NEHEMIE 3 - WE NU GALE 1995

Oyudanɔ kɛ wa zĩ ngbo nu le Yeruzalɛmɛ dɛ olo nɛ ni

¹ Eliasibɛ, gã nwa nganga ndua dɛ toe do ongba a nganganɔ, nɛ wa dɛa nu ngbo Batanɔ. Wa ia ma dɛ kɔ̃ Gale do'do, nɛ wa e ogbangga kpe do nu nɛ dɛ olo nɛ. Nɛ wa 'dafa ngbo nu le gbaa, nɛ ma hɔ tɛ ngala tɔa kɛ li nɛ a Kama ni. Nɛ 'do kɛ wa ia ma hã Gale ni, nɛ wa zĩ ngboe gbaa, nɛ wa hɔ tɛ ngala tɔa Hananeɛlɛ.

² Nɛ owi Yeriko, wa ndua toe dɛ nu kɛ olo wa ni. Nɛ Zakurɛ, be 'da Imri dɛa toe dɛ kɛ zã wa ni.

³ Nɛ owi kɔ le Sɛna, wa zi a wa 'dafa nu ngbo Kɔyɔnɔ. Wa nɛa we e ma'baya ba do zu ngboe do'do, nɛ wa gese ote gbangganɔ, do ogbangganɔ, do omɔ kã do ma dɛ olo nɛ.

⁴ Nɛ Mɛremɔtɛ, be 'da Uria, dɛa toe dɛ kɛ zã wa. Nɛ Mɛsulamɛ, be 'da Berekia, dɛa toe dɛ kɛ zã a. Nɛ dɛ kɛ zã a ni, wi a Sadɔkɛ, be 'da Baana. (Mɛremɔtɛ zi a be yaa Hakɔsi, nɛ Mɛsulamɛ zi a be yaa Mɛsezabɛlɛ.)

⁵ De 'do wa ni, nɛ owi Tekoa wa 'dafa ngboe. Nɛ okumunɔ 'da wa wa bɛ̃a we dɛ toe kɛ onwa ngɔ tonɔ wa ba nu wa hã wa na, wa dɛ ni.

⁶ Nɛ Yoyada, be 'da Pasea, do Mɛsulamɛ, be 'da Bɛsodia, wa dɛa nu ngbo Yɛsana dɛ olo nɛ. Wa ia ma'baya ba do zu nɛ do'do, nɛ wa gese ote gbangganɔ, do ogbangganɔ, do omɔ kã do ma dɛ olo nɛ.

⁷ Nɛ Mɛlatia, wi Gabaoni, do Yadoni, wi Mɛrɔnɔtɛ, do ombe wi wilinɔ tɛ kɔ le Gabaoni do Mispa, wa dɛa toe 'da wa dɛ kɛ zã wa ni. Wa zi ngboe gbaa, nɛ ma hɔ tɛ tɔa 'da gà wi fɔmɔ nùi kɛ mɔ yolo nu lì Efratɛ, nɛ nde ma si 'biti gɛ̃a wese ni.

⁸ Nɛ Uziɛlɛ, wi dɛ to mɔ mbali, kɛ a a be 'da Haraya, a dɛa toe 'da a dɛ kɛ zã wa ni. Nɛ Hanania, wi dɛ nɔ yɔmbɔ dɛa toe gbaa, nɛ ma hɔ tɛ fala kɛ ngboe ma pɛsɛ dɛ 'do ni.

⁹ Nɛ Rɛfaya, be 'da Hurɛ, kɛ a a nwa ngɔ mbee 'bili tɛ nù Yeruzalɛmɛ ni, a dɛa toe 'da a dɛ kɛ zã wa ni.

¹⁰ Yɛdaya, be 'da Harumafɛ hã a lingga do to ngboe kɛ dati tɔa 'da a ni. 'Do nɛ, nɛ Hatusɛ, be 'da Hakabneya, a dɛa toe dɛ kɛ zã a ni.

¹¹ Malkia, be 'da Harimɛ, do Hasubɛ, be 'da Pahatɛ-Moabɛ, wa a wa dɛa toe gbaa we hɔ tɛ ngala tɔa Furunɔ, nɛ wa 'dafa ma.

¹² Dɛ kɛ zã wa ni, Salumɛ, be 'da Halohɛsi, a dɛa toe fala nɛ kpo do oboko benɔ 'da a. Salumɛ zi a nwa ngɔ mbee 'bili tɛ nùi kɔ le Yeruzalɛmɛ.

¹³ Hanunɛ do Owi kɔ le Zanoa hã wa dɛa nu ngbo Gbangɔlɔ̃. Wa dɛa dɛ olo nɛ do'do, nɛ wa a ote gbangganɔ, do ogbangganɔ do omɔ kã do ma dɛ olo nɛ. Nɛ wa 'dafa 'bɔ ngboe we mɛtrɛ kama mɔlɔ, nɛ ma nɛa gbaa, nɛ ma hɔ tɛ nu ngbo Sa'da Mɔ.

¹⁴ Malkia, be 'da Rekabɛ, hã a dɛa nu ngbo Sa'da Mɔ. A zi a nwa ngɔ 'bili tɛ nù Bɛtɛ-Kerɛmɛ. A dɛa ma dɛ olo nɛ do'do, nɛ a a ote gbangganɔ, do ogbangganɔ, do omɔ kã do ma dɛ olo nɛ.

¹⁵ Salumɛ, be 'da Kɔlɛ-Hoze hã a dɛa nu ngbo 'De dɛ olo nɛ. Salumɛ zi a nwa ngɔ 'bili tɛ nù Mispa. A dɛa ma dɛ olo nɛ, kɔ a kila zu nɛ do'do, nɛ a a ote gbangganɔ, do ogbangganɔ, do omɔ kã do ma dɛ olo nɛ. A 'dafa 'bɔ ngbo kɛ si 'biti ndɔ Siloe. Ndɔɛ ni zi do sanga be fɔɛ 'da nwa, do ngalangala ma zĩlĩ dɛ tɛ Gba Ngbo nwa 'da Davidi ni.

¹⁶ Nehemi, be 'da Azbukɛ, dɛa to ngboe gbaa we hɔ tɛ mabi'dongge 'da Davidi, gbaa tɛ zã lì, do tɛ fala ɔi 'da osodanɔ wa zɔ mɔ tɛ nwa ni. (Nehemi zi 'bɔ a nwa ngɔ 'bili tɛ nù Bɛtɛ-Surɛ.)

Olevitɛnɔ kɛ wa dɛa zi to ngboe ni

¹⁷ Olevitɛnɔ wa dɛa to ngboe, nɛ Rɛhumɛ, be 'da Bani zi a nwa ngɔ wa. Wa dɛa toe kɛ 'da wa. Dɛ 'do wa wi a Hasabia, nwa ngɔ mbee 'bili tɛ nù Keila, a dɛa toe we le 'da a.

¹⁸ Dɛ 'do a wi a Bavai, be 'da Henadadɛ, nɛ a a nwa ngɔ mbee 'bili tɛ nù Keila, a dɛa toe we le 'da a.

¹⁹ Dɛ 'do a wi a Ezɛrɛ, be 'da Yesua, nɛ a a nwa ngɔ le Mispa. A 'dafa fala ngbo kɛ ma do dati fala wa usu do mɔ bi bolonɔ ni, gbaa we hɔ fala ngboe 'bɛnggɛ nɛ ni.

²⁰ Dɛ kɛ zã a ni, wi a Barukɛ, be 'da Zabai. A dɛa toe nganda wena tɛ mbe fala 'do ki ni, yolo dɛ gbogbo fala ngboe 'bɛnggɛ nɛ ni, gbaa we hɔ tɛ nu ngbo tɔa 'da gã nwa nganga Eliasibɛ.

²¹ Mɛremɔtɛ, be 'da Uria, nɛ a zi a be yaa Hakɔsi ni, a dɛa to ngboe tɛ fala tɔa 'da Eliasibɛ Sɔkpɔ nɛ ni.

Onganganɔ kɛ wa dɛa zi to ngboe ni

²² Onganganɔ wa dɛa to ngboe ni, wi a owanɔ kɛ wa yula kɔ lenɔ kɛ zã Yeruzalɛmɛ ni.

²³ Wi a Bɛnzamɛ do Hasubɛ. Wa 'dafa fala kɛ ma do dati tɔanɔ 'da wa ni. Nɛ Azaria, be 'da Maseya dɛa toe dɛ kɛ zã tɔa 'da a ni. (Azaria zi a be yaa Anania.)

²⁴ Binui, be 'da Henadadɛ, dɛa to ngboe yolo tɛ tɔa 'da Azaria, gbaa we hɔ tɛ fala li gbala ngboe 'bɛnggɛ nɛ ni.

²⁵ Palalɛ, be 'da Uzai, dɛa to ngboe yolo tɛ li gbala ngboe, we hɔ tɛ ngala tɔa kɛ do ngɔ ni. Ngala tɔa ni, ma do dati tɔa nwa, nɛ ma dɔ̃ɔ do fala owi zɔ mɔ tɛ nwa, wa ɔ nɛ ni. Pɛdaya, be 'da Parɔsi, dɛa to ngboe dɛ 'da a ni.

²⁶ Nɛ owi gala olevitɛnɔ kɔ Tɛmpɛloe, kɛ wa ɔ tɛ fala li nɛ a Ofɛlɛ ni, wa dɛa toe gbaa we hɔ tɛ fala ngboe 'bɛnggɛ nɛ ni. Mɔ yolo tɛ nu ngbo Lìnɔ, nɛ nde fala ni si 'biti gba wese.

Ogele winɔ kɛ wa dɛa zi to ngboe ni

²⁷ Owi Tekoa, wa dɛa toe yolo tɛ fala gã ngala tɔa ma fɔmɔ Tɛmpɛloe ni, we hɔ tɛ ngboe 'da Ofɛlɛ.

²⁸ Ombe nganganɔ, wa dɛa toe gbaa we hɔ tɛ nu ngbo Ombalatanɔ. Nɛ wele do wele dɛa toe dɛ dati tɔa 'da a ni.

²⁹ Sadɔkɛ, be 'da Imɛrɛ, dɛa toe tɛ mɛ 'bɔ dɛ dati tɔa 'da a ni. Sɛmaya, be 'da Sɛkania dɛa 'bɔ toe dɛ kɛ zã a ni. (Sɛkania zi a wi fɔmɔ nu ngboe kɛ si 'biti gba wese ni.)

³⁰ Hanania, be 'da Selemia dɛa toe dɛ kɛ zã a ni. Nɛ Hanunɛ, gazɛlɛ be 'da Salafɛ, 'dafa ngboe kɛ dɛ 'do a ni. Dɛ kɛ zã a ni, wi a Mɛsulamɛ, be 'da Berekia. A dɛa toe tɛ fala dati tɔa 'da a ni.

³¹ Malkia, wi dɛ to do mɔ mbali, a dɛa toe gbaa we hɔ tɛ tɔa Owi gala olevitɛnɔ kɔ tɔa Tɛmpɛloe, do Owi be gole mɛnɔ wa ɔ nɛ ni. A yula 'bɔ dati nu ngbo Mifkadɛ, dɔ̃ɔ do tɔa wi zɔ mɔ ngɔ le dungu nɛ do zu ngboe ni, gbaa we hɔ tɛ li gbala ngboe.

³² Tala Owi dɛ to do mɔ mbalinɔ do wi be gole mɛnɔ, wa dɛa toe 'da wa tɛ Sɔkpɔ fala ma yolo tɛ tɔa 'da wi zɔ mɔ ngɔ le, gbaa we hɔ tɛ nu ngbo Obatanɔ ni.