MATIE 3 - WE NU GALE 1995

Bia we 'da Yoanɛ wi batisa winɔ

¹ Do 'da fala ni, nɛ nde Yoanɛ wi batisa winɔ hɔa zi tɛ li gba zɔ̃ tɛ ngɔ nù Yude i, nɛ a ma ngɔ be we hã winɔ na:

² “Nɛ kífí sila nɛ, we kɛ ngba soe Gale nɛ tɛ we dungu nwa ngɔ nù gɛ ni kɔla ia.”

³ Yoanɛ gɛ a wele kɛ Ezai, mbe wi gba olo nu Gale kɔma zi we 'da a na: “Mbe wele kpo tɛ he mɔ tɛ li gba zɔ̃ i na: ‘Nɛ 'dáfá li wala 'da Nwa, kɔ ma bɔlɔ!’ ”

⁴ Yoanɛ hi'da tulu sala mbe sa'de kpo, li a a samo, nɛ a kpo 'dɛ̃ ndala 'dɛ tili a. Nɛ nyɔngɔmɔ nu a zi a odɔla do nɔ gɔlɔ.

⁵ Nɛ owi Yeruzalɛmɛ, do owanɔ ngɔ nù Yude, do wanɔ kɔ lenɔ nu lì Yɔrdanɛ ni vɛ̃ wa tɛa 'da a,

⁶ nɛ wa gbala 'dã mɛnɔ 'da wa dɛ li winɔ vɛ̃. Nɛ Yoanɛ batisa wa 'dɔ lì Yɔrdanɛ.

⁷ Nɛ gba gili Ofariziɛnɔ do Osadisiɛnɔ wa tɛa 'da Yoanɛ na a batisa wa. Nɛ a tɔ̃ hã wa na: “Aa nɛ, kɛ nɛ ɔlɔ wele ɔ nɛ gɔ̃nɔ gɛ! Wi tɔ̃a hã nɛ na, nɛ yu 'bili we 'da Gale, kɛ ma kɔla ia gɛ a wio nde?

⁸ Nɛ dɛ́ mɛnɔ kɛ ma be na, nɛ kifi sila nɛ do gbãlã we ni.

⁹ Nɛ nɛ tɛ tɔ̃̀ na, lo a obe zã Abrahama iko gɔ, we kɛ mi tɔ̃ hã nɛ na, Gale wia tɛ kala otanɔ gɛ, nɛ a kifi do obe zã Abrahama!

¹⁰ Wa 'dafa kpɛnɛmɛ ia! Tenɔ vɛ̃ kɛ wala nɛ dè gɔ ni, wa gɔmɔ sɛ ma dɛ gulu nɛ, nɛ wa da ma li we.

¹¹ Mi gɛ, mi batisa nɛ do lì, nɛ ma be na nɛ kifi sila nɛ. Nɛ nde wele kpo a hɔ sɛ 'do mi gɛ, nɛ a batisa sɛ nɛ do Hi Wi Santo fala nɛ kpo do we. A nɛa ngɔ mi do ngawi wena, nɛ mi hɔ̀ wi kɛ mi kala mɔ nyanga wi 'da a gɔ.

¹² A ba mɔ pɛpɛ do mɔ dɛ kɔ̃ a we pɛpɛ do tɛ gbãlã mɛ. A a sɛ dia gbãlã mɛ kɔ yangga 'da a, nɛ a a kɔa kɛ li we kɛ ma bí gɔ ni.”

Yoanɛ batisa Yezu

¹³ Do ngba soe ni, nɛ Yezu yula tɛ Galile, nɛ a tɛ 'da Yoanɛ nu lì Yɔrdanɛ nga, takɔ Yoanɛ batisa a.

¹⁴ Nɛ Yoanɛ bɛ̃a, nɛ a tɔ̃ hã a na: “Ɔ̃ ɔ̃, mɔ hã mɔ wia tɛ batisa mi, nɛ mɔ tɛ 'bɔ na, mi batisa mɔ nde?”

¹⁵ Nɛ Yezu gese hã a na: “Mɔ dɛ́ kpa, we kɛ ma wia na, ma dɛ tɛ̃ ɛ ní, takɔ lɛ dɛ mɛ kɛ Gale kɔ̃a ni.” Nɛ Yoanɛ kɔ̃a, nɛ a batisa Yezu.

¹⁶ Yoanɛ batisa Yezu do'do, nɛ Yezu hɔa nza 'dɔ lì do ti, nɛ do kpo fala ni, nɛ li nza hũi, nɛ a zɔ Hi Wi 'da Gale tɛ zĩlĩ dɛ ngɔ a ɔ nɛ gbakulĩ ni.

¹⁷ Nɛ wala gɛlɛ wele wila li nza i na: “Wele kɛ gɛ a Be 'da mi, kɛ a ngɔ sila mi, nɛ mi do yangga wena we a.”