MATIE 16 - WE NU GALE 1995

Yezu bɛ̃a we dɛ gba sɔ̃ mɔ hã Fariziɛnɔ do Sadisiɛnɔ

¹ Mbe gba soe kpo, nɛ Ofariziɛnɔ do Osadisiɛnɔ wa tɛa 'da Yezu, we yamba a. Nɛ wa aka a na, a dɛ́ mbe gba sɔ̃ mɔ kpo hã lo we be na, ngawi 'da a yula 'da Gale ni.

² Nɛ Yezu gisa hã wa na: “'Da fala kɛ wese ma ngɔ le nù ni, nɛ yele ngbala ma hɔ tɛ li nza, nɛ nɛ tɔ̃ na: ‘Kolo tɛ́ sɛ gɔ.’

³ Kɔ do titole belee, hã nɛ zɔ tũ kolo, nɛ nɛ tɔ̃ na: ‘Kolo ma tɛ sɛ sɔɛ gɛ.’ Kɔ nɛ́ kɛ nɛ wia we ĩ ti gulu mɛnɔ ma dɛ tɛ̃ ɛ tɛ li nza i ni, nɛ nɛ wè we ĩ ti gulu kɛnɔ ma dɛ tɛ̃ ɛ do ngba soenɔ gɛ gɔ ni we ge nde?

⁴ Winɔ kikina gɛ, wa a o'dã wele, nɛ wa kɔ̃̀ 'bɔ gɛnɛ Gale gɔ! Wa kɔ̃a we zɔ gba sɔ̃ mɔ we ĩ na, mi yula 'da Gale nde. Nɛ nde wa zɔ́ sɛ gele gba sɔ̃ mɔ gɔ, ma 'bana sɛ do kɛ zɛ́ 'da fala 'da Yonasi ni iko.” Nɛ a ia wa dɛ di ni, nɛ a la dɛ gele fala.

Bia we 'da Fariziɛnɔ ma ɔ nɛ ina hana mapa ni

⁵ 'Da fala Owi yambala mɛnɔ wa tɛ kũ dɛ kulu gba ndɔɛ i ni, nɛ wa zɔa na, ta zu lo ila ngɔ kala mapanɔ 'da lo do'do.

⁶ Nɛ Yezu tɔ̃a hã wa na: “Li nɛ sɔ̃́ tɛ ina hana mapa 'da Ofariziɛnɔ do Osadisiɛnɔ.”

⁷ Nɛ owi yambala mɛnɔ wa ma ngɔ tɔ̃ dɛ sanga wa na: “A tɔ̃ ní, we kɛ lɛ kàlà mapa gɔ.”

⁸ Nɛ Yezu zila kɛ wa tɛ tɔ̃ nɛ ni, nɛ a aka wa na: “Aa nɛ, owinɔ kɛ kɔ̃a we 'da nɛ gã̀ gɔɛ gɛ, gulu kɛ nɛ lengge na, mi tɔ̃a ni we kɛ lɛ zɔlɔ mapa ni we ge nde?

⁹ Nɛ tɛ ĩ̀ gulu we gɛ gɔ nde? Ta zu nɛ ila ngɔ kɛ mi gbini zi sanga mapa mɔlɔ, we winɔ kote mɔlɛ ni nde? Nɛ nɛ ngɛmɛ zi tala kɛ ma 'bana ni, nɛ ma dunu zi sanggi nɛ nde?

¹⁰ Nɛ ta zu nɛ 'bànà 'bɔ ngɔ kɛ mi gbini zi sanga mapa sambo, we winɔ kote nalɛ ni gɔ nde? Nɛ nɛ ngɛmɛ zi tala kɛ ma 'bana ni, nɛ ma dunu zi sanggi nɛ nde?

¹¹ Kɔdɛ kɛ nɛ ĩ̀ na, we mi tɔ̃ hã nɛ gɛ, mɛ a we mapa gɔ ni nɛ nde? Mi tɔ̃ hã nɛ na, li nɛ sɔ̃́ we ina hana mapa 'da Ofariziɛnɔ do Osadisiɛnɔ.”

¹² Nɛ do 'da fala ni, nɛ owi yambala mɛnɔ wa ĩ wá na, a tɔ̃̀ hã lo a we ina kɛ wa dɛ ma do mapa ni gɔ, nɛ nde a tɔ̃ na, li lo sɔ̃ we bia wenɔ 'da Ofariziɛnɔ do Osadisiɛnɔ.

Petro tɔ̃a na Yezu a Mɛsiya

¹³ Mbe ngba soe kpo, nɛ Yezu nɛa ngɔ nùi kɛ zã le Sezare Filipɛ. Nɛ a aka owi yambala mɛnɔ 'da a na: “Winɔ wa tɔ̃ ngboo na, mi Be 'da Wele, mi a wio nde?”

¹⁴ Nɛ wa gisa hã a na: “Ombe winɔ wa tɔ̃ na, mɔ a Yoanɛ wi batisa winɔ. Nɛ ombe wa na, mɔ a Elia. Nɛ ombe 'bɔ na, mɔ a Yeremi, tabi mbe sanga owi gba olo nu Gale zɛ́ dati gɛ.”

¹⁵ Nɛ Yezu aka 'bɔ wa na: “Ní a nɛ ngboo ni, nɛ lengge mɛ na, mi a wio nde?”

¹⁶ Nɛ Simɔ Petro gese na: “Mɔ a Mɛsiya, Be 'da Gale, wele kpasi.”

¹⁷ Nɛ Yezu tɔ̃ hã a na: “Simɔ, be 'da Yonasi, mɔ a wi yangga. We kɛ wi a wi nù hã a bè gbãlã we gɛ hã mɔ gɔ, nɛ nde wi a Baa mi, kɛ a li nza i ni, hã a bia ma hã mɔ.

¹⁸ Kɔ mi tɔ̃ hã mɔ na, ɔ nɛ kɛ li mɔ a Petro, nɛ gulu Petro na ta ni, mi dɛ sɛ Eklezia 'da mi dɛ ngɔ ta ni. Nɛ nde fio ngboo ni wé sɛ tɛ 'danga ma gɔ.

¹⁹ Mi hã sɛ fungula nu le nwa 'da Gale hã mɔ. Kɔ fala kɛ mɔ bɛ̃ gɛnɛ mɔ ngɔ nù gɛ, nɛ Gale a bɛ̃ sɛ tɛ mɛ 'bɔ gɛnɛ mɛ ni tɛ li nza i. Kɔ fala kɛ mɔ kɔ̃ gɛnɛ mɔ ngɔ nù gɛ, nɛ Gale a kɔ̃ sɛ tɛ mɛ 'bɔ gɛnɛ mɛ ni tɛ li nza i.”

²⁰ 'Do nɛ, nɛ Yezu bɛ̃a hã Owi yambala mɛnɔ 'da a nganda wena na, wa tɛ tɔ̃̀ we nɛ hã wele na, ɛ a Mɛsiya ni gɔ.

Yezu tɔ̃a we fie do za'da nza kɔ fie 'da a

²¹ Yolo do 'da fala ni, nɛ Yezu ma ngɔ tɔ̃ hã owi yambala mɛnɔ 'da a dɛ nza na: “Ma wia na, mi nɛ Yeruzalɛmɛ i. Mi hɔ i mɔ, nɛ okumunɔ, do onwa nganganɔ, do owi be mbulanɔ wa hã sɛ zɛlɛ tɛ hã mi wena, nɛ wa gbɛ sɛ mi. Kɔ ma hɔ tɛ talɛ tũi, nɛ mi za'da sɛ nza kɔ fio.”

²² Nɛ Petro sa mɔ hã a dɛ nu ngbaka, nɛ a ma ngɔ dãlã dɛ tɛ̃ a na: “Nwa, e kɔ Gale zɔ mɔ tɛ mɔ! Dɔ mɔ ɔ ni dɛ́ mɔ gɔ.”

²³ Nɛ Yezu siki tɛ̃ ɛ, nɛ a tɔ̃ hã Petro na: “Fó tɛ mɔ li mi do'do, Satana! Mɔ fa we fi mi li wala dɛ 'dã mɔ, we kɛ linggamɔ zu mɔ mɛ a linggamɛ 'da Gale gɔ, mɛ a linggamɔ mɔ́ wele iko.”

²⁴ 'Do nɛ, nɛ Yezu tɔ̃ hã owi yambala mɛnɔ 'da a na: “Fala kɛ wele kɔ̃ we hɔ wi 'da mi, nɛ ma wia na, a bɛ̃ gɛnɛ kili tɛ̃ a wele nɛ, nɛ a ba tole finda te 'da a, nɛ a tɛ 'do mi.

²⁵ Mba gɔ, wi kɛ a fa we kpasa kili tɛ̃ a, nɛ a fe sɛ. Nɛ wi kɛ a la kili tɛ̃ a na ma fe we mi ni, nɛ a kpasa sɛ.

²⁶ Mba gɔ, mɔ olo kɛ na wele yɔ kpasi kɛ ma é gɔ ni, takɔ a ba nùi gɛ vɛ̃ do mɔ́ a ni a ge nde? Mɛ kɛ wele wia tɛ gɔnɔ do zu kpasi 'da ɛ ni a ge nde?

²⁷ Mi Be 'da Wele, mi tɛ sɛ do dɔ̃lɔ̃ li 'da Baa mi, fala nɛ kpo do oanzɛnɔ. Nɛ mi futa sɛ wele do wele we do dɛa mɔ tɛ̃ a.

²⁸ Mi tɔ̃ hã nɛ do gbãlã we na, ombe winɔ sanga nɛ gɛ wa fé sɛ do ti gɔ, wa zɔ sɛ mi Be 'da Wele tɛ tɛ we dungu nwa ngɔ winɔ ni do'do sɛ nɛ de.”