NAHUMƐ 1 - WE NU GALE 1995

¹ Lɛnggɛnɔ kɔ 'buki gɛ, mɛ a lɛnggɛ kɛ Gale tɔ̃a ma dɛ ngɔ le Ninivɛ, nɛ a bia ma li mbe be Yuda kpo kɔ le Ɛlkɔsi, li a a Nahumɛ na, a tɔ̃ ma.

Zã NWA nɔ̃lɔ̃ dɛ tɛ Owi Ninivɛ

² NWA Gale kɔ̃̀ na, owele wa dɔnggɔ ogele gale gɔ, nɛ a hã etumbu hã wanɔ wa bɛ̃ we nu a ni. A bili nu gbã 'dã mɛnɔ 'da wa hã wa, nɛ a élé bili nu gbã 'dã mɔ kpo gɔ.

³ Zã nwa nɔ̃́lɔ̃́ dɔ̃ gɔ. Nɛ nde ngawi 'da a la li ngele, nɛ a lá wi dɛ 'dã mɔ ní iko gɔ. NWA la wala, nɛ gba bũ kamba fi olo a, nɛ gba kutunɔ mɛ a butu kɛnzɛ olo nyanga a.

⁴ A ba nu a kpo, nɛ gba lìnɔ do ogã fua lìnɔ ma ɔ̃sɔ̃ kpɛrr. Nɛ odia wɔkɔsɔ dala do nadalamɛnɔ tɛ Basanɛ kolo, nɛ otenɔ tɛ ngɔ kala Karmɛlɛ kolo, nɛ Ofulɛlɛnɔ tɛ ngɔ nù Libanɛ fe.

⁵ A hɔ ia, nɛ gã kalanɔ gbɛsɛ dati a, nɛ be kalanɔ yeke. A be tɛ̃ a ia, nɛ nùi tana, nɛ owinɔ do mɛnɔ ngɔ nyanga nza gɛ vɛ̃, wa kumu.

⁶ Wele kpo wè tɛ yolo ti dã 'da a gɔ, nɛ wele kpo wè 'bɔ tɛ kpasa ti nɔ̃lɔ̃ zã 'da a gɔ. Nɔ̃lɔ̃ zã 'da a yɛ'bɛ da dɔ̃ ɔ nɛ bɛlɛ zɔ̃ ni. Nɛ gɛnɛ kɔ ota, nɛ sanga nɛ fũ dati a.

⁷ Gɛnɛ kɔ na mɛ ni, nɛ nde NWA a de wena. A fɔmɔ owinɔ 'da a do 'da fala 'bako, nɛ a zɔ mɔ tɛ owinɔ kɛ wa gbini zã wa do a do 'da fala ngamɔ ni.

⁸ Nɛ nde a gbɛ owanɔ kɛ wa bɛ̃ we nu a ni, nɛ a tombo wa kɔ le 'da fionɔ.

Gale tumba to hã Oyuda do Owi Ninivɛ

⁹ Aa nɛ Oyuda, we nɛ lengge dɛ ngɔ NWA ni a ge nde? A gbɛ sɛ owi sɛnɛ nɛ vɛ̃, nɛ wa wé sɛ 'bɔ we zɛlɛ tɛ nɛ gɔ.

¹⁰ We ma bɛlɛ sɛ wa, nɛ wa ngutu sɛ ɔ nɛ kula wɔkɔsɔ, tabi ndu'bu ni.

¹¹ Aa nɛ owi Ninivɛ, nɛ kua wele kpo kɛ zu a dè gɔ, nɛ a lengge NWA Gale 'danga wena ni.

¹² Aa nɛ Oyuda, nɛ zélé wenɔ kɛ nwa tɔ̃a hã nɛ gɛ. A na: “Gɛnɛ kɔ owi sɛnɛ nɛ wa dɛlɛ wena, nɛ wa nganda wena, nɛ nde wa kumu sɛ vɛ̃, nɛ mɔ olo wa kpo 'báná sɛ gɔ. Mi hã zi ngamɔ hã nɛ wena, nɛ nde mi ha sɛ 'bɔ mbé nɛ gɔ.

¹³ Da dɔ̃ ni, mi nɛ fo nɛ ti mbulanɔ 'da owi sɛnɛ nɛ, nɛ mi yala ofɛlɛ dɔkpɔnɔ tɛ nɛ do'do.”

¹⁴ Aa nɛ owi Ninivɛ, nɛ zélé wenɔ kɛ NWA 'bili dɛ ngɔ nɛ gɛ. A na: “Be olo nɛ sɛ bina, nɛ li nɛ ma mbiti sɛ. Mi kala sɛ okpikimanɔ kɛ nɛ sɛa do te, tabi nɛ dula ma do mɔ bolo, nɛ ma kɔ tɔa sambala 'da ogalenɔ 'da nɛ ni, nɛ mi 'danga ma vɛ̃. Mi tɛ zã kɔ̃ fio we mi do nɛ, we kɛ nɛ 'bɔ do mbé dĩ gbali mi bina.”