NAHUMƐ 3 - WE NU GALE 1995

Le Ninivɛ 'danga do'do

¹ 'Bako wena do le Ninivɛ! Le 'da owi zũnɔ do Owi gbɛ winɔ! Le kɛ ma dunu zi do kpamɛnɔ, kɛ wa kala zi kɔ̃ ogele winɔ ni.

² Nɛ zélé! Giti zufanɔ dɔ̃lɔ̃ vayã vayã! Giti kolo ngilingili bolonɔ wele ngurr! Giti nyanga mbalatanɔ wele girr girr girr! Nɛ ngilingili bolonɔ kimili ngindi ngindi ngindi!

³ Osoda kũ mbalatanɔ wa hɛ̃lɛ̃ ombalatanɔ 'da wa na, wa yu nganda. Odu kɔya bolonɔ nyɛ we ngbangge ngbangge ngbangge, nɛ osɛlɛnɔ nyɛ we ɔ nɛ nyɛa li kolo ni! Falanɔ vɛ̃ owɔlɔ ɔ kululu. Wele wè tɛ tɔlɔ ma gɔ, nɛ winɔ wa tɛ kɔ zu nyanga wa do ma!

⁴ Ninivɛ ɔ nɛ wuko ndumba kɛ 'dã mɛnɔ 'da a la li ngele ni. A ɔkɔlɔ zi ogele winɔ, nɛ a vĩ zu wa do dia zɔnga 'da a, do gba sɔ̃ mɛnɔ 'da a, nɛ a kala wa do ngbá.

⁵ Ma kɛ NWA ngɔ mɔ nyanga nza vɛ̃ tɔ̃ hã a na: “Mɔ zɔ́, gulu kɛ mi hã sɛ etumbu hã mɔ gɛ a ni! Mi hɔlɔ sɛ tulu tɛ mɔ vɛ̃, nɛ ogele winɔ wa zɔ sɛ kũlĩ tɛ mɔ, nɛ mɔ hɔ sɛ yia wi li wa.

⁶ Mi da sɛ 'bɛ̃tɛ̃ dɛ ngɔ mɔ, nɛ ma hã sɛ sape hã mɔ. Nɛ mi dɛ sɛ na, owinɔ wa ka mɔ tɛ mɔ, nɛ wa nyɛ nu wa.

⁷ Winɔ vɛ̃ kɛ wa zɔ sɛ mɔ ni, wa gbɔtɔ sɛ tɛ wa tɛ mɔ dɛ 'do, nɛ wa he sɛ mɔ na: ‘Le Ninivɛ 'danga do'do! Wi nɛ he kɔ̃a nɛ a wio nde? Nɛ wi nɛ ĩ 'bako hã a 'dafa ma a wio nde?’ ”

Owi Ninivɛ wa 'bɔ do mbé ngawi bi ngɔ le 'da wa bina

⁸ Ninivɛ, mɔ dia tɛ mɛ nɛa ngɔ Tɛbɛsi, gã le nwa ngɔ nù Ezipeto nde? Tɛbɛsi a le kɛ fua lì Nilɛ kele ma, ɔ nɛ gba ngbo ni.

⁹ Onwa kɔ le Tɛbɛsi, wa dungu zi nwa ngɔ nù Etiopi do nù Ezipeto vɛ̃, nɛ owi ngɔ nùnɔ ni wa hã zi kpamɔ hã wa hã fai. Nɛ owi ngɔ nù Putɛ do Libi, wa dɛa zi na do owi Tɛbɛsi.

¹⁰ Gɛnɛ kɔ na mɛ ni, nɛ nde owi sɛnɛ owi Tɛbɛsi wa kala zi wa do ngbá, nɛ wa 'dɔlɔ wa. Wa kala zi 'bɔ obenɔ 'da wa, nɛ wa o zu wa do ta dɛ li fandanɔ. Nɛ wa kala ogã winɔ do okpasa winɔ, nɛ wa ɛnzɛ wa do dɔkpɔ, nɛ wa to zeke ngɔ wa we kɛ̃ wa dɛ sanga tɛ ngba wa.

¹¹ Nɛ nde ma sɛ 'bɔ ni we nɛ, Owi Ninivɛ. Ngamɔ ma gulu sɛ zu nɛ pilii, nɛ li nɛ ma fele sɛ. Nɛ fa sɛ fala usu tɛ nɛ we yu Owi sɛnɛ nɛ.

¹² Nɛ nde ogba ngbonɔ ngɔ nùi 'da nɛ vɛ̃, ma wia kɔ̃ do wala te kɛ ma fila ia, kɔ wa yaka te nɛ, nɛ wala nɛ ala dɛ kɔ̃ wi nyɔngɔ ma iko ni.

¹³ Osodanɔ 'da nɛ wa 'bɔ do mbé ngawi bi bolo bina, wa mbɔkɔ ɔ nɛ owuko ni. Nu ngbo lenɔ 'da nɛ hũi do kpo tɛ̃ ɛ, nɛ Owi sɛnɛ nɛ wa le iko. We ma bɛlɛ ogbangga nu ngbonɔ vɛ̃.

¹⁴ Aa nɛ owi Ninivɛ, nɛ só lì dɛlɛ dɛ kɔ tɔa, we lengge do 'da fala owi sɛnɛ nɛ wa nɛ linggi le ni. Nɛ 'dáfá omɔ zɛ bilikinɔ, nɛ nɛ so gili we zɛ do ma, nɛ nɛ 'dáfá ongbonɔ dɛ olo nɛ.

¹⁵ Nɛ nde gɛnɛ kɔ nɛ dɛ mɔ ge nde, nɛ nɛ fe sɛ li nyɛa we kɛ ma nɛ bɛlɛ le ni, tabi nɛ fe sɛ do tɔ̃a nu bolo iko. Nɛ kumu sɛ ɔ nɛ bɔ̃ kɛ ogɔbiyele wa nyɔngɔ nzɔlɔ nɛ ni. Owinɔ 'da nɛ wa dɛlɛ zi wena, nɛ wa dɛ ngbakpakpa ɔ nɛ odɔla ni.

¹⁶ Owi be golenɔ 'da nɛ wa dɛlɛ zi nɛa ngɔ osɔlanɔ li nza gɛ. Nɛ nde ngangga gɛ, wa yu do'do, ɔ nɛ ogɔbiyele kɛ wa bũlũ ni.

¹⁷ Owi mbatinɔ do owi ti nu nwa, wa dɛlɛ zi ɔ nɛ olaka, kɛ wa ngɛmɛ ngba wa 'da fala gɛ̃ɛ dɛ ngɔ gbakɔ̃ tenɔ ni. Kɔ 'da fala kɛ wese hɔ ngɔ, hã ma a tɛ wa, nɛ wa pɛsɛ, nɛ nde fo wi ĩ fala wa la nɛ ni bina.

¹⁸ Aa mɔ gã nwa ngɔ nù Asiri, owi fɔmɔ lenɔ 'da mɔ wa fia, nɛ ogã winɔ 'da mɔ wa tùnù sɛ 'bɔ mbé yala gɔ. Gulu nɛ a owinɔ 'da mɔ wa pɛsɛ dɛ ngɔ kalanɔ, nɛ wele we ngɛmɛ li wa we gese wa dɛ olo wa bina.

¹⁹ Mɔ ɔ nɛ wi kɛ a kpa dani, kɔ ina a do ma bina ni. Owinɔ vɛ̃ kɛ wa zele we 'bakoe 'da mɔ ni, wa ta kɔ̃ wa do yangga. We kɛ mɔ zɛlɛ zi tɛ wa 'danga wena, nɛ wi yu zi ti kɔ̃ mɔ kpo iko ni bina.