NEHEMIE 13 - WE NU GALE 1995

Nehemi 'dafa mɛnɔ kpi do kpi dɛ olo nɛ

¹ Do kpo 'da fala wa tɛ tɔlɔ 'buki 'da Mɔizɛ hã owinɔ ni, nɛ wa hɔa tɛ kɛ wa kɔma na, ma wè na, Oamoni do Omoabɛ wa le kɔ owinɔ 'da Gale gɔ ni.

² We kɛ zi dati, 'da fala kɛ oyaa lɛ, obe Israɛlɛ wa la zi do kɔ lenɔ 'da wa, we nɛ dɛ Kanana i ni, nɛ owinɔ ni, wa hã̀ zi nyɔngɔmɔ, do dɔ̃ hã wa gɔ. Nɛ Omoabɛ wa hã zi mbili hã Balamɛ na, a fɔmbɔ obe Israɛlɛ. Nɛ nde Gale 'da lɛ kifi zi fɔmba ni do wila nu.

³ Kɔ obe Israɛlɛ wa nɛa we zele mbula ni, nɛ wa ba nu wa na, wa ndaka ogele winɔ vɛ̃ sanga lo owinɔ 'da Gale do'do.

⁴ Nɛ nde zi dati, wa saka zi nganga Eliasibɛ, we zɔ mɔ tɛ o'bili tɔanɔ kɛ zã Tɛmpɛloe 'da Gale 'da lɛ. Eliasibɛ zi a wi na 'da Tobia,

⁵ ma kɛ a ba mbe gã 'bili kɔ tɔa kpo, nɛ a hã ma hã Tobia. 'Bili tɔa ni zi a fala kɛ wa usu do ofũ, do ofũ yɔmbɔ we dɔnggɔ do Gale, do okpana we dɛa to kɔ tɔa Tɛmpɛloe. Dɛ kpo kɔ 'bili tɔa ni, wa usu zi 'bɔ odɔnggamɛnɔ we onganganɔ, do dimɛ kpalɛnɔ, do mbé dɔ̃, do nɔnɔ kɛ wa hã hã olevitɛnɔ, do owi ga zumanɔ, do wi zɔ mɔ nu tɔa Tɛmpɛloe ni.

⁶ 'Da falanɔ ni, nɛ nde mi zi kɔ le Yeruzalɛmɛ ni bina. Mi nɛa zi 'da Artasɛrsɛsi, gã nwa ngɔ nu Babilonia. Mi nɛa zi do 'da fala a dɛa zi 'bu sabɛlɛ talɛ ngɔ nɛ bɔa tɛ dɛa to nwa 'da a ni. 'Do nɛ là nyɛlɛ gɔ, nɛ gã nwa kɔ̃a na,

⁷ mi kpolo tɛ mi dɛ Yeruzalɛmɛ nga. Kɔ mi hɔa, nɛ mi zele we 'dã mɛ kɛ Eliasibɛ dɛa, tɛ kɛ a hã gã 'bili tɔa kɛ ma zɔ mɔ dɛ tɛ li fanda Tɛmpɛloe hã Tobia ni.

⁸ Nɛ zã mi nɔ̃lɔ̃ wena, nɛ mi da mɛnɔ 'da Tobia kɔ 'bili tɔa ni vɛ̃ dɛ nza.

⁹ 'Do nɛ, nɛ mi ba nu mi na, wa fɔlɔ kɔ 'bili tɔanɔ ni sa. Wa fɔlɔ ma do'do, nɛ wa gese okpana dɛa toe kɔ tɔa Tɛmpɛloe, do odɔnggamɛnɔ, do fũ yɔmbɛ dɛ kɔ nɛ.

¹⁰ Nɛ mi zila 'bɔ na, olevitɛnɔ wa kpà zi mɛnɔ kɛ ma wia zi na wa kpa ni gɔ. Ma kɛ wa la fala dɛ toe 'da wa, nɛ wele do wele si dɛ nu fɔɛ 'da ɛ. Nɛ owi ga zumanɔ wa dɛa zi 'bɔ kpasaa na mɛ ni.

¹¹ Nɛ mi kɔ'dɔ owi 'bili wenɔ, we kɛ wa zɔa mɔ dɛ tɛ Tɛmpɛloe 'da Gale do li wa iko, kɔ wi tonɔ wa la ma ni. Dɛ 'do nɛ, nɛ mi mba li olevitɛnɔ, do owi ga zumanɔ, nɛ mi gisa wa dɛ tɛ tonɔ 'da wa.

¹² Nɛ obe Israɛlɛ, wa ma 'bɔ ngɔ tɛ do dimɛ kpalɛnɔ, do mbé dɔ̃ɛ, do nɔnɔ, nɛ wa usu ma dɛ kɔ o'bili tɔanɔ kɛ wa a we nɛ ni.

¹³ Nɛ mi saka Owele we zɔ mɔ tɛ 'bili tɔanɔ ni. Wi zi a nganga Selemia, do Sadɔkɛ, wi kɔmɔ mbɛti, do levitɛ Pɛdaya, fala nɛ kpo do Hananɛ, wi gbaka wa, kɛ a a be 'da Zakurɛ, nɛ a 'bɔ a be yaa Matania ni. Wa zi vɛ̃ a Owi kɛ Owele wa gbini zã wa do wa. Nɛ toe 'da wa a kɛ̃ dɔnggamɛnɔ hã ongba wa.

¹⁴ Nɛ mi sambala na: “Aa Gale 'daa, da dɛ kɔ ta zu mɔ élé ngɔ mɛnɔ vɛ̃ kɛ mi dɛa zi ni gɔ! Nɛ da dɛ kɔ ta zu mɔ élé 'bɔ ngɔ kɛ mi dɛa olo nu mɔ, nɛ mi 'dafa tɔa Tɛmpɛloe, do mɔ dɛ do sambala ni gɔ.”

¹⁵ Do kpo 'da fala ni, nɛ mi zɔa Owele tɛ ngɔ nù Yuda, nɛ nde wa ma wala te vinɔ we kpĩlĩ lì nɛ do kɔ̃ tũ ɔmɔ tɛ wi. Nɛ ombe wa kala 'bɔ kpalɛnɔ, do dɔ̃nɔ, do wala te vinɔnɔ, do wala te figɛ, do ogele mɛnɔ kpi do kpi dɛ ngɔ opunda, we le do ma dɛ Yeruzalɛmɛ. Nɛ mi ga wa na, wa tɛ bè gole mɔ kpo do kɔ̃ tũ ɔmɔ tɛ wi gɔ.

¹⁶ Dɛ ngɔ nɛ, nɛ Owi Tirɛ kɛ wa ɔ zi tɛ Yeruzalɛmɛ, wa tɛa do okɔyɔ, do ogele tole nyɔngɔmɔ do kɔ̃ tũ ɔmɔ tɛ wi, we be gole nɛ hã Oyudanɔ kɔ le Yeruzalɛmɛ ni.

¹⁷ Ma kɛ mi kɔ'dɔ okumunɔ ngɔ nù Yuda na: “Nɛ a nɛ zɔ 'dã mɛ nɛ dɛ ni nde? Nɛ dɛ to do kɔ̃ tũ ɔmɔ tɛ wi, kɛ mɛ a kɔ̃ tũi 'da Gale ni, ɔ nɛ kɛ mɛ a gele kɔ̃ tũ iko ni nde?

¹⁸ Oyaa lɛ wa dɛa zi 'bɔ ni, gulu nɛ a Gale 'da lɛ hã ngamɛnɔ gɛ hã lɛ, do le 'da lɛ ni. Nɛ nde nɛ owinɔ kɛ nɛ dɛ toe 'da nɛ do kɔ̃ tũ ɔmɔ tɛ wi ni, nɛ tɛ dãlã 'da nɔ̃lɔ̃ zã 'da Gale dɛ ngɔ lɛ obe Israɛlɛ!”

¹⁹ Nɛ yolo do kɔ̃ tũi ni, mi ba nu mi na, do kɔ̃ tũi dati kɔ̃ tũ ɔmɔ tɛ wi, fala kɛ tũi ma ngɔ tũ nɛ, nɛ wa kpe nu ngbo Yeruzalɛmɛ do'do. Nɛ wa tɛ hṹi ma dati kɛ na kɔ̃ tũ ɔmɔ tɛ wi e ni gɔ. Nɛ mi la ombe wi tonɔ 'da mi do kɛ zã nu ngbonɔ, we zɔ ma na, da dɛ kɔ Owele wa lé do tole kpo kɔ le do kɔ̃ tũ ɔmɔ tɛ wi gɔ.

²⁰ Na mɛ ni, Owi be gole mɛnɔ kpi do kpi, wa ɔa zi dɛ 'do ngbo Yeruzalɛmɛ fala kpo, tabi fala bɔa.

²¹ Nɛ mi mbisa wa na: “Gulu 'bɔ dɛ di ni gbaa we hɔ titole bina. Fala kɛ nɛ dɛ 'bɔ mbé nɛ, nɛ mi ba sɛ nu mi na, wa kala nɛ.” Yolo dɛ fala ni, nɛ wa tɛ 'bɔ mbé nɛ do kɔ̃ tũ ɔmɔ tɛ wi gɔ.

²² Nɛ mi ba nu mi hã olevitɛnɔ na, wa fɔlɔ tɛ wa we hɔ sa wi li Gale, nɛ wa nɛ we zɔ mɔ nu ongbo le, sɛ a winɔ wa dɛa kili, nɛ wa zɔ kɔ̃ tũ ɔmɔ tɛ wi na, mɛ a kɔ̃ tũi 'da Gale de. Ma kɛ mi sambala na: “Aa Gale 'daa, mɔ zɔ́ mɛ mi dɛa ni, nɛ ta zu mɔ gbá ngɔ mi. Nɛ mɔ dɛ́ 'bako hã mi, we kɛ mɔ de wena, kɔ̃a zã 'da mɔ ma gã wena.”

²³ Nɛ do kpo 'da fala ni, mi zɔa 'bɔ na, obe Israɛlɛ wa kala owuko gele nunɔ, ɔ nɛ owuko Asdɔdɛ, do owuko Amoni, tabi owuko Moabɛ.

²⁴ Nɛ dɛlɛ obenɔ 'da wa wa tɔ̃ zi lɛnggɛ nu owi Asdɔdɛ, nɛ ombe nɛ wa tɔ̃ lɛnggɛ nu ogele winɔ kpi do kpi. Nɛ nde gbãlã be kpo ĩ̀ zi ti lɛnggɛ nu obe Israɛlɛ gɔ.

²⁵ Ma kɛ mi kɔ'da wa, nɛ mi kana nu mi tɛ wa. Mi zɛa ombe winɔ, nɛ mi zu'du mili zu wa. Dɛ 'do nɛ, nɛ mi ba nu mi na, wa kana tɛ wa do zu li Gale na, wa kɔ̃́ sɛ 'bɔ mbé gɛnɛ kɛ na, oboko benɔ 'da wa wa ba ogele winɔ gɔ. Nɛ obulu benɔ 'da wa, tabi wa do tɛ wa, wa bá sɛ 'bɔ owuko gele nunɔ gɔ.

²⁶ Nɛ mi aka wa na: “Mɛ ma dɛa zi na, Salɔmɔ, nwa ngɔ nù Israɛlɛ dɛ 'dã mɔ, mɛ a kɛ a kala owuko gele nunɔ ni gɔ nde? Sanga ogele nwanɔ vɛ, fo nwa kɛ a wia zi kɔ̃ do a do dɔ̃lɔ̃ li ni bina. Gale kɔ̃a zi gɛnɛ a, nɛ Gale ia zi a do nwa ngɔ nù Israɛlɛ vɛ̃. Gɛnɛ kɔ na mɛ ni, owuko gele nunɔ wa fi zi a kɔ 'dã mɔ.

²⁷ Lɛ kɔ̃̀ we zele na, nɛ bɛ̃ we nu Gale, nɛ nɛ kala owuko gele nunɔ gɔ.”

²⁸ Mbe kpo kɔ ozagbãlã benɔ 'da Yoyada, be yaa gã nwa nganga Eliasibɛ, ba zi be zɔnga be 'da Sanɛbalatɛ, wi Horoni. We duzu ma, mi ndaka a kɔ le Yeruzalɛmɛ do'do.

²⁹ Mi sambala 'bɔ na: “Aa Gale 'daa, da dɛ kɔ ta zu mɔ élé ngɔ mɔ sape, kɛ nu fɛlɛ Eliasibɛ yulu zi kɔ to nganga ni gɔ. Nɛ da dɛ kɔ tɛ mɔ élé 'bɔ ngɔ mɔ sape, kɛ wa yulu zi kɔ gba tɔkɛ 'da mɔ kɛ mɔ gba do onganganɔ, do olevitɛnɔ ni gɔ.”

³⁰ Nɛ mi fua ogele winɔ kɔ obe Israɛlɛ vɛ̃, nɛ mi gisa ngawi mbulanɔ kɛ ma tɔ̃ we tonɔ 'da nganga kpo kpo, do levitɛ kpo kpo ni dɛ olo nɛ.

³¹ Nɛ mi gisa 'bɔ dɔnggamɔ gua do kɔ̃ tũ nɛ, do odɔnggamɔ kuti kpalɛ kɔ fɔnɔ dɛ olo nɛ. Ma kɛ mi sambala na: “Aa Gale 'daa, mɔ zɔ dia mɛnɔ vɛ̃ mi dɛa gɛ, nɛ da dɛ kɔ ta zu mɔ élé ngɔ mi gɔ.”