MATIE 23 - WE NU GALE 1995

Yezu bia we ngɔ Owi be mbulanɔ

¹ Nɛ Yezu wila we hã ogba gili winɔ, do Owi yambala mɛnɔ 'da a na:

² “Toe 'da Owi be mbulanɔ do Ofariziɛnɔ, mɛ a tɔ̃ gulu mbula kɛ Mɔizɛ kɔma zɛ́ ni hã winɔ.

³ Kɔ ma wia na, nɛ zele wa, nɛ nɛ dɛ olo nu wa vɛ̃, nɛ nde nɛ tɛ bà dɛa to tɛ wa gɔ. We kɛ wenɔ wa be ni, wa wele nɛ wa dɛ́ ma gɔ.

⁴ Ma ɔ nɛ kɛ wa ɛnzɛ gã tole, nɛ wa e zu winɔ, nɛ nde wa do tɛ wa, wa é mbe kɔ̃ wa tɛ nɛ gɔ ni.

⁵ Wa dɛ mɛnɔ vɛ̃ na, owinɔ wa zɔ, nɛ wa dɔnggɔ wa. Nɛ nwá mbɛtinɔ kɛ owinɔ wa kɔmɔ we nu Gale dɛ ngɔ nɛ, nɛ wa kpo dati wa do zã 'baka wa ni, Ofariziɛnɔ wa dɛ kɛ 'da wa gã wena. Nɛ nu tulunɔ kɛ wa e nyanga du tulunɔ 'da wa ni, ma dulu nɛa ngɔ kɛ 'da ogele winɔ.

⁶ Wa hɔ tɛ gbalimɔ, nɛ wa kɔ̃a na, wa hã dia fala dungu hã lo. Kɔ wa le kɔ tɔa mbula, nɛ wa kɔ̃a na, lo dungu ngɔ kpongbo nwa do dati winɔ vɛ̃.

⁷ Wa kɔ̃a na, winɔ wa hã balɛ hã lo tɛ li gba fandanɔ, nɛ wa sa li lo na: ‘Wi be mɔ!’

⁸ “Nɛ nde kɛ 'da nɛ, nɛ tɛ kɔ̃̀ na, Owele wa sa li nɛ na ‘Wi be mɔ’ gɔ, we kɛ nɛ vɛ̃ a onya wi, nɛ nɛ do wi be mɔ kpo iko.

⁹ Nɛ tɛ sà li wele ngɔ nù gɛ na ‘Baa’ nɛ gɔ, we kɛ Baa nɛ kpo, wi a wele kɛ li nza i ni iko.

¹⁰ Nɛ tɛ kɔ̃̀ na, owinɔ wa sa li nɛ na ‘Nwa’ gɔ, we kɛ Nwa kpo wi a Mɛsiya iko.

¹¹ Wi kɛ a a gà wi sanga nɛ gɛ ni, ma wia na, a ɔ wi dɛa to 'da nɛ vɛ̃.

¹² Wi kɛ a ba tɛ̃ a dɛ ngɔ, nɛ Gale a fi sɛ a nù. Nɛ wi kɛ a ba tɛ̃ a dɛ nù, nɛ Gale ba sɛ a dɛ ngɔ.

Yezu kɔ'da owi be mbulanɔ do Ofariziɛnɔ

¹³ “'Bako do nɛ, owi be mbulanɔ do Ofariziɛnɔ! Nɛ a Owi ɔlɔ wi! Nɛ kpia nu le nwa 'da Gale na, winɔ wa tɛ lè gɔ. Nɛ nɛ ngboo ni, nɛ kɔ̃̀ we le i mɔ gɔ, nɛ nɛ kele wala ti owinɔ kɛ wa kɔ̃a we le nɛ ni na, dɔ wa lé gɔ. [

¹⁴ “'Bako do nɛ, owi be mbulanɔ do Ofariziɛnɔ! Nɛ ɔlɔ Owi fio wilinɔ, nɛ nɛ kala mɛnɔ 'da wa vɛ̃, nɛ do kpo 'da fala ni, nɛ sambala Gale dulu wena, takɔ winɔ wa dɔnggɔ nɛ iko. Nɛ nde nɛ kpa sɛ gà etumbu olo nɛ.]

¹⁵ “'Bako do nɛ, owi be mbulanɔ do Ofariziɛnɔ! Nɛ a Owi ɔlɔ wi! Nɛ yɛnggɛ ngɔ nùnɔ do ngɔ gba lìnɔ vɛ̃ we fa gbãlã wele kpo na, a kifi sila a. Kɔ a kifi sila a do'do, nɛ nɛ 'danga a na, a dɛ 'dã mɔ nɛ ngɔ kɛ 'da nɛ fala bɔa, we do kɛ na a le li gba nyɛa we dati hã nɛ.

¹⁶ “'Bako do nɛ, owi ba linɔ kɛ nɛ ba te ti owinɔ ni! Nɛ tɔ̃ na: ‘Fala kɛ wele kana tɛ̃ ɛ do Tɛmpɛloe, nɛ nde ma dɛ́ mɔ gɔ. Kɔ a kana tɛ̃ a do mɔ mbali, kɛ wa dɛa do mɛnɔ kɔ Tɛmpɛloe ni, sɛ nɛ a dɛ olo nu a de.’

¹⁷ Nɛ, oyɔnda winɔ kɛ li nɛ lɔ ba gɛ! Mɛ ma nɛa ngɔ ngbɛ ɛ ni a ki nge nde? Mɛ a mɔ mbali kɛ ma kɔ Tɛmpɛloe ni, tabi mɛ a Tɛmpɛloe kɛ ma dɛ na, mɔ mbali hɔ santo ni nde?

¹⁸ Nɛ tɔ̃ 'bɔ na: ‘Fala kɛ wele kana tɛ̃ ɛ do gbagala kɔ Tɛmpɛloe, nɛ nde ki ni dɛ́ mɔ gɔ. Kɔ a kana tɛ̃ a do dɔnggamɛnɔ ngɔ gbagala ni, sɛ nɛ a dɛ olo nu a de!’

¹⁹ Nɛ, owi lɔa linɔ gɛ, mɛ ma nɛa ngɔ ngbɛ ɛ ni a ki nge nde? Mɛ a dɔnggamɛnɔ kɛ winɔ wa hã ni, tabi mɛ a gbagala kɛ ma dɛ na, dɔnggamɛnɔ hɔ santo ni nde?

²⁰ Kɔ wele kɛ a kana tɛ̃ a do gbagala, nɛ nde a kana tɛ 'bɔ tɛ̃ a do dɔnggamɛnɔ vɛ̃ ngɔ nɛ ni.

²¹ Kɔ wele kɛ a kana tɛ̃ a do Tɛmpɛloe, nɛ nde a kana tɛ 'bɔ tɛ̃ a do Gale, kɛ a ɔ kɔ nɛ ni.

²² Kɔ wele kɛ a kana tɛ̃ a do li nza, nɛ nde a kana tɛ 'bɔ tɛ̃ a do kpongbo nwa 'da Gale, do zu li Gale kɛ a dungu ngɔ nɛ ni.

²³ “'Bako do nɛ, owi be mbulanɔ do Ofariziɛnɔ! Nɛ a owi ɔlɔ wi! We kɛ nɛ hã hã Gale mɛ a kpo mbee 'bu ngɔ nwá sanggonɔ kpi do kpi kɛ ma unu tɛ nyɔngɔmɛnɔ ni, nɛ nde nɛ kɔ̃̀ we dɔnggɔ mbulanɔ 'da Gale kɛ ma nɛa ngɔ mɛnɔ vɛ̃ ni gɔ. Mbulanɔ ni a: dɛ bɔlɔ zu dɛa mɔ, ĩ 'bako hã Owele, do dɛ olo nu wi. Ĩ na, mɛ ma wia sɔ ngboo na, nɛ dɛ gɛ a ni, sɛ nɛ nɛ dɛ tala gele mbulanɔ de.

²⁴ Nɛ, owi lɔa linɔ kɛ nɛ ba te ti owinɔ ni! Nɛ tɛkpɛ dɔ̃nɔ 'da nɛ na, dɔ lo nɔ́ ozĩnɔ 'dɔ nɛ gɔ, nɛ nɛ yɔ'dɔ mɛ 'bɔ gã sa'de.

²⁵ “'Bako do nɛ, Owi be mbulanɔ do Ofariziɛnɔ! Nɛ a owi ɔlɔ wi! Nɛ fɔlɔ tati a tɛ nɛ, ɔ nɛ wele fɔlɔ do 'do bila do kpangbala sani ni iko, nɛ nde kɔ sila nɛ dunu do wɔ zũ do o'dã linggamɔ.

²⁶ Mɔ Fariziɛ̃, kɛ li mɔ lɔ lɔa gɛ! Ma wia na, mɔ fɔlɔ kɔ bila dati, nɛ 'do bila ma sa sɛ tɛ mɛ 'bɔ.

²⁷ “'Bako do nɛ, owi be mbulanɔ do Ofariziɛnɔ! Nɛ a Owi ɔlɔ wi! Nɛ ɔ nɛ zunu kɛ wa zɛa mbu tɛ nɛ vɛ̃ ni. Mɔ zɔ ma, nɛ nde 'do nɛ de wena, ɔkɔ na, kɔ nɛ i dunu do ogbãlã fio, do ombulu mɔ kpi do kpi.

²⁸ Nɛ ɔ na mɛ ni, we duzu kɛ nɛ be tɛ nɛ li Owele na, wa zɔ nɛ nɛ́ owi bɔlɔ zu ni, nɛ nde kɔ sila nɛ dunu do linggamɔ ɔlɔ wele, do dɛ 'dã mɔ!

Gale a hã sɛ zɛlɛ tɛ hã Owi ɔlɔ winɔ

²⁹ “'Bako do nɛ, owi be mbulanɔ do Ofariziɛnɔ! Nɛ a owi ɔlɔ wi! Nɛ 'dafa zunu owi gba olo nu Gale, do owi bɔlɔ zunɔ de wena, nɛ nɛ zɛ mbu tɛ nɛ vɛ̃.

³⁰ Nɛ nɛ tɔ̃ na: ‘Ɔ do kɛ lɛ ɔ zi 'da fala 'da oyaa lɛ zi ni, nɛ nde lɛ mbá zi do wa we gbɛ Owi gba olo nu Gale gɔ.’

³¹ Na mɛ ni, nɛ tɔ̃ tɛ nɛ na, lo a obe zã owinɔ kɛ wa gbɛa zɛ́ owi gba olo nu Gale ni.

³² Kɔ nɛ nɛ́, hã nɛ dɛ tala toe kɛ oyaa nɛ wa ndua zɛ́ ni, kɔ ma sɔkpɔ.

³³ Aa nɛ, kɛ nɛ ɔlɔ wele ɔ nɛ gɔ̃nɔ gɛ, nɛ dɛ sɛ fala yu etumbui kɛ nɛ kpa sɛ li gba nyɛa we ni nɛ nde?

³⁴ Ma kɛ mi tɔ̃ hã nɛ na, mi tombo sɛ owi gba olo nu Gale, do owi hã zã, do owanɔ wa yambala mɔ wena ni hã nɛ. Nɛ nde nɛ gbɛ sɛ ombe sanga wa, nɛ nɛ bɛ̃lɛ̃ ombe ngɔ finda te, nɛ nɛ zɛ ombe do zufa ndala tɛ kɔ tɔa mbulanɔ 'da nɛ, nɛ nɛ ndaka sɛ 'do wa kɔ le do kɔ le.

³⁵ We duzu ma, nɛ kpa sɛ etumbu olo tɔkɔ tɛ Owi bɔlɔ zunɔ ni, kɛ owinɔ wa gbɛa zɛ́ wa, ndo do fie 'da Abɛlɛ, kɛ a dɛ̀ zi 'dã mɔ gɔ ni, gbaa we hɔ tɛ kɛ 'da Zakaria, be 'da Baraki, kɛ nɛ gbɛa zi a kɔ Tɛmpɛloe, dɛ ngbala fala kɛ ma santo wena, do gbagala wa dɔ do sa'denɔ ni.

³⁶ Mi tɔ̃ hã nɛ do gbãlã we na, nɛ winɔ kikina gɛ, nɛ kpa sɛ gã etumbu olo Owi gbɛ winɔ ni!

Yezu ala nu a we le Yeruzalɛmɛ

³⁷ “Aa nɛ, owi Yeruzalɛmɛ, nɛ gbɛ owi gba olo nu Gale fai, nɛ nɛ lo owinɔ kɛ Gale tombo wa hã nɛ ni do ta. Mi kɔ̃a zi wena na, mi ngɛmɛ li nɛ dɛ ti mi, ɔ nɛ kɛ naa kɔla ngɛmɛ do li obenɔ 'da a dɛ ti sala 'baka a ni. Nɛ nde nɛ kɔ̃̀ gɔ!

³⁸ Kɔ nɛ zɔ́! Gale a da sɛ li a ngɔ le 'da nɛ do'do, nɛ ma kulu.

³⁹ Mi tɔ̃ hã nɛ na, nɛ zɔ́ sɛ 'bɔ mbé tɛ mi gɔ, gbaa we hɔ ngba soe kɛ nɛ he sɛ mɔ na: ‘E kɔ Nwa Gale wele nu ɛ tɛ wele kɛ a tɛ tɛ do zu li a’ ni.”