MATIE 21 - WE NU GALE 1995

Yezu lia kɔ le Yeruzalɛmɛ

¹ Wa nɛa we kɔlɔ do Yeruzalɛmɛ, nɛ wa hɔ tɛ le Bɛtfaze, kɛ ma ti nyanga kala Olivɛ ni. Nɛ Yezu sa mɔ hã owi yambala mɛnɔ 'da a bɔa, nɛ a tɔ̃ hã wa na:

² “Nɛ nɛ́ kɔ le dati gɛ, nɛ nɛ kpa sɛ naa punda kpo, nɛ nde wa kpua a kpua, kɔ be punda dɛ kɛ zã a ni. Nɛ nɛ yálá wa te do wa hã mi.

³ Kɔ fala kɛ wele aka nɛ, nɛ nɛ gésé hã a na, wi tumba we wa wi a Nwa, nɛ a gese sɛ wa dɔ̃ iko.”

⁴ Ma la na mɛ ni, takɔ we kɛ wi gba olo nu Gale tɔ̃a zɛ́ ni, ma dɛ tɛ̃ ɛ.

⁵ A tɔ̃a zɛ́ na: “Nɛ tɔ̃́ hã owinɔ kɔ le Sioni na, nɛ zɔ́ Nwa 'da nɛ, a tɛ tɛ dɛ 'da nɛ, a ba tɛ̃ a dɛ nù, nɛ a kũ ngɔ be punda.”

⁶ Nɛ owi yambala mɛnɔ wa nɛa, nɛ wa dɛ ɔ nɛ kɛ Yezu tɔ́a hã wa ni.

⁷ Nɛ wa tɛa do be punda do naa a, nɛ wa kala gba tulunɔ 'da wa, nɛ wa gu li 'do wa, nɛ Yezu dungu dɛ ngɔ nɛ.

⁸ Nɛ ogba gili winɔ wa ma ngɔ a gba tulunɔ 'da wa dɛ ngɔ wala. Nɛ ombe wa gbini nwá te, nɛ wa ma ngɔ a li wala dati a.

⁹ Nɛ gba gili winɔ wa la dati, nɛ ombe wa kpe do 'do Yezu, nɛ wa he mɔ na: “Hozana, Be 'da Davidi kpá dɔ̃lɔ̃ li! E kɔ Nwa Gale wele nu ɛ tɛ wi kɛ a tɛ do zu li a ni. Hozana! Gale kɛ a li nza i ni kpá dɔ̃lɔ̃ li!”

¹⁰ Kɔ Yezu lia kɔ le Yeruzalɛmɛ, nɛ owinɔ vɛ̃ wa ma ngɔ dɛ tu tu tu, nɛ wa aka na: “Ki a wio nde?”

¹¹ Nɛ ombe wa gese hã winɔ ni na: “Wi a Yezu, wi gba olo nu Gale. A yula Nazarɛtɛ, tɛ ngɔ nù Galile.”

Yezu nɛa kɔ Tɛmpɛlo

¹² Yezu nɛa, nɛ a le kɔ tɔa Tɛmpɛloe i, nɛ a kpa owinɔ wa be golenɔ 'da wa di ni ni, mba do Owi oso golenɔ, nɛ a ndaka wa dɛ nza. Nɛ a ili mɛsanɔ 'da Owi kpolo mbilinɔ, do mɔ dungu 'da Owi be gole pizɔ̃nɔ, nɛ a fi ma nù.

¹³ Nɛ a tɔ̃ hã wa na: “Wa kɔma olo nu Gale kɔ 'Buki na: ‘Wa sa sɛ li tɔa 'da mi na, mɛ a tɔa dɔnggɔ do mi.’ Nɛ nde nɛ, nɛ kifi ma do fala usu tɛ wi mɔ́ owi zũ.”

¹⁴ Nɛ owi lɔa linɔ, do Owi nɛa kunɔ wa tɛa 'da Yezu dɛ kɔ Tɛmpɛlo ni, nɛ a kpasa wa tɛ zɛlɛmɛnɔ 'da wa vɛ̃.

¹⁵ Nɛ onwa nganganɔ, do Owi be mbulanɔ, wa zɔa ɔngbamɛnɔ kɛ Yezu dɛa, nɛ wa zele kɛ obenɔ wa tɛ he mɔ kɔ Tɛmpɛloe na: “Hozana, Be 'da Davidi kpá dɔ̃lɔ̃ li” ni, nɛ zã wa nɔ̃lɔ̃ wena.

¹⁶ Nɛ wa aka Yezu na: “Mɔ zele wenɔ wa tɔ̃ ni zila nde?” Nɛ Yezu gisa hã wa na: “Ĩi, mi zi zila, ní nɛ nde nɛ tɔ̀lɔ̀ mbe wenɔ gɛ kɔ 'Buki 'da Gale gɔ nde? Wa kɔma na: ‘Gale dɛa na, obenɔ do onzɔ benɔ wa dɔnggɔ ɛ.’ ”

¹⁷ Nɛ a la wa dɛ di ni, nɛ a yolo Yeruzalɛmɛ, nɛ a la dɛ Betani we ɔ i mɔ.

Yezu fɔmba te figɛ

¹⁸ Fala nɛa we sa nɛ, nɛ Yezu ma ngɔ kpolo tɛ̃ a dɛ Yeruzalɛmɛ nga, nɛ wɔ ba zi a wena.

¹⁹ Nɛ a ka mɔ, nɛ a zɔ te figɛ kɛ zã li wala, nɛ a nɛ we fa wala nɛ. Kɔ a nɛa we kɔlɔ do ma, nɛ nde fo wala nɛ bina, mɛ tati a nwá nɛ iko. Nɛ a fɔmba te ni na: “Mɔ te gɛ, mɔ wálá sɛ 'bɔ mbé nɛ li nù gɛ gɔ!” Nɛ te ni kolo ngaɔɔ do ti.

²⁰ Kɔ owi yambala mɛnɔ wa nɛa we zɔ ní, nɛ wa ɔngbɔ do ma wena. Nɛ wa aka Yezu na: “Gulu kɛ te figɛ gɛ kula dɔ̀ ní we ge nde?”

²¹ Nɛ Yezu gisa hã wa na: “Mi tɔ̃ hã nɛ do gbãlã we na, fala kɛ nɛ do kɔ̃a we dɛ 'da Gale, kɔ nɛ ɔ̀ do kafi kɔ sila nɛ gɔ, nɛ nɛ wia we dɛ mɛ mi dɛa ma do te gɛ. Nɛ nɛ dɛ́ sɛ tati a ki ni iko gɔ, nɛ nde nɛ wia we tɔ̃ 'bɔ hã kala gɛ na: ‘Mɔ fó tɛ mɔ dɛ do'do, kɔ mɔ té 'dɔ gba lì,’ nɛ ma dɛ sɛ tɛ̃ ɛ na mɛ ni.

²² Fala kɛ nɛ ɔ do kɔ̃a we dɛ 'da Gale, nɛ nɛ kpa sɛ mɛnɔ kɛ nɛ aka we nɛ kɔ sambala 'da nɛ ni.”

Yezu kpa ngawi dɛa to nwa 'da a do nde?

²³ Nɛ Yezu lia 'bɔ kɔ Tɛmpɛloe, nɛ a tɛ be we. Nɛ onwa nganganɔ do okumunɔ wa tɛa, nɛ wa aka a na: “Mɔ dɛ mɛnɔ gɛ do ngawi 'da wio nde? Wi tumba mɔ we dɛ ma a wio nde?”

²⁴ Nɛ Yezu gisa hã wa na: “Mi kɔ̃a tɛ mɛ 'bɔ we aka nɛ do we kpo. Kɔ nɛ gese nu nɛ hã mi do'do, sɛ nɛ mi sa sɛ li wi kɛ a tumba mi we dɛ mɛnɔ gɛ hã nɛ de.

²⁵ Mi aka nɛ na, wi tumba zi Yoanɛ, wi batisa winɔ a wio nde? Wi zi a Gale, tabi wi zi a Owele nde?” Nɛ wa ma ngɔ tɔ̃ dɛ sanga tɛ ngba wa na: “Fala kɛ lɛ gese na: ‘Wi zi a Gale a tumba a,’ nɛ a tɔ̃ sɛ hã lɛ na: ‘Kɔ gulu kɛ nɛ kɔ̃̀ zi gɛnɛ a gɔ we ge nde?’

²⁶ Kɔ lɛ gese 'bɔ na: ‘Wi zi a Owele hã wa tumba a,’ nɛ ma wé sɛ gɔ. Mba gɔ, lɛ dɛ kili gba gili winɔ, we kɛ wa zɔ Yoanɛ ɔ nɛ wi gba olo nu Gale ni.”

²⁷ Na mɛ ni, nɛ wa gisa hã Yezu na: “Lɛ ĩ̀ gɔ.” Nɛ a tɔ̃a hã wa na: “Ní a mi tɔ̃́ sɛ tɛ mɛ 'bɔ li wi kɛ a tumba mi we dɛ mɛnɔ gɛ ni hã nɛ gɔ.”

Gba we ngɔ obulu be bɔa

²⁸ Nɛ Yezu tɔ̃ 'bɔ hã wa na: “Nɛ lengge na ge nde? Mbe wele kpo, a zi do obulu be bɔa. Nɛ a nɛa, nɛ a tɔ̃ hã kuti be na: ‘Be 'daa, sɔɛ gɛ mɔ nɛ́ we dɛ to kɔ fɔ vinɔ i.’

²⁹ Nɛ be ni gisa na, ɛ nɛ́ sɛ gɔ. Nɛ 'da kala gɔ, nɛ a kpolo linggamɛ 'da a, nɛ a la safɔ i.

³⁰ 'Do nɛ, nɛ baa wa nɛa 'bɔ, nɛ a tɔ̃ kpo we ni hã bɔa wele kɛ. Nɛ wele ki ni gisa hã baa ɛ na: ‘Ĩi, mi nɛ sɛ!’ Nɛ a nɛ̀ gɔ.

³¹ Kɔ sanga wa bɔa ni, wi dɛa olo nu baa ɛ, wi a wele ki nge nde?” Nɛ wa gese na: “Wi a kuti be.” Nɛ Yezu tɔ̃ hã wa na: “Mi tɔ̃ hã nɛ do gbãlã we na, owi futa takonɔ, do owuko vĩ zunɔ wa hɔ sɛ kɔ le nwa 'da Gale dati hã nɛ.

³² We duzu kɛ Yoanɛ tɛa, nɛ a bia bɔlɔ wala hã nɛ, nɛ nɛ kɔ̃̀ zi gɛnɛ a gɔ. Nɛ nde Owi futa takonɔ, do owuko vĩ zunɔ wa kɔ̃a gɛnɛ a. Nɛ gɛnɛ kɔ nɛ zɔa ní, nɛ nde nɛ kìfì sila nɛ, kɔ nɛ kɔ̃ gɛnɛ a gɔ.”

Gba we ngɔ Owi dɛ to fɔ

³³ “Nɛ zélé 'bɔ mbé gba we gɛ. Mbe wele kpo, a wa zi fɔ mɔ́ a, nɛ a mi do vinɔ. Nɛ a dɛ ngbo dɛ tɛ nɛ vɛ̃, nɛ a zã kɔ̃ we kpĩlĩ wala vinɔnɔ dɛ kɔ nɛ, nɛ a dɛ 'bɔ gba'da dɛ nu fɔɛ we zɔ do mɔ tɛ nɛ. Nɛ 'do nɛ, nɛ a e to fɔɛ ni dɛ kɔ̃ Owi dɛa tonɔ na, wa dɛ, nɛ lo gɔnɔ sanga wala nɛ do wa. Nɛ a la gɛnɛ.

³⁴ “Kɔ ma hɔa ngba soe 'bi wala nɛ, nɛ a tombo ombe wi dɛa tonɔ 'da a hã owi dɛ to fɔɛ ni na, wa kala kɛ 'da ɛ si do ma hã ɛ.

³⁵ Kɔ owi dɛa tonɔ ni wa nɛa we hɔ i mɔ, nɛ wa kala wa, nɛ wa zɛ mbe kpo, nɛ wa gbɛ mbe kpo, nɛ wa lo mbe do ta, nɛ wa gbɛ 'bɔ a.

³⁶ Nɛ wele fɔɛ tumba 'bɔ gba dɔa Owi to nɛa ngɔ wanɔ sɔ dati ni. Nɛ owi dɛ to fɔɛ ni wa dɛ do wa ɔ nɛ kɛ 'da wanɔ sɔ dati ni.

³⁷ Nɛ do sɔkpɔ nɛ vɛ̃, nɛ a tombo be 'da a hã wa, nɛ a tɔ̃ na, fala kɛ wa zɔ be 'da ɛ, nɛ wa dɔnggɔ sɛ a.

³⁸ Kɔ owi dɛ to fɔɛ wa nɛa we zɔ be 'da a, nɛ wa ma ngɔ tɔ̃ dɛ sanga tɛ ngba wa na: ‘Nɛ zɔ́ be wele fɔɛ, kɛ a ba sɛ fɔɛ olo baa a ni, a a i mɔ ni. Lɛ nɛ́, kɔ lɛ gbɛ́ a, nɛ lɛ ba sɛ fɔɛ gɛ do mɔ́ lɛ!’

³⁹ Nɛ wa gbɔtɔ a, nɛ wa da a kɔ fɔɛ dɛ nza, nɛ wa gbɛ a.”

⁴⁰ Nɛ Yezu aka wa na: “Kɔ wele fɔɛ ni hɔ, nɛ a dɛ sɛ do Owi dɛ tonɔ ni nɛ nde?”

⁴¹ Nɛ wa gese hã a na: “A zɛlɛ sɛ tɛ o'dã winɔ ni wena, nɛ a gbɛ sɛ wa, nɛ a ba fɔɛ, nɛ a hã ma hã ogele owi dɛa to, kɛ wa hã sɛ owala te hã a do li zɔlɔ nɛ ni.”

⁴² Nɛ Yezu tɔ̃ hã wa na: “Nɛ tɔ̀lɔ̀ mbe we kɛ wa kɔma kɔ 'Buki 'da Gale ni gɔ nde? Wa kɔma na: ‘Ta kɛ owi dɛ tɔanɔ wa da zi ma nù ni, ma hɔa ta bɛlɛduma tɔa. Wi dɛa mɛ ni, wi a Nwa Gale, nɛ mɛ a ɔngbamɔ gbali lɛ.’ ”

⁴³ Ma kɛ Yezu tɔ̃a 'bɔ mbé nɛ na: “Mi tɔ̃ hã nɛ do gbãlã we na, Gale a ba sɛ le nwa 'da a kɔ̃ nɛ, nɛ a hã ma hã ombé gele wele, kɛ wa dɛ sɛ de dɛa to we duzu le nwa ni. [

⁴⁴ Kɔ wi kɛ a te ngɔ ta ni, nɛ sanga a ma 'bili sɛ. Kɔ fala kɛ ta ni te ngɔ wele, nɛ ma mbɔtɔ sɛ a.”]

⁴⁵ Kɔ onwa nganganɔ do Ofariziɛnɔ wa nɛa we zele gba we Yezu tɔ̃a ni, nɛ wa ĩ na, a tɔ̃a we ni hã lo,

⁴⁶ nɛ wa ma ngɔ fa wala we ba a. Nɛ nde wa dɛa kili ba a we ogba gili winɔ. Mba gɔ, owinɔ wa zɔ Yezu ɔ nɛ wi gba olo nu Gale ni.