Tɔlɔ Mɔ 17 - WE NU GALE 1995

Mɔ u we 'da owinɔ 'da Kore

¹ NWA tɔ̃a hã Mɔizɛ na:

² “Mɔ bá nu mɔ hã nganga Elazarɛ, be 'da Aroni na, a tafa omɔ u do wenɔ kɛ wa dɛa do tũ mɔ bolo ni li nyɛa we do'do, nɛ a pɛsɛ sanga kalĩ we, we kɛ omɛnɔ ni ma santo.

³ Mba gɔ, o'dã winɔ kɛ wa fia ni, wa tɛa nɛ hã mi, nɛ ma hɔa santo. Ma wia na, winɔ wa 'dɛnɛ ma, takɔ li nɛ pɛsɛ dɛ 'do, nɛ wa gu mbala mɔ bole ni ngɔ gbagala dɔ do sa'de. Nɛ ma ɔ sɛ dɛ di ni we mbese obe Israɛlɛ.”

⁴ Nɛ nganga Elazarɛ kala omɔ u do wenɔ olo winɔ wa ngutu ni, nɛ wa 'dɛnɛ ma we gu ngɔ gbagala.

⁵ Wa gu ma ngɔ nɛ, takɔ obe Israɛlɛ wa zɔ, nɛ ma gba ta zu wa na, tati a obe zã Aroni hã wa wia we dɔ fũ yɔmbɛ dati NWA. Gele wele iko dɔ ma, nɛ kpo mɛ ma dɛa Kore do owinɔ 'da a ni, ma dɛ sɛ 'bɔ a, ɔ nɛ kɛ nwa tɔ̃a hã Aroni do wala 'da Mɔizɛ ni.

Obe Israɛlɛ wa wila 'dã we hã Mɔizɛ do Aroni

⁶ Fala sa 'do ki ni, nɛ obe Israɛlɛ vɛ̃ wa ma ngɔ wele 'dã we hã Mɔizɛ do Aroni na: “Nɛ dɛa na, nwa gbɛ owinɔ 'da a.”

⁷ Ĩ na, 'da fala obe Israɛlɛ wa wele do 'dã we hã Mɔizɛ do Aroni ni, nɛ wa ka mɔ si ngɔ tɔa Tande 'da NWA i, nɛ wa zɔ zɛ̃ we gã dɔlɔ li 'da NWA, nɛ nde ma gulu ngɔ tɔa.

⁸ Nɛ Mɔizɛ do Aroni wa nɛa nu tɔa Tande i,

⁹ nɛ NWA tɔ̃ hã Mɔizɛ na:

¹⁰ “Nɛ fo tɛ nɛ kɛ zã gili winɔ gɛ do'do. Mi nɛ gbɛ wa fala kpo do ti.” Mɔizɛ do Aroni wa nɛa we zele ni, nɛ wa gu li wa nù.

¹¹ Nɛ Mɔizɛ ba nu a hã Aroni na: “Mɔ ba mɔ u do we 'da mɔ, kɔ mɔ u we ngɔ gbagala ni dɛ kɔ nɛ, nɛ mɔ dɔ fũ yɔmbɛ ngɔ nɛ. Nɛ mɔ wɛlɛ do tɛ mɔ 'da obe Israɛlɛ i na, ma fɔlɔ wa, takɔ wa hɔ sa wi li NWA. Mba gɔ, zã NWA nɔ̃lɔ̃ dɛ tɛ wa, kɔ a tumba 'dã zɛlɛ, kɔ ma ndua gbɛ wa ia.”

¹² Aroni dɛa olo nu Mɔizɛ, nɛ a ba mɔ u do we 'da a, nɛ a wɛlɛ do tɛ̃ a dɛ 'da owinɔ kɛ 'dã zɛlɛ ndua ba wa ni. Nɛ a dɔ fũ yɔmbɛ, takɔ ma fɔlɔ obe Israɛlɛ, kɔ wa hɔ sa wi li NWA.

¹³ Nɛ a yolo dɛ sanga wanɔ wa fia ia, do wanɔ wa 'bana do tunu lì wa ni, nɛ 'dã zɛlɛ sɔkpa.

¹⁴ Owinɔ wa fia tɛ 'dã zɛlɛ ni, wa koto 'bu ngɔ nɛ nalɛ do kama sambo, nɛ nde wa tɔ̀lɔ̀ winɔ 'da Kore kɛ wa fia zi dati ni kɔ wa gɔ.

¹⁵ 'Dã zɛlɛ ma we e do'do, nɛ Aroni kpolo tɛ̃ a, nɛ a kpa Mɔizɛ dɛ nu tɔa Tande 'da NWA i.

Dɔndɔlɛ 'da Aroni

¹⁶ NWA tɔa hã Mɔizɛ na:

¹⁷ “Mɔ tɔ̃́ hã obe Israɛlɛ na, kpasa wi ngɔ nu kpala wa kpo kpo tɛ̃ do dɔndɔlɛ 'da a hã mɔ. Mɔ kpa sɛ dɔndɔlɔ 'bu ngɔ nɛ bɔa, nɛ mɔ kɔmɔ li nu kpala wele kpo kpo dɛ ngɔ dɔndɔlɔ 'da a.

¹⁸ Nɛ kɛ 'da nu kpala Levi, mɔ kɔmɔ sɛ a li Aroni. Mɛ sɛ a dɔndɔlɔ kpo do 'da kpasa wi nu kpala kpo do kpo.

¹⁹ Mɔ kala sɛ dɔndɔlɔnɔ ni, nɛ mɔ a ma kɔ tɔa Tande dɛ dati Sanduku Gba Tɔkɛ, tɛ fala mi be do tɛ mi hã mɔ ni.

²⁰ Nɛ mɛ ma hɔ sɛ ni, ma kɛ: Wi kɛ mi saka sɛ a ni, nɛ dɔndɔlɛ 'da a ma kunu sɛ. Na mɛ ni, nɛ mi kpe sɛ nu 'dã wenɔ obe Israɛlɛ wa tɔ̃ hã mɔ ni. Nɛ wa tɔ̃́ sɛ 'bɔ 'dã we hã mɔ gɔ.”

²¹ Mɔizɛ tɔa wenɔ ni hã obe Israɛlɛ, nɛ okpasa wi nu kpalanɔ kpo kpo wa hã dɔndɔlɔ hã a, dɔndɔlɔ kpo we nu kpala kpo. Nɛ ma vɛ̃ a dɔndɔlɔ 'bu ngɔ nɛ bɔa, wa tɔlɔ mba do kɛ 'da Aroni.

²² Mɔizɛ nɛa do ma, nɛ a a ma dɛ dati Sanduku Gba Tɔkɛ kɔ tɔa Tande 'da NWA i.

²³ Fala sa, kɔ Mɔizɛ nɛa nu tɔa Tande i, nɛ a zɔ na, dɔndɔlɛ 'da Aroni tɛ kɔ nu kpala Levi, ma kù kunu iko gɔ, nɛ nde ma dua 'bɔ do ofulɛlɛ, nɛ ma ko wala te amandɛ.

²⁴ Mɔizɛ kala dɔndɔlɔnɔ vɛ̃ kɔ tɔa Tande ni, nɛ a nɛ do ma we be hã obe Israɛlɛ. Wa vɛ̃ wa zɔa mɛ ma hɔa ni, nɛ kpasa wi do kpasa wi ba dɔndɔlɛ 'da a.

²⁵ Nɛ NWA tɔ̃ hã Mɔizɛ na: “Mɔ gésé dɔndɔlɛ 'da Aroni dɛ dati Sanduku Gba Tɔkɛ i. Wa usu sɛ ma, takɔ ma be hã obe Israɛlɛ na, wa a wi dɛ nga zu. Na mɛ ni, nɛ mɔ gɔnɔ sɛ nu 'dã wenɔ wa tɔ̃ hã mi ni, nɛ wa fé sɛ gɔ.”

²⁶ Nɛ Mɔizɛ dɛa ɔ nɛ kɛ NWA ba do nu a hã a ni.

²⁷ Obe Israɛlɛ wa tɔ̃a hã Mɔizɛ na: “Mɔ tɛ ĩ̀ fala kɛ na lɛ fe di ni we e ia ni gɔ nde?

²⁸ Fala kɛ wele kɔlɔ do tɔa Tande 'da nwa, nɛ a fe iko. Ní a lɛ nɛ fe ní na lɛ e vɛ̃ nde?”