NEHEMIE 12 - WE NU GALE 1995

Li onganganɔ do olevitɛnɔ

¹ Kɛ gɛ mɛ a li onganganɔ do olevitɛnɔ, kɛ wa yula kɔla 'duli, nɛ wa si do Yesua, do Zorobabɛlɛ, be 'da Sealtiɛlɛ ni.

Lì onganganɔ

^2-7 Kɔ onganganɔ, wi a: Sɛraya, Irmeya, Ɛsdrasi, Amaria, Malukɛ, Hatusɛ, Sɛkania, Rɛbumɛ, Mɛremɔtɛ, Ido, Ginɛtɔi, Abia, Miaminɛ, Madia, Bilga, Sɛmaya, Yoyaribɛ, Yɛdaya, Salu, Amɔkɛ, Hilkia do Yɛdaya. Do 'da fala 'da Yesua, nɛ nde winɔ ni vɛ̃ zi a kpasa wi nu fɛlɛ kula 'da onganganɔ, do olevitɛnɔ.

Lì olevitɛnɔ

⁸ Kɔ olevitɛnɔ, wi a: Yesua, Binui, Kadmiɛlɛ, Serebia, Yɛhuda do Matania. Matania do Owi wilinɔ kɔ nu fɛlɛ a hã wa ba gɛlɛ Zumanɔ we dɔnggɔ do Gale.

⁹ Nɛ olevitɛnɔ gɛ hã wa gese nu Zumanɔ ni, wi a: Bakbukia do Uni. Wa yolo do dati wa, sɛ nɛ wa ba do gɛlɛ zuma de.

Obe zã gã nwa nganga Yesua

^10-11 Yesua zi a baa Yoyakimɛ, nɛ Yoyakimɛ a baa Eliasibɛ, nɛ Eliasibɛ a baa Yoyada, nɛ Yoyada a baa Yonatanɛ, nɛ Yonatanɛ a baa Yadua.

Li okpasa wi kɔ nu fɛlɛ nganganɔ

^12-21 'Da fala Yoyakimɛ zi a gã nwa nganga ni, nɛ nde okpasa wi kɔ nu fɛlɛ nganganɔ wi a: Nganga Nu fɛlɛ Mɛraya Sɛraya Hanania Irmeya Mɛsulamɛ Ɛsdrasi Yohananɛ Amaria Yonatanɛ Mɛliku Yozɛfu Sɛbania Adna Harimɛ Hɛlakai Mɛrayɔtɛ Zakaria Ido Mɛsulamɛ Ginɛtoni Zikri Abia … Miniaminɛ Pilatai Moadia Samua Bilga Yonatanɛ Sɛmaya Matɛnai Yoyaribɛ Uzi Yɛdaya Kalai Salai Ebɛrɛ Amɔkɛ Hasabia Hilkia Nɛtaneɛlɛ Yɛdaya

Nganga Nu fɛlɛ

²² Do 'da fala Eliasibɛ, do Yoyada, do Yohananɛ, do Yadua wa hɔa ogã nwa nganganɔ dɛ 'do ngbawa ni, nɛ nde wa kɔma li olevitɛnɔ, kɛ wa a okpasa wi kɔ nu fɛlɛ wa ni kɔ 'buku li winɔ. Wa dɛa 'bɔ ní we onganganɔ, gbaa we hɔ tɛ dɛa to nwa 'da Dariusi, gã nwa ngɔ nù Pɛrsɛ.

²³ Lì okpasa wi kɔ nu fɛlɛ olevitɛnɔ zi tɛ mɛ 'bɔ kɔ 'buku kɛ ma tɔ̃ we gã mɛnɔ ma do gulu nɛ boe ni. Nɛ nde wa kɔma ma gbaa we hɔ 'da fala 'da Yohananɛ, be yaa Eliasibɛ, nɛ ma Sɔkpɔ dɛ di ni.

²⁴ Onwa ngɔ levitɛnɔ: Hasabia, Serebia do Yesua, be 'da Kadmiɛlɛ, wa yolo do dati ogele levitɛnɔ, we ga zuma dɔ̃lɔ̃ li 'da Gale, do dɔngga wi 'da a. Ma hɔ 'da fala toe 'da wa, nɛ wa dɛ ɔ nɛ kɛ mbulanɔ 'da Davidi, wi 'da Gale tɔ̃a ni.

Toe 'da Owi zɔ mɔ nu ngbonɔ

²⁵ Owi zɔ mɔ nu ngbonɔ wi a Matania, Bakbukia, Obadia, Mɛsulamɛ, Talmoni do Akubɛ. Wa zɔ mɔ tɛ fala usu do mɛnɔ, kɛ ma dɔ̃ɔ do onu tɔa Tɛmpɛloe ni.

²⁶ Wa dɛ zi toe 'da wa, do 'da fala 'da Yoyakimɛ, be 'da Yesua, kɛ a 'bɔ a be yaa Yosadakɛ ni. Wa dɛa 'bɔ to do 'da fala 'da Nehemi, wi fɔmɔ le, do Ɛsdrasi, nganga kɛ a a ngbongbo wi ĩ ti mbula ngboo ni.

Nehemi ia ngbo nu le dɛ kɔ̃ Gale

²⁷ 'Da fala dɛa to zĩ ngbo nu le Yeruzalɛmɛ dɛ olo nɛ ia do'do, nɛ wa sa mɔ hã olevitɛnɔ tɛ falanɔ vɛ̃ kɛ wa ɔ nɛ ni na, wa tɛ Yeruzalɛmɛ, hã wa dɛ yangga, nɛ wa dungu ɛngga e ngbo nu le dɛ kɔ̃ Gale, nɛ wa ga ozuma dɔnggɔ do Gale, nɛ wa zɛ ombala mɔ bolo, do ogã kundu, do obe kundu.

^28-29 Ngɔ gili owi ga Zumanɔ ni, wa yula kɔ obe lenɔ 'da wa kɛ zã le Yeruzalɛmɛ, do Nɛtofa, do Bɛtɛ-Gilgalɛ, tɛ ngɔ 'bili tɛ nù Geba do Azmavɛtɛ, nɛ wa ngɛmɛ li ngba wa dɛ Yeruzalɛmɛ.

³⁰ Nɛ onganganɔ do olevitɛnɔ wa fɔlɔ tɛ wa we hɔ sa wi li Gale. Nɛ wa dɛa tɛ mɛ 'bɔ na, owinɔ wa hɔ sa wi li Gale. Dɛ 'do nɛ, nɛ wa dɛa mɛ kɛ ma wia na, nu ngbonɔ do ngbo nu le, ma hɔ sa li Gale ni.

³¹ Mi Nehemi, mi ba nu mi hã okpasa wi ngɔ nu fɛlɛ kulanɔ 'da Oyuda na, wa kũ dɛ ngɔ ngboe. Nɛ mi gɔnɔ sanga ngɔ gili Owi ga Zumanɔ bɔa. Ngɔ gili wa kɛ dati, wa la si ngawili kɔ̃, nɛ wa ba do ngɔ ngbo kɛ si nu ngbo Zubu.

³² Nɛ Hokaya do kpo mbe bɔa kɔ okumu Yuda, wa kpia dɛ 'do owi ga Zumanɔ ni.

³³ Dɛ 'do wa, wi a: Azaria, Ɛsdrasi, Mɛsulamɛ,

³⁴ Yɛhuda, Bɛnzamɛ, Sɛmaya do Irmeya.

³⁵ Dɛ 'do wa, wi a onganganɔ kɛ wa dama mɔtũlũnɔ ni. Nɛ Zakaria, wi nu fɛlɛ Asafɛ, fala nɛ kpo do ongba a, wa kpia dɛ 'do wa. Lì oyaa Zakaria a: Zakurɛ, Mikaya, Matania, Sɛmaya do Yonatanɛ.

³⁶ Nɛ li ongba a a: Sɛmaya, Azarɛlɛ, Milalai, Gilalai, Mal, Nɛtaneɛlɛ, Yɛhuda do Hanani. Zakaria do ongba a wa zɛ omɔ ga Zumanɔ kɛ Davidi, wi 'da Gale tɔ̃a zi na wa dɛ ma ni. Nɛ Ɛsdrasi, nganga wi be mbula, a kpia dati ngɔ gili wanɔ ni.

³⁷ Wa nɛa we hɔ tɛ nu ngbo kɛ ma la dɛ 'do lì i, nɛ wa kpa o'dingba nùnɔ kɛ wa 'dafa we kũ do ma dɛ nu gba ngboe nwa 'da Davidi ni. Nɛ wa kũ do ma dɛ gbogbo zu tɔa 'da Davidi, nɛ wa la gbaa, we hɔ tɛ nu ngbo kɛ ma wala lì, do si 'biti gba wese ni.

³⁸ Ngɔ gili wi ga Zumanɔ kɛ bɔa, wa ba si ngɔ gale. Nɛ mi kpia dɛ 'do wa, tɛ la do ngɔ ngboe, fala nɛ kpo do tala kpo mbee bɔa owinɔ. Lɛ la do ngɔ ngala tɔa Furunɔ, gbaa we hɔ tɛ fala kɛ ngboe gã nɛ wena ni.

³⁹ Dɛ 'do nɛ, nɛ lɛ la do ngɔ nu ngbo Efraimɛ, do Yɛsana, do ngbo Kɔyɔnɔ. 'Do kɛ lɛ la ngala tɔa 'da Hananeɛlɛ, do kɛ 'da Kama do'do, nɛ lɛ ba do ngɔ nu ngbo Batanɔ we hɔ tɛ nu ngbo “Zɔ mɔ tɛ le.”

⁴⁰ Ngɔ gili wi ga Zumanɔ bɔa ni, wa kpa ngba wa tɛ nu Tɛmpɛloe 'da Gale, nɛ wa yolo nù. Nɛ mi yula tɛ mɛ 'bɔ nù, fala nɛ kpo do ombe wi 'bili wenɔ, kɛ wa kpia zi dɛ 'do mi ni.

⁴¹ Ombe nganganɔ wa zi tɛ dama mɔtũlũ. Wi a: Eliakimɛ, Maseya, Miniaminɛ, Mikaya, Eliohenai, Zakaria do Hanania.

⁴² Nɛ ombe nganganɔ wa zi tɛ mɛ 'bɔ tɛ ga zuma. Wi a: Maseya, Sɛmaya, Elazarɛ, Uzi, Yohananɛ, Malkia, Elamɛ do Ezɛrɛ. Nɛ Izrahia zi hã a fĩ kɔ̃ a ngɔ owi ga Zumanɔ.

⁴³ Kɔ̃ tũi ni, mɛ zi a kɔ̃ tũ ɛngga, nɛ winɔ wa hã zi dɔnggamɛnɔ hã Gale wena. Nɛ Gale hã yangga hã owinɔ 'da a wena. Wukonɔ do benɔ tɛ Yeruzalɛmɛ, wa dunu do yangga, nɛ wá zɛ kaliã. Nɛ hiamɔ yangganɔ ni ma dɔ̃lɔ̃ nyɛlɛ wena.

Dɔnggamɛnɔ we hã hã onganganɔ do olevitɛnɔ

⁴⁴ Do kpo 'da fala ni, nɛ wa saka zi owele we zɔ mɔ tɛ 'bili tɔanɔ kɛ wa a do dɔnggamɛnɔ kɛ zã Tɛmpɛloe ni. Odɔnggamɛnɔ ni a okuti wala tenɔ, do kpo mbee 'bu kɔ okpalɛ li fɔnɔ. Toe 'da owinɔ ni a ngɛmɛ Okpalɛnɔ kɛ mbula tɔ̃a na, obe Israɛlɛ wa hã do dɔnggamɔ hã onganganɔ do olevitɛnɔ ni. Wa kala do'do, nɛ wa a kɔ tɔa. Nɛ dɔnggamɛnɔ ni, mɛ a kɛnɔ ma yolo kɔ fɔnɔ kɛ wa wa ma dɛ kɛ zã lenɔ ni. Owinɔ ngɔ nù Yuda vɛ̃ wa kɔ̃a zi gɛnɛ toe 'da onganganɔ do olevitɛnɔ.

⁴⁵ Toe 'da wa a dɔnggɔ Gale 'da wa, do dɛ mɛ kɛ ma wia na, owele do omɛnɔ, wa hɔ sa li Gale ni. Owi ga zumanɔ, do Owi zɔ mɔ nu tɔa Tɛmpɛloe, wa dɛ toe 'da wa, ɔ nɛ kɛ nwa Davidi do be 'da a Salɔmɔ, wa ba zi do nu wa na, wa dɛ ni.

⁴⁶ We kɛ zɛ́ belee, yolo do 'da fala 'da nwa Davidi, do Asafɛ, wi kpe dati owi ga zumanɔ, nɛ wa saka zɛ́ owele we fi kɔ̃ wa ngɔ zuma dɔnggɔ do Gale.

⁴⁷ Tũ kpo kpo, do 'da fala 'da Zorobabɛlɛ, tabi 'da Nehemi, obe Israɛlɛ wa tɛ zi do omɛnɔ kɛ ma wia we gala owi ga zumanɔ, do owi zɔ mɔ nu tɔa Tɛmpɛloe ni. Nɛ wa tɛ 'bɔ do dɔnggamɔ we gala olevitɛnɔ. Nɛ olevitɛnɔ wa kala kɛ 'da onganganɔ, nɛ wa hã ma hã wa.