MATIE 27 - WE NU GALE 1995

Wa nɛa do Yezu dati Pilatɛ

¹ Nɛ do titole belee, nɛ onwa nganganɔ do okumunɔ vɛ̃, wa mba li ngba wa, nɛ wa ɔ ngɔ we kpo na, lo gbɛ Yezu.

² Nɛ wa ba a, nɛ wa ɛnzɛ a, nɛ wa nɛ do a hã Pilatɛ, gã wi fɔmɔ le.

Fie 'da Yudasi

³ Yudasi wi 'dɔlɔ Yezu nɛa we zɔ na, wa 'bili we 'da Yezu na, wa gbɛ a ni, nɛ ma gɛ̃a tɛ̃ a, nɛ a kpolo linggamɛ 'da a. Nɛ a kala mbili 'bu nɛ talɛ kɛ wa hã ma hã a ni, nɛ a nɛ do ma hã onwa nganganɔ do okumunɔ.

⁴ Nɛ a tɔ̃ hã wa na: “Mi dɛa 'dã mɔ, we kɛ mi 'dɔla wi kɛ a dɛ̀ 'dã mɔ gɔ ni na, wa gbɛ a!” Nɛ wa gese hã a na: “Ma zɔ̃ lɛ gɔ. Ki ni a we 'da mɔ zu mɔ kpo!”

⁵ Nɛ Yudasi da mbili ni dɛ kɔ Tɛmpɛlo i, nɛ a la. Nɛ a nɛa, nɛ a kpo fɛlɛ gɛlɛ a, nɛ a gãlã nu te, nɛ a gbɛ tɛ̃ a.

⁶ Nɛ onwa nganganɔ wa kala mbili ni, nɛ wa tɔ̃ na: “Mbula 'da lɛ kɔ̃̀ na, wa mba mbili ɔ nɛ kɛ gɛ do kɛnɔ kɔ Tɛmpɛloe gɔ, we kɛ mɛ a mbili tɔkɔ tɛ wele.”

⁷ Nɛ wa wila we ngɔ mbili ni, nɛ wa kala ma, nɛ wa oso do fɔ kɔ̃ wi 'bo kpana, takɔ wa mi do owinɔ kɛ wa a Oyuda gɔ ni.

⁸ Gulu nɛ a gbaa tia do sɔɛ gɛ, wa sa li fɔɛ ni na: “Fɔ tɔkɔ.”

⁹ Na mɛ ni, nɛ we kɛ Yeremi, wi gba olo nu Gale tɔ̃a zi ni ma dɛa tɛ̃ ɛ. A tɔ̃a zi na: “Wa kala mbili 'bu nɛ talɛ, mɛ a gole kɛ obe Israɛlɛ wa wia zi we a gɛ hã ni.

¹⁰ Nɛ wa usa ma do fɔɛ 'da wi 'bo kpana, ɔ nɛ kɛ Nwa Gale ba zi do nu a hã mi ni.”

Pilatɛ aka Yezu

¹¹ Nɛ Yezu yula dati Pilatɛ, gã wi fɔmɔ le, nɛ Pilatɛ aka a na: “Mɔ a nwa 'da Oyudanɔ nde?” Nɛ Yezu gese hã a na: “Ma a mɔ tɔ̃a ni.”

¹² Nɛ onwa nganganɔ do okumunɔ, wa ma ngɔ 'bili bɛlɛ dɛ ngɔ a, nɛ a gèsè nu we kpo gɔ.

¹³ Nɛ Pilatɛ aka 'bɔ a na: “Mɔ zélé wenɔ winɔ wa kala dɛ ngɔ mɔ dɛlɛ nɛ ge nde gɛ gɔ nde?”

¹⁴ Nɛ Yezu gèsè gbãlã lɛnggɛ kpo gɔ, nɛ Pilatɛ ɔngbɔ nɛ nɛ ge nde ni.

Wa 'bili we 'da Yezu na wa gbɛ a

¹⁵ Sabɛlɛ kpo kpo, do ngba soe ɛngga Hɔ Nza kɔ Ngbá, nɛ ma wia zi na, Pilatɛ da kɔ̃ ɛ tɛ mbe wi bɔlɔkɔ kpo kɛ owinɔ wa saka a ni.

¹⁶ Do 'da fala ni, nɛ nde mbe wele kpo zi kɔ bɔlɔkɔ, wa ĩ ti a wena, li a a Barabasi.

¹⁷ Nɛ Pilatɛ aka gba gili owinɔ kɛ wa mba li ngba wa ni na: “Nɛ kɔ̃a na, mi da kɔ̃ mi tɛ Barabasi, tabi tɛ Yezu kɛ wa sa li a na Kristo ni hã nɛ nde?”

¹⁸ A aka na mɛ ni, we kɛ a ĩ na, onwa nganganɔ wa tɛa do Yezu hã ɛ do kɔ sila bɔnɛ iko.

¹⁹ 'Da fala Pilatɛ dungu nù we 'bili we ni, nɛ kɛnɛ a tombo to hã a na: “Mɔ tɛ lè kɔ we 'da wi bɔlɔ zui gɛ gɔ, we duzu kɛ mi yala zu mi dɛ ngɔ a dè gɔ.”

²⁰ Nɛ onwa nganganɔ do okumunɔ, wa tɛ tɔndɔ go'do winɔ, takɔ wa tɔ̃ hã Pilatɛ na, lo kɔ̃a na a da kɔ̃ a tɛ Barabasi hã lo, nɛ a gbɛ Yezu.

²¹ Nɛ Pilatɛ aka 'bɔ mbé nɛ na: “Sanga wa bɔa gɛ, nɛ kɔ̃a na mi da kɔ̃ mi tɛ wio nde?” Nɛ wa gese na: “Barabasi!”

²² Nɛ Pilatɛ aka 'bɔ wa na: “Kɔ mi dɛ do Yezu, kɛ wa sa li a na Kristo gɛ nɛ nde?” Nɛ wa vɛ̃ wa gese na: “Mɔ bɛ̃́lɛ̃́ a ngɔ finda te!”

²³ Nɛ Pilatɛ aka 'bɔ wa na: “'Dã mɛ ngboo a dɛa ni a ge nde?” Nɛ wa he 'bɔ mɔ dɛ ngɔ fuu na: “Bɛ̃́lɛ̃́ a ngɔ finda te!”

²⁴ Nɛ Pilatɛ zɔa kɛ zã winɔ tɛ nɔ̃lɔ̃ dɛ dati fai ni, nɛ a ĩ na, ɛ wè we dɛ 'bɔ mbé mɔ gɔ. Nɛ a sua lì, nɛ a fɔlɔ do kɔ̃ a dɛ li gba gili winɔ ni, nɛ a tɔ̃ na: “We fie 'da wi gɛ ma zɔ̀ mi gɔ! Mɛ a we 'da nɛ!”

²⁵ Nɛ gba gili winɔ vɛ̃ wa gese na: “E kɔ we fie 'da a ma si zu lɛ, do obenɔ 'da lɛ!”

²⁶ Nɛ Pilatɛ da kɔ̃ ɛ tɛ Barabasi hã wa. Nɛ a ba nu a na, wa zɛ́ Yezu do zufa. 'Do nɛ, nɛ a ia Yezu dɛ kɔ̀ sodanɔ na, wa bɛ̃́lɛ̃́ a ngɔ finda te.

Osodanɔ wa mɔma Yezu

²⁷ Nɛ osodanɔ 'da Pilatɛ wa ba Yezu, nɛ wa le do a kɔ ngboe 'da Pilatɛ i. Nɛ wa mba li tala osodanɔ vɛ̃ dɛ kɛ zã a.

²⁸ Nɛ wa hɔla otulunɔ tɛ̃ a ni do'do, nɛ wa he'de gba du fila tulu hã a.

²⁹ Nɛ wa kala tɛ̃, nɛ wa fana do ndasa nwa korr ɔ nɛ kali ni, nɛ wa yulu dɛ zu a. Nɛ wa e dɔndɔlɔ ngɔ ngawili kɔ̃ a. Nɛ wa gu gba zugolo dati a, nɛ wa ma ngɔ mɔmɔ a tɛ tɔ̃ na: “Nwa 'da Yudanɔ, balɛ hã mɔ!”

³⁰ Nɛ wa tufu sa nu wa dɛ tɛ̃ a, nɛ wa ngbolo zu a do dɔndɔlɔ.

³¹ Wa mɔmɔ a gbaa, nɛ ma we do wa, nɛ wa hɔlɔ gba du tuli ni tɛ̃ a do'do, nɛ wa gese kɛ 'da a ngboo ni dɛ tɛ̃ a. Nɛ wa hɔ do a we nɛ we bɛ̃lɛ̃ a ngɔ finda te.

Wa bɛ̃lã Yezu ngɔ finda te

³² Osodanɔ wa ma ngɔ la do Yezu, nɛ wa kpa mbe wele kpo, li a a Simɔ, wi Sirɛnɛ. Nɛ wa ngbɔkɔ a na, a ba tole finda te 'da Yezu.

³³ Nɛ wa nɛa do Yezu tɛ mbe fala wa sa li nɛ na Golgota. (Gulu nɛ na: “Fala gbãlã zu wi.”)

³⁴ Wa hɔa i mɔ, nɛ wa hã dɔ̃ kɛ wa mba do fã ina ni hã a. Kɔ a nɛa we yamba ma, nɛ a bɛ̃ do'do.

³⁵ Nɛ 'do nɛ, nɛ wa bɛ̃lɛ̃ a ngɔ finda te, nɛ wa to zeke we kɛ̃ sanga tulunɔ 'da a.

³⁶ Nɛ wa dungu nù dɛ di ni we zɔ mɔ tɛ̃ a.

³⁷ Mɛ ni, nɛ nde Pilatɛ dɛa gulu fie 'da Yezu do mbɛti, nɛ wa nãlã ma dɛ ti zu a ni. Wa kɔma na: “Wi gɛ a Yezu, Nwa 'da Oyudanɔ.”

³⁸ 'Da fala ni, nde wa bɛ̃lɛ̃ tɛ mɛ 'bɔ owi zũ bɔa ngɔ finda te dɛ kɛ zã Yezu ni, mbe kpo si ngɔ ngawili kɔ̃, nɛ mbe nɛ si ngɔ gale.

³⁹ Nɛ owinɔ kɛ wa la do di ni ni wa zɔ a, nɛ wa dã a, nɛ wa gɔmɔ zu wa hã a.

⁴⁰ Nɛ wa tɔ̃ hã a na: “Mɔ gɛ, mɔ tɔ̃a zi na, ɛ wia we gbini Tɛmpɛloe, nɛ ɛ dɛ mbé nɛ 'do tũ talɛ. Kɔ fala kɛ mɔ a ngbongbo Be 'da Gale, nɛ mɔ kpásá kili tɛ mɔ, kɔ mɔ zĩ́lĩ́ ngɔ finda te gɛ!”

⁴¹ Nɛ onwa nganganɔ, do Owi be mbulanɔ, do okumunɔ vɛ̃ wa mɔma 'bɔ a tɛ tɔ̃ na:

⁴² “A kpasa zi gele winɔ, nɛ a wè mɛ 'bɔ we kpasa kili tɛ̃ a wele nɛ gɔ! A a Nwa 'da obe Israɛlɛ gɔ nde? Fala kɛ a zĩlĩ ngɔ finda te gɛ, nɛ lɛ kɔ̃ sɛ gɛnɛ a.

⁴³ A gbini zi zã a do Gale, nɛ a na, ɛ a Be 'da Gale. Kɔ fala kɛ Gale kɔ̃ gɛnɛ a kɔ̃a, nɛ a kpasa a ngangga ni!”

⁴⁴ Nɛ Owi zũnɔ kɛ wa bɛ̃lɛ̃ zi wa ngɔ finda te kɛ zã a ni, wa dã 'bɔ a na mɛ ni.

Yezu fia

⁴⁵ Ma nɛa we hɔ midi, nɛ gba tũ tũ mbĩi ngɔ nùi vɛ̃, gbaa 'do sa talɛ.

⁴⁶ Sa talɛ ni nɛa we we ma, nɛ Yezu hia mɔ nganda wena na: “Eli, Eli, lama sabaktani?” (Gulu nɛ na: “Gale 'da mi, Gale 'da mi, gulu kɛ mɔ la mi ní we ge nde?”)

⁴⁷ Nɛ ombe sanga owinɔ zi di ni ni, wa nɛa we zele hiamɛ ni, nɛ wa na: “A tɛ sa mɔ hã Elia.”

⁴⁸ Nɛ mbe sanga owinɔ ni kpo wɛlɛ tɛ̃ ɛ, nɛ a ba nukã, nɛ a fi 'dɔ kpã dɔ̃, nɛ a ɛnzɛ ma de zu ka gole, nɛ a ɛfɛ hã Yezu, takɔ a nzɔ'bɔ.

⁴⁹ Nɛ ombe wa tɔ̃ na: “Lɛ 'bɔ́ kɔ lɛ zɔ, tabi Elia a tɛ sɛ we kpasa a nde.”

⁵⁰ Nɛ Yezu hia 'bɔ mbé mɔ nganda wena, nɛ a e sila a nù.

⁵¹ Nɛ do 'da fala ni, nɛ gba tulu ku'bi kɔ Tɛmpɛloe i ɛ̃a dɛ gbogbo kparr, yolo ngɔ gbaa nù. Nɛ nùi tana nganda wena, nɛ otanɔ ma gba sanga tɛ ngbɛ ɛ.

⁵² Nɛ nu ozununɔ ma hũi, nɛ gba gili winɔ 'da Gale kɛ wa fia zɛ́ ni, wa tunu kɔ fio,

⁵³ nɛ wa hɔ nza kɔ zunu. Nɛ 'do kɛ Yezu za'da nza kɔ fie ni, nɛ wa lia dɛ Yeruzalɛmɛ, le santoe, nɛ Owele wena wa zɔa wa.

⁵⁴ Kɔ gã wi ngɔ osoda Roma, do osodanɔ 'da a kɛ wa zɔ mɔ tɛ Yezu ni, wa nɛa we zɔ kɛ nùi tana, do omɛnɔ vɛ̃ ma dɛa tɛ̃ ɛ ni, nɛ kili ba wa wena, nɛ wa ma ngɔ tɔ̃ na: “Gbãlã we, wi gɛ a Be 'da Gale ngboo!”

⁵⁵ Nɛ ogba gili wuko wa zi 'bɔ di ni, wa yula ndũu tɛ ka mɔ dɛ tɛ Yezu. Wukonɔ ni wa yula zi do Yezu tɛ Galile i, nɛ wa yɛnggɛ zi do a we gala a.

⁵⁶ Sanga owukonɔ ni, wi zi a Maria, boko Magdala, do Maria naa Zake do Yozɛfu, do wuke 'da Zebede.

Wa mi Yezu

^57-58 Kɔ wese nɛa we gɛ̃ nɛ, nɛ mbe wi kpamɔ kpo, li a a Yozɛfu, a nɛa 'da Pilatɛ i, nɛ a aka a na, a ba wɔlɔ Yezu hã ɛ. Yozɛfu ni a wi Arimate, nɛ a zi tɛ mɛ 'bɔ a wi 'da Yezu. Nɛ Pilatɛ hã wala hã Yozɛfu na, a ba wɔlɔ Yezu.

⁵⁹ Nɛ Yozɛfu nɛa, nɛ a ba wɔlɛ, nɛ a kasa a do mbé fɛ̃a tulu vɛ̃.

⁶⁰ Nɛ Yozɛfu e a kɔ zunu 'da ɛ ngboo, kɛ wa yula zi tɛ 'donggo hã a kɔ tanɔ ni. Nɛ a kimili gã ta, nɛ a kpe do nu kɔ̃ɛ, nɛ a si.

⁶¹ 'Da fala ni, nɛ nde Maria, boko Magdala do mbe gele Maria wa zi boe, wa dungu dɛ dati zuni ni.

Owi zɔ mɔ tɛ zuni

⁶² Fala nɛa we sa nɛ olo kɛ wa mi a ni, nɛ nde mɛ a ngba soe ɛngga, nɛ onwa nganganɔ do Ofariziɛnɔ, wa mba li ngba wa, nɛ wa nɛ 'da Pilatɛ i,

⁶³ nɛ wa tɔ̃ hã a na: “Nwa, ta zu lɛ gba ngɔ we kɛ wi bɛlɛ gɛ tɔ̃a zi 'da fala a 'bana nza ni. A tɔ̃a zi na, ma hɔ sɛ talɛ tũi, nɛ ɛ za'da sɛ nza kɔ fio.

⁶⁴ Kɔ mɔ ha nu mɔ na, Owele wa zɔ mɔ tɛ zuni 'da a gba 'do tũ talɛ. Da dɛ kɔ owi yambala mɛnɔ 'da a wa nɛ́, kɔ wa zũ wɔlɔ a, hã wa tɔ̃ hã winɔ na, a za'da nza kɔ fio gɔ. Wa dɛ ni, nɛ bɛlɛ ki ni ma 'danga sɛ nɛ ngɔ kɛ zi dati ni.”

⁶⁵ Nɛ Pilatɛ tɔ̃a hã wa na: “Nɛ kálá osodanɔ gɛ, kɔ nɛ nɛ do wa we zɔ mɔ tɛ zuni ɔ nɛ kɛ nɛ kɔ̃a ni.”

⁶⁶ Nɛ wa la do osodanɔ, nɛ wa hɔ nu zuni i, nɛ wa lɔ nu nɛ, nɛ wa la osodanɔ dɛ di ni we zɔ mɔ tɛ nɛ.