MATIE 25 - WE NU GALE 1995

Gba we ngɔ obe zɔnga 'bu

¹ Nɛ Yezu tɔ̃ na: “Do 'da fala ni, dɛa to nwa 'da Gale ma ɔ sɛ nɛ lɛnggɛ 'da ombe be zɔnga 'bu. Wa kala zi mwindanɔ 'da wa, we gɔnɔ do dati wi ba wuko.

² Ombe mɔlɔ sanga wa ni, wa lénggé mɔ ngboo gɔ, nɛ nde ombe mɔlɔ, wa a wi hã zã.

³ Nɛ wanɔ wa lénggé mɛ ngboo gɔɛ ni, wa kala mwindanɔ 'da wa, nɛ nde wa bà mbe nɔ we a sɛ ngɔ kɛ kɔ nɛ ni gɔ.

⁴ Nɛ owanɔ mɔlɔ kɛ wa a wi hã zã ni, wa kala mwindanɔ 'da wa mba do daka nɔ a kɔ nɛ.

⁵ Nɛ́ kɛ wi wili ni hɔ zi dɔ̃ gɔ ni, nɛ yala ba li wa 'bu ni vɛ̃, nɛ wa ɔa nù.

⁶ “Wa ɔa gbaa, kɔ ma nɛa we hɔ gbogbo tũi, nɛ wa zele hia mɔ na: ‘Nɛ zɔ́, wi ba wuke hɔa ia! Nɛ hɔ́ nza, kɔ nɛ gɔnɔ dati a!’

⁷ Nɛ obe zɔnganɔ 'bu ni wa kulu ngɔ, nɛ wa 'dafa mwindanɔ 'da wa.

⁸ Nɛ wanɔ wa lénggé mɛ ngboo gɔ ni, wa tɔ̃ hã wanɔ do hã zã ni na: ‘Nɛ hã́ mbe nɔɛ 'da nɛ hã lɛ, we kɛ mwinda 'da lɛ nɛ bi bi.’

⁹ Nɛ wanɔ wa do hã zã ni, wa gese hã wanɔ ni na: ‘Ma wé sɛ gɔ! Nɔɛ gã̀ gɔ, kɔ lɛ gɔnɔ sanga nɛ, nɛ nde ma gã́ sɛ kɔ̃ lɛ do nɛ gɔ. Kɔ nɛ nɛ́ 'da owi be golenɔ i, hã nɛ oso kɛ 'da nɛ.’

¹⁰ Nɛ wanɔ ni wa la we oso nɔ kɔ mwinda 'da wa. Wa nɛa we la nɛ, nɛ wi wili hɔ. Nɛ obe zɔnganɔ mɔlɛ kɛ wa 'dafa sɔ mɛnɔ 'da wa ia ni, wa lia do a kɔ tɔa mɔ dɔ ba ngba wi, nɛ Owele wa kpia nu tɔa, nɛ wa kã ma.

¹¹ “Kɔ 'do nɛ nyɛla bi sĩ, nɛ tala be zɔnganɔ mɔlɛ ni wa hɔ, nɛ wa ma ngɔ sa mɔ na: ‘Nwa, nwa, mɔ hṹi nu tɔa hã lɛ!’

¹² Nɛ wi wili ni gese hã wa na: ‘Mi tɔ̃ hã nɛ do gbãlã we na, mi ĩ̀ ti nɛ gɔ.’ ”

¹³ Nɛ Yezu tɔ̃ hã wa na: “Li nɛ sɔ̃́! We duzu kɛ nɛ ĩ̀ ti ngba soe, do sa kɛ mi nɛ hɔ sɛ do ma ni gɔ.”

Gba we ngɔ owi dɛa to talɛ

¹⁴ Nɛ Yezu tɔ̃a 'bɔ na: “Dɛa to nwa 'da Gale ma ɔ sɛ nɛ lɛnggɛ 'da mbe wi wili kpo, a nɛa we la gɛnɛ, nɛ a sa mɔ hã owi dɛa tonɔ 'da a, nɛ a kɛ̃ kpamɛnɔ 'da a dɛ kɔ̃ wa.

¹⁵ A hã gbãlã mbili mɔ mbali koto mɔlɔ hã kuti wele kɛ, nɛ a hã gbãlã nɛ koto bɔa hã bɔa wele kɛ, nɛ a hã ma koto kpo hã talɛ wele kɛ. A hã ma hã wele do wele wia do 'da ngawi dɛa toe 'da a. Nɛ 'do nɛ, nɛ a la gɛnɛ.

¹⁶ Nɛ wi dɛa toe kɛ a kpa gbãlã mbili kote mɔlɔ ni la do ti, nɛ a ma ngɔ dɛ buliye do mbili ni, nɛ a kpa ngɔ nɛ gbãlã mbili koto mɔlɔ 'bɔ.

¹⁷ Nɛ wele kɛ a kpa gbãlã mbili kote bɔa ni, a dɛa 'bɔ na mɛ ni, nɛ a kpa ngɔ nɛ gbãlã mbili koto bɔa.

¹⁸ Nɛ nde wele kɛ a kpa gbãlã mbili kote kpo ni, a zã kɔ̃, nɛ a usu mbili 'da wele a dɛ kɔ nɛ.

¹⁹ “'Do nɛ nyɛlɛ wena, nɛ nwa 'da owi dɛa tonɔ ni si, nɛ a sa mɔ hã wa, nɛ a aka wa ngɔ mbili 'da a.

²⁰ Nɛ wele kɛ a kpa zi gbãlã mbili kote mɔlɛ ni tɛa, nɛ a a kɛ a kpa ngɔ nɛ ni, nɛ a tɔ̃ hã nwa 'da a na: ‘Nwa, mɔ hã zi gbãlã mbili koto mɔlɔ hã mi. Kɔ mi kpa 'bɔ mbé ngɔ nɛ koto mɔlɔ, ma kɛ!’

²¹ Nɛ nwa 'da a tɔ̃ hã a na: ‘Ma de wena. Mɔ a dia wi dɛa to, mɔ dɛ mɔ do wala olo nɛ. Ɔ nɛ kɛ mɔ dɛa be mɛnɔ do wala olo nɛ ni, mi e sɛ mɔ ngɔ ogã mɔ wena. Kɔ mɔ tɛ́ we dɛ yangga fala nɛ kpo do mi.’

²² “Nɛ wi dɛa toe kɛ a kpa zi gbãlã mbili kote bɔa ni tɛa tɛ mɛ 'bɔ, nɛ a tɔ̃ na: ‘Nwa, mɔ hã zi gbãlã mbili koto bɔa hã mi. Kɔ mi kpa 'bɔ mbé ngɔ nɛ koto bɔa, ma kɛ!’

²³ Nɛ nwa 'da a tɔ̃ hã a na: ‘Ma de wena, mɔ a dia wi dɛa to, mɔ dɛ mɔ do wala olo nɛ. Ɔ nɛ kɛ mɔ dɛa be mɛnɔ do wala olo nɛ ni, mi e sɛ mɔ ngɔ ogã mɔ wena. Kɔ mɔ tɛ́ we dɛ yangga fala nɛ kpo do mi.’

²⁴ “Ma nɛa we hɔ ngɔ wele kɛ a kpa zi gbãlã mbili kote kpo ni, nɛ a tɛa, nɛ a tɔ̃ na: ‘Nwa, mi ĩ zi na, tɛ mɔ kolo wena. Mɔ 'bi wala te kɛ mɔ a mɔ mì ma gɔ ni, nɛ mɔ 'bɛ̃lɛ̃ kpalɛ kɛ mɔ a mɔ mì ma gɔ ni.

²⁵ Ma kɛ mi dɛa zi kili, nɛ mi usu mbili 'da mɔ kɔ kɔ̃. Kɔ mɔ zɔ́, mbili 'da mɔ ma kɛ.’

²⁶ Nɛ nwa 'da a gese hã a na: ‘Mɔ a 'dã wi dɛa to, mɔ sulu wena! Mɔ ĩ zi na, mi 'bi wala te kɛ mi a mi mì ma gɔ ni, nɛ mi 'bɛ̃lɛ̃ kpalɛ kɛ mi a mì ma gɔ ni!

²⁷ Kɔ ma wia zi na, mɔ a mbili 'da mi kɔ bankɛ, nɛ mi si sɔ na mɛ gɛ, nɛ mi kala ma do kpa ngɔ nɛ.’

²⁸ “Nɛ a tɔ̃ na: ‘Nɛ kálá gbãlã mbili kote kpo kɔ̃ a ni, kɔ nɛ hã́ ma hã wele kɛ a do ma kote 'bu ni.

²⁹ Mba gɔ, wi kɛ a do mɔ kɔ̃ a boe ni, nɛ a kpa sɛ 'bɔ mbé nɛ dɛ ngɔ nɛ, nɛ ma dɛlɛ sɛ kɔ̃ a wena. Nɛ nde wele kɛ a do mɔ kɔ̃ a bina ni, nɛ wa kala sɛ 'bɔ bi 'bulu kɛ kɔ̃ a ni do'do.

³⁰ Kɔ nɛ bá yɔnda wi dɛa toe gɛ, hã nɛ da a nza kɔ gba tũ, tɛ fala kɛ a he sɛ kɔ̃a, nɛ a nyɔngɔ li gogo a ni.’ ”

Sɔkpɔ tala 'bili we

³¹ Nɛ Yezu tɔ̃ na: “'Da fala kɛ mi Be 'da Wele, mi tɛ sɛ do dɔ̃lɔ̃ li nwa 'da mi, fala nɛ kpo do oanzɛnɔ vɛ̃ ni, nɛ mi dungu sɛ ngɔ kpongbo dɔ̃lɔ̃ li 'da mi.

³² Nɛ owinɔ ngɔ nù gɛ vɛ̃ wa ngɛmɛ sɛ ngba wa dɛ dati mi. Nɛ mi gɔnɔ sɛ sanga winɔ, ɔ nɛ kɛ wi fɔmɔ nadalamɔ gɔnɔ do sanga obatanɔ do duanɔ 'da a ni.

³³ Mi a sɛ obatanɔ si ngɔ ngawili kɔ̃, nɛ mi a oduanɔ si ngɔ gale.

³⁴ Nɛ mi tɔ̃ sɛ hã wanɔ si ngɔ ngawili kɔ̃ mi ni na: ‘Baa mi wila zɛ́ nu a tɛ nɛ ia! Nɛ tɛ́, kɔ nɛ le kɔ le nwa 'da a, kɛ a 'dafa zɛ́ ma hã nɛ dati ndo nyanga dɛ nùi ni.

³⁵ Mba gɔ, mi zi do wɔ, nɛ nɛ hã nyɔngɔmɔ hã mi. Mi zi do wɔ lì, nɛ nɛ hã lì hã mi. Mi zi a gɛnɛ, nɛ nɛ dɛa gɛnɛ mi.

³⁶ Fo zi tulu tɛ mi bina, nɛ nɛ ia tulu tɛ mi. Mi zi do zɛlɛ, nɛ nɛ tɛa we gala mi. Mi zi a kɔ bɔlɔkɔ, nɛ nɛ tɛa we zɔ mi.’

³⁷ “Nɛ owi bɔlɔ zunɔ ni wa aka sɛ mi na: ‘Nwa, lɛ zɔa zi mɔ do wɔ, nɛ lɛ hã nyɔngɔmɛ hã mɔ, tabi mɔ zi do wɔ lì, nɛ lɛ hã lì hã mɔ soe ki nge nde?

³⁸ Mɔ zi a gɛnɛ, nɛ lɛ dɛa gɛnɛ mɔ, nɛ fo zi tulu tɛ mɔ bina, nɛ lɛ ia tulu tɛ mɔ soe ki nge nde?

³⁹ Mɔ zi do zɛlɛ, tabi mɔ zi a kɔ bɔlɔkɔ, nɛ lɛ nɛa we zɔ mɔ soe ki nge nde?’

⁴⁰ Nɛ mi gese sɛ hã wa na: ‘Mi tɔ̃ hã nɛ do gbãlã we na, 'da falanɔ vɛ̃ kɛ nɛ gala zi obe winɔ, kɛ wa a nya mi ni, nɛ gala zi mi!’

⁴¹ “Nɛ 'do nɛ, nɛ mi tɔ̃ sɛ hã wanɔ si ngɔ gale kɔ̃ mi ni na: ‘Nɛ fó tɛ nɛ li mi do'do, we kɛ Gale fɔmbɔ nɛ fɔmba! Nɛ lá dɛ li gba nyɛa we kɛ ma bí gɔ, nɛ Gale dɛa zɛ́ ma we Satana, fala nɛ kpo do oanzɛnɔ 'da a ni!

⁴² Mba gɔ, mi zi do wɔ, nɛ nɛ ha nyɔngɔmɔ hã mi gɔ. Mi zi do wɔ lì, nɛ nɛ ha lì hã mi gɔ.

⁴³ Mi zi a gɛnɛ, nɛ nɛ dɛ̃ gɛnɛ mi gɔ. Fo zi tulu tɛ mi bina, nɛ nɛ è tulu tɛ mi gɔ. Mi zi do zɛlɛ, nɛ nɛ tɛ̀ we gala mi gɔ. Mi zi a kɔ bɔlɔkɔ, nɛ nɛ tɛ̀ we zɔ mi gɔ.’

⁴⁴ Nɛ wa gese sɛ hã mi na: ‘Nwa, lɛ zɔa zi mɔ do wɔ, tabi do wɔ lì, nɛ mɔ zi a gɛnɛ, nɛ fo zi tulu tɛ mɔ bina, mɔ zi do zɛlɛ, tabi kɔ bɔlɔkɔ, nɛ lɛ gàlà mɔ gɔ soe ki nge nde?’

⁴⁵ Nɛ mi gese sɛ hã wa na: ‘Mi tɔ̃ hã nɛ do gbãlã we na, 'da falanɔ vɛ̃ kɛ nɛ bɛ̃a zi we gala obe winɔ kɛ wa a nya mi ni, nɛ bɛ̃a zi we gala mi.’

⁴⁶ Nɛ wa la sɛ dɛ fala zɛlɛ tɛ kɛ ma é gɔ ni. Nɛ owi bɔlɔ zunɔ wa kpa sɛ kpasi kɛ ma é sɛ gɔ ni.”