MATIE 22 - WE NU GALE 1995

Gba we ngɔ dɛa mɔ dɔ ba ngba wi

¹ Nɛ Yezu tɔ̃a 'bɔ ombé gba we hã owinɔ na:

² “Nɛ zélé, dɛa to nwa 'da Gale ma wia kɔ̃ do lɛnggɛ 'da mbe nwa kpo, kɛ a 'dafa zi gã mɔ dɔ ba ngba wi, we duzu zagbãlã be 'da a.

³ Nɛ a tumba owi dɛa tonɔ 'da a na, wa nɛ́, kɔ wa sa mɔ hã owinɔ ɛ saka wa we mɔ dɔɛ ni. Nɛ wa nɛa, nɛ wa sa mɔ, nɛ nde winɔ ni wa kɔ̃̀ we tɛ nɛ gɔ.

⁴ Nɛ a tumba 'bɔ ombé wi dɛa to na, wa nɛ hã wa tɔ̃ hã winɔ ni na: ‘Mi 'dafa nyɔngɔmɛ ia, mi gbɛa owili ngɔmbɔ do osa'de dɛ nɔ, kɔ ma 'bɔ 'da wi nyɔngɔ nɛ iko. Kɔ nɛ tɛ we nɛ!’

⁵ Nɛ gɛnɛ kɔ wa zila sa mɛ ni, nɛ wa lènggè nɛ gɔ. Nɛ wele do wele la dɛ fala kɛ zã a kɔ̃a ni iko. Ombe wa la safɔ, nɛ ombe wa la we be golenɔ 'da wa.

⁶ Nɛ ombe wa kala owi dɛa tonɔ 'da nwa ni, nɛ wa zɛ wa gbaa, nɛ wa gbɛ wa.

⁷ Kɔ nwa ni nɛa we zele ní, nɛ zã a nɔ̃lɔ̃ wena, nɛ a tombo osodanɔ 'da a na, wa nɛ́, kɔ wa gbɛ́ winɔ ni vɛ̃, nɛ wa dɔ tɔanɔ 'da wa.

⁸ 'Do nɛ, nɛ a sa mɔ hã ombé gele wi dɛa tonɔ 'da a, nɛ a tɔ̃ hã wa na: ‘Wa 'dafa nyɔngɔmɛ ia, nɛ nde owinɔ kɛ mi sa mɔ hã wa ni, wa hɔ̀ wi kɛ wa nyɔngɔ ma gɔ.

⁹ Kɔ nɛ nɛ́ li gba walanɔ i, nɛ nɛ sa mɔ hã owinɔ vɛ̃ kɛ nɛ kpa sɛ wa ni, kɔ wa tɛ we nyɔngɔ mɛ.’

¹⁰ Nɛ owi dɛa tonɔ wa la, nɛ wa ngɛmɛ li owinɔ vɛ̃ kɛ wa kpa wa ni, odia wele, do o'dã wele, nɛ kɔ tɔa mɔ dɔɛ dunu.

¹¹ “Nɛ nwa ni lia kɔ tɔa i, we zɔ owinɔ kɛ wa tɛa we nyɔngɔ mɛ ni, nɛ a zɔ mbe wele kpo kɛ a hè'dè tulu ɛngga gɔ ni.

¹² Nɛ nwa ni aka a na: ‘Nyae, kɔdɛ kɛ mɔ lia i nga, nɛ nde mɔ hè'dè tulu ɛngga gɔ ni nɛ nde?’ Nɛ ma ba we nu wi ni do'do.

¹³ Nɛ nwa ni hã nu ɛ hã Owi tonɔ 'da a na: ‘Nɛ ɛ́nzɛ́ kɔ̃ a do nyanga a, kɔ nɛ dá a nza kɔ gba tũ, tɛ fala kɛ a he sɛ kɔ̃a, nɛ a nyɔngɔ li gogo a ni.’ ”

¹⁴ Nɛ Yezu tɔ̃ hã wa na: “Gale sa mɔ hã Owele wena, nɛ nde wanɔ a saka wa ni, wa dɛ̀lɛ̀ gɔ.”

Takoe 'da gã nwa ngɔ nu Roma

¹⁵ Nɛ Ofariziɛnɔ wa nɛa, nɛ wa mba li ngba wa, nɛ wa ba zã zu we, we le do ti nu Yezu, we ba a.

¹⁶ Nɛ wa tumba mbe winɔ 'da wa, do mbe winɔ 'da Herodɛ hã Yezu we aka a na: “Wi be mɔ, lɛ ĩ na, mɔ tɔ̃ gbãlã we fai, nɛ mɔ be tati a wala kɛ ma a bɔlɔ li Gale ni. Nɛ mɔ dɛ́ kili wele gɔ, nɛ mɔ sɔ́nzɔ́ do mɔ mɔ́ wele gɔ.

¹⁷ Kɔ mɔ tɔ̃́ hã lɛ sɛ! Mbula 'da lɛ kɔ̃a na, lɛ futa tako hã gã nwa ngɔ nù Roma, tabi lɛ tɛ fùtà gɔ nde?”

¹⁸ Nɛ nde Yezu ĩ sɔ ti 'dã hã 'da wa ia, nɛ a tɔ̃ hã wa na: “Nɛ, Owi ɔlɔ winɔ gɛ, gulu kɛ nɛ le ti nu mi we ge nde?

¹⁹ Nɛ bé mbe mbili kɛ wa futa do takoe ni hã mi sɛ!” Nɛ wa ba ma hã a.

²⁰ Nɛ a aka wa na: “Kɛ li mbili gɛ, mɛ a kpongbolo zu wio nde? Nɛ kɛ wa kɔma ti nɛ gɛ, mɛ a li wio nde?”

²¹ Nɛ wa gese hã a na: “Mɛ a kpongbolo zu gã nwa ngɔ nù Roma.” Nɛ Yezu tɔ̃ hã wa na: “Na mɛ ni, nɛ gésé mɛ 'da nwa ngɔ nù Roma hã a, nɛ nɛ hã́ kɛ 'da Gale tɛ mɛ 'bɔ hã Gale.”

²² Yezu nɛa we gese hã wa na mɛ ni, nɛ wa ɔngbɔ do ma wena. Nɛ wa la a dɛ di ni, nɛ wa si.

Wa aka Yezu ngɔ tunu kɔ fio

²³ Do kpo ngba soe ni, nɛ ombe Sadisiɛnɔ wa tɛa 'da Yezu. (Sadisiɛnɔ wa a owinɔ kɛ wa tɔ̃ na, wele fe ia, nɛ nde a túnú 'bɔ kɔ fio gɔ ni.) Nɛ wa aka a na:

²⁴ “Aa wi be mɔ, Mɔizɛ tɔ̃a zɛ́ na: ‘Fala kɛ wi wili fe, kɔ a kò be gɔ nde, nɛ ma wia na, nya a wele kɛ 'bana ni ba wuko olo a, takɔ a ko be hã a.’

²⁵ Kɔ mɔ zɔ́, ombe wi wili sambo, wa zi sanga lɛ gɛ, wa vɛ̃ a onya wi dɛ kɔ zã kpo. Nɛ kuti be ba wuko, nɛ a kò do a gɔ, nɛ a fe, nɛ a la wuke ni hã nya a.

²⁶ Nɛ nya a ba wuke ni, nɛ ma dɛ 'bɔ tɛ̃ ɛ ni. 'Do nɛ, nɛ ma dɛ 'bɔ tɛ̃ ɛ na mɛ ni we wele kɛ talɛ, ní do ní gbaa, nɛ ma kpa zu wa sambo ni vɛ̃.

²⁷ Nɛ 'do kɛ wa fia vɛ̃ ni, nɛ wuke fe tɛ mɛ 'bɔ.

²⁸ Ní a do ngba soe kɛ ofionɔ wa tunu sɛ kɔ fio ni, nɛ wuke ni sɛ a wuke 'da wio nde? We duzu kɛ wa vɛ̃ ni, wa zi a wili a!”

²⁹ Nɛ Yezu gisa hã wa na: “Nɛ yɔa, we duzu kɛ nɛ ĩ̀ ti 'Buki 'da Gale gɔ, nɛ nɛ ĩ̀ 'bɔ ti ngawi 'da a gɔ.

³⁰ Do ngba soe kɛ ofionɔ wa tunu sɛ kɔ fio ni, nɛ nde ba ngba wi sɛ bina, nɛ winɔ vɛ̃ wa ɔ sɛ nɛ oanzɛnɔ 'da Gale tɛ li nza i, kɛ wa bá ngba wa gɔɛ ni.

³¹ Nɛ tɔ̀lɔ̀ mbe we kɛ Gale tɔ̃a zɛ́ ma ngɔ ofionɔ, kɛ wa nɛ tunu sɛ kɔ fio ni gɔ nde? A tɔ̃a zɛ́ na,

³² ɛ a Gale 'da Abrahama, do Izaka do Yakɔbɔ. Ĩ na, Gale a Gale 'da ofio gɔ, nɛ nde a Gale 'da owinɔ wa do tunu li wa ni.”

³³ Nɛ gba gili winɔ wa zila we ni, wa ɔngbɔ do bia wenɔ 'da a wena.

Mbula kɛ ma nɛa ngɔ ngbɛ ɛ ni

³⁴ Ofariziɛnɔ wa nɛa we zele na Yezu kpia nu Osadisiɛnɔ ni, nɛ wa mba li ngba wa.

³⁵ Nɛ nde mbe sanga wa ni zi a wi be mbula, nɛ a kɔ̃a zi we aka Yezu we yamba a. Nɛ a aka Yezu na:

³⁶ “Wi be mɔ, mbula kɛ ma nɛa ngɔ ngbɛ ɛ ni a ki nge nde?”

³⁷ Nɛ Yezu gisa hã a na: “ ‘Mɔ kɔ̃́ gɛnɛ Nwa Gale 'da mɔ do sila mɔ vɛ̃, mɔ ha tɛ mɔ hã a, nɛ mɔ dɛ́ to hã a do hã zã 'da mɔ vɛ̃.’

³⁸ Mɔ zɔ́ mbula kɛ ma nɛa ngɔ ngbɛ ɛ vɛ̃ gɛ a ni.

³⁹ Nɛ bɔa mbula kɛ ma wia kɔ̃ do ki ni, mɛ a kɛ ma tɔ̃a na: ‘Mɔ kɔ̃́ gɛnɛ ngba mɔ ɔ nɛ kɛ mɔ kɔ̃a do gɛnɛ kili tɛ mɔ wele nɛ ni.’

⁴⁰ Nɛ mbulanɔ 'da Mɔizɛ vɛ̃, do bia wenɔ 'da owi gba olo nu Gale vɛ̃, ma yula dɛ ngɔ mbulanɔ bɔa ni.”

Mɛsiya nɛa ngɔ Davidi

⁴¹ 'Da fala kɛ Ofariziɛnɔ wa mba li ngba wa, nɛ Yezu aka wa na:

⁴² “Nɛ lengge na, Mɛsiya a wio nde? A a be zã wio nde?” Nɛ wa gisa hã a na: “A a be zã Davidi.”

⁴³ Nɛ Yezu tɔ̃ hã wa na: “Kɔ gulu kɛ 'da fala Hi Wi Santo lia zɛ́ kɔ Davidi, nɛ a sa zɛ́ li Mɛsiya na Nwa ni we ge nde? Davidi tɔ̃a zɛ́ na:

⁴⁴ ‘Nwa Gale tɔ̃a hã Nwa 'da mi na, Mɔ tɛ́, hã mɔ dúngú tɛ ngɔ ngawili kɔ̃ mi, kɔ mi a owi sɛnɛ mɔ nù ti nyanga mɔ.’

⁴⁵ Kɔ Davidi ngboo sa zi li Mɛsiya na, a a Nwa 'da ɛ ni, nɛ kɔdɛ kɛ Mɛsiya nɛ ɔ tati a be zã Davidi iko ni nɛ nde?”

⁴⁶ Nɛ wele kpo wè zi we gese nu nɛ hã a gɔ. Nɛ ndo do ngba soe ni, mbé wele zi 'bɔ do ngawi we aka Yezu do lɛnggɛ bina.