MATIE 19 - WE NU GALE 1995

Bia we 'da Yezu ngɔ bɛ̃ ngba wi

¹ Yezu wila wenɔ ni do'do, nɛ a yolo ngɔ nù Galile, nɛ a la dɛ ngɔ nù Yude, kɛ mbee kuli lì Yɔrdanɛ i ni.

² Nɛ gba gili Owele wa nɛa 'do a, nɛ a kpasa wa tɛ zɛlɛnɔ 'da wa.

³ Nɛ ombe Fariziɛnɔ wa tɛa 'da a, takɔ wa yamba a, nɛ wa aka a na: “Mbula 'da lɛ hã wala hã wele na, a bɛ̃ kɛnɛ a we gele 'dã mɔ vɛ̃ iko nde?”

⁴ Nɛ Yezu gisa hã wa na: “Nɛ tɔ̀lɔ̀ mbe kɛ wa kɔma zɛ́ ma kɔ 'Buki ni gɔ nde? Wa kɔma na, ndo nyanga mɛnɔ vɛ̃, nɛ Gale dɛa zɛ́ wi wili do wuko.

⁵ Nɛ Gale tɔ̃a na: ‘Ma kɛ wi wili a la sɛ tɔa 'da baa a do naa a, nɛ wa mba do kɛnɛ a. Nɛ wa bɔa ni wa hɔ sɛ kili tɛ wele kpo.’

⁶ Na mɛ ni, wa 'bɔ a Owele bɔa gɔ, nɛ nde wa hɔa kili tɛ wele kpo iko. Kɔ ma wè na, wele gɔnɔ sanga winɔ kɛ Gale mba li wa ni gɔ.”

⁷ Nɛ Fariziɛnɔ wa aka 'bɔ a na: “Kɔ gulu kɛ Mɔizɛ hã zɛ́ nu ɛ na, wi wili e mbɛti bɛ̃ ngba wi kɔ̃ kɛnɛ a, sɛ nɛ a gese a de ni we ge nde?”

⁸ Nɛ Yezu gisa hã wa na: “Mɔizɛ hã zɛ́ mbula ni hã nɛ, we duzu kɛ nɛ a wi nga sila. Nɛ nde ndo do kɛ Gale dɛa zɛ́ do mɛnɔ vɛ̃ ni, ma ɔ̀ zɛ́ na mɛ ni gɔ.

⁹ Nɛ nde mi tɔ̃ hã nɛ na, wi kɛ a bɛ̃ kɛnɛ a, kɔ ma ɔ̃ we kɛ wuke yɛnggɛ vĩ zu yali dɛ kɔ̃ a gɔ, kɔ a ba mbé wuko, nɛ nde a yɛnggɛ vĩ zu yali do wuke ni.”

¹⁰ Nɛ owi yambala mɛnɔ 'da a wa tɔ̃ hã a na: “Nɛ́ kɛ we 'da wi wili do wuko ma ɔ na mɛ ni, ma wè na wele ba wuko gɔ.”

¹¹ Nɛ Yezu tɔ̃ hã wa na: “We gɛ ma wè do winɔ vɛ̃ gɔ, ma wia tati a do wanɔ kɛ Gale hã ngawi nɛ hã wa ni.

¹² Mba gɔ, mɔ kɛ wele wè tɛ ba wuko gɔ we nɛ ni, ma dɛlɛ wena. Mbe nɛ wa kua wa, nɛ nde wa do ngawi ɔ ngu'du wuko bina. Nɛ mbee nɛ tɛ mɛ 'bɔ wa hɔlɔ wa hɔla. Nɛ ombe nɛ wa kɔ̃̀ we ba wuko gɔ, we dɛ to nwa 'da Gale. Kɔ wi kɛ bia we gɛ wia do a ni, nɛ a kɔ̃́ gɛnɛ nɛ!”

Yezu wila nu ɛ tɛ obe

¹³ Nɛ Owele wa tɛa do benɔ 'da wa hã Yezu na, a e kɔ̃ a ngɔ wa, nɛ a sambala Gale na, a wele nu a tɛ wa. Nɛ owi yambala mɛnɔ wa ma ngɔ o dã zu winɔ ni na, gulu kɛ wa tɛ do benɔ we ge nde?

¹⁴ Nɛ Yezu tɔ̃ hã wa na: “Nɛ tɛ gà benɔ we tɛ 'da mi nga gɔ. Nɛ lá wa kɔ wa tɛ, we duzu kɛ le nwa 'da Gale ma we winɔ kɛ sila wa ɔ nɛ sila benɔ gɛ ni.”

¹⁵ Nɛ a a kɔ̃ a ngɔ wa, nɛ a wele nu a tɛ wa. 'Do nɛ, nɛ a la dɛ gele fala.

Wi kpamɔ kpo aka Yezu

¹⁶ Nɛ mbe wele kpo tɛa 'da Yezu, nɛ a aka a na: “Aa wi be mɔ, dia mɛ mi wia tɛ dɛ nɛ, takɔ mi kpa kpasi kɛ ma é sɛ gɔ ni a ge nde?”

¹⁷ Nɛ Yezu aka a na: “Gulu kɛ mɔ aka mi ngɔ mɔ kɛ ma a dia ni we ge nde? Dia wi, wi a Gale zu a kpo. Kɔ fala kɛ mɔ kɔ̃ we kpa kpasi, nɛ mɔ dɛ́ mbulanɔ.”

¹⁸ Nɛ wi ni aka a na: “Mbula ki nge nde?” Nɛ Yezu gese hã a na: “Mɔ tɛ gbɛ wi gɔ, mɔ tɛ ɔ̃ do wili tabi wuko mɔ ngba mɔ gɔ, mɔ tɛ zṹ mɔ gɔ, mɔ tɛ 'bìlì bɛlɛ do zu li ngba mɔ gɔ.

¹⁹ Mɔ dɔ́nggɔ́ baa mɔ do naa mɔ, nɛ mɔ kɔ̃́ gɛnɛ ngba mɔ ɔ nɛ kɛ mɔ kɔ̃a do kili tɛ mɔ wele nɛ ni.”

²⁰ Nɛ zagbãlã ni gese na: “Mi dɛa zi mbulanɔ ni vɛ̃ ia, kɔ mɛ ma zɔla mi ni a ge nde?”

²¹ Nɛ Yezu tɔ̃ hã a na: “Fala kɛ mɔ kɔ na, mɔ we ngboo nde, nɛ mɔ sí, kɔ mɔ bé gole kpamɛnɔ 'da mɔ vɛ̃, nɛ mɔ kɛ̃́ mbuli nɛ hã Owi sãnɔ, nɛ mɔ kpa sɛ mbé kpamɔ tɛ li nza i. Nɛ mɔ kpóló tɛ mɔ, nɛ lɛ yɛnggɛ do mɔ.”

²² Kɔ be zagbãlã nɛa we zele ní, nɛ a dɛ zɔlɛɛ, nɛ a la do 'bako, we kɛ a zi do kpamɔ wena.

²³ 'Do nɛ, nɛ Yezu tɔ̃ hã Owi yambala mɛnɔ 'da a na: “Mi tɔ̃ hã nɛ do gbãlã we na, we le kɔ le nwa 'da Gale ma nganda sɛ do wi kpamɔ wena.

²⁴ Nɛ mi tɔ̃ 'bɔ na, nɛ zɔ́ gã sa'de ɔ nɛ samo. Takɔ a le li holo tonga ma nganda wena. Nɛ nde takɔ wi kpamɔ le kɔ le nwa 'da Gale, ma nganda nɛa ngɔ ki ni.”

²⁵ Kɔ Owi yambala mɛnɔ wa nɛa we zele ní, nɛ wa ɔngbɔ do ma wena, nɛ wa ma ngɔ tɔ̃ na: “Na mɛ ni, wi wia sɛ we kpasa nɛ a wio nde?”

²⁶ Nɛ Yezu ka mɔ tɛ wa, nɛ a tɔ̃ hã wa na: “Owele wa wè tɛ kpasa do ngawi 'da wa wele nɛ gɔ. Nɛ nde Gale wia we dɛ mɛnɔ vɛ̃.”

²⁷ Nɛ Petro aka Yezu na: “Mɔ zɔ́, kɛ lɛ la mɛnɔ 'da lɛ vɛ̃, kɔ lɛ yɛnggɛ do mɔ gɛ! Mɛ lɛ nɛ kpa sɛ olo nɛ ni a ge nde?”

²⁸ Nɛ Yezu gisa hã wa na: “Mi tɔ̃ hã nɛ do gbãlã we na, 'da fala kɛ omɛnɔ vɛ̃ ma kifi sɛ mbé nɛ ni, nɛ mi Be 'da Wele, mi dungu sɛ ngɔ kpongbo nwa tɛ fala dɔ̃lɔ̃ li, nɛ nɛ 'bu ngɔ nɛ bɔa kɛ lɛ yɛnggɛ do nɛ gɛ, nɛ dungu sɛ tɛ mɛ 'bɔ ngɔ kpongbo nwa 'bu ngɔ nɛ bɔa we 'bili we 'da onu kpala obe Israɛlɛ 'bu ngɔ nɛ bɔa ni.

²⁹ Wi kɛ a la tɔa 'da a, do onya a, do baa a, do naa a, do obenɔ 'da a, do fɔnɔ 'da a we duzu mi, nɛ a kpa sɛ mbé mɔ fala kama nɛ ngɔ kɛ a zi do ma dati ni. Nɛ do 'do, nɛ a kpa sɛ kpasi kɛ ma é gɔ ni fai.

³⁰ Nɛ gba gili winɔ kɛ wa sɔɛ gɛ a owi dati ni, wa sɛ a Owi ngɔ go'do. Nɛ gba gili wanɔ kɛ wa a Owi ngɔ go'do ni, wa sɛ a owi dati.”