Mike 2 - WE NU GALE 1995

Owinɔ kɛ dɛa to tɛ wa dè gɔ

¹ Bako do nɛ winɔ kɛ nɛ lengge o'dã linggamɔ do tũ, nɛ nɛ 'dafa na, fala sa, nɛ lo dɛ mɛnɔ lo lingga ni.

² Fala kɛ nɛ zɔ tɔa, tabi fɔ, kɔ ma de tɛ nɛ, nɛ nɛ kala ma kɔ̃ Owele nɛ. Nɛ zũ 'bɔ nùi 'da owinɔ, nɛ nɛ kala odia mɛnɔ kɔ̃ wa do obenɔ 'da wa.

³ We duzu ma, NWA Gale tɔ̃a hã nɛ na, ɛ hã sɛ 'bako hã nɛ, nɛ nɛ wé sɛ tɛ yu nɛ gɔ. Nɛ nɛ́ sɛ 'bɔ nɔ do wali gɔ, we kɛ ngba soe 'bako 'da nɛ kɔla ia.

⁴ Do 'da fala nɛ, nɛ wa ga sɛ zuma do zu li nɛ na: “Lɛ 'bɔ do mbé dia mɔ bina, wa kala Onùnɔ 'da lɛ kɔ̃ lɛ do'do. Ogele winɔ wa ndaka lɛ kɔ ofɔnɔ 'da lɛ, nɛ wa kɛ̃ ma dɛ kɔ̃ ongba wa.”

⁵ Fala kɛ owinɔ 'da NWA Gale wa kɛ̃ sɛ 'bɔ nùnɔ dɛ kɔ ngba wa ni, nɛ nde wele kpo sanga nɛ do obenɔ 'da nɛ, a kpá sɛ ma gɔ.

Ombe winɔ wa ba kafi lɛnggɛ nu Mike

⁶ Mbe Owele wa tɔ̃ hã mi na, mi tɛ tɔ̃̀ wenɔ nu mi gɛ gɔ, we kɛ fo gulu nɛ bina. Gale hã sɛ sape hã owinɔ 'da a gɔ.

⁷ Wa tɔ̃ 'bɔ na, NWA Gale fɔmbɔ obe Israɛlɛ gɔ, a là fala du sila 'da a dɛ 'da wa gɔ, a wè tɛ dɛ na mɛ ni gɔ. Wila we nu a dɛ 'da wi kɛ dɛa to tɛ̃ a a bɔlɔ ni pii a dia.

⁸ Nɛ nde NWA gisa hã winɔ ni na: “Aa nɛ, ogã winɔ, nɛ dɛ do owinɔ 'da mi, ɔ nɛ nɛ a owi sɛnɛ wa ni. Nɛ zɔ owi wili wa yolo li bolo, hã wa si do gɛ̃a sila ni, nɛ nɛ kala tulu ngɔ 'da wa tɛ wa do'do.

⁹ Nɛ nɛ ndaka owukonɔ 'da owinɔ 'da mi kɔ otɔanɔ 'da wa ngɔ sila wa ni, nɛ nɛ kala 'bɔ mɛnɔ mi hã zi hã obenɔ 'da wa, nɛ ma be dɔ̃lɔ̃ li 'da mi ni kɔ̃ wa do'do.

¹⁰ Kɔ nɛ fó tɛ nɛ fala gɛ do'do! Nɛ lá! We kɛ dungu fio 'bɔ ngɔ nùi gɛ bina. 'Dã mɛnɔ 'da nɛ ma 'danga nùi do'do, nɛ nɛ kpa sɛ ngamɔ we nɛ wena.

¹¹ “Nɛ kɔ̃a gɛnɛ zele wi kɛ a tɔ̃ bɛlɛ, nɛ a ɔlɔ nɛ do zu li mi na, mi Gale, mi tɔ̃a na, nɛ nɔ sɛ dɔ̃, nɛ nɛ nɔ sɛ 'bɔ onga dɔ̃ wena ni. Wi tɔ̃ bɛlɛ na mɛ ni wia do nɛ.”

Gale a mba sɛ li tala obe Israɛlɛ

¹² Gale na, ɛ mba sɛ li nɛ, tala obe Israɛlɛ vɛ̃ kɛ nɛ 'bana ni. Ɛ ngɛmɛ sɛ li nɛ, ɔ nɛ wa ngɛmɛ do li obata dɛ kɔ ba'de 'da wa ni. Nɛ Owele wa dɛlɛ sɛ ngɔ nùi 'da nɛ, ɔ nɛ kɛ obata wa dɛlɛ kɔ ngbo 'da wa ni.

¹³ Ɛ NWA Gale 'da nɛ, ɛ kpe sɛ dati nɛ, nɛ ɛ fĩ sɛ wala hã nɛ na, nɛ hɔ́ nza kɔ ngbá. Ɛ fo sɛ nɛ kɔ ngamɔ, nɛ ɛ 'dɔlɔ sɛ zã ngbo nu le, nɛ nɛ hɔ do ma.