Mike 1 - WE NU GALE 1995

¹ Nɛ zélé wenɔ kɛ NWA wila zi ma hã Mike, be kɔ le Moresɛtɛ. A wila ma do 'da fala Yotamɛ, Ahazɛ do Ezekiasi wa dungu zi nwa ngɔ nù Yuda dɛ 'do ngba wa ni. NWA Gale wila zi we ni hã Mike si ngɔ ogã le Samaria tɛ ngɔ nù Israɛlɛ, do Yeruzalɛmɛ tɛ ngɔ nù Yuda.

NWA Gale dãlã dɛ tɛ owinɔ 'da a

² Aa nɛ, owinɔ ngɔ nùi gɛ vɛ̃, nɛ gɛ́ zala nɛ! NWA Gale a yolo sɛ tɛ li nza 'di, nɛ a tɛ we dãlã we dɛ tɛ nɛ.

³ Mɛ a gbãlã we, NWA a yolo sɛ tɛ fala kɛ a ɔ nɛ ni, nɛ a zĩlĩ, nɛ a yɛnggɛ do zu ogba ngala kalanɔ.

⁴ Nɛ ogba ngala kalanɔ ma gɔnɔ sɛ lì, nɛ ma fo do ti nyanga a, ɔ nɛ kɛ nɔ gɔnɔ li we ni. Nɛ lì nɛ ma dunu sɛ ogbangɔlɔ̃nɔ.

⁵ Nɛ ĩ gulu kɛ Gale nɛ dãlã we dɛ tɛ nɛ ni nde? A nɛ dãlã dɛ tɛ nɛ, we kɛ nɛ, Oisraɛlɛ do Oyuda, nɛ bɛ̃a we nu a, nɛ nɛ dɛa 'dã mɔ. Nɛ nde wi ɔkɔlɔ nɛ Oisraɛlɛ na, nɛ bɛ̃ we nu Gale, wi a wio nde? Wi a owinɔ kɔ gã le Samaria! Nɛ wi ɔkɔlɔ nɛ Oyuda na, nɛ dɔnggɔ osɛa tenɔ, wi a wio nde? Wi a owinɔ kɔ gã le Yeruzalɛmɛ!

⁶ We duzu ma, NWA tɔ̃a na: “Mi 'danga sɛ le Samaria, nɛ ma hɔ sɛ nɛ́ gili ota ni. Mi kifi sɛ ma do zamɔ, nɛ ma hɔ sɛ fɔ mi do kpalɛ. Mi kala sɛ otanɔ olo le ni, nɛ mi a ma kɔ gbangɔlɔ̃, nɛ mi zã sɛ nyanga otɔanɔ dɛ nza.

⁷ Owi sɛnɛ Oisraɛlɛ wa gbini sɛ sanga osɛa tenɔ kɛ owi Samaria wa dɔnggɔ ni, nɛ wa gba sɛ sanga okpikima galenɔ 'da wa. Wa dɔ sɛ 'bɔ odia mɛnɔ vɛ̃, kɛ owi Samaria wa hã ma hã owukonɔ wa dɛ ndumba dɛ kɔ tɛmpɛloe 'da wa ni. We kɛ odia mɛnɔ ni, owi Samaria wa hɛa ma do mbili 'da owuko ndumbanɔ ni. Nɛ owi sɛnɛ wa wa kala sɛ ma, we hã ma 'dɔkɔlɔ owuko ndumba kɔ gele le.”

Ogele wi wa kala sɛ lenɔ kɛ zã Yeruzalɛmɛ

⁸ Ma kɛ mi Mike, mi he sɛ mɔ, nɛ mi ala nu mi. Mi yɛnggɛ sɛ do wila nyanga mi, nɛ mi sɛ do kũlĩ tɛ mi iko. Mi he sɛ mɔ ɔ nɛ o'banggo, nɛ mi ala nu mi ɔ nɛ Odili ni.

⁹ Owi Samaria wa kpásá sɛ li etumbui Gale hã ma hã wa gɛ gɔ. Nɛ kpo etumbui ni ma kpa sɛ 'bɔ Owi ngɔ nù Yuda, do owinɔ 'da mi tɛ kɔ gã le Yeruzalɛmɛ.

¹⁰ Nɛ tɛ tɔ̃̀ we etumbui 'da lɛ tɛ kɔ le Gatɛ gɔ, dɔ wa zélé hia kɔ̃a 'da nɛ gɔ. Nɛ, Owi kɔ le Bɛtɛ-Leafra, nɛ té nzɛlɛ, nɛ nɛ dungu gɛla.

¹¹ Nɛ, Owi kɔ le Safirɛ, owi sɛnɛ nɛ wa kala sɛ nɛ, nɛ wa 'dɔlɔ nɛ dɛ kɔ gele le do wila tɛ nɛ, nɛ sape ma ba sɛ li nɛ. Nɛ nɛ, owi kɔ le Sananɛ, nɛ tɛ fà na, nɛ hɔ nza kɔ gba ngbo nu le 'da nɛ gɔ, we kɛ owi sɛnɛ lɛ wa 'do ngboe ni boe. Nɛ, owi kɔ le Bɛtɛ-Ɛsɛlɛ, nɛ hé kɔ̃a tɛ nɛ, we kɛ fo gba ngbo na, nɛ yu owi sɛnɛ nɛ dɛ kɔ nɛ bina.

¹² Nɛ, owi Marɔtɛ, nɛ táná kili, nɛ nɛ lénggé do dia dungu 'da nɛ, we kɛ etumbu 'da NWA Gale kɔla hɔ kɔ le Yeruzalɛmɛ ia.

¹³ Nɛ, owi Lakisi, nɛ ɛ́nzɛ́ ombalatanɔ dɛ tɛ ongilingilinɔ 'da nɛ we yu Owi sɛnɛ nɛ. Nɛ bɛ̃a we nu Gale, ɔ nɛ kɛ Oisraɛlɛ wa bɛ̃a zi ma ni, nɛ owi Yeruzalɛmɛ wa dɛa 'dã mɔ we duzu nɛ.

¹⁴ Aa nɛ, owi ngɔ nu Yuda, nɛ dá sila nɛ ngɔ owi Moresɛtɛ-Gatɛ do'do. Owi kɔ le Akzibɛ, wa wé sɛ 'bɔ we gbaka nɛ onwa ngɔ nù Israɛlɛ gɔ.

¹⁵ Nɛ, owi Maresa, NWA a dɔlɔ sɛ nɛ hã owi sɛnɛ nɛ, nɛ wa ba sɛ le 'da nɛ. Onwanɔ kɛ li wa dɔ̃lɔ̃ ngɔ nù Israɛlɛ gɛ, wa yu sɛ, nɛ wa usu sɛ tɛ wa kɔ ta tɛ Adulamɛ.

¹⁶ Nɛ, owi Yeruzalɛmɛ, nɛ kpóló mili zu nɛ vɛ̃, nɛ nɛ dungu gɛla. Nɛ hé kɔ̃a obenɔ 'da nɛ ngɔ sila nɛ ni, we kɛ Owi sɛnɛ nɛ wa kala sɛ wa, nɛ wa 'dɔlɔ wa dɛ kɔ gele le nyɛlɛ do nɛ.