Mike 7 - WE NU GALE 1995

Mike ala nu a hã Gale

¹ 'Bako do mi! Mi ɔ nɛ wi kɛ a yɛnggɛ olo owi 'bi wala te vinɔnɔ ngɔ fɔ i, takɔ a kala mbe 'bulu nɛ olo wa, nɛ a kpà mɔ kpo we nyɔ nyɔnga gɔ ni.

² Ngɔ nù Yuda gɛ ma ɔ tɛ mɛ 'bɔ na mɛ ni. Fo wi dɛ olo nu Gale, tabi wi dɛ mɔ do wala olo nɛ kɔ winɔ gɛ bina. Obe Yuda vɛ̃, wa lengge tati a handa ngba wa na, wa gbɛ wa iko.

³ Wa ĩ ti dɛ 'dã dɛa mɔ wena. Onwanɔ do Owi 'bili wenɔ, wa dɛ to 'da wa olo mbili iko. Ogã winɔ, wa tɔ̃ 'dã linggamɛnɔ 'da wa dɛ nza, nɛ wa dɛ nganda na, linggamɛ 'da lo dɛ tɛ̃ ɛ.

⁴ Sila wa dè gɔ, nɛ wa dɛ́ mɔ do wala olo nɛ gɔ. Wa ɔ nɛ o'dã wɔkɔsɔ ni. Aa nɛ, obe Yuda, kɔ̃ tũ bili nu gbã 'dã mɛnɔ 'da nɛ hɔa ia. Ma dɛ sɛ tɛ̃ ɛ ɔ nɛ kɛ Owi zɔ mɔ tɛ nɛ wa tɔ̃a zi ni. Owi zɔ mɔ tɛ nɛ wi a owi gba olo nu Gale. Kɔ kili ndua ba nɛ belee ia gbãlã we!

Mike gbini zã a do Gale

⁵ Nɛ tɛ kɔ̃̀ gɛnɛ we nu o'bia nɛ gɔ, nɛ nɛ tɛ gbìnì zã nɛ do oyali ngba nɛ gɔ. Nɛ nɛ tɛ tɔ̃̀ we zã nɛ hã okɛnɛ nɛ gɔ.

⁶ Mba gɔ, bulu be dã baa a, nɛ boko be bɛ̃ we nu naa a, nɛ konduka mɔ̃lɔ̃ do kɛfɛ a, nɛ onya mɔ ngboo, wa hɔ owi sɛnɛ mɔ.

⁷ Nɛ nde kɛ 'da mi, mi siki li mi dɛ 'da NWA Gale wi kpasa mi, mi gbini zã mi do a. A a Gale 'da mi, a zele sɛ wala gɛlɛ mi.

Sambala 'da owinɔ 'da Gale

⁸ Aa nɛ, owi sɛnɛ lɛ, nɛ tɛ mɔ̀mɔ̀ ngamɛ lɛ kpa gɛ gɔ. Gɛnɛ kɔ lɛ tia nù, nɛ nde lɛ kulu sɛ ngɔ. Gɛnɛ kɔ lɛ a kɔ gba tũ, nɛ nde NWA Gale a fo sɛ lɛ dɛ sa fala.

⁹ Nɛ fala kɛ NWA o dã zu lɛ, nɛ lɛ kunu sila lɛ, we kɛ lɛ dɛa 'dã mɔ, nɛ lɛ zɛlɛ sila a. Nɛ nde mbe tũ kpo, nɛ a yolo sɛ 'do lɛ, nɛ a be sɛ dia gulu we 'da lɛ dɛ nza. A a sɛ lɛ tɛ sa fala, nɛ a dɛ sɛ de dɛa mɔ hã lɛ.

¹⁰ Owi sɛnɛ lɛ wa zɔ sɛ de dɛa mɛnɔ, kɛ a dɛ we lɛ ni, nɛ sape ma ba sɛ li wa, nɛ wa áká sɛ 'bɔ nu lɛ na: “NWA Gale 'da nɛ a do nde” ni gɔ. Nɛ Owele wa ma sɛ owi sɛnɛ lɛ do nyanga wa ɔ nɛ 'bɛ̃tɛ̃ ni, nɛ lɛ sɛ do yangga we zɔ mɛ wa dɛ do wa ni.

¹¹ Mbe ngba soe kpo, nɛ obe Yuda wa zĩ sɛ ngbo nu gã le Yeruzalɛmɛ dɛ olo nɛ. Do ngba soe ni, nɛ wa gã sɛ 'da ngbala nùi 'da lɛ dɛ 'do.

¹² Nɛ onya lɛ, wanɔ kɛ wa 'dɔlɔ zi wa belee dɛ Asiri do Ezipeto, gbaa tɛ nu lì Efratɛ do Nilɛ, tabi tɛ nu gba lìnɔ, tabi ndũu tɛ ngɔ okalanɔ i ni, wa si sɛ dɛ Yeruzalɛmɛ.

¹³ Nɛ tala gele nùnɔ, ma kifi sɛ li go, we duzu 'dã mɛnɔ 'da owinɔ kɛ wa ɔ ngɔ nɛ ni.

¹⁴ Aa NWA Gale, mɔ ka lɛ owinɔ 'da mɔ kɛ mɔ saka lɛ ni. Mɔ zɔ́ mɔ tɛ lɛ, ɔ nɛ kɛ wi fɔmɔ odua bata zɔ do mɔ tɛ batanɔ 'da a ni. Nùi lɛ ɔ ngɔ nɛ gɛ, ma dé kpalɛ gɔ, nɛ nde odia nù mi do kpalɛ zĩ lɛ takpa. Kɔ mɔ ka lɛ dɛ tɛ nù Basanɛ do Galadɛ, kɔ lɛ kpa dia nù i mɔ, nɛ lɛ mi do kpalɛ ɔ nɛ kɛ zɛ́ dati ni.

¹⁵ Mɔ dɛ́ oɔngbamɔ hã lɛ, nɛ́ kɛ mɔ dɛa zi dati, 'da fala kɛ mɔ kala oyaa lɛ tɛ Ezipeto we si do wa ni.

¹⁶ Mɔ dɛ́ ní, nɛ ogele winɔ wa zɔ sɛ, nɛ sape ma ba sɛ li wa. Gɛnɛ kɔ wa do ngawi wena, nɛ ma ba sɛ we nu wa, nɛ zala wa ma la sɛ, nɛ wa tana sɛ kili gbulu gbulu.

¹⁷ Wa Sama sɛ fumbɛlɛ ɔ nɛ ogɔ̃ do osa'de hala nù ni. Wa hɔ sɛ nza kɔ ogba ngbonɔ 'da wa do kili, nɛ tɛ wa ma tana sɛ dati mɔ NWA Gale 'da lɛ. Wa ɔngbɔ sɛ ngawi 'da mɔ NWA.

¹⁸ Fo gele gale kpo kɛ a wia kɔ̃ do mɔ NWA ni bina. Fala kɛ mɔ zɔ 'dã mɛnɔ 'da otala winɔ 'da mɔ, kɛ wa 'bana nza ni, nɛ mɔ kunu sila mɔ, nɛ mɔ fo ku'da nɛ zu wa do'do. Zã mɔ nɔ̃́lɔ̃́ fai gɔ, we kɛ mɔ do yangga we be dia sila 'da mɔ hã lɛ.

¹⁹ Mɔ dɛ sɛ 'bɔ 'bako hã lɛ, nɛ mɔ fo sɛ ku'da o'dã mɛnɔ zu lɛ fai, nɛ mɔ lénggé sɛ 'bɔ do ma gɔ. Ma ɔ sɛ nɛ kɛ mɔ da ma 'dɔ gba 'du lì ni.

²⁰ Mɔ be sɛ kɔ̃a zã 'da mɔ hã lɛ, obe zã Abrahama do Yakɔbɔ, nɛ mɔ élé we dɛ omɛnɔ kɛ mɔ kpua zi mbulu nɛ hã oyaa lɛ ni hã lɛ gɔ.