MATIE 4 - WE NU GALE 1995

Satana yamba sila Yezu

¹ Nɛ Hi Wi Santo kã Yezu dɛ li gba zɔ̃ i, takɔ Satana yamba sila a.

² Nɛ a ɔa i mɔ 'bu tũ nalɛ, nɛ nde a nyɔ̀ngɔ̀ mɔ gɔ, nɛ wɔ ba a.

³ Nɛ Satana hɔa, nɛ a tɔ̃ hã a na: “Fala kɛ mɔ a Be 'da Gale kpaa nde, nɛ mɔ tɔ̃́ hã otanɔ gɛ, kɔ ma kifi nyɔngɔmɔ, hã mɔ nyɔngɔ.”

⁴ Nɛ Yezu gese hã a na: “Wa kɔma kɔ 'Buki 'da Gale na: ‘Wele kpásá tati a we nyɔngɔmɔ iko gɔ, nɛ nde a wia tɛ kpasa we wenɔ vɛ̃ kɛ ma yolo nu Gale ni.’ ”

⁵ Nɛ Satana ba a, nɛ a la do a dɛ kɔ le Yeruzalɛmɛ, nɛ a e a gbogbo zu tɔa Tɛmpɛlo i,

⁶ nɛ a tɔ̃ hã a na: “Fala kɛ mɔ a ngbongbo Be 'da Gale, nɛ mɔ bũlũ, kɔ mɔ zĩ nù. We kɛ wa kɔma kɔ 'Buki na: ‘Gale a a sɛ oanzɛnɔ 'da a na, wa zɔ mɔ tɛ mɔ. Wa kpɔ sɛ kɔ̃ wa ti mɔ dɛ li ngɔ gɛ na, dɔ mɔ tó nyanga mɔ do ta gɔ.’ ”

⁷ Nɛ Yezu gese hã a na: “Wa kɔma 'bɔ kɔ 'Buki na: ‘Mɔ tɛ yàmbà Nwa Gale 'da mɔ gɔ.’ ”

⁸ Nɛ Satana ba 'bɔ a, nɛ a e a tɛ ngɔ 'bɛ̃lɛ̃ zu kala, nɛ a be lenɔ ngɔ nù gɛ, do dɔ̃lɔ̃ li 'da ma vɛ̃ hã a,

⁹ nɛ a tɔ̃ hã a na: “Fala kɛ mɔ gu nù ti mi, kɔ mɔ dɔnggɔ mi, nɛ mi hã sɛ mɛnɔ ni vɛ̃ hã mɔ.”

¹⁰ Nɛ Yezu gese hã a na: “Mɔ fó tɛ mɔ, Satana! Wa kɔma kɔ 'Buki na: ‘Mɔ dɔnggɔ sɛ Nwa Gale 'da mɔ, nɛ mɔ sambala tati a a zu a kpo.’ ”

¹¹ 'Do ki ni wá, nɛ Satana la Yezu, nɛ oanzɛnɔ wa hɔ, nɛ wa gala a.

Yezu ndua nyanga dɛa toe 'da a tɛ Galile

¹² Yezu nɛa we zele na, Herodɛ ba Yoanɛ wi batisa winɔ do bɔlɔkɔ ni, nɛ a la dɛ ngɔ nù Galile i.

¹³ A hɔa Nazarɛtɛ, nɛ a ɔ̀ di ni gɔ, nɛ a la we ɔ tɛ Kafarnaumɛ, kɛ ma dɛ nu gba ndɔ Galile, tɛ ngɔ nù Zabuloni do Nɛftali ni.

¹⁴ A dɛa na mɛ ni, takɔ we Ezai, wi gba olo nu Gale tɔ̃a zɛ́ ni, ma dɛ tɛ̃ ɛ. A tɔ̃a zɛ́ na:

¹⁵ “Nù Zabuloni do Nɛftali, lenɔ tɛ nu kolo gba lì, do kɛnɔ kulu lì Yɔrdanɛ, nù Galile, kɛ ogele winɔ wa ɔ nɛ ni!

¹⁶ Owinɔ wa ɔ kɔ gba tũ ni, wa zɔa gba nyɛa we yele ngbaa. Nɛ wanɔ kɛ wa kɔ gba tũi 'da fionɔ ni, fala sa ngɔ wa.”

¹⁷ Nɛ ndo do ngba soe ni, nɛ Yezu ma ngɔ be we na: “Nɛ kífí sila nɛ, we kɛ ngba soe Gale nɛ tɛ we dungu nwa ngɔ nù gɛ ni kɔla ia.”

Yezu sa mɔ hã owi da gbanda zu wa nalɛ

¹⁸ Mbe ngba soe kpo, nɛ Yezu ma ngɔ la do nu gba ndɔ Galile, nɛ a zɔ owi gbɛ kɔyɔ zu wa bɔa tɛ da gbanda 'da wa 'dɔ gba ndɔɛ ni tɛ fa kɔyɔ. Wi a Simɔ (kɛ wa sa 'bɔ li a na Petro ni), do nya a Andre.

¹⁹ Nɛ Yezu tɔ̃ hã wa na: “Nɛ tɛ́, kɔ lɛ yɛnggɛ do nɛ, nɛ mi a sɛ nɛ do owi fa wele hã Gale.”

²⁰ Wa nɛa we zele ni, nɛ wa la gbanda 'da wa dɛ di ni do ti, nɛ wa la do Yezu.

²¹ A nɛa we la dɛ dati, nɛ a zɔ owele bɔa, wa 'bɔ a onya wi, wi a Zake do Yoanɛ, benɔ 'da Zebede. Wa zi a kɔ ga do baa wa Zebede tɛ kpo li gbanda 'da wa. Nɛ Yezu sa mɔ hã wa,

²² nɛ wa la baa wa do ga 'da wa dɛ di ni do ti, nɛ wa la do Yezu.

²³ Nɛ Yezu yɛngga do ngɔ nù Galile vɛ̃ tɛ be mɔ hã owinɔ kɔ tɔa mbulanɔ 'da wa. Nɛ a tɛ be Dia Sako dɛa to nwa 'da Gale hã wa, nɛ a kpasa owi zɛlɛ kpi do kpi.

²⁴ Nɛ we 'da a yɛ'ba ngɔ nù Siri vɛ̃, nɛ Owele wa tɛa do owi zɛlɛ kpi do kpi hã a. Wa tɛa do winɔ kɛ wa do o'dã hi wi kɔ wa ni, do owi zɛlɛ tindili, do Owi kala nyanga, nɛ Yezu kpasa wa vɛ̃.

²⁵ Nɛ ogba gili wele, wa zi tɛ yɛnggɛ 'dɔkɔlɔ a. Wa yula ngɔ nù Galile, do ngɔ nùi kɛ wa sa li nɛ na Lenɔ 'Bu ni, do kɔ le Yeruzalɛmɛ, do ngɔ nù Yude, do kɔ lenɔ kulu lì Yɔrdanɛ i ni.