Mike 6 - WE NU GALE 1995

NWA Gale dãlã dɛ tɛ owinɔ 'da a

¹ Nɛ zélé wenɔ kɛ NWA Gale tɔ̃ dɛ ngɔ obe Israɛlɛ gɛ! A tumba mi na, mi kúlú ngɔ, nɛ mi tɔ̃́ gulu dã kɛ ma ba a dɛ tɛ obe Israɛlɛ ni. Nɛ okalanɔ do otɔ̃nɔ wa zele, nɛ wa ɔ Otemɔɛnɔ 'da a.

² Kɔ nɛ, okalanɔ do onyanga nùnɔ kɛ ma yáká tɛ̃ ɛ gɔ ni, nɛ zélé dãlã we kɛ NWA Gale dãlã dɛ tɛ obe Israɛlɛ gɛ. A na:

³ “Nɛ, owinɔ 'da mi, 'dã mɛ mi dɛa do nɛ ni a ge nde? Mɛ kɛ mi dɛa, hã ma mbɔkɔ nɛ ni a ge nde? Nɛ gésé nu nɛ hã mi sɛ!

⁴ Mi fua zi oyaa nɛ kɔ ngbá tɛ Ezipeto i, nɛ mi si do wa, nɛ mi tumba zi Mɔizɛ, Aroni do Miriamɛ we kpe dati wa. Kɛ mi dɛa ni, ma dè gɔ nde?

⁵ Aa nɛ, owinɔ 'da mi, nɛ lénggé do Balakɛ, nwa ngɔ nù Moabɛ kɛ a kɔ̃a zi we fɔmbɔ nɛ ni. Nɛ nɛ lénggé do gisa nu we kɛ Balamɛ, be 'da Beɔrɛ, a gisa zi hã a ni. Nɛ ta zu nɛ tɛ èlè ngɔ tɛlɛ tɛ kɛ mi kã zi oyaa nɛ, yolo tɛ Sitimɛ, gbaa we hɔ tɛ Gilgalɛ ni gɔ. Nɛ lénggé ki ni vɛ̃, nɛ nɛ ĩ sɛ ti mɛnɔ kɛ mi NWA, mi dɛa we kpasa do nɛ ni.”

Mɛnɔ kɛ NWA kɔ̃a na owele wa dɛ ma

⁶ Fala kɛ mi nɛ we dɔnggɔ NWA Gale kɛ a gã wena ni, nɛ dia dɔnggamɛ mi wia tɛ dɔnggɔ do a ni a ge nde? Mi wia tabi tɛ dɔ obe ngɔmbɔ hã a nde?

⁷ Tabi dɔ ogba gili dua bata, nɛ mi so gã gba fua lì nɔ hã a, nɛ ma de sɛ tɛ̃ a nde? Mi wia we gbɛ kuti be 'da mi hã a, takɔ a fo ku'da o'dã mɛnɔ zu mi nde?

⁸ Gɔ! NWA Gale bia mɛ kɛ lɛ wia tɛ dɛ nɛ ni hã lɛ. A aka lɛ na, lɛ dungu do dia sila, nɛ lɛ dɛ bɔlɔ zu dɛa mɔ do ongba lɛ, nɛ ti kɔ̃ lɛ le ngbɛ ɛ do a kɔ dɛa to tɛ lɛ.

NWA bɛ̃a gɛnɛ zũ mɔ do dɛ ngatɛ

⁹ Nɛ zélé wenɔ kɛ NWA Gale tɔ̃ hã Owi kɔ gã le gɛ! We kɛ wenɔ ni, ma gala sɛ owinɔ wa yu kili a yu ni. NWA tɔ̃a na: “Aa nɛ, owinɔ kɛ nɛ mba li ngba nɛ dɛ kɔ gã le gɛ, nɛ zélé mi sɛ!

¹⁰ Mi kɔ̃̀ na, o'dã wele wa kala odia mɔ do 'dã wala, nɛ wa ngɛmɛ ma dɛ kɔ tɔa 'da wa gɔ. Mi bɛ̃a na, wa tɛ zṹ owinɔ do 'dã kilo 'da wa gɔ.

¹¹ Fala kɛ wa ba 'dã kilo, hã wa zũ do mɛnɔ 'da owinɔ, nɛ nde mi zɔ́ sɛ wa nɛ́ odia wi gɔ.

¹² Owi kpamɛnɔ kɔ gã le 'da nɛ, wa zɛlɛ tɛ Owi sãnɔ. Nɛ nɛ vɛ̃, nɛ a Owi ɔlɔ wi, do owi 'bili bɛlɛ.

¹³ We duzu o'dã dɛa mɛnɔ 'da nɛ, ma a mi ndua 'danga odia mɛnɔ 'da nɛ ia ni.

¹⁴ Nɛ nyɔngɔ sɛ mɔ, nɛ nde zã nɛ hɛ̃́ sɛ gɔ, nɛ nɛ he sɛ kɔ̃a wɔ. Omɛnɔ kɛ nɛ e ngɔ ni, ma 'danga sɛ. Nɛ fala kɛ nɛ usu mɔ nde, nɛ mi tombo sɛ owi bolo, nɛ wa 'danga ma.

¹⁵ Nɛ mi sɛ Okpalɛnɔ 'da nɛ, nɛ nde nɛ kálá sɛ ma gɔ. Nɛ kpĩlĩ sɛ nɔ olivɛnɔ 'da nɛ, nɛ nde nɛ nyɔ́ngɔ́ sɛ nɔ nɛ gɔ. Nɛ ma sɛ owala te vinɔnɔ 'da nɛ we kpĩlĩ lì nɛ, we dɛ do dɔ́, nɛ nde nɛ nɔ́ sɛ dɔ́ nɛ gɔ.

¹⁶ Mi dɛ sɛ do nɛ na mɛ ni, we kɛ nɛ dɛ o'dã mɛnɔ vɛ̃ kɛ nwa Omri, do be 'da a Akabɛ, do nu fɛlɛ kula 'da wa, wa dɛa zi ni. Kɔ ɔ nɛ kɛ nɛ kɔ̃a we dɛ 'dã dɛa mɛnɔ olo wa ni, mi 'danga sɛ ta 'bɔ gã le 'da nɛ. Nɛ nɛ, owinɔ 'da mi, nɛ hɔ sɛ owi gbɔlɔ mɔmu do owi sape li winɔ vɛ̃.”