Tɔlɔ Mɔ 11 - WE NU GALE 1995

Gale tumba we, nɛ ma bɛlɛ mbe fala ɔi 'da obe Israɛlɛ

¹ Ngba soe kpo, nɛ obe Israɛlɛ wa bi tɛ wa hã NWA wena. Kɔ NWA nɛa we zele bi tɛ wi 'da wa, nɛ zã a nɔ̃lã, nɛ a tombo we, nɛ ma bɛlɛ mɛnɔ tɛ mbe nu fala ɔi 'da wa.

² Obe Israɛlɛ wa nɛa we zɔ ni, nɛ wa he mɔ, nɛ wa sa mɔ hã Mɔizɛ na, a gala lo. Mɔizɛ ala nu a do zu li wa hã NWA, nɛ we bi.

³ Ma kɛ wa sa li fala ni na Tabera, gulu nɛ na: “Nyɛa We”, we kɛ nwa fi we tɛ fala ɔi 'da wa ni.

Obe Israɛlɛ wa gɔa mulu sa'de

⁴ Ombe gele wele wa lia zi sanga obe Israɛlɛ tɛ li wala gɛnɛ 'da wa. Nɛ mbe ngba soe kpo, nɛ sɔkpã ba nu ogele winɔ ni. Nɛ wɔ nyɔngɔ mulu sa'de ba wa wena. Nɛ obe Israɛlɛ wa ma ngɔ bi tɛ mɛ 'bɔ tɛ wa tɛ tɔ̃ na: “Ee nɛ gɛ! Lɛ nɛ kpa mbe mulu sa'de we nyɔngɔ nɛ do nde?

⁵ Ee! Tɛ ngɔ nù Ezipeto i, lɛ nyɔngɔ zi kɔyɔnɔ vɛ̃, ɔ nɛ kɛ zã lɛ kɔa ni. Lɛ nyɔngɔ zi 'bɔ osindo, osa, do omatungulu kpi do kpi.

⁶ Kɔ kɛ gɛ, ngawi 'da lɛ ma ia do'do. Mɔ kpo kɔ mɛnɔ ni na lɛ nyɔngɔ ma bina. Tũ kpo kpo, lɛ nyɔngɔ tati a mana gɛ iko.”

⁷ Mana ma ɔ zi fɛ̃a nɛ gbãlã mũlũ ni, nɛ ma ɛ̃fɛ̃ ɔ nɛ mukate kɛ wa mba do nɔ gɔlɔ ni.

^8-9 Do tũi, nɛ ma ala zi do mbɔɛ fala nɛ kpo, dɛ kɛ zã fala ɔi 'da wa. Nɛ do titole, nɛ owinɔ wa yɛnggɛ we kala ma. Nɛ wa o zi ma ngɔ ta, tabi wa to do kungba, nɛ wa gi ma do kpana, tabi wa dɛ do obisikiti. Mana ma ɔ zi nɛ mukate, kɛ wa dɔa do nɔ ni.

¹⁰ Mɔizɛ zila kɛ obe Israɛlɛ wa bi tɛ wa nu tɔa tandenɔ 'da wa ni, nɛ ma yɛkɛ sila a, we kɛ zã NWA nɔ̃lɔ̃ dɛ tɛ wa.

¹¹ Nɛ Mɔizɛ aka NWA na: “Aa NWA, gulu kɛ mɔ dɛ mi 'danga ní ni we ge nde? Gulu kɛ mi dè 'bɔ li mɔ gɔ, nɛ mɔ hã to fɔmɔ gili winɔ gɛ hã mi ni, we ge nde?

¹² Mi a mi dɛa wa nde? Nɛ mi a mi kua wa, takɔ mɔ tɔ̃ hã mi na, mi 'bolo wa dɛ kɔ̃ mi ɔ nɛ be nzɔ be, nɛ mi kã wa dɛ ngɔ nùi mɔ kpua mbulu nɛ hã oyaa lɛ ni nde?

¹³ Mi nɛ kpa mulu sa'de na, mi hã ma hã winɔ vɛ̃ kɛ wa bi tɛ wa gɛ do nde?

¹⁴ Mi wè tɛ ba dĩ tole winɔ gɛ zu mi kpo gɔ, ma nɛa ngɔ mi do'do.

¹⁵ Fala kɛ mɔ kɔ we dɛ mi na mɛ ni, nɛ ma wia wá na, mɔ dɛ 'bako hã mi, nɛ mɔ gbɛ mi do'do. Mi fe, nɛ mi zɔ́ sɛ 'bɔ ngamɛ mɔ hã ma hã mi gɛ gɔ.”

¹⁶ Nɛ NWA tɔ̃ hã Mɔizɛ na: “Mɔ ngɛ́mɛ́ li owi wili 'bu wa sambo, kɛ wa a okumu do okpasa wi ngɔ obe Israɛlɛ, nɛ wa a owi dĩ ni. Nɛ mɔ nɛ́ do wa dɛ nu tɔa Tande i, nɛ mɔ tɔ̃ hã wa na, wa yolo do mɔ dɛ dati mi ni.

¹⁷ Mi zĩlĩ sɛ we wele we do mɔ dɛ di ni. Nɛ mi dɛ sɛ na, Hi Wi kɛ mi hã ma hã mɔ ni, zĩlĩ tɛ mɛ 'bɔ ngɔ wa. Na mɛ ni, nɛ wa gala sɛ mɔ, nɛ mɔ bá sɛ 'bɔ dĩ tole winɔ gɛ zu mɔ kpo gɔ.

¹⁸ Nɛ mɔ tɔ̃́ hã obe Israɛlɛ na: ‘Bindɛ, nɛ nɛ fɔlɔ tɛ nɛ we hɔ sa wi li NWA. Nɛ kpa sɛ mulu sa'de we nyɔngɔ nɛ. NWA zila bi tɛ wi 'da nɛ kɛ nɛ tɔ̃ na, lo do gã wɔ nyɔngɔ mulu sa'de, do kɛ nɛ tɔ̃ 'bɔ na, lo zi Ezipeto i do dia nɛ ni. Ma kɛ a hã sɛ mulu sa'de hã nɛ na, nɛ nyɔngɔ.

¹⁹ Nɛ kpá sɛ ma 'do tũ kpo tabi tũ bɔa iko gɔ. Tabi 'bɔ we tũ mɔlɔ, tũ 'bu tabi 'bu tũ bɔa gɔ.

²⁰ Nɛ nyɔngɔ sɛ mulu sa'de gbaa 'do zɛkɛ kpo, nɛ ma 'danga sɛ nu nɛ, nɛ ma gbala do kɔ zɔ́ nɛ sɛ nɛ de. Ki ni a etumbu kɛ nɛ kpa sɛ ma, we kɛ nɛ bɛ̃a gɛnɛ nwa, kɛ a ɔ dɛ sanga nɛ gɛ, nɛ nɛ bi tɛ nɛ dati a na, lo hɔa nza kɔ Ezipeto we ge nde ni.’ ”

²¹ Nɛ Mɔizɛ tɔ̃ hã nwa na: “Winɔ mi kã wa gɛ, wa nɛa ngɔ koto kama gazɛlɛ nɛa. Nɛ mɔ tɔ̃ tɛ mɛ na, ɛ nɛ hã mulu sa'de hã wa gbaa zɛkɛ kpo vɛ̃ nde!

²² Gɛnɛ kɔ lɛ gbɛ sɔ obatanɔ, oduanɔ, do ongɔmbɛnɔ 'da lɛ vɛ̃, nɛ nde ma wé sɔ zu wa gɔ. Tabi lɛ gbɛ sɔ 'bɔ okɔyɔnɔ 'dɔ gba lì vɛ̃, nɛ nde ma wé sɔ 'bɔ gɔ.”

²³ Nɛ nwa gese hã a na: “Ngawi 'da mi do ndɔti nɛ bina. 'Da kala sɛ gɔ, nɛ mɔ zɔ sɛ na, we mi tɔ́a ni ma dɛ sɛ tɛ̃ ɛ, tabi ma dɛ́ sɛ tɛ̃ ɛ gɔ nde.”

Gale tumba Hi Wi 'da a dɛ ngɔ okumu 'bu wa sambo

²⁴ Nɛ Mɔizɛ hɔa nza, nɛ a tɔ̃ wenɔ NWA tɔ̃a hã a ni hã owinɔ. 'Do nɛ, nɛ a mba li okumunɔ 'da obe Israɛlɛ 'bu wa sambo, nɛ a a wa zĩ do tɔa Tande takpa.

²⁵ Nɛ NWA zĩlĩ dɛ kɔ lɔnggɔ zɛ̃ we, nɛ a wele we do Mɔizɛ. Nɛ a dɛ na, Hi Wi kɛ a hã ma hã Mɔizɛ ni zĩlĩ tɛ mɛ 'bɔ ngɔ okumunɔ, nɛ wa ma ngɔ gba olo nu a Gale. Nɛ nde wa gbà 'do nɛ nyɛlɛ gɔ.

²⁶ Ombe wele bɔa kɔ okumunɔ 'bu wa sambo ni, li wa a Ɛldadɛ do Medadɛ, wa 'bana dɛ fala ɔi ni, nɛ nde wa nɛ nu tɔa Tande i gɔ. Nɛ Hi Wi zĩlĩ tɛ mɛ 'bɔ dɛ ngɔ wa, nɛ wa ma ngɔ gba olo nu Gale dɛ li winɔ tɛ fala ɔi ni.

²⁷ Nɛ mbe be zagbãlã kpo yu we tɔ̃ hã Mɔizɛ na, Ɛldadɛ do Medadɛ wa tɛ gba olo nu Gale tɛ fala ɔi i.

²⁸ Nɛ Yozue, be 'da Nunɛ, kɛ a a wi gala Mɔizɛ yolo zi ngɔ zagbãlã tɛ̃ a ni, zila ni, nɛ a he mɔ hã Mɔizɛ na: “Mɔizɛ, wele mi, mɔ kpé nu wa do'do!”

²⁹ Nɛ Mɔizɛ gese hã a na: “Mɔ bi tɛ mɔ we mi nde? Ma wia sɔ na, nwa tombo Hi Wi 'da a dɛ ngɔ obe Israɛlɛ vɛ̃, takɔ wa hɔ owi gba olo nu a.”

³⁰ 'Do nɛ, nɛ Mɔizɛ do okumu Israɛlɛ, wa kpolo tɛ wa dɛ fala ɔi i.

NWA tumba onɔɛ hã obe Israɛlɛ

³¹ NWA dɛa, nɛ bũ fi ngɔ gba lì, nɛ ma kala onɔɛ ɔ nɛ ogbanu ni, nɛ wa ma ngɔ bũlũ dɔ̃ɔ do nù gɛ. Wa hɔa tɛ fala ɔi, nɛ wa ala nù. Wa ala zĩ do fala ɔi, nɛ wa pɛsɛ do nù gɛ nyɛlɛ wena. Nɛ wa ala dɛ ngɔ ngba wa ɔ nɛ mɛtrɛ kpo ni dɛ ngɔ.

³² Ma kɛ ngba soe ni vɛ̃, do tũi ni vɛ̃, do tũ kɛ 'do nɛ ni, owinɔ wa kala onɔɛnɔ ni. Nɛ gɛnɛ kɔ wele kɛ a kàlà wa dɛlɛ gɔ, nɛ wa we kilo dɛlɛ wena. Wa yɛlɛ wa dɛ kɛ zã tandenɔ 'da wa na wa kolo.

³³ Nɛ nde mulu nɔɛnɔ ni 'bana dɛ kɔ nu obe Israɛlɛ iko, kɔ wa tɛ nyɔngɔ sanga nɛ e gɔ, nɛ zã NWA nɔ̃lɔ̃ dɛ tɛ wa, nɛ a tombo 'dã zɛlɛ na, ma ba wa.

³⁴ Ma kɛ wa sa li fala ni na Kibrɔtɛ-Tava, gulu nɛ na: “Zunu dɛ Nga'ba.” We kɛ wa mi winɔ kɛ wa dɛa zi sɔkpã mulu sa'de ni dɛ di ni.

³⁵ Obe Israɛlɛ wa yula Kibrɔtɛ-Tava, nɛ wa la dɛ Haserɔtɛ. Wa hɔa i mɔ, nɛ wa 'dafa fala ɔi 'da wa dɛ di ni.