Tɔlɔ Mɔ 14 - WE NU GALE 1995

Obe Israɛlɛ wa bɛ̃a we le ngɔ nù Kanana

¹ Do ngba soe wa tɔ̃a do wenɔ ni, nɛ do tũi ni vɛ̃, obe Israɛlɛ wa hia kɔ̃a do 'bako vɛ̃.

² Nɛ wa tɔ̃a 'dã we hã Mɔizɛ do Aroni na: “Ma dia sɔ fɛ̃ na, le fe dɛ Ezipeto i, tabi na lɛ fe dɛ li gba zɔ̃ gɛ.

³ Kɔ gulu kɛ NWA kã lɛ gbaa dɛ ngɔ nùi kɛ ɔ nɛ gɛ ni we ge nde? Lɛ fe sɛ li bolonɔ, nɛ owi sɛnɛ lɛ wa kala sɛ wukonɔ 'da lɛ do obenɔ 'da lɛ, nɛ wa si do wa. Ma dia sɔ fɛ̃ na, lɛ kpolo tɛ lɛ dɛ Ezipeto i.”

⁴ Nɛ wa ma ngɔ tɔ̃ dɛ sanga tɛ ngba wa na: “Lɛ sáká wi kpe dati lɛ, kɔ lɛ kpolo tɛ lɛ dɛ Ezipeto i.”

⁵ Ma kɛ Mɔizɛ do Aroni wa nɛa we zele ni, nɛ wa gu li wa nù dɛ dati obe Israɛlɛ ni vɛ̃.

⁶ Nɛ Yozue, be 'da Nunɛ, do Kalɛbɛ, be 'da Yɛfune, owinɔ bɔa kɔ wanɔ wa yɛnggɛ zi we zɔ nùi ni, wa ɛ̃a tulu tɛ wa do 'bako,

⁷ nɛ wa tɔ̃ hã owinɔ na: “Nùi lɛ yɛnggɛ ngɔ nɛ we zɔ ma ni, ma de wena,

⁸ nɛ ma do nyɔngɔmɔ la li ngele. Kɔ fala kɛ NWA be dia zã 'da a hã lɛ, nɛ a kpe sɛ ti lɛ dɛ ngɔ nùi ni, nɛ a ba sɛ ma hã lɛ.

⁹ Kɔ nɛ tɛ dɛ̃ nga zu hã NWA gɔ, nɛ nɛ tɛ dɛ̃ 'bɔ kili winɔ ngɔ nùi ni gɔ. Lɛ bi wa, nɛ lɛ nɛ sɛ ngɔ wa da dɔ̃ iko. Mba gɔ, ogalenɔ 'da wa, wa gɛa tɛ wa 'do wa do'do. Nɛ nde NWA fala nɛ kpo do lɛ boe. Nɛ tɛ dɛ kili wa gɔ!”

¹⁰ Obe Israɛlɛ wa zila ni, nɛ wa vɛ̃ wa fa we lo wa do ta na, wa gbɛ wa do'do. Nɛ nde wa nɛa we gbanga nɛ, nɛ dɔ̃lɔ̃ li 'da NWA zĩlĩ dɛ ngɔ tɔa Tande, nɛ ma nyɛ li wa gbarr.

Mɔizɛ sambala NWA we obe Israɛlɛ

¹¹ Nɛ NWA tɔ̃ hã Mɔizɛ na: “Owinɔ gɛ, wa nɛ la fala bɛ̃ gɛnɛ mi soe ki nge nde? Mi dɛa gba sɔ̃ mɛnɔ hã wa wena, nɛ mi bia ngawi 'da mi hã wa. Kɔ gulu kɛ wa bɛ̃ fai we gbini zã wa do mi we ge nde?

¹² Mi tombo sɛ 'dã zɛlɛ dɛ ngɔ wa, nɛ ma gbɛ wa vɛ̃. 'Do nɛ, nɛ mi dɛ sɛ na, mɔ ko Owele kɛ wa nganda wena, nɛ wa dɔ sɛ nɛ ngɔ obe Israɛlɛ.”

¹³ Nɛ nde Mɔizɛ tɔ̃a hã NWA na: “Oezipeto wa ĩ na, mɔ fua owinɔ gɛ ngɔ nùi 'da lo do ngawi 'da mɔ.

¹⁴ Nɛ wa tɔ̃a we nɛ hã owinɔ ngɔ nùi gɛ, nɛ owinɔ ni wa zila na, mɔ nwa hã mɔ kã lɛ owinɔ 'da mɔ, nɛ mɔ be tɛ mɔ hã lɛ, nɛ lɛ zɔ mɔ zɔa. Nɛ wa zila 'bɔ na, mɔ a mɔ fɔmɔ lɛ owinɔ 'da mɔ, we kɛ do gba wese, nɛ mɔ kpe ti lɛ kɔ lɔnggɔ zɛ̃ we, nɛ do tũi, nɛ mɔ la do kɔ lɔnggɔ nyɛa we.

¹⁵ Kɔ fala kɛ mɔ gbɛ winɔ 'da mɔ riki ní, nɛ ogele winɔ kɛ wa zila sako mɛnɔ mɔ dɛa zi vɛ̃ ni, wa tɔ̃ sɛ na,

¹⁶ mɔ gbɛa winɔ 'da mɔ dɛ li gba zɔ̃ɛ gɛ, we kɛ mɔ wè we kã wa dɛ ngɔ nùi mɔ kpua mbulu nɛ hã wa ni gɔ.

¹⁷ Ma kɛ ngangga ni, mi gɔ kɔ̃ mɔ NWA na, mɔ be ngawi 'da mɔ hã lɛ, nɛ mɔ dɛ olo mbuli mɔ kpua ni, we kɛ mɔ tɔ̃a na,

¹⁸ ɛ a NWA, ɛ do du sila, nɛ dia zã 'da ɛ ma la mɔ vɛ̃. Ɛ kunu sila ɛ ngɔ 'dã mɛnɔ do nga zui 'da winɔ. Kɔ fala kɛ wele dɛ 'dã mɔ, nɛ nde ɛ lá a iko gɔ, nɛ ɛ hã sɛ etumbu hã a do owi nu fɛlɛ a gbaa we hɔ ngɔ obe yaa a do okanggadɔkɔ a.

¹⁹ Aa NWA, we dia zã 'da mɔ, mɔ fó 'bɔ ku'da 'dã mɛ zu owinɔ 'da mɔ, ɔ nɛ kɛ mɔ fo ma zu wa fai, yolo do 'da fala wa hɔa nza ngɔ nù Ezipeto ni.”

²⁰ Nɛ NWA gese na: “Mi kɔ̃a, mi fo sɛ ku'da 'dã mɛ zu wa, ɔ nɛ kɛ mɔ aka ni.

²¹ Nɛ nde nɛ́ kɛ mi ngboo a NWA, nɛ dɔ̃lɔ̃ li 'da mi ma kpa ngɔ nùi vɛ̃ ni, mi kana tɛ mi na,

^22-23 wele kpo kɔ owinɔ gɛ lé sɛ ngɔ nùi ni gɔ. Wa zɔa dɔ̃lɔ̃ li 'da mi, do ogba sɔ̃ mɛnɔ vɛ̃ mi dɛa zi ngɔ nù Ezipeto i, do kɛnɔ mi dɛa 'bɔ li gba zɔ̃ɛ gɛ ni zɔa. Gɛnɛ kɔ na mɛ ni, nɛ nde wa yamba mi fai, nɛ wa là fala bɛ̃ we nu mi gɔ. Ma hã wele kpo kɔ wa lé sɛ ngɔ nùi mi kpua zi mbulu nɛ hã oyaa wa ni gɔ, we kɛ wa bɛ̃a gɛnɛ mi ni.

²⁴ Nɛ nde dɛa mɔ tɛ Kalɛbɛ, wi dɛa toe 'da mi, ma si do tɛ̃ ɛ do kɛ 'da wa, a 'bana dɛ olo nu mi. Ma kɛ mi dɛ sɛ na, a le ngɔ nùi a yɛnggɛ we zɔ ma ni, nɛ obe zã a wa kpa sɛ ma.

²⁵ Ngangga ni, Oamalɛkɛ do Okanana wa dɛa tɔa kɔ ogbangɔlɔ̃nɔ di ni ni. Kɔ bindɛ, nɛ nɛ kpolo sɛ tɛ nɛ, nɛ nɛ la sɛ do li gba zɔ́ si li wala gba lì Sala Tɔ̃.”

NWA hã etumbu hã owinɔ 'da a

²⁶ Nɛ NWA tɔ̃ 'bɔ hã Mɔizɛ do Aroni na:

²⁷ “O'dã winɔ gɛ wa nɛ la fala bi tɛ wa hã mi soe ki nge nde? Mi zila bi tɛ wi 'da wa, nɛ ma ngba mi do'do.

²⁸ Kɔ nɛ nɛ́, nɛ nɛ to hã wa na: Mi NWA, mi kana tɛ mi na, mi nɛ dɛ do nɛ, ɔ nɛ kɛ nɛ tɔ̃a kɔ lɛnggɛnɔ 'da nɛ ni.

²⁹ Nɛ fe sɛ, nɛ wɔlɔ nɛ ma ɔ sɛ do li gba zɔ̃ gɛ fatata. Nɛ vɛ̃ kɛ wa tɔlɔ zi nɛ, nɛ sabɛlɛ 'da nɛ yolo 'bu nɛ bɔa we kũ dɛ ngɔ ni, nɛ fe sɛ, we kɛ nɛ bi tɛ nɛ hã mi wena.

³⁰ Mi kpua zi mbulu hã nɛ na, mi ba sɛ nùi ni hã nɛ, nɛ nɛ ɔ sɛ ngɔ nɛ. Nɛ nde wele kpo ɔ́ sɛ ngɔ nɛ gɔ, fo tati a Kalɛbɛ do Yozue.

³¹ Nɛ tɔ̃a sɔ we 'da obenɔ 'da nɛ na, owi sɛnɛ nɛ wa kala sɛ wa si do wa. Nɛ nde mi dɛ sɛ na, obenɔ 'da nɛ ni, wa le ngɔ nùi nɛ bɛ̃a gɛnɛ nɛ ni, nɛ wa ɔ ngɔ nɛ.

³² Nɛ nɛ, nɛ fe sɛ dɛ li gba zɔ̃ɛ gɛ,

³³ nɛ obenɔ 'da nɛ wa yɛnggɛ sɛ do onadalamɛnɔ 'da wa dɛ li gba zɔ̃ɛ gɛ we 'bu sabɛlɛ nalɛ. Tɛ wa ma zɛlɛ sɛ olo kɛ nɛ bɛ̃a we dɛ olo nu mi ni gbaa na, nɛ vɛ̃ nɛ le dɛ li gba zɔ̃ɛ gɛ sɛ nɛ de.

³⁴ Ɔ nɛ kɛ nɛ yɛnggɛ zi we zɔ nùi 'do 'bu tũ nalɛ ni, ma hã tɛ nɛ ma zɛlɛ sɛ tɛ mɛ 'bɔ olo 'dã mɛ 'da nɛ we 'bu sabɛlɛ nalɛ. Tũ kpo sɛ a sabɛlɛ kpo. Na mɛ ni, nɛ nɛ ĩ sɛ na, bɛ̃ we nu mi ma 'danga wena.

³⁵ Mi nwa, mi tɔ́a, nɛ mi kana tɛ mi na, nɛ fe sɛ vɛ̃ dɛ li gba zɔ̃ɛ gɛ. Mi dɛ sɛ do nɛ na mɛ ni, we kɛ nɛ a o'dã wi. Nɛ mba ngba nɛ, nɛ nɛ bɛ̃ we nu mi.”

^36-37 Nɛ NWA tumba o'dã zɛlɛ hã owinɔ Mɔizɛ tombo zi wa na, wa yɛnggɛ we zɔ nùi ni, nɛ wa fia. Mba gɔ, wa tɔ̃a 'dã we si ngɔ nùi wa zɔa ni, nɛ ma hã nɔ̃lɔ̃ zã hã owinɔ na, wa tɔ̃ 'dã we hã Mɔizɛ.

³⁸ Sanga owinɔ ni, tati a Yozue do Kalɛbɛ hã wa 'bana zi nza.

Obe Israɛlɛ wa bɛ̃a 'bɔ we dɛ olo nu NWA

³⁹ Mɔizɛ nɛa, nɛ a tɔ̃ wenɔ ni vɛ̃ hã obe Israɛlɛ, nɛ ma zɛlɛ zi sila wa wena.

⁴⁰ Gulu nɛ hã do sanga titole belee, nɛ wa kulu ngɔ we la dɛ ngɔ kalanɔ i, nɛ wa ma ngɔ tɔ̃ na: “Lɛ dɛa 'dã mɔ. Nɛ nde di dɔ́ ni, lɛ kɔ̃a we nɛ dɛ ngɔ nùi kɛ nwa bia hã lɛ ni.”

⁴¹ Nɛ Mɔizɛ aka wa na: “Gulu kɛ nɛ nɛ i mɔ we ge nde? Kɛ nɛ dɛ ni a olo nu Gale gɔ. Fala kɛ nɛ nɛ i mɔ, nɛ nde ma wé sɛ do nɛ gɔ.

⁴² Nɛ tɛ nɛ̀ gɔ, we kɛ NWA 'do nɛ bina. Fala kɛ nɛ nɛ, nɛ owi sɛnɛ nɛ wa bi sɛ nɛ, nɛ wa nɛ ngɔ nɛ.

⁴³ Oamalɛkɛ do Okanana wa dati nɛ ni boe. Wa kumu sɛ nɛ li bolo. NWA sɛ 'do nɛ bina, we kɛ nɛ bɛ̃a gɛnɛ dɛ olo nu a do'do.”

⁴⁴ Obe Israɛlɛ wa dɛa nga zu, nɛ wa kɔa tɛ mɛ we la dɛ ngɔ kalanɔ i. Nɛ nde Mɔizɛ 'bana dɛ fala ɔi ni, fala nɛ kpo do Sanduku Gba Tɔkɛ.

⁴⁵ Nɛ Oamalɛkɛ do Okanana, kɛ wa ɔ ngɔ kalanɔ ni, wa zĩlĩ, nɛ wa bi wa, nɛ wa nɛ ngɔ wa. Nɛ wa ndaka 'do wa gbaa tɛ Horma.