Mike 5 - WE NU GALE 1995

Nwa wi kpasa wi a yolo sɛ kɔ le Bɛtleɛmɛ

¹ NWA Gale tɔ̃a na: “Le Bɛtleɛmɛ Efrata, mɛ a be le sĩ sanga lenɔ ngɔ nù Yude. Nɛ nde mi dɛ sɛ na, le ni ma ko wi kɛ a dungu sɛ nwa ngɔ obe Israɛlɛ do zu li mi ni. A sɛ a wi kɛ wa ĩ ti nu fɛlɛ oyaa a vɛ̃ yolo do gulu nɛ.”

² NWA a la sɛ owinɔ 'da a dɛ kɔ owi sɛnɛ wa gbaa na, wuke kɛ a saka a ni, a ko be 'da a. Olo nɛ, nɛ tala obe Israɛlɛ kɛ wa 'bana nza tɛ kɔla 'duli 'di ni, wa si sɛ dɛ ngɔ nù Israɛlɛ, nɛ wa mba li ngba wa do onya wa.

^3-4 Nɛ nwa kɛ wa ko sɛ a ni, a kã sɛ owinɔ do ngawi 'da NWA Gale, nɛ a be sɛ 'bɔ dɔ́lɔ́ li 'da Gale 'da a dɛ nza. Nwa ni a hã sɛ dungu fio hã owinɔ 'da a, we kɛ ngawi 'da a ma be sɛ tɛ̃ ɛ ngɔ nùnɔ vɛ̃. Fala kɛ Oasiri wa tɛ we ba nùi 'da lɛ, kɔ wa le kɔ ngbo lenɔ 'da lɛ, nɛ lɛ tombo sɛ onwa bolonɔ 'da lɛ, we bi do wa.

⁵ Nɛ owinɔ 'da lɛ wa ba sɛ nù Asiri do ngawi 'da omɔ bi bolonɔ 'da wa, nɛ wa e sɛ mbula ngɔ owinɔ ngɔ nùi ni. Do 'da fala kɛ wa tɛ, hã wa kũ ngɔ ngbala nùi, takɔ wa le we ba le 'da lɛ ni, nɛ onwa bolonɔ 'da lɛ wa kpasa sɛ lɛ ti kɔ wa.

Tɛlɛ tɛ kɛ obe Israɛlɛ wa dungu sɛ sanga ogele winɔ

⁶ Tala obe Israɛlɛ kɛ wa 'bana sɛ do tunu li wa ni, wa kpasa sɛ ogele winɔ kɛ zã wa ni, ɔ nɛ kɛ kolo tabi mbɔɛ ma kpasa do wɔkɔsɔnɔ ni. Wa gbini sɛ zã wa do Gale, nɛ nde wa gbíní sɛ zã wa do wele gɔ.

⁷ Nɛ tala obe Israɛlɛ kɛ wa 'bana sɛ sanga ogele winɔ ni, wa nganda sɛ nɛ́ kɛ gbɔgbɔ nganda sanga osa'denɔ zamɔ 'di ni. Wa ɔ sɛ nɛ be gbɔgbɔ kɛ a hɔ ngbala obata, nɛ a ba mbe kpo, nɛ a nyɔngɔ a, nɛ nde fo wi ba tala nɛ nu a bina ni.

⁸ Kafi bina, obe Israɛlɛ wa kala sɛ owi sɛnɛ wa, nɛ wa gbɛ wa vɛ̃.

NWA a 'danga sɛ ogalenɔ 'da owinɔ

⁹ NWA Gale tɔ̃a na: “Do fala nɛ ni, nɛ mi gbɛ sɛ ombalatanɔ, nɛ mi 'danga sɛ 'bɔ ongilingili nɛ bolonɔ 'da nɛ.

¹⁰ Mi 'danga sɛ ogã lenɔ ngɔ nùi 'da nɛ, nɛ mi zã sɛ ogba ngbonɔ, kɛ nɛ yu bolonɔ dɛ kɔ nɛ ni dɛ nù.

¹¹ Mi 'danga sɛ omɔ dɛ do sɔ̃nɔ 'da nɛ, nɛ fo sɛ 'bɔ mbé wi sɔ mɔ́ nɛ kpo bina.

¹² Mi 'danga sɛ osɛa tenɔ, do otanɔ kɛ nɛ ndɛngɛlɛ ma dɛ ngɔ ngbɛ ɛ, nɛ nɛ dɔnggɔ ma ni.

¹³ Mi zu'du sɛ kpikima gale Asera kɛ nɛ dɔnggɔ ma ni, nɛ mi 'danga sɛ olenɔ 'da nɛ.

¹⁴ Mi be sɛ dã 'da mi hã ogele winɔ kɛ wa bɛ̃a nu mi ni, nɛ mi bili sɛ nu gbã bɛ̃a we 'da wa hã wa.”