NEHEMIE 6 - WE NU GALE 1995

Owi sɛnɛ lɛ wa fa 'bɔ we 'danga toe

¹ 'Da fala ni, nɛ Sanɛbalatɛ, do Tobia, do Gesɛmɛ be Arabɛ, do tala ogele wi sɛnɛ lɛ, wa zila na mi zĩ ngbo nu le dɛ olo nɛ, kɔ mbé gbini mɔ 'bànà 'bɔ gɔ. Ki ni, nɛ nde mi tɛ bɛ̃̀lɛ̃̀ gbangga kpe nu ngboe dɛ olo nɛ gɔ.

² Nɛ Sanɛbalatɛ do Gesɛmɛ wa tombo wi to we sa mɔ hã mi, takɔ lɛ kpa ngba lɛ do wa tɛ Kɛfirimɛ, kɔ gbangɔlɔ̃ tɛ kɔ le Ono. Ĩ na, wa lingga we dɛ 'dã mɔ do mi.

³ Nɛ mi gisa hã wa na: “Mi 'bana do saka to dɛ dɛa wena, kɔ ma wé sɛ na, mi nɛ we kpa nɛ gɔ. We kɛ mi la, nɛ toe olo mi nga ma fe sɛ.”

⁴ Wa sa mɔ hã mi ní fala nalɛ, nɛ mi gisa hã wa fai na mɛ ni.

⁵ Kɔ ma hɔa tɛ mɔlɔ kɛ, nɛ Sanɛbalatɛ tombo mbe wi toe 'da a kpo do mbɛti kɛ wa kpè nu nɛ gɔ ni, we tɔ̃ hã mi na:

⁶ “Gesɛmɛ zila na, ogele winɔ wa tɔ̃ na, mɔ do onya mɔ Yudanɔ, nɛ lengge we bɛ̃ we nu gã nwa, nɛ a tɔ̃a 'bɔ hã mi na mɛ ni. A na, mɔ zĩ ngbo nu le dɛ olo nɛ, we kɛ mɔ kɔ̃a we hɔ nwa.

⁷ Ombe wa tɔ̃a 'bɔ na, mɔ saka Owi gba olo nu Gale, takɔ wa mbese kɔ Yeruzalɛmɛ na, mɔ hɔa nwa ngɔ nù Yuda. Nɛ nde 'da kala sɛ gɔ, nɛ gã nwa a zele sɛ wenɔ ni vɛ̃. Kɔ mɔ tɛ́, kɔ lɛ wele we nɛ do mɔ.”

⁸ Mi tɔlɔ mbɛti ni do'do, nɛ mi gese hã a na: “Gbãlã we kpo kɔ kɛ mɔ tɔ̃ ni bina! Mɛnɔ ni vɛ̃ mɛ a linggamɔ mɔ́ mɔ zu mɔ kpo!”

⁹ Nɛ nde do gbãlã we, owi sɛnɛ lɛ vɛ̃ wa fa zi kpo na, kili ba lɛ. Wa lengge zi na, tili ma ba sɛ li lɛ, nɛ lɛ da sɛ kɔ̃ lɛ tɛ toe. Kɔ di dɔ̃ ni, mi sambala na: “Aa Gale 'daa, mɔ hã kpã sila hã mi kɔ toe 'da mi!”

¹⁰ Mbe tũ kpo, nɛ mi nɛa 'da Sɛmaya, be 'da Dɛlaya, kɛ a be 'da Metabeɛlɛ ni, we kɛ a wè zi we hɔ nza gɔ. Nɛ a tɔ̃a hã mi na: “Owi sɛnɛ mɔ wa tɛ sɛ do tũ we gbɛ mɔ. Kɔ mɔ tɛ́, hã lɛ nɛ do mɔ kɔ Tɛmpɛloe 'da Gale, tɛ fala kɛ ma santo, kɔ lɛ kpé nu tɔanɔ dɛ ngɔ lɛ.”

¹¹ Nɛ mi gisa hã a na: “Wele ɔ nɛ mi gɛ, a wè tɛ yu bolo gɔ! Nɛ wele ɔ nɛ mi gɛ, a wia tɛ le fala kɛ ma santo, nɛ a 'bana do tunu li a nde? Gɔ, mi lé sɛ i mɔ gɔ.”

¹² Nɛ mi ĩ zi do dia nɛ na, we a tɔ̃ hã mi gɛ, ma yòlò nu Gale gɔ, nɛ nde Tobia do Sanɛbalatɛ wa hã zi mbili hã a, takɔ a tɔ̃ ni.

¹³ Wa dɛa na mɛ ni, takɔ mi dɛ kili, kɔ mi zele mbula 'da wa, nɛ mi dɛ 'dã mɔ. Nɛ do wala ni, wa wia sɔ we 'danga zu li mi, nɛ wa kɔ'dɔ mi.

¹⁴ Ma kɛ mi sambala na: “Aa Gale 'daa, da dɛ kɔ ta zu mɔ élé ngɔ mɛ Tobia, do Sanɛbalatɛ, do Noadia, wuko wi gba olo nu mɔ do bɛlɛ, do tala ogele wi gba olo nu mɔ do bɛlɛ, wa dɛa ni gɔ. We kɛ wa fa we a kili tɛ mi.”

¹⁵ To zĩ ngboe dɛ olo nɛ, ma ia 'do 'bu tũ mɔlɔ ngɔ nɛ bɔa, do kɔ̃ zɛkɛ 'bu nɛ bɔa ngɔ nɛ mɔlɔ, zɛkɛ 'da gazɛlɛ.

¹⁶ 'Da fala owi sɛnɛ lɛ tɛ ngɔ nùnɔ kɛ zã lɛ, wa nɛa we zele ní, nɛ wa dɛa kili, nɛ sape ba 'bɔ li wa wena. Nɛ wa ĩ wá na, toe ni dɛa zi tɛ̃ ɛ do dia zã 'da Gale.

¹⁷ Do 'da fala ni, ogã winɔ tɛ ngɔ nù Yuda, wa dɛ zi mbɛti sanga tɛ ngba wa do Tobia wena.

¹⁸ Do gbãlã we, dɛlɛ Oyuda wa ba zi zã zu we do a, we kɛ a zi a kɛfɛ Yuda kpo li a a Sɛkania, be 'da Ara. Nɛ bulu be 'da a, Yohananɛ ba zi boko be 'da Mɛsulamɛ, be 'da Berekia.

¹⁹ Wa dɔnggɔ a dɛ gbali mi, nɛ wa gba 'da nu wenɔ 'da mi hã a. Nɛ Tobia tɛ tombo ombɛti hã mi, takɔ mi dɛ kili.