NEHEMIE 9 - WE NU GALE 1995

Oyudanɔ wa ngɛmɛ ngba wa we gbala 'dã mɛ 'da wa

¹ Ma hɔa kɔ̃ tũ 'bu nɛ bɔa ngɔ nɛ nalɛ, do kɔ kpo kpo zɛkɛ ni, nɛ obe Israɛlɛ, wa ngɛmɛ ngba wa, we kɛ mɛ zi a ngba soe bɛ̃ nyɔngɔmɔ we dɔnggɔ do Gale. Wa hi'da saki, nɛ wa a bũ zu wa.

² Wa 'bila tɛ wa tɛ ogele nunɔ. Nɛ wa ma ngɔ gbala 'dã mɛnɔ 'da wa do kɛ 'da oyaa wa hã Gale.

³ Nɛ 'do nɛ, nɛ wa kulu ngɔ, nɛ wa yolo do nyanga wa 'do sa talɛ, we zele we wa tɔlɔ kɔ 'buku mbula 'da NWA Gale 'da wa ni. Nɛ wa bili 'bɔ zu wa nù dati NWA Gale 'do sa talɛ, we aka a na, a fo ku'da 'dã mɛ zu wa do'do.

⁴ Nɛ owinɔ kɛ wa yula ngɔ gbagala wa dɛa we olevitɛnɔ ni. Wi a: Yesua, Bani, Kadmiɛlɛ, Sɛbania, Buni, Serebia, Bani do Kɛnani. Wa yula dɛ di ni, nɛ wa aka NWA Gale do nga gɛlɛ na, a gbaka lo.

⁵ Nɛ 'do nɛ, nɛ olevitɛnɔ gɛ: Yesua, Kadmiɛlɛ, Bani, Hakabneya, Serebia, Hodia, Sɛbania do Pɛtahia, wa hia mɔ na: “Nɛ kúlú ngɔ! Nɛ dɔ́nggɔ́ dia zu li NWA Gale 'da nɛ! Nɛ nɛ té de zu li a 'da fala fai!” “NWA, e kɔ wele do wele dɔnggɔ dɔ̃lɔ̃ li 'da mɔ, kɛ ma gã nɛa ngɔ tala ogele linɔ vɛ̃ ni.

Sambala 'da Oyudanɔ we gbala 'dã mɛ 'da wa

⁶ “Mɔ zu mɔ kpo, mɔ a NWA. Mɔ dɛa li nza do osɔlanɔ. Mɔ dɛa nùi, do mɛnɔ ngɔ nɛ vɛ̃. Mɔ dɛa gba lìnɔ, do mɛnɔ 'dɔ nɛ vɛ̃, nɛ mɔ hã kpasi hã mɔ kpo kpo kɛ mɔ dɛa ni. Oanzɛnɔ wa gu gba zugolo, nɛ wa bili zu wa nù ti mɔ.

⁷ “Mɔ, NWA Gale, mɔ zi a mɔ saka Abrama. Mɔ fua zi a kɔ le Urɛ, tɛ ngɔ nù Babilonia, nɛ mɔ ia li a na Abrahama.

⁸ Mɔ zɔa zi kɔ̃a we 'da a dɛ 'da mɔ, ma kɛ mɔ gba tɔkɔ do a, nɛ mɔ kpua mbulu ba nùnɔ gɛ hã obe zã a. Mɛ zi a nùnɔ 'da Okanana do Ohiti do Oamori, do Opɛrizi, do Oyebuzi, do Ogirgasi, takɔ owi nu fɛlɛ a wa ɔ dɛ ngɔ nùnɔ ni. Nɛ mɔ dɛa zi olo nu mɔ, we kɛ mɔ a wi bɔlɔ zu.

⁹ “Mɔ zɔa zi zɛlɛ tɛ 'da oyaa lɛ tɛ ngɔ nù Ezipeto, nɛ mɔ zila gɛlɛ wa tɛ sa mɔ hã mɔ tɛ nu gba lì Sala Tɔ̃, na mɔ gala wa.

¹⁰ Mɔ dɛa zi ogba sɔ̃ mɔ we hã ngamɔ hã nwa ngɔ nù Ezipeto, do owi olo li a, do owinɔ ngɔ nùi 'da a vɛ̃, we kɛ mɔ ĩ ti tɛlɛ tɛ kɛ Oezipeto, wa zɛlɛ zi tɛ oyaa lɛ do ngatɛ 'da wa ni. Nɛ nde gã dɔ̃lɔ̃ li 'da mɔ bia tɛ̃ ɛ, nɛ ma 'bana 'bɔ be tɛ̃ ɛ ni, tia do sɔɛ gɛ.

¹¹ Mɔ gba zi wala 'dɔ gba li hã oyaa lɛ, sɛ a wa kũ do kula nyanga wa de. Nɛ mɔ da zi owi ndaka wa 'dɔ gba 'du lì, nɛ wa bindi ɔ nɛ ta ni.

¹² Do gba wese, mɔ kã zi winɔ 'da mɔ do lɔnggɔ zɛ̃ we, nɛ do tũi, mɔ kpe dati wa do lɔnggɔ nyɛa we, nɛ ma be wala hã wa.

¹³ Mɔ yula zi li nza i, nɛ mɔ zĩlĩ we wele we do wa tɛ ngɔ kala Sinai. Mɔ bia zi bɔlɔ wala do gbãlã zã bia we hã wa, nɛ mɔ hã ngbongbo mbula hã wa.

¹⁴ Do wala 'da Mɔizɛ, wi toe 'da mɔ, wa ĩ zi ti kɔ̃ tũ ɔmɔ tɛ wa, kɛ mɛ a tũ dɔnggɔ do mɔ, nɛ mɔ bia 'bɔ ogele mbulanɔ kɔ 'buku mbula 'da mɔ hã wa.

¹⁵ “Wɔ ba zi wa, nɛ mɔ hã zi mapa kɛ ma yula li nza i ni hã wa na, wa nyɔngɔ. Wɔ lì ba wa, nɛ mɔ fua zi lì kɔ ta dɛ nza na wa nɔ. Nɛ mɔ tumba wa we bi lenɔ, kɛ mɔ kana zi tɛ mɔ we ba ma hã wa ni.

¹⁶ Nɛ nde oyaa lɛ wa dɛa zi ngatɛ, wa kɔ̃̀ we zele mbula 'da mɔ gɔ, nɛ wa dɛa nga zu.

¹⁷ Zala wa ngaka do'do, wa bɛ̃a we dɛ olo nu mɔ, nɛ tɛ wa ila ngɔ odia dɛa mɛnɔ vɛ̃ kɛ mɔ dɛa zi we wa ni, nɛ wa saka we kpolo tɛ wa kɔ ngbá tɛ Ezipeto. Nɛ nde mɔ là wa na mɛ ni gɔ, we kɛ mɔ a Gale kɛ mɔ fo ku'da 'dã mɛnɔ zu winɔ. Mɔ ĩ 'bako hã winɔ, nɛ mɔ do dia kɔ sila dɛ 'da wa. Mɔ do du sila, nɛ kɔ̃a zã 'da mɔ ma la mɔ vɛ̃.

¹⁸ Wa dula zi be wili ngɔmbɔ do mɔ bolo, nɛ wa hia mɔ na: ‘Gale 'da lɛ, kɛ a fua lɛ kɔ Ezipeto dɛ nza, a kɛ!’ Wa dɛa zi na mɛ ni, nɛ wa dã zu li mɔ nwa wena.

¹⁹ Gɛnɛ kɔ na mɛ ni, nɛ nde kɔ̃a zã 'da mɔ dɛ tɛ 'da wa, gã la li, nɛ tɛ li gba zɔ̃ i, mɔ dà zi kɔ̃ mɔ tɛ wa gɔ. Lɔnggɔ zɛ̃ we, kɛ ma be zi wala hã wa do gba wese ni, ma yù wa gɔ, nɛ lɔnggɔ nyɛa we, kɛ ma be zi wala hã wa do tũi ni, ma bì 'bɔ gɔ.

²⁰ We kɔ̃a zã 'da mɔ dɛ 'da wa, nɛ mɔ tumba Hi Wi 'da mɔ na, a hã hã zã hã wa. 'Da fala fai, mɔ tumba mana, na wa nyɔngɔ, do lì na wa nɔ, we wɔnɔ 'da wa.

²¹ Mɔ zɔa mɔ tɛ wa 'do 'bu sabɛlɛ nalɛ tɛ li gba zɔ̃ i, nɛ wa zɔ̀lɔ̀ mɔ kpo gɔ. Tulu tɛ wa ɛ̃̀ gɔ, nɛ nyanga wa hɛ̃̀ 'bɔ gɔ.

²² “Mɔ 'dɔlɔ ogele winɔ kɛ zã wa ni vɛ̃ hã wa. Wa ba nù Hɛsɛboni, kɛ Sihoni dungu zi nwa ngɔ nɛ ni, do nù Basanɛ, kɛ nwa 'da wa zi a Ɔgɛ ni.

²³ Mɔ hã onu fɛlɛ kula hã wa dɔa nɛa ngɔ osɔlanɔ li nza i. Mɔ kã wa dɛ tɛ ngɔ nù Kanana, kɛ mɔ tɔ̃a zi hã oyaa wa na, wa nɛ, kɔ wa ba ma do mɔ́ wa ni.

²⁴ Obe yaa wa, wa lia ngɔ nù Kanana, nɛ mɔ 'dafa na, owinɔ ngɔ nùi ni, wa fo tɛ wa dati wa, nɛ wa bili zu wa ti mɔ mbati 'da wa. Nɛ owinɔ 'da mɔ, wa ba nùi ni do mɔ́ wa, nɛ mɔ ba wala hã wa na, wa dɛ do owinɔ ngɔ nùnɔ ni, do onwanɔ 'da wa, nɛ́ kɛ zã wa kɔ̃a ni.

²⁵ Wa kala ole kɛ gba ngbo zĩ ma takpa, do odia nù mi do kpalɛ, do otɔa kɛ ma dunu do kpamɔ, do okɔ̃ lì kɛ wa zã ma ia, do ote vinɔ, do ote olivɛ, do ogele tenɔ kɛ wa nyɔngɔ wala nɛ nyɔnga ni. Wa nyɔngɔ mɔ, nɛ wa nɔ dɔ́, nɛ zã wa hɛ̃, nɛ wa dɛa yangga, we ode mɛnɔ vɛ̃ mɔ hã hã wa ni.

²⁶ “Nɛ nde gɛnɛ kɔ na mɛ ni, wa dɛ̃ zi olo nu mɔ gɔ. Wa bɛ̃a zi we nu mɔ, nɛ wa siki zi 'do wa lua do mbula 'da mɔ. Wa gbɛa zi owi gba olo nu mɔ, kɛ wa hɛ̃lɛ̃ zi wa na, wa kpolo tɛ wa dɛ 'da mɔ ni. Wa ɔ̀mɔ̀ zi tɛ dã zu li mɔ gɔ.

²⁷ Ma kɛ mɔ 'dɔlɔ zi wa hã Owi sɛnɛ wa, nɛ wa hã zi ngamɔ hã wa. Nɛ kɔ ngamɛ 'da wa, wa hia dɛ 'da mɔ, nɛ yolo li nza ngɔ i, mɔ zila wala gɛlɛ wa. Nɛ we duzu kɔ̃a zã 'da mɔ kɛ ma gã la li ni, mɔ tumba owi kpe dati wa we fo wa kɔ ngbá 'da owi sɛnɛ wa do'do.

²⁸ Nɛ nde wa nɛa we hɔ kɔ ngbá da dɔ̃ nɛ́, nɛ wa ma ngɔ dɛ 'dã mɛnɔ do ti, nɛ mɔ da 'bɔ kɔ̃ mɔ tɛ wa hã owi sɛnɛ wa. Ma kɛ wa ma 'bɔ ngɔ he dɛ 'da mɔ, nɛ yolo li nza ngɔ i, mɔ zila wala gɛlɛ wa. Nɛ we duzu dia zã 'da mɔ dɛ 'da wa, mɔ kpasa wa fala dɛlɛ wena.

²⁹ Mɔ hɛ̃lɛ̃ wa we si 'do 'da mbula 'da mɔ, nɛ nde ngatɛ 'da wa la li ngele, wa zèlè nu mɔ gɔ, wa bɛ̃a we dɛ mbula 'da mɔ. Ĩ na, mbulanɔ ni, ma hã kpasi hã owinɔ kɛ wa dɛ ma ni. Nɛ nde wa bia nga zu, nɛ wa bɛ̃a we zele we nu mɔ kpaa.

³⁰ Mɔ kunu wa 'do sabɛlɛ dɔ wena, nɛ do wala 'da Hi Wi 'da mɔ, owi gba olo nu mɔ, wa sa mɔ hã wa do zu li mɔ, nɛ nde wa zèlè wa gɔ. Ma kɛ mɔ ia wa ti mɔ mbati 'da ogele winɔ. Gɛnɛ kɔ na mɛ ni, nɛ nde mɔ kùmù wa gɔ, nɛ mɔ dà kɔ̃ mɔ tɛ wa gɔ,

³¹ we kɛ dia zã 'da mɔ gã la li. Mɔ a Gale kɛ mɔ ĩ 'bakoe 'da winɔ, nɛ mɔ be dia kɔ sila dɛ 'da wa.

³² “Mɔ, Gale 'da lɛ, mɔ gã wena, mɔ do ngawi, nɛ lɛ dɛ kili mɔ. Mɔ 'bana dɛ olo gba tɔkɛ 'da mɔ do lɛ fai. Mɔ kɔ̃̀, nɛ mɔ lénggé do ngamɛnɔ kɛ lɛ owinɔ 'da mɔ lɛ kpa gɛ, ngamɛnɔ 'da onwanɔ, do okpasa wi nu fɛlɛ kulanɔ 'da lɛ, ngamɛnɔ 'da onganganɔ 'da lɛ, do Owi gba olo nu mɔ hã lɛ, ngamɛnɔ kɛ lɛ do oyaa lɛ, lɛ zɔa ma, yolo tɛ fala lɛ zi ti nwa 'da onwa ngɔ nù Asiri, gbaa we hɔ sɔɛ gɛ ni.

³³ Kɔ mɛnɔ vɛ̃ ma kpa lɛ ni, mɔ bia bɔlɔ zu hã lɛ, nɛ mɔ èlè dɛ olo nu mɔ gɔ, ĩ na, lɛ dɛ̃ olo nu lɛ gɔ.

³⁴ “Onwanɔ do okpasa wi nu fɛlɛ kulanɔ 'da lɛ, onganganɔ do oyaa lɛ, wa dɛ̃ zi mbula 'da mɔ gɔ. Wa 'danga zi we nu mɔ, do ombisa wenɔ, mɔ mbese zi do wa ni.

³⁵ Mɔ ia zi onwa ngɔ wa, nɛ mɔ kɛ̃a zi de mɛnɔ hã wa wena. Mɔ hã nù hã wa, kɛ ma gã, nɛ ma ko kpalɛ wena ni. Nɛ nde gɛnɛ kɔ na mɛ ni, wa là zi fala 'dã mɛnɔ 'da wa gɔ, nɛ wa kɔ̃ zi we dɛ to hã mɔ gɔ.

³⁶ Kɔ mɔ zɔ̃, sɔɛ gɛ, lɛ a ongbá! Lɛ hɔa ngbá tɛ ngɔ nù kɛ mɔ hã zi hã oyaa lɛ, takɔ wa kpa odia kpalɛ tɛ nɛ ni.

³⁷ Nɛ nde we duzu 'dã mɛnɔ 'da lɛ, nùi ni ko odia kpalɛ hã Onwanɔ, kɛ mɔ ia lɛ ti mbula 'da wa ni iko. Wa dɛ do lɛ, do onadalamɛnɔ 'da lɛ, nɛ́ kɛ zã wa kɔ̃a ni. Gbãlã we, lɛ kɔ 'bako gã wena!”