Mike 3 - WE NU GALE 1995

Mike dãlã dɛ tɛ ogã wi ngɔ obe Israɛlɛ

¹ Nɛ Mike tɔ̃ na: “Aa nɛ, ogã wi ngɔ obe Israɛlɛ, nɛ zélé mi sɛ! Ma wia sɔ na, nɛ dɛ tonɔ 'da nɛ do wala olo nɛ.

^2-3 Nɛ nde nɛ kɔ̃̀ we dɛ de dɛa mɔ gɔ, nɛ kɔ̃a we dɛ tati a 'dã mɔ iko. Nɛ dɛ do owinɔ 'da mi, ɔ nɛ kɛ nɛ a wi gɔmɔ sa'de ni. Nɛ ɛ̃lɛ̃ ndala tɛ wa, nɛ nɛ 'bili mulu tɛ wa, nɛ nɛ o gbãlã tɛ wa, ɔ nɛ kɛ nɛ nɛ a kɔ kpana we gi we nyɔngɔ ma ni.

⁴ We duzu ma, nɛ, ogã wi ngɔ obe Israɛlɛ, fala kɛ nɛ ala nu nɛ hã NWA Gale, nɛ nde a gésé sɛ we kpo hã nɛ gɔ. A da sɛ li a zamɔ, nɛ a tɛ́ sɛ we gbaka nɛ gɔ, we kɛ nɛ dɛ 'dã mɔ wena.”

Mike dãlã dɛ tɛ owi gba olo nu Gale do bɛlɛ

⁵ NWA Gale dãlã we dɛ tɛ Owi gba olo nu a, kɛ wa tɔ̃ bɛlɛ do zu li a hã obe Israɛlɛ ni. A na: “Fala kɛ wele hã mbili hã nɛ, nɛ nɛ tɔ̃ hã a na, a kpa sɛ dia dungu. Kɔ fala kɛ a hã̀ mbili hã nɛ gɔ, nɛ nɛ tɔ̃ na, Owele wa bi sɛ a.

⁶ Kɔ nɛ zélé mi sɛ! Nɛ, owinɔ nɛ tɔ̃ bɛlɛ ni, ndɔti tũ 'da nɛ kɔla ia. Tũ ma tũ sɛ nɛ, nɛ nɛ ɔ́lɔ́ sɛ 'bɔ owinɔ 'da mi gɔ. Mi bé sɛ 'bɔ mbé mɔ li nɛ gɔ, nɛ nɛ tɔ̃́ sɛ 'bɔ we mɔ́ mi gɔ. Wese ma gɛ̃ sɛ nɛ, owi tɔ̃ bɛlɛnɔ.

⁷ Nɛ, owinɔ kɛ nɛ tɔ̃ we mɛnɔ ma dɛ sɛ tɛ̃ ɛ ni, nɛ usu sɛ li nɛ do sape, we kɛ mi Gale, mi gésé sɛ 'bɔ nu we 'da nɛ gɔ.”

⁸ Nɛ nde kɛ 'da mi Mike, NWA a nganda sila mi ia. A hã Hi Wi 'da a hã mi, nɛ a ia bɔlɔ zu zu mi. A hã nganda hã mi we sala o'dã dɛa mɛnɔ 'da obe Israɛlɛ dɛ nza.

Le Yeruzalɛmɛ ma 'danga sɛ

⁹ Aa nɛ, ogã wi ngɔ obe Israɛlɛ, nɛ zélé mi sɛ! Nɛ kɔ̃̀ gɛnɛ dia 'bili we gɔ, nɛ nɛ dɛ́ mɔ do bɔlɔ nɛ gɔ.

¹⁰ Nɛ gbɛ Owele, nɛ nɛ kala mbili kɔ̃ wa do nga nɛ, we 'dafa do Yeruzalɛmɛ, le 'da Gale.

¹¹ Owele wa hã dia mɔ hã Owi 'bili wenɔ, sɛ nɛ wa ĩ ti 'bili dia we hã wa de. Wa hã mbili hã onganganɔ, sɛ nɛ wa be mbula de. Wa hã mbili hã owinɔ kɛ wa gba olo nu Gale ni, sɛ nɛ wa tɔ̃ we mɛnɔ ma dɛ sɛ tɛ̃ ɛ ni de. Nɛ nde mɛ ni, wa 'bã nu wa, nɛ wa tɔ̃ na, NWA Gale do lo boe, nɛ nde lo kpá sɛ 'dã mɔ kpo gɔ.

¹² Kɔ nɛ zɔ mɛ kɛ o'dã mɛnɔ 'da nɛ, ma nɛ dɛ nɛ ni: kala Sioni ma hɔ sɛ mbé fɔ, le Yeruzalɛmɛ ma dɛ sɛ olo tɔa, nɛ wɔkɔsɔ ma kele sɛ ngɔ kala tɔa Tɛmpɛloe vɛ̃.