NEHEMIE 5 - WE NU GALE 1995

Nehemi 'dafa wenɔ ngbala Oyudanɔ

¹ Mbe tũ kpo, nɛ owi wili do owuko Yuda, wa bi tɛ wa wena ngɔ 'dã mɛnɔ kɛ mbe onya wa Yudanɔ wa dɛ do wa ni.

² Ombe nɛ wa na: “Lɛ, do obulu benɔ, do oboko benɔ 'da lɛ, lɛ dɛlɛ wena. Nɛ lɛ kɔ̃a sɔ we kpa ble we nyɔngɔ nɛ, sɛ a lɛ kpasa de.”

³ Nɛ ombe wa tɔ̃ na: “'Da fala gba wɛ, kɔ lɛ kɔ̃ zi we kpa ble we nyɔngɔ nɛ, nɛ ma wia na, lɛ e fɔnɔ do ote vinɔnɔ do otɔanɔ 'da lɛ do tikɔɛ, sɛ nɛ de.”

⁴ Nɛ ombe gele nɛ wa tɔ̃ 'bɔ na: “We futa takoe hã gã nwa, nɛ ma wia zi na lɛ e fɔnɔ, do ote vinɔnɔ 'da lɛ do tikɔɛ mbili, sɛ nɛ de.

⁵ Ĩ na, lɛ vɛ̃ a Owi nu fɛlɛ kula kpo! Benɔ 'da lɛ wa là ngba wa do wanɔ 'da onya lɛ Oyudanɔ ni gɔ! Nɛ nde ma wia na, lɛ a obenɔ 'da lɛ do ngbá. Ombe boko benɔ 'da lɛ wa hɔa 'bɔ ngbá ia. Kɔ lɛ wè tɛ dɛ si do tɛ̃ ɛ gɔ, we kɛ ofɔnɔ 'da lɛ, do ote vinɔnɔ 'da lɛ, ma hɔa mɔ owinɔ lɛ ba ku'da kɔ̃ wa ni ia.”

⁶ Mi nɛa we zele bi tɛ wi 'da wa, nɛ dã ba mi wena.

⁷ Ma kɛ mi 'bili do kɔ sila mi we kɔ'dɔ okumunɔ, do Owi 'bili wenɔ, we dĩ tole wa ba hã onya wa ni. Nɛ mi sa mɔ hã wa we gã mba li ngba wi.

⁸ Nɛ mi tɔ̃a hã wa na: “Lɛ do tɛ lɛ, lɛ gɔnɔ zi onya lɛ Yudanɔ kɛ wa hã zi tɛ wa do ngbá hã ogele winɔ ni. Nɛ lɛ dɛa zi ma ɔ nɛ kɛ ma wia do lɛ ni. Nɛ nde ngangga ni, nɛ be gole onya nɛ hã kpo kpo lɛ onya wa.” Mi nɛa we tɔ̃ ni, nɛ wa kpà we kpo we gi gisa gɔ, nɛ wa kpia nu wa.

⁹ Nɛ mi tɔ̃ 'bɔ na: “Mɛ nɛ dɛa gɛ, ma dè gɔ! Ma wia sɔ na, nɛ dɛ kili Gale 'da lɛ kɔ dungi 'da nɛ fai, da dɛ kɔ Owi sɛnɛ lɛ, wa kɔ'dɔ lɛ gɔ.

¹⁰ Mi tɛ mɛ 'bɔ, do ongba mi wi tonɔ, do Owi tonɔ 'da mi, lɛ ia ku'da mbili, do ku'da ble zu owinɔ. Nɛ nde lɛ tɛ sà mɔ 'da mɛnɔ kɛ wa wia sɔ we gese hã lɛ ni gɔ.

¹¹ Kɔ yolo do sɔɛ gɛ, nɛ gésé ofɔnɔ, do ote vinɔnɔ, do ote olivɛnɔ, do otɔanɔ 'da Owi ba ku'danɔ 'da nɛ hã wa. Nɛ nɛ tɛ sà 'bɔ mɔ 'da ble, do dɔ̃, tabi do nɔnɔ kɛ nɛ ia zi zu wa do ku'da ni, nɛ nɛ fa we kpa mbili ngɔ nɛ gɔ.”

¹² Nɛ wa gisa na: “Lɛ dɛ sɛ ɔ nɛ kɛ mɔ tɔ̃a ni. Lɛ gese sɛ mɛnɔ ni hã wa, nɛ lɛ áká sɛ mɔ kpo kɔ̃ wa gɔ.” Nɛ mi sa mɔ hã onganganɔ, nɛ mi ba nu mi na, owinɔ kɛ wa ba ku'da kɔ̃ wa ni, wa kana tɛ wa dɛ gbali onganganɔ ni na, wa dɛ sɛ olo nu wa.

¹³ Dɛ 'do nɛ, nɛ mi yaka singbi nu gba tuli 'da mi, nɛ mi na: “E kɔ Gale yaka sɛ tɛ mɛ 'bɔ owanɔ vɛ̃ wa dɛ́ sɛ olo nu wa gɔ ni na mɛ ni! Nɛ a fó wa kɔ tɔanɔ, do ngɔ mɛnɔ 'da wa, nɛ wa tɛ 'bànà do mɔ kɔ̃ wa gɔ!” Nɛ gba gili winɔ wa hia mɔ na: “E kɔ ma dɛ tɛ̃ ɛ na mɛ ni!” Nɛ wa vɛ̃ wa dɔnggɔ NWA, nɛ wa dɛa olo nu wa.

Dia sila 'da Nehemi

¹⁴ Wa saka mi do wi fɔmɔ nu Yuda, yolo do 'da fala kɛ gã nwa Artasɛrsɛsi dɛa 'bu sabɛlɛ bɔa tɛ to nwa 'da a ni. Nɛ mi dɛa toe ni gbaa we hɔ tɛ 'bu sabɛlɛ talɛ ngo nɛ bɔa kɔ dɛa to nwa 'da a. Nɛ kɔ sabɛlɛ 'bu ngɔ nɛ bɔa ni, mi, tabi ongba mi wi tonɔ, lɛ sà mɔ fala kpo we tako kɛ winɔ wa wia we hã hã wi fɔmɔ le ni gɔ.

¹⁵ Owi fɔmɔ lenɔ zi dati mi ni, wa hã zi dĩ tole hã winɔ. Wa kala nyɔngɔmɔ, do do dɛ ngɔ gili fɛ̃a mɔ bole 'bu nɛ nalɛ, kɛ wa hã zi hã wa ni. Gɛnɛ ko ongba wa wi tonɔ, nɛ wa zɛlɛ zi 'bɔ tɛ winɔ kpasaa na mɛ ni. Nɛ nde mi, mi dɛ̃ ni fala kpo gɔ, we dɛ kili Gale.

¹⁶ Mi do tɛ mi ngboo, mi lia kɔ dɛa to zĩ ngbo le dɛ olo nɛ. Nɛ nde mi è to fɔmɔ le do li mi we oso fɔ do dia gole gɔ. Nɛ owi tonɔ 'da mi, kɛ wa dɛa zi 'bɔ to zĩ ngbo nu le ni, wa dɛ̀ 'bɔ ni gɔ.

¹⁷ Ĩ na, tũ kpo kpo, mi hã zi nyɔngɔmɔ hã Oyuda, do owi 'bili wenɔ kama kpo do 'bu wa mɔlɔ, mba do ogɛnɛnɔ kɛ wa yolo zi ngɔ nùnɔ kɛ zã lɛ ni.

¹⁸ Tũ kpo kpo, wa gi zi kili ngɔmbɔ kpo, obata gazɛlɛ, do okala dɛlɛ wena hã wa. Nɛ 'do tũ 'bu 'bu, wa tɛ zi do gili dɔnɔ hã wa. Nɛ nde dĩ tole mɛnɔ ni vɛ̃ zi dɛ ngɔ mi. Gɛnɛ kɔ na mɛ ni, nɛ nde mi àkà zi we mɛnɔ kɛ wa wia we hã hã wi fɔmɔ le ni gɔ. We kɛ tonɔ winɔ wa dɛ ni zi a dĩ tole we wa.

¹⁹ Ma kɛ mi sambala na: “Aa Gale 'daa, tɛ mɔ tɛ èlè ngɔ mɛnɔ vɛ̃ mi dɛa we winɔ gɛ gɔ, kɔ mɔ bé dia sila 'da mɔ hã mi.”