NEHEMIE 10 - WE NU GALE 1995

Owinɔ wa kana tɛ wa we dɛ mbula 'da Gale

¹ We duzu mɛnɔ vɛ̃ kɛ ma kpa zi lɛ, obe Israɛlɛ ni, ma kɛ lɛ kana tɛ lɛ nganda wena we dɛ mbula 'da Gale. Nɛ lɛ kɔma linggamɛ ni kɔ mbɛti. Nɛ okpasa wi nu fɛlɛ kulanɔ, do olevitɛnɔ, do onganganɔ 'da lɛ, wa ia zi kɔ̃ wa ti mbɛti ni.

² Nɛ zélé li owinɔ wa ia kɔ̃ wa ti mbɛti ni. Wi a: Nehemi, be 'da Hakalia. A a wi fɔmɔ le.

Onganganɔ

^3-9 Kɔ onganganɔ wi a: Sidɛkia, Sɛraya, Azaria, Irmeya, Pasɛhurɛ, Amaria, Malkia, Hatusɛ, Sɛbania, Malukɛ, Harimɛ, Mɛremɔtɛ, Obadia. Daniɛlɛ, Ginɛtoni, Barukɛ, Mɛsulamɛ, Abia, Miaminɛ, Mazia, Bilgai do Sɛmaya.

Olevitɛnɔ

^10-14 Kɔ olevitɛnɔ wi a: Yesua, be 'da Azania, Binui, wi nu fɛlɛ kula 'da Henadadɛ, Kadmiɛlɛ do ongba wa: Sɛbania, Hodia, Kɛlita, Pɛlaya, Hananɛ, Mika, Rɛhɔbɛ, Hasabia, Zakurɛ, Serebia, Sɛbania, Hodia, Bani do Bɛninu.

Ogã wi ngɔ winɔ

^15-28 Kɔ ogã wi ngɔ winɔ wi a: Parɔsi, Pahatɛ-Moabɛ, Elamɛ, Zatu, Bani, Buni, Azgadɛ, Bebai, Adonia, Bigvai, Adinɛ, Atɛrɛ, Hizkia, Azurɛ, Hodia, Hasumɛ, Besai, Harifɛ, Anatɔtɛ, Nebai, Magpiasi, Mɛsulamɛ, Hezirɛ, Mɛsezabɛlɛ, Sadɔkɛ, Yadua, Pɛlatia, Hananɛ, Anania, Oze, Hanania, Hasubɛ, Halohɛsi, Pila, Sobɛkɛ, Rɛhumɛ, Hasabna, Maseya, Ahia, Hananɛ, Ananɛ, Malukɛ, Harimɛ do Baana.

Obe Israɛlɛ wa kpua mbulu hã Gale

²⁹ Lɛ, ogele be Israɛlɛ, do onganganɔ, do olevitɛnɔ, do Owi zɔ mɔ nu ngbonɔ, do Owi ga Zumanɔ, do Owi gala olevitɛnɔ, lɛ mba kpo do ogã winɔ 'da lɛ we kpo mbulu hã Gale, mba do owinɔ kɛ wa 'bana zi ngɔ nù Yuda nga do 'da fala 'duli, nɛ wa bɛ̃a gɛnɛ dɛa mɛ 'da opaganɔnɔ we dɛ mbula 'da Gale ni. Wi a lɛ, mba do okɛnɛ lɛ, do obenɔ 'da lɛ, owuko nɛ do Owi wili nɛ, kɛ wa wia sabɛlɛ zele gulu mbula ni.

³⁰ Lɛ vɛ̃, lɛ mba do ogã winɔ 'da lɛ, nɛ lɛ kana tɛ lɛ fala nɛ kpo do wa na, lɛ dɛ sɛ mbula kɛ NWA Gale 'da lɛ ia hã lɛ, do wala 'da wi toe 'da a Mɔizɛ ni. Lɛ kana tɛ lɛ na, lɛ dɛ sɛ mbulanɔ 'da Gale vɛ̃ do bɔlɔ nɛ.

³¹ Lɛ kɔ̃́ sɛ 'bɔ we ba ko sanga tɛ ngba lɛ do opaganɔnɔ, kɛ wa ɔ ngɔ nùi 'da lɛ ni gɔ.

³² Fala kɛ do kɔ̃ tũ ɔmɔ tɛ wi 'da lɛ, tabi do gele kɔ̃ tũ ɛngga, kɔ winɔ ni wa tɛ do okpalɛ, tabi do ogele tole we be gole nɛ, nɛ nde lɛ ósó sɛ mɔ kpo kɔ̃ wa gɔ. Nɛ 'do sabɛlɛ sambo sambo, lɛ la sɛ fɔnɔ 'da lɛ na, ma dɛ bìlì, nɛ lɛ la sɛ ku'danɔ 'da lɛ dɛ zu onya lɛ.

³³ Lɛ ba nu lɛ na, kɔ sabɛlɛ kpo kpo, nɛ lɛ da sɛ mbili fɛ̃a mɔ bolo kɛ ma wia do gramɛ nalɛ, we dɛa toe kɔ Tɛmpɛloe 'da Gale 'da lɛ.

³⁴ Nɛ mbili ni ma gala sɛ we oso mapa, do sa'de, do ofũ we dɔnggɔ do Gale tũ kpo kpo, do dɔnggamɛ kɛ wa hã kɔ̃ tũ ɔmɔ tɛ wi, do kɔ̃ tũ mbé hɔa zɛkɛ, tabi tala ogele tũ ɛngganɔ ni. Ma gala sɛ 'bɔ we oso do tala ogele dɔnggamɛnɔ hã Gale, do osa'de kɛ obe Israɛlɛ wa gbɛ hã Gale we fo ku'da 'dã mɛnɔ zu wa ni. Nɛ kpo kpo mbili ni, ma gala sɛ 'bɔ we tonɔ vɛ̃ kɛ wa dɛ ma we 'dafa do Tɛmpɛloe 'da Gale 'da lɛ ni.

³⁵ Lɛ, onganganɔ, do olevitɛnɔ, do ogele be Israɛlɛ, lɛ tua zeke we kɛ̃ kɔ̃ tũi kɛ onu fɛlɛ kulanɔ 'da lɛ, wa nɛ sɛ do dɔnggamɔ gua we Tɛmpɛloe 'da Gale 'da lɛ ni. Lɛ dɛ sɛ 'bɔ mbula kɛ ma tɔ̃a na, sabɛlɛ kpo kpo, lɛ nɛ́ do guanɔ we dɔ do sa'denɔ hã NWA Gale 'da lɛ.

³⁶ Nɛ sabɛlɛ kpo kpo, lɛ nɛ sɛ 'bɔ do kuti kpalɛ li fɔnɔ, do kuti wala tenɔ 'da lɛ we hã ma hã onganganɔ kɔ Tɛmpɛloe.

³⁷ Nɛ lɛ nɛ sɛ 'bɔ do Okuti bulu benɔ kɛ lɛ kua wa ni, do Okuti be nadalamɛnɔ 'da lɛ, nɛ lɛ e sɛ wa hã Gale, ɔ nɛ kɛ mbula tɔ̃a ni. Lɛ nɛ sɛ do Okuti be ngɔmbɔ, do bata, do dua, nɛ lɛ kala wa hã onganganɔ kɛ wa de toe kɔ Tɛmpɛlo 'da Gale 'da lɛ ni.

³⁸ Lɛ hã sɛ 'bɔ odia fũ, do owala te, do mbé dɔ̃, do nɔ hã wa. Nɛ wa a sɛ ma kɔ tɔa usu do mɛnɔ kɔ ngbo Tɛmpɛloe i. Lɛ hã sɛ kpo mbee 'bu 'da kpamɛnɔ 'da lɛ vɛ̃ do dimɛ hã olevitɛnɔ. Nɛ olevitɛnɔ wa nɛ sɛ kɔ lenɔ lɛ dɛ do toe ni, we kala dimɛnɔ ni.

³⁹ Nɛ nganga kpo kɔ nu fɛlɛ Aroni, a kã sɛ olevitɛnɔ, 'da fala wa nɛ sɛ we kala dimɛnɔ ni. Olevitɛnɔ wa si sɛ do kpo mbee 'bu 'da dimɛnɔ ni dɛ kɔ Tɛmpɛloe, nɛ wa a sɛ ma kɔ tɔa usu do mɛnɔ.

⁴⁰ Obe Israɛlɛ, do olevitɛnɔ, wa a sɛ okpalɛ dɔnggɔ do Gale, do mbé dɔ̃nɔ, do nɔnɔ kɔ tɔa usu do mɛnɔ tɛ fala kɛ wa a do okpana dɛa toe kɔ Tɛmpɛloe ni. Fala ni, mɛ 'bɔ a fala kɛ onganganɔ kɛ wa dɛ toe kɔ̃ tũi ni, do Owi zɔ mɔ nu ngboe, do Owi ga Zumanɔ wa dungu nɛ ni. Na mɛ ni, lɛ lá sɛ Tɛmpɛloe 'da Gale ni iko gɔ.