NAHUMƐ 2 - WE NU GALE 1995

Owele wa bi le Ninivɛ

¹ Aa nɛ Oyuda, nɛ zɔ́, wele kpo yula ngɔ kalanɔ i, kɔ a tɛ tɛ do dia sako hã nɛ. A tɛ we tɔ̃ tɛlɛ tɛ kɛ le Ninivɛ 'danga nɛ ni. We duzu ma, nɛ Oyuda, nɛ dúngú ɛngga we dɔnggɔ Gale, nɛ nɛ ha mɛnɔ kɛ nɛ kpua zi mbulu nɛ ni hã a. 'Dã winɔ kɛ wa zɛlɛ zi tɛ nɛ ni, wa fia vɛ̃ ia. Wa tɛ́ sɛ 'bɔ we bi nɛ gɔ.

^2-3 NWA nɛ gese dɔ̃lɔ̃ li 'da obe Israɛlɛ dɛ olo nɛ. Owi sɛnɛ wa hã wa 'danga zi mɛnɔ 'da wa vɛ̃, ɔ nɛ kɛ wa sɛlɛ do gbakɔ̃ te vinɔ dɛ nù ni. Nɛ nde da dɔ́ gɛ, nwa nɛ gese dɔ̃lɔ̃ li do ngawi 'da wa dɛ olo nɛ, ɔ nɛ kɛ zi dati ni. Aa nɛ owi Ninivɛ, owi sɛnɛ nɛ wa hɔa we bi le 'da nɛ ia. Wa 'danga sɛ ma vɛ̃. Nɛ zɔ́ mɔ tɛ ngbonɔ do li walanɔ 'da nɛ! Nɛ ngɛ́mɛ́ ngba nɛ vɛ̃, nɛ nɛ 'dáfá tɛ nɛ we bi bole!

⁴ Owi sɛnɛ nɛ wa kala ofila ngele dɛ kɔ̃ wa, nɛ wa he'de fila tulu. 'Da fala wa kɔlɔ ndo bole ia, nɛ ongilingilinɔ 'da wa ma ngɔ nyɛ ngbangge ngbangge, nɛ osodanɔ wa ma ngɔ fi sɛlɛnɔ 'da wa fɛãa.

⁵ Ongilingilinɔ ma tɛ yu do 'da walanɔ, do 'da lenɔ nganda wena, ɔ nɛ osa'de dɛ dã ni. Ma nyɛ ɔ nɛ nyɛa tanda ni, nɛ tɛ ma gbɛngɛ ɔ nɛ nyɛa li kolo ni.

⁶ Nwa ngɔ nù Asiri sa mɔ hã ogã wi ngɔ sodanɔ 'da a, nɛ wa wɛlɛ tɛ wa, nɛ wa kɔ zu nyanga wa. Osodanɔ ni wa wɛlɛ tɛ wa we kù dɛ ngɔ ngbonɔ, nɛ wa usu tɛ wa vɛ̃ 'do gba gbɛlɛ ngele kpo we bi owi sɛnɛ wa.

⁷ Nɛ owi sɛnɛ wa wa gbini nu ngbonɔ kɛ si tɛ nu gba lìnɔ i ni fala kpo do ti, nɛ wa le, nɛ wa ba tɔa 'da nwa.

⁸ Wa ba kpikima gale wuke, nɛ wa la do ma. Nɛ owukonɔ kɛ wa zɔ zi mɔ tɛ nɛ ni, wa ma ngɔ zɛ nu wa do 'bako, ɔ nɛ hiamɔ mɔ́ gbakulĩ ni, nɛ wa ma ngɔ zɛ ngu'du wa.

⁹ Owi Ninivɛ wa tɛ yu le ɔ nɛ fua lì kɛ wa kpia, nɛ ma ba, hã ma tɛ fo do ngɔ nùi vɛ̃ ni. Nɛ ombe wa tɛ he mɔ na: “Nɛ tɛ yù gɔ! Nɛ tɛ yù gɔ!” Nɛ nde fo wi kpolo tɛ̃ ɛ 'do bina.

¹⁰ Nɛ owinɔ wa ba le ni, wa tɛ he tɛ mɛ 'bɔ mɔ na: “Nɛ kálá mɔ mbalinɔ, do fɛ̃a mɔ bolonɔ! Le gɛ, ma dunu do ogili kpamɔ, do omɔ olo gã gole kpi do kpi.”

¹¹ Ninivɛ 'danga do'do. Owi kɔ nɛ wa yu, nɛ ma dɛa olo tɔa! Nɛ tɛ owinɔ wa 'bana kɔ le ni dɛa gɛ̃ vɛ̃, li wa fila, nɛ nyanga wa kungga do'do, nɛ tɛ wa tana gbulu gbulu.

¹² Le Ninivɛ a 'danga nɛ́ gɛ nde? Ĩ na zi dati, mɛ zi a le kɛ ma nganda wena, ɔ nɛ fala ɔi 'da ogbɔgbɔ ni. Obe gbɔgbɔnɔ wa kpa nyɔngɔmɛ 'da wa dɛ di ni. Gɛnɛ kɔ wili gbɔgbɛ la we fa nyɔngɔmɛ ia, nɛ nde fo wi tulu obe gbɔgbɔnɔ olo a nga bina.

¹³ Wili gbɔgbɛ nɛ zi, nɛ a gbɛ sa'denɔ, nɛ a ɛ̃ sanga nɛ sikili sikili, nɛ a si do ma hã naa gbɔgbɛ do obenɔ 'da a. Nɛ kɔ ta, fala wa ɔ nɛ ni, ma dunu zi do omulu sa'de.

¹⁴ Aa nɛ Owi Ninivɛ, nɛ zélé we NWA ngɔ mɔ nyanga nza vɛ̃ tɔ̃a gɛ. A na: “Mi hã sɛ etumbu hã nɛ. Mi dɔ sɛ ongilingili bolonɔ 'da nɛ, nɛ ma ngutu gbulu gbulu. Osodanɔ 'da nɛ wa fe sɛ li bolo, nɛ mi kala sɛ kpamɛnɔ kɛ nɛ zũ zi kɔ̃ ogele winɔ ni do'do. Zi dati, nɛ tumba zi Owi nɛ to hã ogele winɔ we tulu wa, nɛ nde Owele wa zélé sɛ 'bɔ wala gɛlɛ owi nɛ tonɔ 'da nɛ gɔ.”