NEHEMIE 1 - WE NU GALE 1995

¹ Kɛ gɛ mɛ a lɛnggɛ olo nu mi Nehemi, be 'da Hakalia. Mbe tũ kpo, do kɔ zɛkɛ 'da kusi, 'da fala kɛ gã nwa Artasɛrsɛsi dɛa 'bu sabɛlɛ bɔa tɛ to nwa 'da a ni,

Nehemi zila osako si ngɔ le Yeruzalɛmɛ

² nɛ mbe nya mi kpo lì a a Hanani, a yula tɛ ngɔ nù Yuda, nɛ a tɛ we zɔ mi. A tɛa do ombe gele wele. Do 'da fala ni, mi ɔ zi tɛ Suzɛ, le kɛ gba ngbo zĩ ma takpa. Nɛ mi aka wa si ngɔ Oyudanɔ kɛ wa yula zi kɔlɔ 'duli 'da wa, nɛ wa si dɛ kɔ le Yeruzalɛmɛ i ni.

³ Nɛ wa gese hã mi na, winɔ kɛ wa si zi olo 'dɔlɔ wi 'da wa ni, wa ɔ ngɔ nù Yuda. Nɛ nde wa zɔ ngamɔ i mɔ wena, nɛ wa 'bɔ do dĩ bina. Nɛ ngbo nu le Yeruzalɛmɛ ma gbini wena, nɛ ogbangga kpe do nu ngbo le ma bɛlɛ 'bɔ do'do.

Sambala 'da Nehemi we Oyuda

⁴ 'Da fala kɛ mi nɛa we zele Sakonɔ ni, nɛ mi dungu nù, nɛ mi ma ngɔ he nɛ. Mi dungu do 'bako, nɛ mi bɛ̃a nyɔngɔmɔ 'do tũ dɛlɛ wena. Nɛ 'do nɛ, nɛ mi sambala Gale li nza i na:

⁵ “Aa NWA Gale tɛ li nza i, Gale kɛ mɔ gã wena, nɛ lɛ dɛ kili mɔ! Mɔ 'bana dɛ olo gba tɔkɛ 'da mɔ do owinɔ kɛ wa dɛ mbula 'da mɔ, nɛ mɔ be kɔ̃a zã 'da mɔ hã wanɔ kɛ wa kɔ̃a gɛnɛ mɔ ni.

⁶ Ngangga ni, mɔ síkí li mɔ dɛ 'da mi, hã mɔ zélé sambala 'da mi, wi toe 'da mɔ. Tũ do gba wese, mi aka mɔ we duzu lɛ Oyudanɔ, wi tonɔ 'da mɔ, nɛ mi gbala 'dã mɛnɔ kɛ lɛ dɛa ni. Gbãlã we, mi ĩ na, mi do oyaa mi, lɛ dɛa 'dã mɔ.

⁷ Lɛ dɛa 'dã mɔ dɛ 'da mɔ, we kɛ lɛ bɛ̃a we dɛ olo nu mɔ, do dɛ mbulanɔ 'da mɔ, kɛ mɔ hã zi hã lɛ do wala 'da wi toe 'da mɔ Mɔizɛ ni.

⁸ Nɛ nde mɔ lénggé do we olo nu mɔ, kɛ mɔ tɔ̃a zi hã lɛ do wala 'da Mɔizɛ ni. Mɔ tɔ̃a zi na, fala kɛ lɛ 'bànà do kɔ̃a zã dɛ 'da mɔ gɔ, nɛ mɔ pɛsɛ sɛ lɛ do ngɔ nùnɔ nyanga nza gɛ vɛ̃.

⁹ Kɔ 'do ki ni, hã fala kɛ lɛ siki 'bɔ li lɛ dɛ 'da mɔ, kɔ lɛ dɛ olo ombulanɔ 'da mɔ, nɛ mɔ ngɛmɛ sɛ li lɛ, we gese lɛ dɛ fala kɛ mɔ saka na wa dɔnggɔ do mɔ ni. Gɛnɛ kɔ wa 'dɔlɔ lɛ gbaa tɛ ndɔti nùi, nɛ mɔ ngɛmɛ sɛ li lɛ we gese lɛ.

¹⁰ “Aa NWA, lɛ a wi tonɔ 'da mɔ, nɛ lɛ a owinɔ 'da mɔ! Mɔ zi a mɔ gɔnɔ lɛ kɔ ngbá do ngawi 'da mɔ kɛ ndɔti nɛ bina.

¹¹ Mi ala nu mi hã mɔ NWA na, mɔ gɛ́ zala mɔ tɛ sambala 'da mi, do kɛ 'da onya mi Oyudanɔ, kɛ yangga 'da wa ma yolo kɔ dɔnggɔ dɔ̃lɔ̃ li 'da mɔ ni. Mɔ dɛ́ na, gã nwa kɔ̃ gɛnɛ mɛnɔ kɛ mi nɛ aka a we ma ni, nɛ a hã wala hã mi do dia kɔ sila.” Do 'da fala ni, mi zi a wi tɛnɛ dɔ̃ɛ hã gã nwa.