MATIE 17 - WE NU GALE 1995

Tɛ Yezu kifi dɛ li owi yambala mɛnɔ

¹ 'Do nɛ la tũ gazɛlɛ, nɛ Yezu kala ombe wi yambala mɛnɔ 'da a talɛ, Petro, Zake, do Yoanɛ nya Zake, nɛ a kũ do wa dɛ zu mbe ngala kala kpo, tati a wa iko.

² Wa hɔa i mɔ, nɛ tɛ Yezu kifi dɛ li wa. Nɛ bula li a ma ngɔ to ɔ nɛ wese ni, nɛ tulu tɛ̃ a ndele kpala kpala kpala.

³ Nɛ owi yambala mɛnɔ talɛ ni wa nɛ ka mɔ, nɛ wa zɔ Mɔizɛ do Elia, nɛ nde wa tɛ wele we do Yezu.

⁴ Kɔ Petro nɛa we zɔ ní, nɛ a tɔ̃ hã Yezu na: “Nwa, fala gɛ de wena, lɛ 'báná dɛ dɛ iko. Fala kɛ mɔ kɔ̃, nɛ mi dɛ kɔnggɔ talɛ, kɛ 'da mɔ, kɛ 'da Mɔizɛ, do kɛ 'da Elia.”

⁵ Kɔ a 'bana tɛ tɔ̃ we ni, nɛ gba fɛ̃a kutu tɛa, nɛ ma lɔ'ba wa, nɛ wala gɛlɛ wele wila dɛ kɔ kuti ni na: “Wele kɛ gɛ a Be 'da mi, kɛ a ngɔ sila mi, nɛ mi do yangga wena we a. Nɛ zélé a!”

⁶ Kɔ owi yambala mɛnɔ wa nɛa we zele we ni, nɛ kili ba wa wena, nɛ wa gu li wa nù.

⁷ Nɛ Yezu tɛa, nɛ a yaka wa, nɛ a tɔ̃ hã wa na: “Nɛ kúlú ngɔ! Nɛ tɛ dɛ kili gɔ.”

⁸ Nɛ wa ba li wa ngɔ, nɛ wa zɔ̀ 'bɔ gele wele gɔ, wa zɔa tati a Yezu iko.

⁹ Kɔ wa ma ngɔ zĩlĩ kala, nɛ Yezu dala nu ɛ hã wa nganda wena na: “Dɔ nɛ tɔ̃́ we mɛ kɛ nɛ zɔa ni hã wele gɔ, gbaa ndɔti nɛ a kɛ mi Be 'da Wele, mi za'da nza kɔ fio do'do sɛ nɛ de.”

¹⁰ 'Do nɛ, nɛ owi yambala mɛnɔ wa aka Yezu na: “Gulu kɛ Owi be mbulanɔ wa tɔ̃ na, Elia a tɛ sɛ dati, sɛ nɛ Mɛsiya tɛ de ni we ge nde?”

¹¹ Nɛ a gese hã wa na: “Mɛ a gbãlã we na, Elia a tɛ sɛ dati we 'dafa mɛnɔ vɛ̃.

¹² Kɔ mi tɔ̃ hã nɛ na, Elia tɛa zi ia, nɛ nde winɔ wa ĩ̀ zi ti a gɔ, nɛ wa zɛlɛ zi tɛ̃ a ɔ nɛ kɛ zã wa kɔ̃a ni. Nɛ wa zɛlɛ sɛ tɛ mɛ 'bɔ tɛ mi Be 'da Wele, kpasaa na mɛ ni.”

¹³ Nɛ owi yambala mɛnɔ wa ĩ na, a tɔ̃a we 'da Yoanɛ wi batisa winɔ.

Yezu ndaka 'dã hi wi kɔ be

¹⁴ Wa nɛa we hɔ tɛ fala gba gili winɔ wa nɛ ni, nɛ mbe wele kpo tɛa, nɛ a gu nù ti Yezu.

¹⁵ Nɛ a tɔ̃ hã a na: “Nwa, mɔ ĩ́ 'bako hã bulu be 'da mi, a do zɛlɛ tindili, nɛ ma hã ngamɔ hã a wena. Ma ma ngɔ dɛ a ia, nɛ ma fi a li we, tabi 'dɔ lì.

¹⁶ Mi tɛa do a hã owi yambala mɛnɔ 'da mɔ, nɛ nde wa wè we kpasa a gɔ.”

¹⁷ Nɛ Yezu tɔ̃ na: “O! Aa nɛ 'dã winɔ gɛ! Gulu kɛ nɛ do kɔ̃a we dɛ 'da Gale bina we ge nde? Mi 'bana sɛ 'bɔ do nɛ gbaa soe ki nge nde? Mi kunu sɛ sila mi dɛ tɛ nɛ fai nde? Nɛ tɛ́ do be hã mi!” Nɛ wa tɛa do be hã a.

¹⁸ Nɛ Yezu dãlã dɛ tɛ 'dã hi wi kɔ be ni, nɛ 'dã hi wi hɔa nza, nɛ be kpasa do ti.

¹⁹ Nɛ owi yambala mɛnɔ wa tɛa tati a wa iko, nɛ wa aka Yezu na: “Gulu kɛ lɛ wè sɔ we fo 'dã hi wi kɔ be ni gɔ we ge nde?”

²⁰ Nɛ Yezu gese hã wa na: “We kɛ nɛ do kɔ̃a we dɛ 'da Gale ngboo bina. Mi tɔ̃ hã nɛ do gbãlã we na, fala kɛ nɛ sɔ do kɔ̃a we dɛ 'da Gale ɔ nɛ be gbãlã mutardɛ ni, nɛ nɛ tɔ̃ sɔ hã kala gɛ na, ma fó tɛ̃ ɛ dɛ do'do, kɔ ma lá dɛ gele fala. Nɛ ma fo sɔ tɛ̃ ɛ na mɛ ni. Nɛ mɔ kɛ ma wia sɔ tɛ gana nɛ ni bina. [

²¹ We fo 'dã hi wi ɔ nɛ wele ki ni dɛ nza, ma wia tati a do sambala Gale do bɛ̃ nyɔngɔmɔ.”]

Yezu tɔ̃a 'bɔ we fie do za'da nza kɔ fie 'da a

²² Mbe ngba soe kpo, nɛ owi yambala mɛnɔ vɛ̃ wa mba ngba wa tɛ Galile. Nɛ Yezu tɔ̃ hã wa na: “Wa 'dɔlɔ sɛ mi Be 'da Wele hã Owele,

²³ nɛ wa gbɛ sɛ mi. Kɔ ma hɔ tɛ talɛ tũi, nɛ mi za'da sɛ nza kɔ fio.” Kɔ owi yambala mɛnɔ wa nɛa we zele ní, nɛ 'bako ba li wa wena.

Tɛlɛ tɛ kɛ Yezu futa tako Tɛmpɛlo

²⁴ Mbe ngba soe kpo, nɛ Yezu do owi yambala mɛnɔ 'da a wa hɔa Kafarnaumɛ, nɛ owi futa tako Tɛmpɛlo wa tɛa, nɛ wa aka Petro na: “Nwa 'da nɛ futa tako Tɛmpɛloe futa nde?”

²⁵ Nɛ Petro gese hã wa na: “Ĩi, a fu futa.” Kɔ Petro nɛa we le dɛ kɔ tɔa i, nɛ Yezu aka a dati na: “Simɔ, mɔ lengge na, wi wia tɛ futa takoe 'da Onwanɔ ngɔ nù gɛ, wi a wio nde? Wi a obe wele lenɔ ngboo, tabi ogɛnɛnɔ nde?”

²⁶ Nɛ Petro gese hã a na: “Wi a ogɛnɛnɔ.” Nɛ Yezu tɔ̃ hã a na: “Na mɛ ni, lɛ obe wele lenɔ, lɛ wè tɛ futa ma gɔ.

²⁷ Nɛ nde ma wè na, lɛ 'danga sila winɔ gɛ gɔ. Kɔ mɔ nɛ́ 'dɔ lì i, hã mɔ da galĩ, nɛ kɔyɛ kɛ mɔ nɛ da a dati ni, nɛ mɔ 'bã nu a, nɛ mɔ kpa sɛ gbãlã mbili kɔ nu a. Nɛ mɔ ba ma, nɛ mɔ hã hã wa, we futa do takoe zu lɛ do mɔ.”