MATIE 7 - WE NU GALE 1995

Nɛ tɛ 'bìlì we mɔ́ ngba nɛ gɔ

¹ “Nɛ tɛ 'bìlì we mɔ́ ngba nɛ gɔ, dɔ Gale 'bílí tɛ mɛ 'bɔ we 'da nɛ gɔ.

² We kɛ Gale a 'bili sɛ we 'da nɛ kpasaa ɔ nɛ kɛ nɛ 'bili do wenɔ 'da ngba nɛ ni. Mɛ nɛ we do mɔ hã ngba nɛ ni, Gale a we sɛ tɛ mɛ 'bɔ do mɔ hã nɛ.

³ Kɔdɛ kɛ mɔ zɔ be 'bulu wɔkɔsɛ kɛ ma tia li nya mɔ ni, nɛ nde mɔ ĩ́ fala te kɛ ma tia li mɔ gɛ gɔ ni nɛ nde?

⁴ Kɔdɛ kɛ mɔ wia tɛ tɔ̃ hã nya mɔ na, mɔ é li mɔ, kɔ mi fo 'bulu wɔkɔsɛ ngɔ nɛ gɛ, nɛ nde ĩ na, mɔ tɛ mɛ 'bɔ do te li mɔ ni nɛ nde?

⁵ Mɔ, wi ɔlɔ wi gɛ, ma wia na, mɔ fo te li mɔ dati do'do, sɛ nɛ mɔ zɔ sɛ mɔ do dia nɛ, we fo 'bulu wɔkɔsɛ li nya mɔ ni de.

⁶ “Nɛ tɛ ha mɔ kɛ ma a sa li Gale ni hã otolo gɔ, dɔ wa síkí tɛ wa, kɔ wa nyɔngɔ nɛ gɔ. Nɛ nɛ tɛ dà oiyakanɔ 'da nɛ hã ongulu gɔ, dɔ wa má ma do nyanga wa iko gɔ.

Nɛ gɔ́ mɔ kɔ̃ Gale, nɛ a hã sɛ hã nɛ

⁷ “Nɛ gɔ́ mɔ kɔ̃ Gale, nɛ a hã sɛ hã nɛ. Nɛ fá mɔ, nɛ nɛ kpa sɛ. Nɛ ngbóló 'do nu tɔa, nɛ Gale a hũi sɛ hã nɛ.

⁸ Mba gɔ, wi kɛ a gɔ mɔ, nɛ wa hã sɛ hã a, nɛ wi kɛ a fa mɔ, nɛ a kpa sɛ, nɛ wi kɛ a ngbolo 'do nu tɔa, nɛ wa hũi sɛ hã a.

⁹ Sanga nɛ gɛ, baa be kɛ be 'da a aka a na, a hã mapa hã ɛ, nɛ a hã ta hã a ni a wio nde?

¹⁰ Tabi be aka we kɔyɔ, nɛ baa a a hã sɛ gɔ̃ hã a nde?

¹¹ Nɛ a owi dɛ 'dã mɔ, kɔ nɛ hã odia mɔ hã obenɔ 'da nɛ ni, ní a tɔlɔ wá do Baa nɛ Gale li nza i ni nde? Nɛ gɔ mɔ kɔ̃ a, nɛ a hã sɛ odia mɔ hã nɛ wena.

¹² “Nɛ dɛ́ do ongba nɛ ɔ nɛ kɛ nɛ kɔ̃a tɛ mɛ 'bɔ na, wa dɛ do nɛ ni. Ki ni a kɛ mbula 'da Mɔizɛ, do 'buki 'da Owi gba olo nu Gale tɔ̃a gɛ a ni.

Nɛ lé do be nu ngboe

¹³ “Nɛ dɛ́ nganda na, nɛ le do be nu ngboe. We kɛ nu ngboe kɛ ma gã wena, nɛ li wala nɛ lɔ wena ni, ma kã wele dɛ li fio. Nɛ gba gili Owele wa la do ma.

¹⁴ Nɛ nu ngboe kɛ ma a bi sĩ, nɛ li wala nɛ gã̀ gɔ, nɛ fala la li nɛ nganda wena ni, ma kã wele we kpa kpasi. Nɛ Owele wa lá li nɛ wena gɔ.

Wa ĩ ti te we wala nɛ

¹⁵ “Lì nɛ sɔ̃́ tɛ owinɔ wa gba olo nu Gale do bɛlɛ ni. We kɛ wa tɛ 'da nɛ ɔ nɛ obata ni, nɛ nde kɔ sila wa ɔ nɛ kɔ sila gɔ̃̀ ni.

¹⁶ Nɛ ĩ sɛ ti wa we dɛa to tɛ wa. We kɛ wele wè tɛ 'bi wala ndimɔ ngɔ te sàlá gɔ, nɛ wele wè 'bɔ tɛ 'bi wala mafuku ngɔ te gbakɔnda gɔ.

¹⁷ Dia te ko dia wala te, nɛ 'dã te ko tɛ mɛ 'bɔ 'dã wala te.

¹⁸ Dia te wè tɛ ko 'dã wala te gɔ, nɛ 'dã te wè tɛ ko dia wala te gɔ.

¹⁹ Tenɔ vɛ̃ kɛ ma kó dia wala nɛ gɔ ni, nɛ wa 'bili ma do'do, nɛ wa da ma li we.

²⁰ Na mɛ ni, nɛ ĩ sɛ ti owinɔ wa gba olo nu Gale do bɛlɛ ni we dɛa to tɛ wa.

Owinɔ wa le sɛ kɔ le nwa 'da Gale a wio nde?

²¹ “Winɔ vɛ̃ kɛ wa sa li mi na: ‘Nwa, Nwa’ ni, wa lé sɛ kɔ le nwa 'da Gale gɔ, nɛ nde wi tati a wanɔ wa dɛ mɛnɔ kɛ zã Baa mi kɛ li nza i kɔ̃a ni, wa le sɛ.

²² Do ngba soe 'bili we, nɛ ogba gili wele wa tɔ̃ sɛ hã mi na: ‘Nwa, Nwa, lɛ bia zi we nu Gale hã Owele do zu li mɔ, nɛ lɛ fua o'dã hi wi, nɛ lɛ dɛa ogba gili ɔngbamɔ do zu li mɔ!’

²³ Nɛ mi gese sɛ hã wa na: ‘Mi ĩ̀ ti nɛ gɔ, nɛ a owi dɛ 'dã mɔ! Nɛ fó tɛ nɛ ngɔ li mi do'do!’ ”

Gba we ngɔ dɛ to tɔa mɔ́ owele bɔa

²⁴ Nɛ Yezu tɔ̃ 'bɔ na: “Winɔ vɛ̃ kɛ wa zele we mi tɔ̃ gɛ, kɔ wa e ma fala dɛa to, nɛ nde wa wia kɔ̃ do wi hã zã, kɛ a dɛa tɔa 'da a, nɛ a a nyanga nɛ dɛ ngɔ ta ni.

²⁵ Nɛ kolo tɛa, nɛ lì hɛ̃a, nɛ gba bũ zɛa tɔa nganda wena, nɛ nde ma tè gɔ, we kɛ a a zi nyanga tɔa ni dɛ ngɔ ta.

²⁶ Nɛ winɔ vɛ̃ kɛ wa zele we nu mi, kɔ wa è ma fala dɛa to gɔ ni, wa wia kɔ̃ do yɔndɔ wi kɛ a dɛa tɔa 'da a dɛ ngɔ kɛnzɛ ni.

²⁷ Nɛ kolo tɛa, nɛ lì hɛ̃a, nɛ gba bũi zɛa tɔa nganda wena, nɛ ma te wuku.”

Yezu be we do dĩ wena

²⁸ Yezu bia wenɔ ni do'do, nɛ ogba gili winɔ vɛ̃ wa ɔngba bia wenɔ 'da a wena,

²⁹ we kɛ a be zi ma do dĩ wena, nɛ nde a bé ɔ nɛ kɛ owi be mbulanɔ 'da wa wa be zi ni gɔ.