Tɔlɔ Mɔ 1 - WE NU GALE 1995

OBE ISRAƐLƐ TƐ LI GBA ZƆ̃ SINAI Kuti kɛ wa tɔlɔ nu kpala obe Israɛlɛ

¹ Do zɛkɛ 'da bɔa, kɔ̃ nɛ kpo, do kɔ bɔa sabɛlɛ 'do kɛ obe Israɛlɛ wa Ia ngɔ nù Ezipeto, kɔ wa hɔa tɛ li gba zɔ̃ Sinai ni, nɛ NWA Gale wila we hã Mɔizɛ tɛ kɔ tɔa Tande kpa ngba wi do a na:

² “Mɔ do Aroni, nɛ tɔ́lɔ́ obe Israɛlɛ, nɛ nɛ kɔmɔ li wi wilinɔ vɛ̃ do nu kpala wa do nu fɛlɛ wa.

³ Nɛ tɔ́lɔ́ wi wilinɔ vɛ̃ kɛ wa do 'bu sabɛlɛ bɔa we kũ dɛ ngɔ, nɛ wa wia we dɛ to soda ni.

⁴ Kpasa wi nu fɛlɛ kula kpo kɔ nu kpala kpo kpo, a gala sɛ nɛ.”

^5-15 Li okpasa wi nu fɛlɛ kulanɔ ni ma kɛ: Nu kpala Li kpasa wi Rubɛnɛ Elisurɛ, be 'da Sɛdeurɛ Simeoni Sɛlumiɛlɛ, be 'da Surisadai Yuda Nasoni, be 'da Aminadabɛ Isakarɛ Nɛtaneɛlɛ, be 'da Suarɛ Zabuloni Eliabɛ, be 'da Heloni Efraimɛ Elisama, be 'da Amihudɛ Manase Gamliɛlɛ, be 'da Pɛdasurɛ Bɛnzamɛ Abidanɛ, be 'da Gidoni Danɛ Ahiezɛrɛ, be 'da Amisadai Asɛrɛ Pagiɛlɛ, be 'da Okranɛ Gadɛ Eliasafɛ, be 'da Deuɛlɛ Nɛftali Ahira, be 'da Enanɛ

Nu kpala Li kpasa wi

¹⁶ Okpasa wi nu fɛlɛ kulanɔ, wa saka wa ni, wa 'bɔ a ogã wi ngɔ osoda Israɛlɛ.

¹⁷ Nɛ do kpo zɛkɛ 'da bɔa, kɔ̃ nɛ kpo, nɛ owi wilinɔ 'bu ngɔ wa bɔa, kɛ wa saka wa ni, wa mba do Mɔizɛ do Aroni,

¹⁸ nɛ wa sa mɔ hã owinɔ vɛ̃. Nɛ wa kɔmɔ li obe Israɛlɛ vɛ̃, kɛ wa do 'bu sabɛlɛ bɔa, we kũ dɛ ngɔ ni. Nɛ wa tɔlɔ wa do 'da nu kpala wa, do nu fɛlɛ wa,

¹⁹ ɔ nɛ kɛ NWA ba do nu a hã Mɔizɛ ni. Wa tɔlɔ zi winɔ tɛ li gba zɔ̃ Sinai.

^20-43 Wa tɔlɔ winɔ kɔ nu kpala obe Israɛlɛ kpo kpo do 'da nu fɛlɛ wa. Nɛ wa kɔmɔ li wa, nɛ wa tɔlɔ wi wilinɔ vɛ̃ kɛ wa do 'bu sabɛlɛ bɔa, we kũ dɛ ngɔ, nɛ wa wia dɛ to soda ni. Wa ndua do nu kpala Rubɛnɛ, kuti be 'da Yakɔbɔ. Nɛ wa kpa ngɔ gili wa ɔ nɛ mɛ gɛ: Nu kpala Ngɔ gili wa Rubɛnɛ 46.500 Simeoni 59.300 Gadɛ 45.650 Yuda 74.600 Isakarɛ 54.400 Zabuloni 57.400 Efraimɛ 40.500 Manase 32.200 Bɛnzamɛ 35.400 Danɛ 62.700 Asɛrɛ 41.500 Nɛftali 53.400

Nu kpala Ngɔ gili wa

⁴⁴ Ki ni a ngɔ gili winɔ kɛ Mɔizɛ, Aroni do okpasa wi nu fɛlɛ kulanɔ kɔ onu kpala Israɛlɛ, wa tɔlɔ wa gɛ a ni.

⁴⁵ Ngɔ gili obe Israɛlɛ kɛ wa tɔlɔ wa, nɛ wa wia dɛ to soda ni,

⁴⁶ Wa zi vɛ̃ 603.550.

To kɛ ma zɔa tati a olevitɛnɔ

⁴⁷ 'Da fala tɔlɔ winɔ, nɛ nde wa tɔ̀lɔ̀ owi nu kpala Levi fala nɛ kpo do gele obe Israɛlɛ gɔ.

⁴⁸ Mba gɔ, NWA ba zi nu a hã Mɔizɛ na:

⁴⁹ “Da dɛ kɔ mɔ tɔ́lɔ́ obe zã Levi fala nɛ kpo do gele obe Israɛlɛ gɔ.

⁵⁰ Mɔ la sɛ to zɔ mɔ kɔ tɔa Tande, fala wa ia do ta Gba Tɔkɛ, do obe si'bili mɛnɔ kɔ tɔa ni hã wa. Wa ba sɛ tole tɔa Tande do obe si'bili mɔ tɛ nɛ, nɛ wa dɛ sɛ to do kɔ tɔa Tande i. Nɛ wa ɔ sɛ zĩ do ma takpa.

⁵¹ “'Da fala nɛ kulu ngɔ we la nɛ ni, nɛ wa sɛ a wa nɛ yala tɔa Tande. Kɔ nɛ hɔ tɛ mbé fala ɔi, nɛ wa a wa nɛ zĩ sɛ 'bɔ ma dɛ olo nɛ. Hã fala kɛ mbe gele wele kɔlɔ do tɔa Tande, nɛ wa gbɛ sɛ a.

⁵² Tala gele obe Israɛlɛ, wa ɔ sɛ wele do wele dɛ kɔ ngɔ gili sodanɔ 'da wa, do ti bɛndɛlɛ 'da wa.

⁵³ Nɛ nde tati a obe zã Levi hã wa ɔ sɛ zĩ do tɔa Tande takpa, nɛ wa dɛ sɛ toe 'da wa dɛ di ni. Na mɛ ni, nɛ wa amba sɛ zu obe Israɛlɛ na, wa tɛ kɔ́lɔ́ do tɔa ni, kɔ dã ba mi dɛ tɛ wa gɔ.”

⁵⁴ Obe Israɛlɛ wa dɛa vɛ̃ ɔ nɛ kɛ NWA ba do nu a hã Mɔizɛ ni.