NEHEMIE 2 - WE NU GALE 1995

Nehemi kpa wala we si dɛ Yeruzalɛmɛ

¹ Mbe tũ kpo, kɔ zɛkɛ 'da kpo, 'da fala kɛ gã nwa Artasɛrsɛsi dɛa 'bu sabɛlɛ bɔa tɛ to nwa 'da a ni, nɛ a dungu nù we nyɔngɔ mɔ. 'Da fala ni, nɛ mi ba dɔ̃ɛ, nɛ mi tɛnɛ hã a. Nɛ bula li mi zi do 'bako, nɛ nde mi dɛ̃ zi mbe 'bako na mɛ ni dɛ gbali a fala kpo gɔ.

² Ma kɛ a aka mi na: “Gulu kɛ bula li mɔ do 'bako ni we ge nde? Mɔ do zɛlɛ bina, nɛ gulu 'bakoe 'da mɔ a ge nde?” Mi nɛa we zele ni, nɛ kili ba mi wena,

³ nɛ mi gese hã a na: “Gã nwa, e kɔ 'do mɔ nyɛlɛ ngɔ nùi gɛ! Mi wia tɛ ɔ do 'bako, we kɛ le kɛ wa mi zɛ́ do oyaa mi ni, ma dɛa olo tɔa do'do. Nɛ ogbangga kpe do nu ngbo le, ma bɛlɛ vɛ̃.”

⁴ Nɛ gã nwa aka 'bɔ mi na: “Ní a mɔ kɔ̃a ge nde?” Nɛ mi aka Gale li nza i do ti,

⁵ nɛ 'do nɛ, nɛ mi gese hã gã nwa na: “Gã nwa, fala kɛ mɔ kɔ̃ we be dia zã 'da mɔ hã mi, nɛ mɔ hã wala hã mi, kɔ mi nɛ ngɔ nù Yuda, tɛ kɔ le wa mi zɛ́ do oyaa mi ni, takɔ mi 'dafa ma.”

⁶ 'Da fala ni, nɛ nde wuke 'da gã nwa dungu dɛ kɛ zã a. Nɛ gã nwa aka 'bɔ mi na: “Mɔ ɔ sɛ le gɛnɛ 'da mɔ tũ nɛ nde? Nɛ mɔ si sɛ soe ki nge nde?” Nɛ mi wia kɔ̃ tũ si 'da mi hã a, nɛ a kɔ̃ na, mi nɛ.

⁷ Nɛ mi tɔ̃ 'bɔ hã a na: “Gã nwa, fala kɛ mɔ kɔ̃, nɛ mɔ dɛ mbɛti hã Owi fɔmɔ lenɔ tɛ kulu lì Efratɛ, kɛ si 'biti gɛ̃a wese, sɛ a wa hã wala hã mi, we nɛ tɛ ngɔ nù Yuda i de.

⁸ Nɛ mɔ dɛ 'bɔ gele mbɛti hã Asafɛ, wi zɔ mɔ tɛ tenɔ kɔ kɔlanɔ 'da mɔ, takɔ a hã sɛ tenɔ kɛ ma we sɛ we gala mi, we bɛ̃lɛ̃ do gbangga nu gba ngboe kɛ ma kɔlɔ do Tɛmpɛloe, do tenɔ we 'dafa do ngbo nu le, do kɛnɔ we dɛ do tɔa ɔi 'da mi” ni. Nɛ gã nwa dɛa mbɛtinɔ ni vɛ̃ hã mi, we kɛ wila nui 'da Gale zi do mi boe.

⁹ Mi nɛa we la nɛ, nɛ gã nwa tumba Owi ngɔ osoda, do owi kũ ngɔ mbalata we kã mi li wala. Mi hɔa 'da owi fɔmɔ lenɔ tɛ kulu lì Efratɛ, kɛ si 'biti gɛ̃a wese, nɛ mi hã mbɛtinɔ hã wa.

¹⁰ Kɔ Sanɛbalatɛ, be Horoni, do kosolo a Tobia, be Amoni, wa nɛa we zele na mi hɔa we dɛ de dɛa mɔ we obe Israɛlɛ ni, nɛ ma hã̀ yangga hã wa gɔ.

Nehemi yɛnggɛ we zɔ ngbo nu le

¹¹ Mi hɔa tɛ Yeruzalɛmɛ, nɛ mi ɔa tũ talɛ.

¹² Nɛ nde mi tɔ̃̀ gulu toe kɛ Gale tumba mi we dɛ ma we le ni dɛ nza hã wele kpo do ti gɔ. Nɛ 'do nɛ, nɛ mi kulu ngɔ fala nɛ kpo do ombe wele do tũ, nɛ lɛ nɛ we soko ngboe. Mi nɛa tati a do punda kɛ mi kũ ngɔ a ni.

¹³ Do sanga tũi, nɛ mi hɔa nza do nu ngboe kɛ si ba gɔtɔ, nɛ mi nɛ nu lì Gba Sɔ̃ Sa'de, do nu ngbo kɛ li nɛ a Zubu ni. Nɛ mi suka ngbo nu le Yeruzalɛmɛ vɛ̃ do sɔ̃a li, nɛ mi zɔa na ma gbini wena, nɛ ogbangga kpe do nu nɛ ma bɛlɛ 'bɔ.

¹⁴ Nɛ 'do nɛ, nɛ mi ba wala nu ngbo kɛ ma la dɛ 'dɔ lì i, do kɛ zã lì 'da nwa, nɛ nde punda 'da mi kpà wala we la nɛ gɔ.

¹⁵ Ma kɛ do zã tũi ni, mi kũ ganggala Sedroni, we zɔ ngbo kɛ i mɔ ni. Dɛ 'do nɛ, nɛ mi kpula tɛ mi, nɛ mi si do wala nu ngbo kɛ si ba gɔtɔ.

¹⁶ Owi 'bili wenɔ kɔ le, wa ĩ̀ ti fala zi mi nɛa nɛ ni gɔ. Nɛ wa ĩ̀ 'bɔ ti mɛ mi dɛa zi ni gɔ, we kɛ dati nɛ ni, mi tɔ̃̀ zi gulu we kpo hã onya mi be Yuda, tabi onganganɔ, tabi okumunɔ, tabi owi 'bili wenɔ, tabi owinɔ wa zɔ mɔ tɛ tonɔ ni gɔ.

¹⁷ Ma kɛ mi tɔ̃a hã wa na: “Nɛ zɔ́ ngamɛ ma kpa lɛ gɛ: le Yeruzalɛmɛ dɛa olo tɔa do'do, nɛ ogbangga kpe do nu ngbo le ma bɛlɛ vɛ̃! Lɛ kúlú ngɔ, kɔ lɛ nɛ́ we zĩ ngbo nu le Yeruzalɛmɛ dɛ olo de, sɛ a lɛ fua sape li lɛ de!”

¹⁸ Nɛ mi tɔ̃a 'bɔ hã wa ɔ nɛ kɛ Gale wila zi do nu a tɛ mi ni, do wenɔ kɛ gá nwa tɔ̃a zi hã mi ni. Nɛ wa hia mɔ do ti na: “Lɛ kúlú ngɔ, kɔ lɛ zĩ ngbo nu le dɛ olo nɛ!” Nɛ wa ma ngɔ 'dafa tɛ wa nganda wena we de dia dɛa toe ni.

¹⁹ Kɔ Sanɛbalatɛ, be Horoni, do kosolo a Tobia, be Amoni, do Gesɛmɛ, be Arabɛ, wa nɛa we zele we nɛ, nɛ wa ma ngɔ mɔmɔ lɛ, nɛ wa aka lɛ do nyɛnɛ nu na: “Mɛ nɛ nɛ dɛ tɛ mɛ gɛ a ge nde? Nɛ fa we bɛ̃ nu gã nwa nde?”

²⁰ Nɛ mi gisa hã wa na: “Wi a Gale li nza i do tɛ̃ a, hã a 'dafa sɛ na, ma dɛ gbãlã hã lɛ. Lɛ, owi tonɔ 'da a, lɛ nɛ kulu ngɔ dɛ tɛ toe gɛ, we zĩ ngbo nu le dɛ olo nɛ. Nɛ nde kɛ 'da nɛ gɛ, nɛ do mɔ kpo we kpa kɔ le Yeruzalɛmɛ bina, nɛ nɛ bá sɛ 'bɔ to nwa kpo kɔ nɛ gɔ. Nɛ fala kpo ta zu wele gbá sɛ ngɔ nɛ kɔ le Yeruzalɛmɛ gɔ!”