɔnggamɛ do mɔ́ wa

²¹ NWA tɔ́a na: “Kɛ gɛ a si olo toe 'da olevitɛnɔ kɛ wa dɛ toe kɔ tɔa Tande 'da mi ni. Mi hã sɛ kpo mbee 'bu kɔ mɛnɔ kɛ ma ngɔ nù Israɛlɛ gɛ ni hã wa.

²² Tala gele obe Israɛlɛ wa kɔ́lɔ́ sɛ do tɔa Tande gɔ, dɔ wa té do ngbangga, kɔ wa fe gɔ.

²³ Tati a olevitɛnɔ hã wa dɛ sɛ toe kɔ tɔa Tande, kɔ fala kɛ wa dɛ 'dã mɔ i mɔ nde, nɛ ma sɛ dɛ zu wa. Nɛ dɛ sɛ mbula gɛ 'da fala fai. Olevitɛnɔ wa kpá sɛ 'bili tɛ nù ɔ nɛ gele nu kpala obe Israɛlɛ gɔ.

²⁴ Nɛ nde olo li 'bili tɛ nùi, mi hã kpo mbee 'bui kɔ mɛnɔ kɛ obe Israɛlɛ wa wia we hã hã mi ni, hã wa. Gulu nɛ a mi tɔ́a hã wa na, wa kpá sɛ 'bili tɛ nù ɔ nɛ gele nu kpalanɔ gɔ ni.”

²⁵ NWA tɔ́a hã Mɔizɛ na,

²⁶ a é 'bɔ mbulanɔ gɛ hã olevitɛnɔ na: “'Da fala kɛ obe Israɛlɛ wa tɛ sɛ do kpo mbee 'bui kɔ mɛnɔ 'da wa hã nɛ ni, nɛ nɛ fo sɛ kpo mbee 'bu ngɔ mɛnɔ ni we dɔnggɔ do mi.

²⁷ Dɔnggamɛ 'da nɛ ni, ma we sɛ kɔ̃ do kɛ obe Israɛlɛ wa fo ngɔ kuti kpalɛnɔ, tabi kuti dɔ̃ɛ 'da wa hã mi ni.

²⁸ Do wala ni, nɛ nɛ tɛ sɛ tɛ mɛ 'bɔ do dɔnggamɛ 'da nɛ hã mi, nɛ nɛ hã ma hã nganga Aroni.

²⁹ Ngɔ mɛnɔ vɛ̃ wa nɛ hã ma hã nɛ ni, nɛ nɛ saka sɛ dia kɛ we hã ma hã mi.

³⁰ Hã fala kɛ nɛ fo zu mɛnɔ ni hã mi do'do, nɛ nɛ kala tala nɛ do mɔ́ nɛ, ɔ nɛ kɛ gele obe Israɛlɛ wa 'bana do tala kpalɛnɔ, do dɔ̃ɛ do nɔɛ 'da wa ni.

³¹ Nɛ, do onu fɛlɛ nɛ, nɛ wia we nyɔngɔ mɛnɔ ni tɛ fala nɛ kɔa we nyɔngɔ do ma ni, we kɛ mɛ a mɔ olo toe nɛ dɛ kɔ tɔa Tande 'da mi ni.

³² 'Da fala nɛ fo dia kɛ 'da mi kɔ mɛnɔ ni do'do, kɔ nɛ ma ngɔ nyɔngɔ tala nɛ, ki ni nɛ nde nɛ dɛ̃ 'dã mɔ gɔ. Kɔ fala kɛ nɛ fò dia kɛ 'da mi dati gɔ, hã nɛ nyɔngɔ iko, nɛ nde nɛ faka odɔnggamɔ santo 'da obe Israɛlɛ ia, nɛ nɛ fe sɛ.”