NEHEMIE 8 - WE NU GALE 1995

Ɛsdrasi tɔlɔ mbula 'da Gale hã owinɔ

^1-2 Ma hɔa tɛ kuti tũ kɔ zɛkɛ 'da kusi, nɛ winɔ wa yula kɔ lenɔ 'da wa, nɛ wa ngɛmɛ ngba wa vɛ̃ kpo tɛ Yeruzalɛmɛ, tɛ li fanda dati nu ngbo Lì. Nɛ wa aka nganga Ɛsdrasi, kɛ a a wi be mbula ni na, a tɛ do 'buku mbula kɛ NWA Gale hã zi hã obe Israɛlɛ do wala 'da Mɔizɛ ni. Nɛ Ɛsdrasi ba ma, nɛ a tɛ do ma dɛ dati ogba gili winɔ, Owi wili do owuko, do obenɔ kɛ wa wia sabɛlɛ zele gulu nɛ ni.

³ Yolo do sanga titole gbaa, nɛ wese hɔ gbogbo zu wi, nɛ nde Ɛsdrasi yula dɛ li fanda dati nu ngbo Lì ni tɛ tɔlɔ wenɔ kɔ 'buki ni hã wa dɛ ngɔ. Nɛ wa vɛ̃ wa gɛa zala wa we zele ma.

⁴ Ɛsdrasi yula zi dɛ ngɔ gbagala, kɛ wa dɛa ma do ma'baya we yolo ngɔ nɛ do kɔ̃ tũi ni. Nɛ owinɔ wa yula zi ngɔ ngawili kɔ̃ a wi a: Matitia, Sema, Anaya, Uria, Hilkia, do Maseya. Nɛ ngɔ gale kɔ̃ a wi a: Pɛdaya, Mikaɛlɛ, Malkia, Hasumɛ, Hasɛbadana, Zakaria do Mɛsulamɛ.

⁵ Ɛsdrasi yula zi do ngɔ, dɛ dati gba gili winɔ ni, kɔ owinɔ vɛ̃ wa nɛa we zɔ a tɛ hũi 'buki, nɛ wa kulu ngɔ.

⁶ Nɛ Ɛsdrasi ma ngɔ dɔnggɔ gã NWA Gale, nɛ winɔ vɛ̃ wa kala kɔ̃ wa dɛ ngɔ, nɛ wa kɔ̃ na: “Ma dɛ́ tɛ̃ ɛ na mɛ ni! Ma dɛ̃ tɛ̃ ɛ na mɛ ni!” Dɛ 'do nɛ, nɛ wa gu gba zugolo, nɛ wa bili zu wa nù we dɔnggɔ NWA.

⁷ Wa kulu ngɔ, nɛ ombe levitɛnɔ wa ma ngɔ be gulu mbula hã wa. Olevitɛnɔ ni zi a: Yesua, Bani, Serebia, Yaminɛ, Akubɛ, Sabɛtai, Hodia, Maseya, Kɛlita, Azaria, Yozabadɛ, Hananɛ do Pɛlaya.

⁸ Wa tɔlɔ kɔ 'buku mbula 'da Gale, nɛ wa kifi ma do lɛnggɛ nu winɔ, nɛ wa be gulu nɛ, sɛ a wele kpo kpo zila gulu mbula wa tɔlɔ ni de.

⁹ Gba gili winɔ wa nɛa we zele mbɛti wa tɔlɔ ni, nɛ wa ma ngɔ he nɛ. Gulu nɛ a Nehemi, wi fɔmɔ le, do nganga Ɛsdrasi, wi be mbula, do olevitɛnɔ kɛ wa bia zi gulu mbula ni, wa tɔ̃a hã wa na: “Tũi gɛ, mɛ a tũi 'da NWA Gale 'da nɛ! Nɛ tɛ dùngù do 'bako gɔ, nɛ nɛ tɛ hè kɔ̃a gɔ.”

¹⁰ Nɛ Ɛsdrasi tɔ̃ 'bɔ hã wa na: “Nɛ sí, nɛ nɛ nyɔ́ngɔ́ mɔ sɔkpã, nɛ nɛ nɔ́ ɛ̃fɛ̃ dɔ́. Nɛ nɛ kɛ̃́ mbe hã wanɔ wa zɔlɔ nyɔngɔmɔ ni, we kɛ tũi gɛ, mɛ a tũi 'da nwa. Nɛ tɛ dùngù do 'bako gɔ! We kɛ nwa hã yangga kɛ na, ma hã́ sɛ ngawi hã nɛ ni.”

¹¹ Nɛ olevitɛnɔ wa ga 'bɔ winɔ na: “Ngɔ tɛ nɛ gɛ̃! Tũi gɛ, mɛ a tũi 'da NWA. Nɛ tɛ dùngù do 'bako gɔ!”

¹² Ma kɛ winɔ wa si, nɛ wa ma ngɔ nyɔngɔ mɔ do nɔ dɔ̃. Nɛ wa kɛ̃a sanga nyɔngɔmɛnɔ 'da wa do owanɔ kɛ wa zɔlɔ ni, nɛ wa dɛa yangga wena. We kɛ wa zila gulu mbula wa tɔla hã wa ni.

Oyuda wa dungu Ɛngga Ɔ ti Da

¹³ Kɔ̃ tũ kɛ 'do nɛ ni, nɛ okpasa wi ngɔ nu fɛlɛ kulanɔ 'da Oyuda vɛ̃, do onganganɔ, do olevitɛnɔ, wa mba ngba wa dɛ kɛ zã nganga Ɛsdrasi, wi be mbula, we yambala 'du gulu bia wenɔ kɔ 'buku mbula 'da Gale.

¹⁴ Nɛ wa kpa zi lɛnggɛ kpo kɔ mbula kɛ Gale hã do wala 'da Mɔizɛ ni na, do zɛkɛ 'da kusi, nɛ obe Israɛlɛ wa dungu Ɛngga Ɔ ti Da. Nɛ do ngba soe ɛngga ni, nɛ wa ɔ ti da.

¹⁵ Nɛ wa 'bili na, wa sa mbila ɛngga ni tɛ kɔ lenɔ vɛ̃, do kɔ le Yeruzalɛmɛ. Nɛ wa mbese 'bɔ winɔ na, wa nɛ ngɔ okalanɔ, kɔ wa 'bili ogbakɔ̃ te olivɛ, do te mirtɛ, do onwá 'bete, do onwá te kɛ ma ɔ yikaa ni, we dɛ do da.

¹⁶ Ma kɛ obe Israɛlɛ, wa nɛa we fa ogbakɔ̃ tenɔ ni we dɛ do da. Ombe wa zĩ da 'da wa dɛ ngɔ zu tɔanɔ 'da wa kɛ ma lɔ lɔa ni, nɛ ombe wa zĩ tɛ li fanda ngbonɔ 'da wa, nɛ ombe nɛ wa zĩ 'bɔ tɛ li fanda Tɛmpɛloe, nɛ ombe gele wanɔ, tɛ li fanda si dati nu ngbo Lì, nɛ ombe nɛ, tɛ li fanda kɛ si nu ngbo Efraimɛ.

¹⁷ Owinɔ vɛ̃ kɛ wa si zi kɔlɔ 'duli ni, wa zĩ da, nɛ wa dungu ti nɛ. Mɛ zi a fala gã yangga, we kɛ yolo 'da fala 'da Yozue, be 'da Nunɛ, obe Israɛlɛ wa dùngù zi 'bɔ ɛngga ni gɔ.

¹⁸ Nɛ do kɔ̃ tũ ɛngga ni kpo kpo, yolo do kuti tũi we hɔ Sɔkpɔ nɛ, wa tɔla lɛnggɛ kɔ 'buku mbula 'da Gale. Ɛngga dɛa tũ sambo, nɛ do ngbɛ'dɛ'dɛ tũi, nɛ gba gili winɔ wa ngɛmɛ li ngba wa dati pɛsɛ nɛ, ɔ nɛ kɛ mbula tɔ̃a ni.