MATIE 28 - WE NU GALE 1995

Yezu za'da nza kɔ fio

¹ Tũ ɔmɔ tɛ wi la do'do, nɛ do titole belee, do kuti tũi kɔ mbé pɔsɛ, nɛ Maria, boko Magdala do mbe gele Maria wa nɛa we zɔ ngɔ zuni.

² Kɔ wa nɛ gbanga nɛ, nɛ nùi ma tana gbirr, nɛ mbe anzɛ 'da Nwa Gale yula li nza i, nɛ a zĩlĩ, nɛ a kimili gã ta nu kɔ̃ɛ ni do'do, nɛ a dungu dɛ ngɔ nɛ.

³ Tɛ̃ a nyɛ zi nɛ́ nyɛa li kolo ni, nɛ tulu tɛ̃ a fɛnga nde nde.

⁴ Nɛ kili ba osodanɔ kɛ wa zɔ mɔ tɛ zuni ni wena, nɛ tɛ wa tana, nɛ wa ɔ nɛ wa nɛ fi fia ni.

⁵ Nɛ anzɛ tɔ̃ hã owukonɔ ni na: “Nɛ tɛ dɛ̀ kili gɔ. Mi ĩ na nɛ fa Yezu, kɛ wa bɛ̃lɛ̃ zi a ngɔ finda te ni.

⁶ Nɛ nde fo a dɛ bina, a tunu kɔ fio, ɔ nɛ kɛ a tɔ̃a zi nɛ hã nɛ ni. Nɛ tɛ́ hã nɛ zɔ fala wa ia zi do a gɛ.

⁷ Kɔ nɛ wɛ́lɛ́ tɛ nɛ, hã nɛ tɔ̃ hã Owi yambala mɛnɔ 'da a na, a tunu kɔ fio ia, kɔ a gɔna dati nɛ dɛ Galile i, nɛ nɛ kpa sɛ a i mɔ. Ma hã mi tɔ̃a hã nɛ ni.”

⁸ Nɛ wukonɔ wa wɛlɛ tɛ wa, nɛ wa hɔ nza kɔ zuni do kili, do yangga 'bɔ, nɛ wa yu, nɛ wa nɛ we tɔ̃ we ni hã Owi yambala mɛnɔ 'da Yezu.

⁹ Kɔ wa nɛ gbanga nɛ, nɛ Yezu gɔnɔ dati wa, nɛ a tɔ̃ hã wa na: “Balɛ hã nɛ!” Nɛ wa tɛa, nɛ wa 'be tɛ nyanga a, nɛ wa dɔnggɔ a.

¹⁰ Nɛ Yezu tɔ̃ hã wa na: “Kili tɛ bà nɛ gɔ. Nɛ nɛ́, kɔ nɛ tɔ̃́ hã onya mi na, wa lá dɛ Galile i, nɛ wa kpa sɛ mi i mɔ.”

Osodanɔ wa tɔ̃a sako hã onwa nganganɔ

¹¹ 'Da fala owukonɔ ni wa tɛ si nɛ ni, nɛ ombe sanga sodanɔ kɛ wa zɔ zi mɔ tɛ zuni ni wa nɛa le i, nɛ wa tɔ̃ we mɛnɔ vɛ̃ ma dɛa tɛ̃ ɛ ni hã onwa nganganɔ.

¹² Kɔ onwa nganganɔ wa nɛa we zele ní, nɛ wa mba li ngba wa do okumunɔ. Nɛ wa wila we dɛ sanga wa ní gbaa, kɔ ma ia, nɛ wa hã mbili dɛlɛ wena hã osodanɔ ni.

¹³ Nɛ wa mbo nu wa na: “Nɛ tɔ̃́ na, Owi yambala mɛnɔ 'da a wa tɛa do tũ, 'da fala kɛ yala nɛa ngɔ nɛ ni, kɔ wa zũ wɔlɔ a do'do.

¹⁴ Kɔ Pilatɛ zele we nɛ, nɛ lɛ mbɔkɔ sɛ sila a na, dɔ a zɛ́lɛ́ tɛ nɛ gɔ.”

¹⁵ Nɛ osodanɔ ni wa kala mbili, nɛ wa dɛa ɔ nɛ kɛ wa tɔ̃a hã wa ni. Nɛ lɛnggɛ ni ma yɛ'ba kɔ Oyudanɔ gbaa tia do sɔɛ gɛ.

Yezu bia tɛ a hã Owi yambala mɛnɔ 'da a

¹⁶ Nɛ Owi yambala mɛnɔ 'bu ngɔ wa kpo ni, wa nɛa ngɔ kala kɛ Yezu bia zi hã wa tɛ Galile i ni.

¹⁷ Wa hɔa i mɔ, kɔ wa nɛa we zɔ a, nɛ wa gu nù ti a. Nɛ nde ombe sanga wa ni, wa zi do kafi.

¹⁸ Nɛ Yezu tili dɛ 'da wa, nɛ a tɔ̃ hã wa na: “Gale hã ngawi ngɔ mɛnɔ li nza i, do kɛnɔ nù gɛ vɛ̃ hã mi.

¹⁹ Kɔ nɛ nɛ́, hã nɛ bé we hã onu kpala winɔ ngɔ nù gɛ vɛ̃, takɔ wa hɔ owinɔ 'da mi. Nɛ bátísá wa do zu li Baa, do Be, do Hi Wi Santo.

²⁰ Nɛ nɛ bé hã wa na, wa dɛ mbulanɔ vɛ̃ kɛ mi bia zi hã nɛ ni. Nɛ mi, mi sɛ fala nɛ kpo do nɛ fai, gbaa we hɔ ngba soe nùi ma 'danga sɛ nɛ ni.”