Mike 4 - WE NU GALE 1995

Gale a hã sɛ dungu fio hã winɔ vɛ

¹ Mbe tũ kpo, nɛ kala kɛ tɔa Tɛmpɛloe ngɔ nɛ ni, ma ngala sɛ nɛ ngɔ kɛnɔ kɛ zã nɛ ni vɛ̃, nɛ mɛ sɛ a nwa kala. Nɛ onu kɔnggɔ winɔ vɛ̃ wa nɛ sɛ dɛ tɛ nɛ.

² Kɔ gba gili winɔ ni wa ma ngɔ nɛ 'di mɔ, nɛ wa tɔ̃ sɛ do 'da li wala na: “Lɛ nɛ́, lɛ kũ ngɔ kala Sioni, kala 'da NWA, lɛ lé kɔ tɔa 'da Gale 'da Yakɔbɔ. A be sɛ mbulanɔ 'da a hã lɛ, nɛ lɛ ba sɛ wala kɛ a be hã lɛ ni. Mba gɔ, bia wenɔ 'da NWA ma yolo tɛ ngɔ kala Sioni, nɛ lɛnggɛnɔ 'da a, kɛ ma hɔ zala lɛ ni, ma yolo Yeruzalɛmɛ.”

³ A gɔnɔ sɛ ngbangganɔ sanga onu kɔnggɔ winɔ, nɛ a 'dafa sɛ ngbala wa vɛ̃. Wa yámbálá sɛ 'bɔ bi bolo gɔ, tua kɛ wa bí sɛ 'bɔ mbé bolo do ngba wa gɔ. Wa kala sɛ du kɔya bolonɔ 'da wa, nɛ wa dolo do kongo, nɛ osɛlɛ bi bolonɔ 'da wa, wa dɛ sɛ do dugbu we wa do fo.

⁴ Owinɔ wa mi sɛ kpalɛnɔ 'da wa, nɛ wa kala sɛ ma do gɛ̃a sila, nɛ fo wi tulu sɛ ngbɛ ɛ bina. Gale, NWA ngɔ mɔ nyanga nza vɛ̃ tɔ̃a ni.

⁵ Onu fɛlɛ gele winɔ kpo do kpo, wa dɔnggɔ ogalenɔ 'da wa, nɛ wa gbini zã wa do wa. Nɛ nde lɛ, obe Israɛlɛ, lɛ dɔnggɔ sɛ ta 'bɔ pii a NWA Gale 'da lɛ, nɛ lɛ gbini sɛ zã lɛ do a kɔ sabɛlɛ do sabɛlɛ.

Gale a dungu sɛ nwa kɔ le Yeruzalɛmɛ

⁶ NWA Gale tɔ̃a na: “Mbe tũ kpo, nɛ mi kala sɛ owinɔ kɛ mi hã zi ngamɔ hã wa, nɛ wa la kɔlɔ 'duli ni, nɛ mi mba sɛ li wa kpo.

⁷ Wa 'dɔlɔ wa nyɛlɛ do le 'da wa, nɛ wa mbɔka vɛ̃. Nɛ nde mi mba sɛ li owanɔ wa 'bana nza ni, nɛ mi dɛ sɛ na, wa hɔ nganda nu kɔnggɔ wele. Do 'da fala ni, nɛ mi Gale, mi ɔ sɛ do ngɔ kala Sioni tɛ Yeruzalɛmɛ, nɛ mi dungu sɛ nwa ngɔ wa pii.

⁸ Mi dungu sɛ ngɔ kala ni we zɔ mɔ tɛ winɔ 'da mi, ɔ nɛ kɛ wi fɔmɔ oduanɔ dungu ngɔ gba'da, we zɔ do mɔ tɛ duanɔ 'da a ni. Nɛ mi dɛ sɛ na, le ni ma hɔ 'bɔ gã le nwa nɛ́ kɛ zi dati ni.”

Owi Yeruzalɛmɛ wa kpasa kɔ ngamɔ

⁹ Aa nɛ, Owi Yeruzalɛmɛ, nɛ he kɔ̃a pii we ge nde? Nɛ nɛ bí tɛ nɛ ɔ nɛ wuko kɛ zɛlɛ kula tɛ̃ a ni we ge nde? Nwa ngɔ nɛ bina nde? Nɛ Owi tɔ̃ mbula hã nɛ, wa fi fia nde?

¹⁰ Gbãlã we, nɛ Owi Yeruzalɛmɛ, nɛ bí tɛ nɛ, nɛ nɛ hé mɔ ɔ nɛ wuko kɛ a do zɛlɛ kula ni. We kɛ wa kala sɛ nɛ kɔ gã le 'da nɛ dɛ nza, nɛ nɛ ɔ sɛ do ngɔ fɔnɔ, nɛ wa 'dɔlɔ sɛ nɛ gbaa dɛ Babilɔnɛ i. Nɛ nde i mɔ ni, NWA a kpasa sɛ nɛ, nɛ a fo sɛ nɛ ti mbula 'da owi sɛnɛ nɛ.

¹¹ Di ngangga ni, ogili gele winɔ, wa mba li ngba wa, nɛ wa sɛnɛ nɛ, obe Yuda. Wa tɔ̃ na, lo hã sɛ sape hã owi Yeruzalɛmɛ, nɛ le 'da wa ma 'danga sɛ, nɛ ma de sɛ tɛ lo wena.

¹² Owinɔ ni wa ĩ̀ ti mɛnɔ kɛ NWA 'dafa ni gɔ, nɛ wa ĩ̀ 'bɔ ti linggamɔ zu a gɔ. Gale a mba sɛ li wa, nɛ a zɛ sɛ wa, ɔ nɛ kɛ wa zɛ do fo ni.

¹³ NWA Gale tɔ̃a hã owi Yeruzalɛmɛ na: “Nɛ kúlú ngɔ dɛ tɛ Owi sɛnɛ nɛ, nɛ nɛ ha ngamɔ hã wa. Mi dɛ sɛ na, nɛ nganda ɔ nɛ wili ngɔmbɔ, kɛ zamba zu a do tambala nyanga a nganda nɛ́ mɔ bolo ni. Nɛ nɛ gbɛ sɛ ogele winɔ wena. Nɛ kala sɛ odia mɛnɔ, kɛ wa zũ zi kɔ̃ Owele ni, nɛ nɛ dɔnggɔ sɛ do mi Gale, kɛ mi a NWA ngɔ omɛnɔ nù gɛ vɛ̃ ni.”

¹⁴ Nɛ nde di dɔ̃ ni, nɛ, owi Yeruzalɛmɛ, kɛ nɛ tɛ mba li sodanɔ 'da nɛ gɛ, nɛ ndɔ́ mbu li nɛ, ɔ nɛ kɛ nɛ dungu gɛla ni. We kɛ owi sɛnɛ nɛ wa tɛ linggi nɛ we bi do nɛ, nɛ nɛ hɔ́ sɛ nza kɔ ngbo le 'da nɛ gɔ. Owinɔ ni wa zɛ sɛ sanga li nwa 'da nɛ do dɔ te.