MATIE 15 - WE NU GALE 1995

Ofariziɛnɔ do wi be mbulanɔ wa a wi ɔlɔ wi

¹ Mbe ngba soe kpo, nɛ Ofariziɛnɔ do owi be mbulanɔ kɛ wa yula Yeruzalɛmɛ i ni, wa tɛa 'da Yezu, nɛ wa aka a na:

² “Gulu kɛ Owi yambala mɛnɔ 'da mɔ, wa dɛ́ mbula 'da oyaa lɛ gɔ we ge nde? Mba gɔ, fala kɛ wa nɛ nyɔngɔ mɔ, nɛ nde wa fɔ́lɔ́ kɔ̃ wa ɔ nɛ kɛ mbula 'da oyaa lɛ tɔ̃a ni gɔ.”

³ Nɛ Yezu gese hã wa na: “Nɛ nɛ, gulu kɛ nɛ dɛ́ mbula 'da Gale gɔ, nɛ nɛ dɛ tati a kɛ 'da oyaa nɛ iko ni we ge nde?

⁴ Mba gɔ, Gale tɔ̃a na: ‘Mɔ dɔ́nggɔ́ baa mɔ do naa mɔ.’ Nɛ a tɔ̃ 'bɔ na: ‘Kɔ fala kɛ wele tɔ̃ 'dã nu we hã baa a, tabi hã naa a nde, nɛ ma wia na, wa gbɛ wi ni do'do.’

⁵ Kɔ nɛ, nɛ tɛ be hã winɔ na, fala kɛ wele tɔ̃ hã baa a tabi hã naa a na: ‘Mɛ sɔ mi wia we gala do nɛ ni ni, mi ia ma hã Gale,’

⁶ nɛ ma hã wala hã wi ni na, a tɛ gàlà baa a, tabi naa a gɔ. Nɛ dɛ na mɛ ni, nɛ nde nɛ 'danga we nu Gale we dɛ tati a mbulanɔ 'da nɛ iko!

⁷ Nɛ, owi ɔlɔ winɔ gɛ, Ezai tɔ̃a zɛ́ olo nu Gale ngɔ nɛ do gbãlã we na:

⁸ ‘Winɔ gɛ wa dɔnggɔ mi do nu wa iko, nɛ nde sila wa ngɔ mi bina.

⁹ Dɔngga wi wa dɔnggɔ do mi gɛ, ma yala iko, we duzu kɛ mbulanɔ wa be ma ni, mɛ a kɛ Owele wa ia ni iko, nɛ wa tɔ̃ na, mɛ a mbulanɔ 'da mi Gale.’”

Mɛnɔ kɛ ma wia we 'danga wele ni

¹⁰ Do nɛ, nɛ Yezu sa mɔ hã ogba gili winɔ, nɛ a tɔ̃ hã wa na: “Nɛ vɛ̃, nɛ zélé mi sɛ!

¹¹ Nɛ ĩ́ na, mɔ kɛ wele nyɔngɔ, nɛ ma le dɛ kɔ zã a ni, ma wè tɛ 'danga kɔ sila a gɔ. Nɛ nde mɛ a linggamɔ kɔ zã wele, kɛ ma hɔ do nu a ni, sɛ nɛ ma 'danga sila a de.”

¹² Nɛ owi yambala mɛnɔ wa tɛa, nɛ wa aka Yezu na: “Mɔ ĩ̀ na, wenɔ mɔ tɔ̃a ni, ma zɛlɛ Ofariziɛnɔ wena ni gɔ nde?”

¹³ Nɛ a gisa hã wa na: “Kpalɛnɔ vɛ̃ kɛ Baa mi li nza i, a mì ma gɔ ni, wa zu'du sɛ ma do'do.

¹⁴ Kɔ nɛ lá wa ní, we duzu kɛ wa ɔ nɛ wi ba li kɛ a ba te ti ngba a wi lɔa li ni! Hã fala kɛ wi lɔa li ba te ti ngba a wi lɔa li, nɛ wa bɔa nɛ, wa ala sɛ kɔ kɔ̃.”

¹⁵ Nɛ Petro tɔ̃ hã a na: “Mɔ tɔ̃́ gulu gba we ni hã lɛ.”

¹⁶ Nɛ Yezu gisa hã a na: “Nɛ tɛ mɛ 'bɔ, nɛ tɛ ĩ̀ ti gulu wenɔ mi tɔ̃a ni gɔ nde?

¹⁷ Nɛ ĩ̀ na, mɔ kɛ ma le kɔ nu wele, nɛ ma la dɛ kɔ zã a, nɛ 'do nɛ, nɛ a sɔ̃ ma iko ni gɔ nde?

¹⁸ Nɛ nde mɛ a linggamɔ kɔ zã wele, kɛ ma hɔ do nu a ni, sɛ nɛ ma 'danga kɔ sila a de.

¹⁹ Mba gɔ, 'dã linggamɔ yolo kɔ zã wele, sɛ nɛ ma tombo a we gbɛ wi, ɔ do kɛnɛ ngba a tabi wili mɔ́ ngba a, yɛnggɛ vĩ zu yali, zũ mɔ, 'bili bɛlɛ do zu li wele, do dã dɛla de.

²⁰ Nɛ zɔ́, mɛnɔ ma 'danga wele gɛ a ni! Nɛ nde gɛnɛ kɔ wele fɔ̃lɔ̃ kɔ̃ a dati nyɔngɔ mɔ ɔ nɛ kɛ mbula tɔ̃a ni gɔ, nɛ ma wè tɛ 'danga a gɔ.”

Mbe wuko kpo kɛ a a Yuda gɔ ni tɛa 'da Yezu

²¹ Nɛ Yezu yula di ni, nɛ a la dɛ kɛ zã le Tirɛ do Sidoni.

²² Nɛ mbe wuko kpo zi di ni, a a Yuda gɔ, a a boko Kanana. A tɛa, nɛ a he mɔ na: “Nwa, Be 'da Davidi, mɔ ĩ́ 'bako hã mi! Boko be 'da mi do 'dã hi wi kɔ a, nɛ a zɔ ngamɔ wena!”

²³ Nɛ Yezu gèsè we kpo hã a gɔ. Nɛ owi yambala mɛnɔ 'da Yezu wa tɛa, nɛ wa tɔ̃ hã a na, a gésé wuke ni, we kɛ a he mɔ tɛ tɛ do 'do lo fai iko ni.

²⁴ Nɛ Yezu gese hã wa na: “Gale tumba mi tati nɛ hã wanɔ sanga obe Israɛlɛ, kɛ wa ɔ nɛ obatanɔ kɛ wa yɔa ni iko!”

²⁵ Nɛ wuke ni tɛ 'bɔ, nɛ a gu nù ti Yezu, nɛ a tɔ̃ na: “Nwa, mɔ gálá mi!”

²⁶ Nɛ Yezu gisa hã a na: “Ma wè na, wele ba nyɔngɔmɔ mɔ́ be, nɛ a hã ma hã otolo gɔ.”

²⁷ Nɛ wuke gisa tɛ mɛ 'bɔ hã a na: “Nwa, mɛ a gbãlã we! Gɛnɛ kɔ na mɛ ni, nɛ nde otolonɔ wa wia tɛ nyɔngɔ bi 'bulu nyɔngɔmɛnɔ kɛ ma ala kɔ̃ Owele wa ni.”

²⁸ Nɛ Yezu gisa hã a na: “Ee wuke gɛ, kɔ̃a we 'da mɔ gã wena! E kɔ ma dɛ tɛ̃ ɛ hã mɔ, ɔ nɛ kɛ mɔ kɔ̃a ni.” Nɛ do kpo 'da fala ni, nɛ boko be 'da wuke ni kpasa.

Yezu kpasa ogba gili wi zɛlɛ

²⁹ Yezu yula di ni, nɛ a la dɛ nu lì Galile. Nɛ a kũ dɛ ngɔ kala kpo, nɛ a dungu nù.

³⁰ Nɛ ogba gili wele wa tɛa do owi nɛa kũ, owi lɔa li, owi kala nyanga, do owi lɔnda nu, do ogele wi kunda tɛ̃ ɛ do tɛ̃ ɛ, nɛ wa a wa dɛ dati Yezu, nɛ a kpasa wa.

³¹ Nɛ owinɔ wa nɛa we zɔ owi lɔnda nunɔ tɛ wele we, do Owi kala nyanganɔ wa tɛ nɛ nɔ, nɛ nyanga owi nɛa kunɔ bɔla, nɛ owi lɔa linɔ te zɔ mɔ ni, nɛ wa ɔngbɔ do ma wena, nɛ wa ma ngɔ dɔnggɔ Gale 'da obe Israɛlɛ.

Yezu hã nyɔngɔmɔ hã owele koto nalɛ

³² Yezu sa mɔ hã owi yambala mɛnɔ 'da a, nɛ a tɔ̃ hã wa na: “'Bako ba li mi dɛ tɛ owinɔ gɛ wena, we kɛ lɛ ɔa do wa tũ talɛ vɛ̃, nɛ nyɔngɔmɔ ia kɔ̃ wa do'do. Kɔ ma wè na mi gese wa do wɔ na mɛ ni gɔ, ní gɔ, nɛ wa ala sɛ wɛ dɛ li wala gɛ.”

³³ Nɛ owi yambala mɛnɔ wa aka na: “Lɛ nɛ dɛ fala kpa nyɔngɔmɔ dɛ li zɔ̃ɛ gɛ, we hã hã gba gili Owele ɔ na mɛ gɛ ni nɛ nde?”

³⁴ Nɛ Yezu aka wa na: “Nɛ do mapa nɛ nde?” Nɛ wa gese hã a na: “Lɛ do gbãlã mapa sambo, do obe kɔyɔ sĩ.”

³⁵ Nɛ a tɔ̃ hã gba gili owinɔ ni na, wa dungu nù. Nɛ winɔ wa dungu nù vɛ̃.

³⁶ Nɛ a kala mapanɔ sambo ni, do kɔyɔnɔ, nɛ a hã iɔ̃nae hã Gale, nɛ a gbini sanga nɛ, nɛ a hã ma hã owi yambala mɛnɔ 'da a na, wa kɛ̃ hã gba gili owinɔ ni. Nɛ wa kɛ̃a,

³⁷ nɛ wele do wele nyɔnga, nɛ zã a hɛ̃a. Nɛ owi yambala mɛnɔ wa ngɛma tala kɛ ma 'bana ni, nɛ ma dunu sanggi sambo.

³⁸ Ĩ na, winɔ wa nyɔnga zi mɛ ni, wa zi a Owi wili koto nalɛ, nɛ wa tɔ̀lɔ̀ owukonɔ do benɔ gɔ.

³⁹ Wa nyɔngɔ mɛ ia do'do, nɛ Yezu gese wa na, wa si. Nɛ a kũ kɔ ga, nɛ a la dɛ ngɔ nù Magadanɛ.