MATIE 14 - WE NU GALE 1995

Fie 'da Yoanɛ wi batisa winɔ

¹ Do 'da fala ni, nɛ Herodɛ, nwa ngɔ nù Galile zila wenɔ kɛ winɔ wa tɔ̃ ngɔ Yezu ni.

² Nɛ a tɔ̃ hã Owi dɛa tonɔ 'da a na: “Wi a Yoanɛ wi batisa winɔ, kɔ a za'da nza kɔ fio, ma kɛ a kpa ngawi we dɛ gba sɔ̃ mɛnɔ gɛ!”

^3-4 Ĩ na zi dati, nɛ Herodɛ ba Herodiadɛ, wuke 'da kpasa wi ti a Filipɛ kɔ̃ a do kɛnɛ ɛ. Nɛ Yoanɛ tɔ̃ hã Herodɛ na: “Mɔ wè do ba kɛnɛ nya mɔ gɔ.” Kɔ Herodɛ nɛa we zele ni, nɛ a hã nu a na, wa ba Yoanɛ. Nɛ wa ba a, nɛ wa ɛnzɛ a, nɛ wa fi a bɔlɔkɔ.

⁵ Herodɛ kɔ̃a zi na, ɛ gbɛ Yoanɛ, nɛ nde a dɛ zi kili Oyudanɔ wena, we kɛ wa zɔ zi Yoanɛ ɔ nɛ wi gba olo nu Gale ni.

⁶ Nɛ do ngba soe wa dɛa mɔ dɔ we tũ kula 'da Herodɛ ni, nɛ boko be 'da Herodiadɛ yɔa yɔla dati owinɔ kɛ Herodɛ sa mɔ hã wa ni. Nɛ yɔla ni de tɛ Herodɛ wena,

⁷ nɛ a kana tɛ̃ a na: “Mɛnɔ vɛ̃ mɔ nɛ gɔ kɔ̃ mi ni, mi hã sɛ ma hã mɔ.”

⁸ Nɛ naa boko be ni ia hã kɔ a, nɛ a nɛa, nɛ a tɔ̃ hã Herodɛ na: “Mɔ ha kpongbolo zu Yoanɛ wi batisa winɔ, dɛ kɔ kpangbala sani hã mi ngangga ni!”

⁹ Kɔ Herodɛ nɛa we zele ní, nɛ 'bako ba li a. Nɛ nde a wè 'bɔ tɛ bɛ̃ ma gɔ, we duzu kɛ a kana sɔ tɛ̃ a dɛ li ongba a ia.

¹⁰ Nɛ a tumba na, wa 'bili gɛlɛ Yoanɛ kɔ bɔlɔkɔ i.

¹¹ Nɛ wa tɛa do zu a dɛ kɔ kpangbala sani, nɛ a hã ma hã boko be ni, nɛ a la do ma hã naa a.

¹² Nɛ owi yambala mɛnɔ 'da Yoanɛ wa tɛa, nɛ wa ba wɔlɔ a, nɛ wa mi ma. Nɛ 'do nɛ, nɛ wa nɛa, nɛ wa tɔ̃ we nɛ hã Yezu.

Yezu hã nyɔngɔmɔ hã Owele koto mɔlɔ

¹³ Yezu nɛa we zele sako fie 'da Yoanɛ, nɛ a la fala ni do'do. Nɛ a kũ kɔ ga, nɛ a la dɛ fala kɛ fo wele tɛ nɛ bina ni. Nɛ ogba gili winɔ wa zila we nɛ, nɛ wa yula kɔ lenɔ, nɛ wa la 'dɔkɔlɔ Yezu tɛ ngbɛlɛ do ngu'du lì.

¹⁴ Kɔ Yezu nɛa we zĩlĩ kɔ ga ni, nɛ a zɔ gba gili winɔ ni, nɛ 'bako ba li a dɛ tɛ wa wena, nɛ a ma ngɔ kpasa owi zɛlɛnɔ 'da wa.

¹⁵ Kɔ wese ma ngɔ gɛ̃ nɛ, nɛ owi yambala mɛnɔ wa tɛa, nɛ wa tɔ̃ hã Yezu na: “Wese gɛ̃a ia, nɛ fo tɔa dɛ bina. Kɔ mɔ gésé ogba gili winɔ gɛ, kɔ wa la dɛ kɔ lenɔ i, hã wa oso nyɔngɔmɔ, hã wa nyɔngɔ.”

¹⁶ Nɛ Yezu gese hã wa na: “Wa wè tɛ la nɛ gɔ. Nɛ do tɛ nɛ, nɛ ha nyɔngɔmɔ hã wa!”

¹⁷ Nɛ wa gese hã a na: “Lɛ do gbãlã mapa mɔlɔ do kɔyɔ bɔa iko.”

¹⁸ Nɛ Yezu tɔ̃ hã wa na: “Nɛ tɛ́ do ma.”

¹⁹ Nɛ a tɔ̃ hã owinɔ na, wa dúngú nù dɛ ngɔ wɔkɔsɔnɔ. Nɛ winɔ wa dungu nù. Nɛ Yezu kala mapanɔ mɔlɛ, do kɔyɔnɔ bɔa ni dɛ kɔ̃ ɛ, nɛ a ba li a ngɔ, nɛ a sambala Gale, nɛ a gbini sanga mapa, nɛ a hã ma hã owi yambala mɛnɔ na, wa kɛ̃ dɛ kɔ̃ gba gili winɔ ni.

²⁰ Nɛ wa vɛ̃ wa nyɔnga, nɛ zã wa hɛ̃a. Nɛ owi yambala mɛnɔ wa ngɛma tala nɛ, nɛ ma dunu sanggi 'bu ngɔ nɛ bɔa.

²¹ Ĩ na, winɔ vɛ̃ kɛ wa nyɔngɔ mɛ ni, wa zi a owi wili koto mɔlɔ. Nɛ wa tɔ̀lɔ̀ zi owukonɔ do benɔ gɔ.

Yezu la ngɔ lì do nyanga ɛ

²² 'Do nɛ, nɛ Yezu tɔ̃ a hã owi yambala mɛnɔ 'da a na, wa kũ kɔ ga, kɔ wa la dati dɛ kulu gba ndɔɛ i. Nɛ a 'bana we gese winɔ.

²³ A pɛsa wa do'do, nɛ a kũ mbe kala kpo we wele we nu ngba a do Gale. Kɔ fala ma ngɔ dɛ mbĩi, nɛ nde a zi i mɔ zu a kpo iko.

²⁴ Do 'da fala ni, nɛ nde owi yambala mɛnɔ wa tɛ kɔ̀lɔ̀ do nu kolo lì gɔ, nɛ ngele lì ma ngɔ ba ga, we kɛ bũ tɛ zi dɛ ngu'du wa nga nganda wena.

²⁵ Kɔ kuti kɔlanɔ wa nɛa we he mɔ, nɛ Yezu la ngɔ lì do nyanga e we nɛ dɛ 'da wa i.

²⁶ Kɔ wa nɛa we zɔ a tɛ la do ngɔ lì, nɛ zu wa hɔa hau, nɛ wa na: “Mɛ a bɔzɔ wi!” Nɛ kili ba wa, nɛ wa ma ngɔ he mɔ.

²⁷ Nɛ do ti, nɛ Yezu tɔ̃ hã wa na: “Nɛ kpala sila nɛ, nɛ tɛ dɛ kili gɔ, wi a mi!”

²⁸ Nɛ Petro tɔ̃ hã a na: “Nwa, wi a mɔ kpaa nde, nɛ mɔ tɔ̃ hã mi, kɔ mi nɛ do ngɔ lì dɛ 'da mɔ i.”

²⁹ Nɛ Yezu gese hã a na: “Mɔ tɛ́!” Nɛ Petro zĩlĩ kɔ ga, nɛ a ma ngɔ la do ngɔ lì dɛ 'da Yezu i.

³⁰ Kɔ a nɛa we zɔ kɛ bũi fi nɛ ge nde ni, nɛ kili ba a, nɛ a ma ngɔ si ti lì, nɛ a he mɔ na: “Nwa, mɔ kpásá mi!”

³¹ Nɛ Yezu Efa kɔ̃ ɛ dɔ̃, nɛ a 'be nu kɔ̃ Petro, nɛ a tɔ̃ hã a na: “Aa mɔ, kɛ kɔ̃a we 'da mɔ ma gà gɔɛ gɛ, gulu kɛ mɔ do kafi we ge nde?”

³² Nɛ wa kũ bɔa nɛ dɛ kɔ ga, nɛ ngɔ tɛ bũi gɛ̃a.

³³ Nɛ owi yambala mɛnɔ sɔ kɔ ga ni, wa gu nù ti Yezu, nɛ wa tɔ̃ hã a na: “Gbãlã we, mɔ a Be 'da Gale!”

Yezu hɔa ngɔ nù Genezarɛtɛ

³⁴ Nɛ wa kũ gba ndɔɛ, nɛ wa hɔ ngɔ nù Genezarɛtɛ.

³⁵ Wa nɛa we hɔ nza, nɛ owinɔ fala ni wa ĩ ti Yezu, nɛ wa ma ngɔ yɛ'bɛ sako hɔa 'da a falanɔ vɛ̃. Nɛ owinɔ wa tɛa do owi zɛlɛnɔ di ni vɛ̃ hã a.

³⁶ Nɛ wa ma ngɔ ala nu wa hã a na, a e lo, kɔ lo 'be mbamba nu tulu tɛ̃ a iko, kɔ lo kpasa. Nɛ wi zɛlɛnɔ vɛ̃ kɛ wa 'bia zi nu tulu tɛ̃ a ni, wa kpasa.