Tɔlɔ Mɔ 15 - WE NU GALE 1995

¹ Mbula ngɔ odɔnggamɛnɔ NWA tɔ̃a hã Mɔizɛ na,

² a é mbulanɔ gɛ hã obe Israɛlɛ na: “'Da fala kɛ nɛ le sɛ ngɔ nùi mi nɛ hã ma hã nɛ na, nɛ ɔ nɛ ni,

³ nɛ nɛ dɔ sɛ sa'de we dɔnggɔ do mi. Nɛ dɛ sɛ na mɛ gɛ: Nɛ gbɛ sɛ sa'de hã mi we be dɛa na, tabi we kɛ nɛ kɔa we dɛ olo mbulu, tabi nɛ gbɛ do kɔ sila nɛ iko, tabi 'bɔ we dɔnggɔ mi do 'da fala ɛngganɔ. Nɛ osa'denɔ kɛ nɛ saka sɛ wa we dɔnggɔ do mi ni a: ngɔmbɔ kpo, bata kpo, naa dua kpo, tabi wili nɛ kpo. Nɛ zɛ̃ we nɛ ma unu sɛ mi, nɛ ma de tɛ mi.

^4-5 Wele kɛ a dɔ sɛ sa'de we dɔnggɔ do mi ni, nɛ a mba sɛ ma do fũ farini do dɔ̃. Fala kɛ ma ɔ do be bata nde, nɛ mɛ sɛ a kilo farini talɛ, kɛ wa zanga do litrɛ nɔ kpo do dɔ nɛ, nɛ litrɛ dɔ̃ 'bɔ kpo do dɔ nɛ.

⁶ Kɔ ma ɔ do wili bata nde, nɛ wa mba sɛ do kilo farini gazɛlɛ, kɛ wa zanga do litrɛ nɔ bɔa,

⁷ nɛ litrɛ dɔ̃ 'bɔ bɔa. Nɛ zɛ̃ we nɛ ma unu sɛ mi, nɛ ma de tɛ mi.

⁸ Fala kɛ wa gbɛ ngɔmbɔ do dɔnggamɔ we dɛ olo mbulu tabi we dɔnggamɔ kɛ ma be dɛa na, tabi we gele dɔnggamɔ iko nde,

⁹ nɛ wa mba sɛ sa'de ni do kilo fũ kusi, kɛ wa zanga do litrɛ nɔ talɛ,

¹⁰ nɛ wa mba 'bɔ do litrɛ dɔ̃ talɛ. Nɛ zɛ̃ we nɛ ma unu sɛ mi, nɛ ma de tɛ mi.

¹¹ 'Da fala wa hã sɛ ngɔmbɔ, wili bata, be bata, tabi be dua we dɔnggɔ do mi ni, nɛ wa dɛ sɛ na mɛ ni.

¹² Gɛnɛ kɔ ngɔ gili sa'denɔ nɛ nɛ gbɛ do dɔnggamɛ hã mi ni, ma la kɛ mi tɔla ni, nɛ ma wia na, nɛ mba ma kpo kpo do dɔnggamɛnɔ mi sa li nɛ ni.

¹³ “Obe Israɛlɛ vɛ̃ wa dɛ sɛ mbulanɔ gɛ do 'da fala wa dɔ sɛ odɔnggamɛnɔ kɛ zɛ̃ we nɛ unu mi, nɛ ma de tɛ mi ni.

¹⁴ Nɛ tɔ̃ sɛ 'bɔ wenɔ gɛ hã ogele winɔ kɛ wa tɛa gɛnɛ 'da nɛ, tabi wanɔ kɛ wa ɔa dɛ sanga ni sabɛlɛ dɔ wena ni. Fala kɛ wa dɔ sa'de we dɔnggɔ do mi, kɔ wa kɔ̃ na, zɛ̃ we nɛ ma unu mi, nɛ ma de tɛ ni nde, nɛ wa dɛ sɛ kpo kpo mbulanɔ mi ia hã nɛ ni.

¹⁵ Mbulanɔ ni ma we winɔ vɛ̃, tabi obe Israɛlɛ, tabi ogele winɔ. Nɛ obe zã nɛ, wa dɛ sɛ mbulanɔ ni kɔ sabɛlɛnɔ vɛ̃ kɛ ma tɛ sɛ ni. Nɛ, obe Israɛlɛ do ogele winɔ, nɛ wia kɔ̃ li mi NWA.

¹⁶ Nɛ mbulanɔ ma wia 'bɔ kɔ̃ kpo we nɛ do wa.”

Dɔnggamɔ kuti kpalɛ li fɔnɔ

¹⁷ NWA tɔ̃a hã Mɔizɛ na,

¹⁸ a é mbulanɔ gɛ hã obe Israɛlɛ na: “'Da fala nɛ le sɛ ngɔ nùi mi nɛ hã ma hã nɛ ni,

¹⁹ kɔ nɛ kpa nyɔngɔmɔ ngɔ nɛ nde, nɛ nɛ fo sɛ mbee nɛ we hã ma hã mi do dɔnggamɔ.

²⁰ Nɛ zanga sɛ kuti farini, nɛ nɛ dɔ do mukate we dɔnggɔ do mi. Nɛ hã sɛ ma hã mi ɔ nɛ kɛ wa hã do dɔnggamɔ fũ 'do kɛ wa kala kuti kpalɛ li fɔnɔ ni.

²¹ Na mɛ ni, nɛ dɔnggɔ sɛ mi do kuti mukate kɛ nɛ dɔ sɛ ni. Nɛ dɛ sɛ mbulanɔ ni fai kɔ sabɛlɛnɔ vɛ̃ kɛ ma tɛ sɛ 'do gɛ.

²² “Lɛ ba na, mbe wele yɔ ombe sanga mbulanɔ kɛ mi hã ma hã nɛ do wala 'da Mɔizɛ ni, nɛ nde a dɛ̃ do mbana gɔ,

²³ tabi lɛ ba 'bɔ na, tɛ kɔ sabɛlɛnɔ 'do gɛ, nɛ owinɔ wa yɔ mbulanɔ vɛ̃ kɛ mi ia hã nɛ do wala 'da Mɔizɛ ni, nɛ nɛ dɛ na mɛ gɛ:

²⁴ Fala kɛ winɔ wa yɔ, we kɛ wa ĩ̀ ti mbulanɔ do wala olo nɛ gɔ, nɛ ma wia na, owinɔ vɛ̃ wa mba li ngba wa, nɛ wa dɔ wili ngɔmbɔ we dɔnggɔ do mi, nɛ zɛ̃ we nɛ ma unu sɛ mi, nɛ ma de tɛ mi. Wa mba sɛ dɔnggamɛ ni do farini do dɔ̃. Nɛ wa hã sɛ 'bɔ wili dua we fo ku'da 'dã mɛ ni zu wa.

²⁵ Nɛ nganga a gbɛ sɛ wili dua ni, takɔ ma fɔlɔ obe Israɛlɛ vɛ̃, kɔ wa hɔ sa wi li mi. Ku'da 'dã mɛ ni ma fo sɛ tɛ̃ ɛ zu wa, we kɛ wa dɛ̀ 'dã mɔ do mbana gɔ, nɛ wa dɔa 'bɔ wili ngɔmbɔ, nɛ wa gbɛ wili dua we nɛ.

²⁶ Mi fo sɛ ku'da 'dã mɛ ni zu obe Israɛlɛ vɛ̃ do zu ogele winɔ wa ɔ sanga wa ni. Mba gɔ, we kɛ 'dã mɛ ni, ma kpa zu owinɔ vɛ̃.

²⁷ “Nɛ nde fala kɛ wele kpo dɛ 'dã mɔ, hã a dɛ̀ do mbana gɔ nde, nɛ wi ni a hã sɛ naa dua kɛ a dɛa sabɛlɛ kpo iko ni na, ma fɔlɔ 'dã mɛ 'da a, kɔ a hɔ sa wi li mi.

²⁸ Nganga a gbɛ sɛ naa dua ni, takɔ ma fɔlɔ wi dɛ 'dã mɛ ni.

²⁹ Mbula ni ma wia kɔ̃ we owinɔ vɛ̃, obe Israɛlɛ, tabi ogele winɔ wa ɔ sanga wa, kɛ wa dɛ̃ 'dã mɔ do mbana gɔ ni.

³⁰ Kɔ fala kɛ mbe be Israɛlɛ kpo, tabi mbe gele wele dɛ 'dã mɔ do mbana, nɛ nde a dã zu li mi, nɛ wa fo sɛ a sanga owinɔ do'do.

³¹ Nɛ 'dã mɛ 'da a ma sɛ dɛ zu a, we kɛ a zɔa lɛnggɛ nu mi yala, nɛ a bɛ̃ we dɛ mbulanɔ 'da mi.”

Wi kɛ a gbini mbula ngɔ kɔ̃ tũ ɔmɔ tɛ wi

³² 'Da fala kɛ obe Israɛlɛ wa 'bana zi tɛ ɔ dɛ li gba zɔ̃ɛ ni, nɛ mbe ngba soe kpo, wa kpa mbe wele tɛ fa gua do kɔ̃ tũ ɔmɔ tɛ wi.

³³ Nɛ wa ba a, nɛ wa tɛ do a dɛ dati Mɔizɛ, Aroni do obe Israɛlɛ vɛ̃.

³⁴ Nɛ wa a Owele na, wa zɔ mɔ tɛ̃ a, we kɛ wa ĩ̀ ti etumbui ma wia na, wa hã ma hã a we 'dã mɛ a dɛa ni gɔ.

³⁵ Ma kɛ nwa tɔa hã Mɔizɛ na: “Ma wia na, nɛ gbɛ wi ni. Obe Israɛlɛ vɛ̃ wa hɔ́ do a fala ɔi dɛ nza, nɛ wa lo a do ta gbaa, nɛ wa gbɛ a.”

³⁶ Wa dɛa mbula 'da NWA, nɛ wa hɔa do wi ni fala ɔi dɛ gele fala, nɛ wa lo a do ta, nɛ a fe.

Obe Israɛlɛ wa singbi sɛ nu tulu tɛ wa

³⁷ NWA tɔ̃a hã Mɔizɛ na,

³⁸ a é mbulanɔ gɛ hã obe Israɛlɛ na: “Nɛ, do obe zã nɛ, nɛ singbi sɛ nu tulu tɛ nɛ, nɛ nɛ fulu fila fɛlɛ dɛ nu nɛ zɛ zɛ zɛ. Nɛ dɛ sɛ mbula ni kɔ sabɛlɛ do sabɛlɛ.

³⁹ Nɛ he'de sɛ otulu kɛ wa singbi nu ma singbi ni. Nɛ 'da fala nɛ zɔ sɛ singbi nu tuli ni, nɛ ta zu nɛ ma gba sɛ ngɔ ombulanɔ 'da mi, nɛ nɛ dɛ sɛ ma. Na mɛ ni, nɛ nɛ kpá sɛ wɔ dɔnggɔ ogale bɛlɛnɔ gɔ.

⁴⁰ Nɛ nɛ lengge sɛ we dɛ ombulanɔ 'da mi vɛ̃, nɛ nɛ be sɛ na, nɛ a owinɔ 'da mi.

⁴¹ Mi a NWA Gale 'da nɛ, mi a mi fua zi nɛ ngɔ nù Ezipeto dɛ nza we hɔ Gale 'da nɛ. Mi a NWA Gale 'da nɛ.”