Tɔlɔ Mɔ 10 - WE NU GALE 1995

Wa dula mɔtũlũ do fɛ̃a mɔ bolo

¹ NWA tɔ́a hã Mɔizɛ na:

² “Mɔ bá fɛ̃a mɔ bolo, nɛ mɔ dolo do mɔtũlũ bɔa. Nɛ ma gala sɛ nɛ we ngbolo li obe Israɛlɛ, tabi we tɔ̃ hã wa na, wa le wala.

³ 'Da fala wa dama sɛ mɔtũlũnɔ bɔa ni fala nɛ kpo, nɛ obe Israɛlɛ vɛ̃ wa ngbolo sɛ li ngba wa dɛ kɛ zã mɔ, dɛ dati tɔa Tande kpa ngba wi do mi.

⁴ Fala kɛ wa dama mɔtũlũ kpo iko nde, nɛ tati a okumunɔ do ogã wi ngɔ nu fɛlɛ kulanɔ, wa ngbolo sɛ li ngba wa dɛ kɛ zã mɔ.

^5-6 Fala kɛ wa dama mɔtũlĩ, kɔ wa gɔnɔ sanga nɛ dɔ̃ dɔ̃, nɛ ki ni ma be sɛ na, obe Israɛlɛ wa le wala. Kuti mɔtũlĩ wele, nɛ nu kpalanɔ kɛ wa ɔ do dati tɔa Tande si 'biti gba wese ni, wa le sɛ wala. Nɛ do bɔa kɛ, nɛ wanɔ wa ɔ do kɛ zã tɔa Tande si ba gɔtɔ ni, wa la.

⁷ Nɛ nde we ngbolo li winɔ, nɛ wa dama sɛ mɔtũlĩ, nɛ nde wa gɔ́nɔ́ sɛ sanga nɛ dɔ̃ dɔ́ gɔ.

⁸ “Winɔ wa wia we dama mɔtũlĩ ni, wi a onganganɔ, kɛ wa a obe zã Aroni ni. Nɛ nɛ, obe Israɛlɛ do obe zã nɛ, nɛ dɛ sɛ mbula ni 'da fala fai.

⁹ 'Da fala nɛ sɛ a ngɔ nùi 'da nɛ, kɔ nɛ nɛ we bi do owi sɛnɛ nɛ, nɛ nɛ dama sɛ mɔtũlũnɔ, nɛ nɛ he hiamɔ bolo, sɛ a tɛ mi gba ngɔ nɛ de. Na mɛ ni, nɛ mi, NWA Gale 'da nɛ, mi kpasa sɛ nɛ ti kɔ owi sɛnɛ nɛ.

¹⁰ Nɛ 'da fala kɛ nɛ dungu ɛngganɔ, ɔ nɛ ɛngga mbé hɔa zɛkɛ tabi gele ɛngga nde, kɔ nɛ nɛ dɔ sa'denɔ we dɔnggɔ do mi, tabi nɛ nɛ gbɛ ombe we be dɛa na, nɛ nɛ dama sɛ mɔtũlĩ. Nɛ do 'da fala ni, nɛ tɛ mi ma gba sɛ ngɔ nɛ. Mi a NWA Gale 'da nɛ.”

YOLO SINAI WE HƆ LI NGBALA NÙ MOABƐ Óbe Israɛlɛ wa lia wala

¹¹ Do kɔ̃ zɛkɛ 'bu nɛ bɔa, zɛkɛ 'da bɔa, do kɔ bɔa sabɛlɛ 'do kɛ obe Israɛlɛ wa hɔa nza Ezipeto ni, nɛ zɛ̃ we ma yolo dɛ ngɔ tɔa Tande do si fala Sanduku Gba Tɔkɛ ɔ nɛ ni, nɛ ma kũ dɛ ngɔ.

¹² Obe Israɛlɛ wa zɔa ní, nɛ wa kulu ngɔ tɛ li gba zɔ̃ Sinai, nɛ wa le wala. Zɛ̃ we kpia dati wa, nɛ ma yolo nù tɛ li gba zɔ Paranɛ.

¹³ Ki ni zi a kuti kɛ na, obe Israɛlɛ wa kulu ngɔ do tɛlɛ tɛ kɛ NWA ba do nu a hã Mɔizɛ ni.

¹⁴ Ngɔ gili nu kpala obe Israɛlɛ kɛ wa ɔ zi ti bɛndɛlɛ 'da nu kpala Yuda ni, wa la dati. Nɛ Nasoni, be 'da Aminadabɛ a kpia ti osodanɔ 'da wa.

¹⁵ 'Do wa, nɛ nu kpala Isakarɛ do gã wi ngɔ sodanɔ 'da wa Nɛtaneɛlɛ, be 'da Suarɛ wa kpe.

¹⁶ Nɛ dɛ 'do wa, wi a nu kpala Zabuloni do gã wi ngɔ wa Eliabɛ, be 'da Heloni.

¹⁷ 'Do nɛ, nɛ wa yala tɔa Tande. Nɛ obe zã Gɛrsoni do Mɛrari wa kala ma la do nɛ.

¹⁸ Dɛ 'do nɛ, nɛ ngɔ gili nu kpala obe Israɛlɛ kɛ wa ɔ zi ti bɛndɛlɛ 'da nu kpala Rubɛnɛ ni, wa kpia dɛ 'do wa. Nɛ Elisurɛ, be 'da Sɛdeurɛ a kpia ti osodanɔ 'da wa.

¹⁹ 'Do wa, nɛ nu kpala Simeoni do gã wi ngɔ sodanɔ 'da wa Sɛlumiɛlɛ, be 'da Surisadai wa kpe.

²⁰ Nɛ dɛ 'do wa, wi a nu kpala Gadɛ do gã wi ngɔ sodanɔ 'da wa Eliasafɛ, be 'da Deuɛlɛ.

²¹ Nɛ olevitɛnɔ kɛ wa a obe zã Kehatɛ, nɛ wa a wa ba tole mɛnɔ ma santo wena ni, wa kpia dɛ 'do wa. Kɔ wa nɛ hɔ tɛ mbé fala kɛ wa nɛ ɔ nɛ ni, nɛ nde otala levitɛnɔ wa zĩ sɔ tɔa Tande dɛ ngɔ ia.

²² Ngɔ gili nu kpala obe Israɛlɛ, kɛ wa ɔ zi ti bɛndɛlɛ 'da nu kpala Efraimɛ ni, wa kpia tɛ mɛ 'bɔ. Nɛ Elisama, be 'da Amihudɛ kpia ti osodanɔ 'da wa.

²³ 'Do wa, nɛ nu kpala Manase do gã wi ngɔ sodanɔ 'da wa Gamliɛlɛ, be 'da Pɛdasurɛ wa kpe.

²⁴ Nɛ dɛ 'do wa, wi a nu kpala Bɛnzamɛ do gã wi ngɔ sodanɔ 'da wa Abidanɛ, be 'da Gidoni.

²⁵ 'Do nɛ wá vɛ̃, nɛ ngɔ gili nu kpala obe Israɛlɛ, kɛ wa ɔ zi ti bɛndɛlɛ 'da Danɛ ni, wa kpe. Wa a wa zɔ zi mɔ tɛ winɔ do ngɔ go'do nga. Nɛ Ahiezɛrɛ, be 'da Amisadai kpia ti osodanɔ 'da wa.

²⁶ 'Do wa, nɛ nu kpala Asɛrɛ do gã wi ngɔ sodanɔ 'da wa Pagiɛlɛ, be 'da Okranɛ wa kpe.

²⁷ Nɛ dɛ 'do wa, wi a nu kpala Nɛftali do gã wi ngɔ sodanɔ 'da wa Ahira, be 'da Enanɛ.

²⁸ Ki ni a tɛlɛ tɛ kɛ wa 'dafa zi do ngɔ gili winɔ na, wa nɛ do ma gɛ a ni.

Mɔizɛ fa wele we kpe ti obe Israɛlɛ li wala gɛnɛ 'da wa

²⁹ Mɔizɛ tɔ̃a hã Hobabɛ, be 'da kɛfɛ a Yetro, wi Madianɛ na: “Lɛ kɔa we nɛ dɛ tɛ nùi kɛ NWA tɔ́a na, ɛ hã sɛ ma hã lɛ ni. A kpua zi mbulu hã lɛ obe Israɛlɛ na, a hã sɛ odia mɔ hã lɛ. Kɔ mɔ kã́ lɛ, nɛ lɛ kɛ̃ sɛ sanga dia mɛnɔ a kɔa we hã ma hã lɛ ni do mɔ.”

³⁰ Nɛ Hobabɛ gese na: “Mi nɛ́ sɛ gɔ. Mi kɔa we kpolo tɛ mi dɛ kɔ le kua mi ni.”

³¹ Nɛ Mɔizɛ tɔ̃ 'bɔ hã a na: “Mɔ kɔ̃, nɛ mɔ tɛ là lɛ gɔ. Mɔ kpé ti lɛ, we kɛ mɔ ĩ ti falanɔ kɛ lɛ wia we 'dafa fala ɔi 'da lɛ tɛ nɛ li gba zɔ̃ɛ gɛ ni.

³² Mɔ kã lɛ, nɛ lɛ kɛ̃ sɛ sanga dia mɛnɔ NWA nɛ hã sɛ hã lɛ ni do mɔ.”

Obe Israɛlɛ wa kulu ngɔ

³³ Obe Israɛlɛ wa kulu ngɔ tɛ kala 'da NWA, nɛ wa la gbaa 'do tũ talɛ. Nɛ Sanduku Gba Tɔkɛ 'da NWA zi do dati wa, takɔ ma fa fala kɛ wa wia we 'dafa do fala ɔi 'da wa ni.

³⁴ Do gba wese, nɛ zɛ̃ we 'da NWA ma kã zi wa fai.

³⁵ Nɛ 'da falanɔ vɛ̃ kɛ wa nɛ we kulu ngɔ we la do Sanduki Gba Tɔkɛ ni, nɛ Mɔizɛ he mɔ na: “NWA, mɔ kúlú ngɔ, hã mɔ pɛ́sɛ́ owi sɛnɛ mɔ, sɛ a wa yu dati mɔ de.”

³⁶ Kɔ wa nɛ we yolo nù we e Sanduku nù ni, nɛ a he mɔ na: “NWA, mɔ kpóló tɛ mɔ dɛ kɔ gba gili nu fɛlɛ kulanɔ 'da lɛ obe Israɛlɛ nga.”