MATIE 9 - WE NU GALE 1995

Yezu kpasa wi kala nyanga

¹ Nɛ Yezu kũ kɔ ga, nɛ a kpolo tɛ̃ a dɛ kulu gba ndɔɛ nga, nɛ a la dɛ kɔ le 'da a i.

² Nɛ Owele wa hɔ do mbe wi kala nyanga ngɔ tangge hã Yezu. Kɔ Yezu nɛa we zɔ kɔ̃a we 'da winɔ dɛ 'da a ni, nɛ a tɔ̃ hã wi kala nyanga na: “Be 'daa, mɔ ngo tɛ mɔ! Mi fua ku'da 'dã mɛ zu mɔ ia!”

³ A nɛa we tɔ̃ ni, nɛ ombe sanga wi be mbulanɔ wa ma ngɔ tɔ̃ dɛ sanga wa na: “Wi gɛ dã zu li Gale!”

⁴ Nɛ nde Yezu ĩ sɔ ti linggamɛ 'da wa ia, nɛ a tɔ̃ hã wa na: “Gulu kɛ nɛ lengge 'dã linggamɔ ní we ge nde?

⁵ Mba gɔ, sanga kɛ mi tɔ̃a hã wi gɛ na, mi fua ku'da 'dã mɛnɔ 'da mɔ, do kɛ na, mɔ kúlú ngɔ, kɔ mɔ nɛ nɔ ni, kɛ ma nganda wena kɔ nɛ ni a ki nge nde?

⁶ Kɔ mi kɔ̃a we be hã nɛ na, mi Be 'da Wele, mi do ngawi ngɔ nù gɛ, we fo ku'da 'dã mɔ zu Owele ni.” Nɛ a siki tɛ̃ a, nɛ a tɔ̃ hã wi kala nyanga ni na: “Mɔ kúlú ngɔ, kɔ mɔ bá tangge 'da mɔ, hã mɔ sí!”

⁷ A nɛa we tɔ̃ ni, nɛ wi kala nyanga kulu ngɔ, nɛ a si.

⁸ Kɔ ogba gili winɔ wa nɛa we zɔ ní, nɛ kili ba wa wena, nɛ wa dɔnggɔ Gale, we kɛ a hã ngawi na mɛ ni hã Owele ni.

Yezu sa mɔ hã Matie

⁹ Nɛ Yezu yula fala ni, kɔ a ma ngɔ la nɛ, nɛ a zɔ mbe wele kpo kɔ biro 'da a, kɛ winɔ wa futa do takonɔ ni, li a a Matie. Nɛ Yezu tɔ̃ hã a na: “Mɔ tɛ́, kɔ lɛ yɛnggɛ do mɔ!” Nɛ Matie kulu ngɔ, nɛ a la do Yezu.

¹⁰ 'Do nɛ, nɛ Yezu do owi yambala mɛnɔ 'da a, wa tɛ nyɔngɔ mɔ kɔ tɔa 'da Matie ni. Nɛ gba gili owi futa takonɔ, do o'dã winɔ, wa tɛa we nyɔngɔ mɛ ni do a.

¹¹ Kɔ Ofariziɛnɔ wa nɛa we zɔ ní, nɛ wa aka owi yambala mɛnɔ 'da a na: “Gulu kɛ wi be mɛ 'da nɛ nyɔngɔ mɔ do Owi futa takonɔ do o'dã winɔ we ge nde?”

¹² Nɛ Yezu zila we wa tɔ̃a ni, nɛ a tɔ̃ hã wa na: “Wi kɛ a do nga tɛ̃ a ni, a nɛ́ 'da wi ina gɔ, nɛ nde wi zɛlɛ, sɛ nɛ a nɛ 'da wi ina de.

¹³ Kɔ nɛ nɛ́, hã nɛ fa gulu we kɛ wa kɔma kɔ 'Buki na: ‘Dɛ mɔ do dia zã, ma dia tɛ mi nɛa ngɔ odɔnggamɛnɔ’ ni. Mba gɔ, mi tɛ̀ we obɔlɔ zu wele gɔ, mi tɛa we o'dã winɔ.”

Owele wa aka Yezu ngɔ bɛ̃ nyɔngɔmɔ we dɔnggɔ Gale

¹⁴ Nɛ Owi yambala mɛnɔ 'da Yoanɛ wi batisa winɔ wa tɛa 'da Yezu, nɛ wa aka a na: “Gulu kɛ lɛ do Fariziɛnɔ vɛ̃, lɛ bɛ̃ nyɔngɔmɔ we dɔnggɔ Gale, nɛ nde owi yambala mɛnɔ 'da mɔ wa dɛ́ ní gɔ we ge nde?”

¹⁵ Nɛ Yezu gisa hã wa do gba we na: “Nɛ lengge na, wa sa mɔ hã Owele tɛ mɔ dɔ ba ngba wi, nɛ nɛ wia tɛ tɔ̃ hã wa na, wa dɛ 'bako dɛ li wi ba wuke ni nde? Nɛ nde ngba soe kɛ owinɔ wa fo wi ba wuke ni sanga wa do'do, sɛ nɛ wa wia we bɛ̃ nyɔngɔmɔ de.”

¹⁶ Nɛ Yezu tɔ̃a 'bɔ mbé gba we hã wa na: “Wele wè tɛ ba nu mbé tulu, nɛ a 'bamba do li ã tulu gɔ. We kɛ nu mbé tuli ni wia we ɛ̃ 'da li ã tuli dɛ dati.

¹⁷ Nɛ wele wè tɛ a mbé dɔ̃ kɔ ã daka ndala gɔ. Ní gɔ, nɛ dɔ̃ɛ ma hana sɛ, nɛ ma fũ daka ndala, nɛ dɔ̃ɛ a nù, nɛ daka ndala ni ma 'danga sɛ 'bɔ. Kɔ ma wia na, wa a mbé dɔ̃ kɔ mbé daka ndala. Nɛ ma vɛ̃ bɔa nɛ, ma 'bana sɛ do dia nɛ.”

Yezu kpasa wi zɛlɛ, nɛ a tunu fio

¹⁸ Yezu ma ngɔ tɔ̃ wenɔ ni hã wa, nɛ mbe nwa 'da Oyudanɔ hɔ, nɛ a gu nù ti Yezu, nɛ a tɔ̃ hã a na: “Boko be 'da mi a fia di ngangga ni. Kɔ mɔ tɛ́, hã mɔ é kɔ̃ mɔ ngɔ a, nɛ a kpasa sɛ!”

¹⁹ Nɛ Yezu kulu ngɔ, nɛ a la do a fala nɛ kpo do owi yambala mɛnɔ 'da a.

^20-21 Nɛ nde mbe wuko kpo sanga winɔ ni, a zi do zɛlɛ zã. Tɔkɔ si tɛ̃ a wena, nɛ a ɔa do ma gbaa we sabɛlɛ 'bu ngɔ nɛ bɔa. Nɛ a lengge na, fala kɛ ɛ tamba mbamba tulu tɛ̃ a tamba iko, nɛ ɛ kpasa sɛ. Nɛ a tɛa dɛ 'do Yezu, nɛ a tamba nu tulu tɛ̃ a.

²² Nɛ Yezu siki tɛ̃ ɛ, nɛ a zɔ a, nɛ a tɔ̃ hã a na: “Boko be 'daa, mɔ kpala sila mɔ! Mɔ kpasa we duzu kɛ mɔ do kɔ̃a we dɛ 'da mi.” Nɛ wuke kpasa do ti.

²³ Nɛ Yezu nɛa we hɔ nu tɔa 'da nwa ni, nɛ a zɔ owi dama gaga, do gba gili winɔ kɛ wa tɛ he mɔ fuu ni,

²⁴ nɛ a tɔ̃ na: “Nɛ hɔ́ nza vɛ̃, we kɛ be gɛ fè gɔ, a ɔa yala iko.” Kɔ winɔ wa zila ni, nɛ wa ma ngɔ mɔmɔ a.

²⁵ Nɛ wa fo gba gili winɔ dɛ nza vɛ̃, nɛ Yezu le dɛ kɔ 'bili tɔa, nɛ a 'be nu kɔ̃ boko be, nɛ a kulu ngɔ.

²⁶ Nɛ sako nɛ yɛ'ba do ngɔ nùi ni vɛ̃.

Yezu kpasa Owi lɔa li bɔa

²⁷ Yezu yula fala ni, kɔ a ma ngɔ la nɛ, nɛ owi lɔa li bɔa, wa tɛ 'do a, nɛ wa ma ngɔ he mɔ na: “Be 'da Davidi, mɔ ĩ́ 'bako hã lɛ!”

²⁸ Kɔ Yezu nɛa we hɔ nu tɔa i, nɛ wa tɛ, nɛ a aka wa na: “Nɛ kɔ̃a do kɔ sila nɛ na, mi wia we kpasa nɛ nde?” Nɛ wa gese hã a na: “Nwa, lɛ kɔ̃a!”

²⁹ Nɛ Yezu ndɔ kɔ̃ ɛ tɛ gbali wa, nɛ a tɔ̃ na: “E kɔ ma dɛ tɛ̃ ɛ hã nɛ we do 'da kɔ̃a we 'da nɛ!”

³⁰ Nɛ gbali wa hũi, nɛ wa zɔ mɔ. Nɛ Yezu dala nu ɛ hã wa wena na: “Lì nɛ sɔ̃́, dɔ wele ĩ́ fala nɛ gɔ!”

³¹ Nɛ nde wa la, nɛ wa yɛ'bɛ we 'da Yezu do kɔ lenɔ fala ni vɛ̃.

Yezu kpasa wi lɔnda nu

³² Owinɔ ni wa ma ngɔ la nɛ, nɛ Owele wa tɛ do mbe wele kpo, a wélé we gɔ, we kɛ a do 'dã hi wi kɔ a.

³³ Nɛ Yezu ndaka 'dã hi wi kɔ wi ni do'do, nɛ a ma ngɔ wele we. Nɛ gba gili winɔ wa ɔngba do ma wena, nɛ wa tɔ̃ na: “Kɛ gbaa gɛ, lɛ zɔ̀ mbe kuti kɛ gɛ ngɔ nù Israɛlɛ gɛ gɔ!”

³⁴ Nɛ Ofariziɛnɔ wa ma ngɔ tɔ̃ na: “Wi a nwa ngɔ o'dã hi winɔ, hã a hã ngawi fo o'dã hi winɔ gɛ hã a!”

'Bako ba li Yezu dɛ tɛ gba gili winɔ

³⁵ Yezu zi tɛ yɛnggɛ do kɔ ogã lenɔ do kɔ obe lenɔ vɛ̃, tɛ be we kɔ tɔa mbulanɔ. A be zi Dia Sako dɛa to nwa 'da Gale, nɛ a tɛ kpasa Owi zɛlɛ kpi do kpi.

³⁶ A nɛa we zɔ gba gili winɔ, nɛ 'bako ba li a, we kɛ wa mbɔka, nɛ wa do ngawi bina, ɔ nɛ obata kɛ fo wi fɔmɔ wa bina ni.

³⁷ Nɛ a tɔ̃ hã owi yambala mɛnɔ 'da a na: “Kpalɛ ma li fɔ i wena, nɛ nde owi dɛ to kala ma, wa dɛ̀lɛ̀ gɔ.

³⁸ Kɔ nɛ áká wele fɔɛ, kɔ a tombo Owi dɛa to we kala kpalɛnɔ ni.”