Tɔlɔ Mɔ 12 - WE NU GALE 1995

NWA fi zɛlɛ ngbɛlɛ tɛ Miriamɛ

¹ Mɔizɛ ba zi mbe gele wuko nu kpala Kusanɛ. Nɛ Miriamɛ do Aroni onya Mɔizɛ, wa ma ngɔ tɔ̃ tɛ̃ a we duzu ba koe ni

² na: “NWA wele tɛ mɛ we do wala 'da Mɔizɛ iko nde? A wele tɛ mɛ 'bɔ we do wala 'da lɛ wila.” Wa tɔ̃a ni, nɛ NWA zele.

³ Nɛ nde Mɔizɛ wèlè we kpo gɔ. Mba gɔ, a zi a wi kɛ a ba tɛ̃ a dɛ nù nɛa ngɔ winɔ ngɔ nù gɛ vɛ̃.

⁴ Nɛ NWA sa mɔ hã Mɔizɛ, Aroni do Miriamɛ, nɛ a tɔ̃ hã wa na: “Nɛ do talɛ zu nɛ, nɛ nɛ́ dɛ nu tɔa Tande we kpa ngba wi do mi.” Wa hɔa i mɔ,

⁵ nɛ nwa zĩlĩ dɛ kɔ lɔnggɔ zɛ̃ we, nɛ a yolo dɛ nu tɔa Tande ni. Nɛ a sa mɔ hã Aroni do Miriamɛ, nɛ wa do bɔa nɛ, wa tili dɛ dati.

⁶ Nɛ a tɔ̃ hã wa na: “Nɛ zélé we mi nɛ tɔ̃ hã nɛ gɛ do dia nɛ. Fala kɛ mi saka wele sanga nɛ na, a gba olo nu mi nde, nɛ mi be tɛ mi li wi ni do kɔ yalɛ, nɛ mi wele we do a.

⁷ Nɛ nde kɛ 'da wi toe 'da mi Mɔizɛ, kɛ a zɔ mɔ tɛ owinɔ 'da mi do wala olo nɛ ngboo ni, ma ɔ́ ni gɔ.

⁸ Mi kɔ̃̀ we wele we hã a do gba we gɔ, mi fi li nɛ hã a dɛ nza ngboo. Mi be tɛlɛ tɛ mi hã a, nɛ a zɔ. Kɔ gulu kɛ nɛ dɛ́ kili tɔ̃ tɛ wi toe 'da mi Mɔizɛ gɔ we ge nde?”

⁹ Na mɛ ni, zã nwa nɔ̃lã dɛ tɛ wa, nɛ a la.

¹⁰ 'Da fala zɛ̃ we kũ dɛ zu tɔa Tande i ni, nɛ tɛ Miriamɛ kutu do ngbɛlɛ. Aroni nɛa we zɔ na, Miriamɛ do ngbɛlɛ ni,

¹¹ nɛ a tɔ̃ hã Mɔizɛ na: “Nwa, lɛ do ngbangga. Nɛ nde mi gɔ kɔ̃ mɔ na, mɔ tɛ hã̀ etumbu hã lɛ we dɛa mɔ yɔnda lɛ dɛa gɛ gɔ.

¹² Da dɛ kɔ mɔ dɛ́ na, Miriamɛ ɔ nɛ fio nzɔ be kɛ wa nɛ ko a, nɛ nde mbee tɛ̃ a 'danga ia ni gɔ.”

¹³ Ma kɛ Mɔizɛ ala nu a hã NWA na: “Aa Gale, mi gɔ kɔ mɔ na, mɔ kɔ, nɛ mɔ kpásá a.”

¹⁴ Nɛ NWA gese hã a na: “Fala kɛ baa a tufu sɔ sã nu ɛ dɛ li a, we dã a, nɛ a dungu sɔ do sape nɛ 'do tũ sambo. Kɔ ma wia na, mɔ fo tɛ mɛ 'bɔ a fala ɔi, we tũ sambo. Nɛ 'do nɛ, nɛ a kpolo sɛ tɛ̃ a.”

¹⁵ Wa fua Miriamɛ tɛ fala ɔi do'do we tũ sambo, nɛ obe Israɛlɛ wa lè wala gɔ we 'bɔ 'da a.

¹⁶ A nɛa we kpolo tɛ̃ a dɛ fala ɔi do'do ni, nɛ wa kulu ngɔ tɛ Haserɔtɛ, nɛ wa la dɛ li gba zɔ́ Paranɛ. Wa hɔa i mɔ, nɛ wa 'dafa fala ɔi 'da wa dɛ di ni.