Tɔlɔ Mɔ 16 - WE NU GALE 1995

Kore do ongba a wa dɛa nga zu

¹ Mbe levitɛ kpo li a a Kore, be 'da Isarɛ tɛ kɔ nu fɛlɛ Kehatɛ, a dɛa nga zu dɛ tɛ Mɔizɛ. Nɛ a sɔ̃ɛ Owele talɛ kɔ nu kpala Rubɛnɛ, nɛ wa mba do a. Li winɔ ni a: Datanɛ do Abiramɛ, benɔ 'da Eliabɛ, do Ɔnɛ, be 'da Pelɛtɛ.

² Nɛ mbe obe Israɛlɛ kama bɔa do 'bu wa mɔlɔ, kɛ wa a okpasa wi do owi dĩ, nɛ wa saka zi wa kɔ mba li ngba wi ni, wa mba 'bɔ do wa.

³ Wa ngɛmɛ ngba wa vɛ̃, nɛ wa nɛ dɛ dati Mɔizɛ do Aroni, nɛ wa tɔ̃ hã wa na: “Nɛ la li ngele toe 'da nɛ do'do. Wele obe Israɛlɛ vɛ̃ a mɔ́ NWA, nɛ NWA 'bɔ do lɛ boe. Kɔ gulu kɛ nɛ lengge na, nɛ nɛa ngɔ tala owinɔ 'da NWA ni we ge nde?”

⁴ Mɔizɛ zila dãlã wenɔ ni, nɛ a gu li a nu, nɛ a sambala.

⁵ 'Do nɛ, nɛ a tɔ̃ hã Kore do owinɔ 'da a na: “Bindɛ do titole, nɛ NWA a dɛ sɛ na, lɛ ĩ ti wi kɛ a a mɔ́ a ni. A be sɛ wele kɛ a saka a na, a kɔlɔ do ɛ ni. Nɛ a hã sɛ wala hã wi ni na, a tɛ dati ɛ.

^6-7 Kɔ bindɛ do titole, nɛ mɔ Kore do owinɔ 'da mɔ, nɛ ba sɛ mɔ u do we, nɛ nɛ a we kɔ nɛ. Nɛ nɛ a fũ yɔmbɔ ngɔ nɛ, nɛ nɛ tɛ do ma dɛ dati NWA. Nɛ lɛ zɔ sɛ wi ngboo kɛ NWA nɛ saka a na, a kɔlɔ do ɛ ni. Wi a nɛ, olevitɛnɔ hã nɛ la li ngele toe 'da nɛ do'do!”

⁸ Nɛ Mɔizɛ tɔ̃ 'bɔ hã Kore na: “Nɛ, olevitɛnɔ, nɛ zélé mi sɛ!

⁹ NWA a saka nɛ dɛ kɔ tala gele obe Israɛlɛ na, nɛ kɔlɔ do ɛ, nɛ nɛ dɛ to kɔ tɔa Tande 'da ɛ, nɛ nɛ dɛ 'bɔ to olo li obe Israɛlɛ vɛ̃. Nɛ nde nɛ lengge na, ki ni ma wè gɔ nde?

¹⁰ NWA kɔa na, mɔ Kore, do onya mɔ levitɛnɔ vɛ̃, nɛ kɔlɔ do ɛ. Nɛ nɛ fa 'bɔ na, nɛ ba toe 'da onganganɔ dɛ ngɔ ki ni nde?

¹¹ Mɔ do owinɔ 'da mɔ, nɛ bɛ̃a we nu Aroni. Nɛ nde ĩ na, wi kɛ nɛ bɛ̃a nu a ni, wi a NWA, nɛ nɛ dɛa nga zu dɛ tɛ̃ a.”

¹² 'Do nɛ, nɛ Mɔizɛ tumba na, wa sa mɔ hã Datanɛ do Abiramɛ, benɔ 'da Eliabɛ. Wa nɛa we zele sa mɛ ni, nɛ wa gese hã Mɔizɛ na: “Lɛ nɛ́ sɛ i mɔ gɔ!

¹³ Mɔ fua zi lɛ dɛ nza ngɔ nù Ezipeto, nù kɛ ma do nyɔngɔmɔ la li ngele, nɛ mɔ tɛa do lɛ dɛ dɛ, takɔ lɛ fe dɛ li gba zɔ̃ɛ gɛ. Nɛ ki ni ma wè li mɔ gɔ, nɛ mɔ kɔa 'bɔ we be tɛ mɔ na, mɔ ngɔ lɛ nde?

¹⁴ Ma wè gɔ. Mɔ nɛ do lɛ dɛ ngɔ nù kɛ nyɔngɔmɔ la li ngele tɛ nɛ ni gɔ, nɛ mɔ hã̀ 'bɔ ofɔ vinɔ hã lɛ do mɔ́ lɛ gɔ. Mɔ zɔ lɛ ɔ nɛ owi tandu kɛ wa wè tɛ zɔ mɛnɔ mɔ dɛ ni gɔ nde? Lɛ bɛ̃a, lɛ nɛ́ sɛ i mɔ gɔ.”

¹⁵ Mɔizɛ nɛa we zele we ni, nɛ zã a nɔ̃lɔ̃, nɛ a tɔ̃ hã NWA na: “Mi aka kɔ̃ mɔ na, mɔ tɛ kɔ̃̀ gɛnɛ dɔnggamɔ mɔ wa kpo gɔ. Mi dɛ̀ wele kpo sanga wa ni 'danga gɔ, nɛ mi bà 'bɔ mɔ kpo kɔ wa gɔ, gɛnɛ kɔ mbamba punda kpo iko ni gɔ.”

Kore do owinɔ 'da a wa kpa etumbu

¹⁶ Mɔizɛ tɔ̃a hã Kore na: “Bindɛ, nɛ mɔ do owinɔ 'da mɔ, nɛ tɛ sɛ dati NWA. Nɛ Aroni sɛ 'bɔ boe.

¹⁷ Wele do wele kɔ owinɔ 'da mɔ 250 ni, a ba sɛ mɔ u do we 'da a, nɛ a dɔ fũ yɔmbɛ dati NWA. Nɛ mɔ Kore do Aroni, nɛ dɛ sɛ 'bɔ kpasaa na mɛ ni.”

¹⁸ Kore do owinɔ 'da a, wa dɛa olo nu Mɔizɛ. Nɛ wele do wele ba mɔ u do we 'da a, nɛ a a we kɔ nɛ, nɛ a a fũ yɔmbɔ ngɔ nɛ, nɛ a nɛ, nɛ a yolo dɛ nu tɔa Tande 'da NWA ni. Nɛ Mɔizɛ do Aroni, wa dɛa tɛ mɛ 'bɔ ní.

¹⁹ Nɛ Kore mba li obe Israɛlɛ vɛ̃, nɛ wa yolo dɛ dati Mɔizɛ do Aroni dɔ̃ɔ do nu tɔa Tande ni. Na mɛ ni, nɛ gã dɔlɔ li 'da NWA ma zĩlĩ ɔ nɛ gba nyɛa we, nɛ obe Israɛlɛ vɛ̃ wa zɔ ma.

²⁰ Nɛ NWA tɔ̃ hã Mɔizɛ do Aroni na:

²¹ “Nɛ gɛ́ tɛ nɛ kɛ zã owinɔ gɛ vɛ̃ do'do, we kɛ mi nɛ gbɛ wa di dɔ̃ gɛ.”

²² Mɔizɛ do Aroni wa nɛa we zele ni, nɛ wa gu li wa nù, nɛ wa he mɔ na: “Aa Gale! Mɔ a mɔ dɛa mɛnɔ nyanga nza gɛ vɛ̃. Kɔ gulu kɛ wele kpo iko dɛ 'dã mɔ, nɛ zã mɔ nɔ̃lɔ̃ dɛ tɛ winɔ vɛ̃ ni we ge nde?”

²³ Nɛ NWA gese hã Mɔizɛ na:

²⁴ “Mɔ bá nu mɔ hã owinɔ na, wa yu nyɛlɛ do tandenɔ 'da Kore, Datanɛ do Abiramɛ.”

²⁵ Nɛ Mɔizɛ kulu ngɔ fala nɛ kpo do okumunɔ, nɛ wa nɛ we kpa Datanɛ do Abiramɛ.

²⁶ Nɛ a tɔ̃ hã obe Israɛlɛ na: “Nɛ yú nyɛlɛ do tandenɔ 'da owi dɛ 'dã mɛnɔ gɛ. Nɛ tɛ 'bè tɛ mɔ mɔ́ wa kpo gɔ, da dɛ kɔ nɛ fé tɛ mɛ 'bɔ we 'dã mɛnɔ 'da wa gɔ.”

²⁷ Owinɔ wa zila ni, nɛ wa la nyɛlɛ do tandenɔ 'da Kore, Datanɛ do Abiramɛ. Datanɛ do Abiramɛ wa hɔa nza ɔ tandenɔ 'da wa, nɛ wa yolo dɛ nu ɛ ni, fala nɛ kpo do owukonɔ, obenɔ o ogele nu fɛlɛ kulanɔ 'da wa.

²⁸ Nɛ Mɔizɛ tɔ̃ hã obe Israɛlɛ na: “Nɛ zɔ mɛnɔ vɛ̃ kɛ ma nɛ dɛ tɛ̃ ɛ ni, lɛ nɛ ĩ sɛ na, wi tumba mi na, mi dɛ nɛnɔ gɛ vɛ̃, wi a NWA, nɛ nde mi dɛ́ lo kɔ sila mi iko gɔ.

²⁹ Fala kɛ winɔ gɛ wa fe fio tɔa ɔ nɛ ogele winɔ vɛ̃ iko nde, ni a NWA hã a tòmbò mi gɔ.

³⁰ Nɛ nde fala kɛ NWA dɛ ɔngbamɔ, hã nùi ma gbini, nɛ ma zu'du do wa do mɛnɔ 'da wa vɛ̃, do tɛlɛ tɛ kɛ na, wa zĩlĩ do tunu li wa dɛ fala 'da ofionɔ i, nɛ nɛ ĩ sɛ na, owinɔ ni wa bɛ̃a nu NWA.”

³¹ Mɔizɛ nɛa we da nu ɛ tɛ lɛnggɛ ni, nɛ nùi mangga dɛ ti nyanga Datanɛ do Abiramɛ ni.

³² Nɛ ma gbini, nɛ ma zu'du do wa, do onu fɛlɛ kulanɔ 'da wa, fala nɛ kpo do owinɔ 'da Kore do omɛnɔ 'da wa vɛ̃.

³³ Owinɔ ni wa zĩlĩ do tunu li wa do omɛnɔ 'da wa vɛ̃ dɛ fala 'da ofionɔ i. Nɛ nùi ma kpe dɛ ngɔ wa, nɛ wa kumu sanga obe Israɛlɛ do'do.

³⁴ Tala obe Israɛlɛ vɛ̃ kɛ wa kɔlɔ zi do di ni ni, wa zila hiamɛ 'da owinɔ ni, nɛ wa yu, nɛ wa he mɔ na: “Lɛ yú! Ní gɔ, nɛ nùi ma zu'du sɛ tɛ mɛ 'bɔ do lɛ.”

³⁵ 'Do nɛ, nɛ NWA tumba nyɛa we, nɛ ma bɛlɛ owinɔ 250 kɛ wa dɔa zi fũ yɔmbɛ ni.